Daily Murli for Sunday 11 June 2023

11-06-23 praatahmurli om shanti ''avyakt-baapdaada'' revise 09-01-95 madhuban

nishchaybuddhi ki nishaaniyaan - nishchit vijayi aur sada nishchinta sthiti ka anubhav

aaj sarva bachchon ke rakshak aur shikshak baapdaada apne sabhi brahman bachchon ke foundation ko dekh rahe the। ye to sabhi jaante ho ki vartamaan shreshtha jeevan ka foundation nishchay hai। jitna nishchay roopi foundation pakka hai utna hi aadi se ab tak sahaj yogi, nirmal svabhaav, shubh bhaavna ki vritti aur aatmik drishti sada natural roop mein anubhav hoti hai। har samay chalan aur chehre se unki jhalak anubhav hoti hai kyonki brahman jeevan mein sirf jaanna nahin hai ki ‘main ye hoon aur baap ye hai', lekin jaanne ka arth hai jo jaante hain vo maanna aur chalna।

baapdaada dekh rahe the ki jo bhi bachche apne ko brahman kahlaate hain vo sabhi ye falak se kehte hain ki ham nishchaybuddhi hain। to baap-daada sabhi nishchaybuddhi bachchon se poochhte hain, jab aap sabhi kehte ho ki ham nishchaybuddhi vijayi hain to kabhi vijay, kabhi haar kyon hoti hai? jab kabhi-kabhi thodi halchal hoti hai to kya us samay nishchay khatma ho jaata hai? jab nishchaybuddhi sada ho to vijayi sada ho? ki beech-beech mein ghutka aur jhutka hota hai? nishchay ka foundation chaaron or se majboot hai ya chaaron or ke bajaay kabhi ek or kabhi do or dheele ho jaate hain? koi bhi cheej ko majboot kiya jaata hai to chaaron or se tight kiya jaata hai na। agar ek side bhi thoda-sa halchal vaala ho to hilega na! to chaaron prakaar ka nishchay arthaat baap mein, aap mein, drama mein aur brahman parivaar mein nishchay। ye chaar hi taraph ke nishchay ko jaanna nahin lekin maankar chalna। agar jaante hain lekin chalte nahin hain to vijay dagmag hoti hai। jis samay vijay halchal mein aati hai, to check karna ki chaaron taraph se kaun-sa taraph hal-chal mein hai? baapdaada dekhte hain ki kai bachchon ko baap mein poora nishchay hai, ismen paas hain lekin apne aapmen jo nishchay chaahiye usmein antar pad jaata hai। jaante bhi hain, kehte bhi hain ki main ye hoon, main ye hoon, lekin jo jaante hain, maante hain vo swaroop mein, chalan mein, karma mein ho - ismen hi antar pad jaata hai। ek taraph sochte hain ki main master sarvashaktimaan hoon, vishwa kalyaankaari hoon, doosre taraph chhoti-si paristhiti par vijay nahin praapta kar sakte। hain to master sarvashaktimaan lekin ye paristhiti bahut badi hai, ye baat hi aisi hai! to kya ye nishchay hai ki sirf jaanna hai lekin maankar chalna nahin? kehte va sochte hain ki main vishwa kalyaankaari hoon lekin vishwa ko to chhodo, sva kalyaan mein bhi kamjor hote hain। agar us samay unhein kaho ki kya svayan ko parivartan kar sva kalyaankaari nahin ban sakte? to javaab dete hain ki hain to vishwa kalyaankaari lekin sva kalyaan bahut mushkil hai! ye baat badalna mushkil hai! to vishwa kalyaankaari kahenge ya kamjor? to sva mein bhi paristhiti pramaan, samay pramaan, sambandh-samparka pramaan nishchay swaroop mein aaye, aise nishchay buddhi ki vijay hui hi padi hai। jaise sabhi ko ye pakka nishchay hai ki main shreshtha aatma hoon, iske liye koi duniya ke vaigyaanik bhi aapko hilaane ki koshish karen ki aatma nahin shareer ho, to maanenge nahin aur hi usko manaayenge। to jaise ye pakka hai ki main shareer nahin hoon, main aatma hoon aur kaun-si aatma hoon, ye bhi pakka hai, aise nishchaybuddhi ki vijay bhi itni nishchit hai। haar asambhav hai aur vijay nishchit hai। aur ye bhi nishchit hai ki baaten bhi ant tak aani hain। lekin usmein vijayi banne ke liye ek hi samay par chaaron hi taraph ka nishchay pakka chaahiye। teen mein nishchay hai aur ek mein nahin hai to vijay nishchit nahin hai lekin mehnat se vijay hogi। nishchit vijay vaale ko mehnat nahin karni padegi। kai baar kai kehte hain baapdaada to bahut achha, vo to pakka hai ki baap hai aur ham bachche hain, hamaara baap se hi sambandh hai lekin daivi parivaar mein khitkhit hoti hai, usmein nishchay dagmag ho jaata hai iseeliye parivaar ko chhod dete hain, halka kar dete hain। to ek side dheela ho gaya na। bina parivaar ke maala mein kaise aayenge? maala kab banti hai? jab daana daane se milta hai aur ek hi dhaage mein piroye hue hote hain। agar alag-alag dhaage mein alag-alag daana ho to usko maala nahin kahenge। to parivaar hai maala। agar parivaar ko chhodkar teen nishchay pakke hain to bhi vijay nishchit nahin hai। chalo parivaar ki khitkhit se kinaara kar lo, baap ka sahaara ho, parivaar ka kinaara ho, to chalega? kaam to baap se hai ya bhaaiyon se hai? baap se kaam hai, varsa baap se milna hai, bhaai-bahnon se kya milega? lekin brahman jeevan mein yahi nyaaraapan hai ki dharma aur raajya donon ki sthaapna hoti hai, sirf dharma ki nahin। aur dharma pitaayen sirf dharma ki sthaapna karte hain, baap ki visheshta hai dharma aur raajya ki sthaapna karna। to raajya mein ek raaja kya karega? bahut achha takhta bhi ho, taaj bhi ho, kya karega? raajdhaani bhi chaahiye na? to raajdhaani arthaat brahman parivaar so raaj parivaar isliye brahman parivaar mein har paristhiti mein nishchaybuddhi, tab raajya-bhaagya mein bhi sada raajya adhikaari honge। to aise nahin samajhna - koi baat nahin, parivaar se nahin banti hai, baap se to banti hai! drama agar bhool jaata hai to baap to yaad rehta hi hai! lekin koi bhi kamjori ek hi samay par hoti hai, sva sthiti arthaat sva-nishchay bhi agar kamjor hota hai to vijay nishchit ke bajaay halchal mein aa jaati hai। to baapdaada nishchay ke foundation ko check kar rahe the। kya dekha?

sada chaar hi prakaar ka nishchay ek samay par saath nahin rehta, kabhi rehta kabhi hilta isliye sada vijayi ka anubhav nahin kar paate hain। phir sochte hain - hona to ye chaahiye lekin pata nahin kyon nahin hua? kiya to bahut mehnat, socha to bahut achha… lekin sochna aur hona ismen antar pad jaata hai। iska arth hi hai ki nishchay ke chaaron taraph majboot nahin hain। aur hansi ki baat to ye hai ki drama bhi kah rahe hain, hai to drama, hai to drama... lekin achhi tarah se hil bhi rahe hain। kabhi sankalp mein hilte, kabhi bol tak bhi hil jaate, kabhi karma tak bhi aa jaate। us samay kya lagta hoga, drishya saamne laao, drama-drama bhi kah rahe hain aur hildul bhi rahe hain! lekin nishchaybuddhi ki nishaani hai nishchit vijayi। agar vidhi theek hai to siddhi praapta na ho, ye ho nahin sakta। to jab bhi koi bhi kaarya mein vijay praapta nahin hoti hai to samajh lo ki nishchay ki kami hai। chaaron or check karo, ek or nahin।

aur baat, nishchaybuddhi ki nishaani jaise nishchit vijay hai vaise nishchinta honge। koi bhi vyartha chintan aa hi nahin sakta। sivaae shubh chintan ke vyartha ka naam-nishaan nahin hoga। aise nahin, vyartha aaya, bhagaaya। nishchaybuddhi ke aage vyartha aa nahin sakta kyonki kyon, kya, aur kaise - ye vyartha hota hai। jab drama ke raaz ko jaante hain, aadi-madhya-ant ko jaanne vaale hain to jo drama ke aadi-madhya-ant ko jaanne vaale hain vo chhoti-si baat ke aadi-madhya-ant ko nahin jaan sakte! na jaanne ke kaaran kyon, kya, kaise, aise - ye vyartha sankalp chalte hain। agar drama mein atal nishchay hai, knowledgeful bhi hain, powerful bhi hain to vyartha sankalp hilaane ki himmat bhi nahin rakh sakte। parantu jab hilte hain to sochte hain pata nahin kya ho gaya! to baapdaada hansate hain ki drama ke aadi-madhya-ant ko jaan liya, apne 84 janma ko jaan liya aur ek baat ko nahin jaante! bade hoshiyaar ho! hoshiyaari dikhaate ho na samay prati samay! kalpa vriksha ke sabhi patton ko jaante ho ki nahin? sabhi vriksha ke foundation mein baithe ho? ya 7-8 baithe hain? to jad mein baithe hue vriksha ko jaante ho? patte-patte ko jaante ho aur ye pata nahin kaise? to nishchay ki nishaaniyaan nishchinta sthiti, iska anubhav karo। hoga, nahin hoga, kya hoga, kar to rahe hain, dekhen kya hota hai - isko nishchinta nahin kahenge। aur phir baap ke aage hi phariyaad karte hain - aap madadgaar ho na, aap rakshak ho na, aap ye ho na, aap ye ho na...। phariyaad karna arthaat adhikaar ganvaana। adhikaari phariyaad nahin karenge - ye kar lo na, ye ho jaaye na। to nishchaybuddhi arthaat nishchinta। to ye practical nishaaniyaan apne aapmen check karo। aise albele nahin rah jaana - ham to hain hi nishchaybuddhi। kaun-sa nishchay kamjor hai vo check karo aur change karo। sirf check nahin karna। baapdaada ne kaha tha na checker ke saath maker bhi ho। sirf checker nahin। check karne ka arth hi hai second mein change hona। lekin check karo aur change nahin karo to bahut kaal se svayan mein dilshikasta ke sanskaar pakke hote jaayenge aur jo bahutkaal ke sanskaar hain vahi ant mein avashya saamna karte rahenge। koi soche ant mein to main sivaae baap ke aur kuchh nahin sochoonga। lekin ho nahin sakta। bahutkaal ka abhyaas chaahiye। nahin to ek second sochenge - shivbaaba shivbaaba shivbaaba... aur doosre second maaya kahegi - nahin, tumhaare mein shakti nahin hai, tum ho hi kamjor, to yuddha chalti rahegi। yadi nishchinta nahin honge to brahman jeevan ke antakaal ka jo lakshya varnan karte ho vo sahaj kaise hoga! aur agar ant tak ye vyartha sankalp honge to vahi bhooton ke, yamdooton ke roop mein aayenge। aur koi yamdoot nahin aate hain, ye vyartha sankalp apni kamjoriyaan, yahi yamdoot ke roop mein aate hain। yamdoot kya karte hain? daraate hain। aur doosron ke liye kahenge vimaan mein jaayenge arthaat udti kala se paar ho jaayenge। koi vimaan aadi nahin hain lekin udti kala ka anubhav hai। isliye pahle se hi check karke change karo। kab tak karenge? baapdaada ko khush to kar dete hain - karenge, pratigya bhi likh dete hain lekin vo kaagaz tak rehti hain ya jeevan tak?

achha, aaj madhuban nivaasiyon ka bhi tarna hai। madhuban vaalon se to vishesh baapdaada ka sneh hai। sabse hai lekin phir bhi thoda-sa vishesh madhuban nivaasiyon se hai kyonki nimitta hain। phir bhi dekho aap aate hain, khaatiri to theek karte hain na। madhuban vaale khaatiri karne mein paas hai na। mehmaan-nivaaji karna hi mahaanta hai। jisko mehmaan-nivaaji karna aata hai, vo mahaan ho hi jaata hai। sirf khaane-peene se nahin lekin dil ke sneh ki mehmaan-nivaaji, vo sabse shreshtha hai। chaahe picnic kitni bhi kara lo lekin dil ka sneh nahin mila to kahenge kuchh nahin mila। to madhuban vaale dil ke sneh sahit mehmaan-nivaaji karte hain। karte ho na ki koi neeche-oopar karenge to kahenge baapdaada ne aise hi kaha? aise nahin karna। sneh ke saagar ke bachche ho na, kab tak sneh denge? nahin। gaagar ke bachche nahin, saagar ke bachche, behad।

sabke paas sneh ka stock hai na? maataaon ke paas bhi hai, kumaariyon ke paas bhi hai, paandavon ke paas bhi hai। saagar hai ya thoda hai? to kabhi krodh to nahin karte honge na? jab sneh ke saagar hain to krodh kahaan se aaya? kiske sanskaaron ko jaankar satisfy karte ho na। chaahe vo wrong hai lekin aap to knowledgeful ho na, aap to jaante ho na ki ye kya hai lekin us samay kya kehte hain - isne aise kiya na, iseeliye hamne bhi kiya। wrong se wrong ho gaya to kya kamaal ki? usne wrong kiya aur aapne uska respond bhi wrong hi diya! kai kehte hain na krodh ek baari karte hain to kuchh nahin hota, baar-baar karta rehta hai! to jaante ho ki jiska svabhaav hi krodh ka hai to vo krodh nahin karega to kya karega! uska kaam hai krodh karna aur aapka kaam hai sneh dena ya krodh karna? vo 10 baari kare to aap ek baari to javaab denge na? nahin denge to vo 20 baari karega! phir kya karenge? to itni sahanshakti hai? ya usne 10 kiya, aapne aadha kiya koi harja nahin? usne jhooth bola, aapne krodh kiya, to kya theek hua? phir bade bahaaduri se kehte hain - jhooth bola na, iseeliye krodh aa gaya। lekin jhooth bolna to achha nahin laga aur krodh karna achha hai! to sneh ke saagar ke master sneh ke saagar। master sneh ke saagar ke nayan, chain, vritti, drishti mein zara bhi aur koi bhaav nahin aa sakta। yadi thoda-thoda josh aa gaya to kya usko sneh ka saagar kahenge? ki lota hai? chaahe kuchh bhi ho jaaye, saari duniya kyon nahin aap par krodh kare lekin master sneh ke saagar duniya ki parvaah nahin karenge। beparvaah baadshaah ho। jo parvaah thi vo pa liya। abhi in vyartha baaton se beparvaah baadshaah। checking ki parvaah karo, change hone ki parvaah karo, lekin vyartha mein beparvaah। kar sakte ho ki bachcha, potra, dhotra, dhotri... thoda-sa krodh karega, thoda-sa neeche-oopar karega, to sneh ke bajaay aur bhaavna bhi aa jaayegi? daphtar mein jaayenge, business mein jaayenge, naukar aisa mil jaayega, vaayumandal aisa mil jaayega... lekin vyartha se beparvaah baadshaah। samartha mein beparvaah nahin hona। kai ulta bhi utha lete hain, jahaan maryaada hogi vahaan kahenge baapdaada ne kaha na ki beparvaah baadshaah ban jaao। lekin maryaadaaon mein beparvaah nahin। aapka title hai maryaada purushottam। ye maryaadaayen hi brahman jeevan ke kadam hain। agar kadam par kadam nahin rakha to manzil kaise milegi? brahma baap ke kadam par kadam rakho। to ye maryaadaayen hi kadam hain। agar is kadam mein thoda bhi neeche-oopar hote ho to manzil se door ho jaate ho aur phir mehnat karni padti hai। aur baapdaada ko bachchon ki mehnat achhi nahin lagti, kehte hain sahaj yogi aur karte hain mehnat। to achha lagta hai kya? achha। (baapdaada ne drill karaai)

chaaron or ke sarva nishchaybuddhi shreshtha aatmaayen, sada nishchit vijayi aatmaayen, sada nishchinta aatmaayen, sada shreshtha vidhi dvaara vriddhi karne ke nimitta banne vaali vishesh aatmaayen, sada ek baap ek bal ek bharose mein achal-adol rahne vaale sameep aatmaon ko baapdaada ka yaad-pyaar aur namaste।

vardaan:- dil ke sneh aur sambandh ke aadhaar par sameepta ka anubhav karne vaale nirantar yogi bhav

brahman aatmaon mein koi dil ke sneh, sambandh se yaad karte hain aur koi dimaag arthaat knowledge ke aadhaar par sambandh ko anubhav karne ka baar-baar prayatna karte hain। jahaan dil ka sneh aur sambandh ati pyaara arthaat sameep hai vahaan yaad bhoolna mushkil hai। jaise shareer ke andar nas-nas mein blood samaaya hua hai aise aatma mein nish-pal arthaat har pal yaad samaai hui hai, isko kehte hain dil ke sneh sampanna nirantar yaad।

slogan:- nihsvaartha aur nirvikalp sthiti se seva karo tab saphalta milegi।