Daily Murli for Sunday 6 August 2023

06-08-23 praatahmurli om shanti ''avyakt-baapdaada'' revise 31-03-95 madhuban

parmaatma milan mele ki saugaat - taaj, takhta aur tilak

aaj behad ka baap behad mein sabhi bachchon ko dekh rahe hain। behad ka baap hai aur aap sabhi bhi behad ke maalik so baalak ho। baapdaada sabhi snehi sahayogi bachchon ko dekh harshit ho rahe hain aur bachche baap ko dekhkar harshit ho rahe hain। baap ko jyaada khushi hai va bachchon ko jyaada khushi hai - kya kahenge? donon ko! isko kaha jaata hai parmaatma milan mela। mele to bahut hote hi hain lekin parmaatma milan mela ek hi sangamayug par hota hai। saare kalpa mein nahin ho sakta hai। ab ho raha hai aur hoga। aap sabko bhi mela achha lag raha hai na! baapdaada to bachchon ke bhaagya ko dekh harshit hote hain aur dil mein geet gaate hain - vaah bachche vaah! jo bhaagya svapna mein bhi na tha, sankalp mein bhi nahin tha lekin ab saakaar mein shreshtha bhaagya anubhav kar rahe hain। har ek ke mastak par shreshtha bhaagya ki lakeer chamak rahi hai। sabhi chamakte hue sitaare ho na? apna ye shreshtha bhaagya smriti mein rehta hai na! kyon shreshtha bhaagya hai? kyonki bhaagya vidhaata dvaara aap bhaagyavaan aatmaon ka divya brahman janma hua hai। baap ko bhi bhaagya vidhaata kehte hain aur brahma ko bhi bhaagya vidhaata kehte hain। aur aap sabka janma baapdaada dvaara hua hai। to jiska baap svayan bhaagya vidhaata hai uska bhaagya kitna shreshtha hoga! parmaatma milan mana rahe ho na! (double foreigners se) ye bhi mana rahe hain! behad ke mele mein agar double videshi nahin hote to behad ka nahin kaha jaata। to aap logon ka bhi vishesh part hai, jo baap aur sarva bachche dekh-dekh harshit hote hain। bhaagya vidhaata dvaara janma hona - ye sabse number one bhaagya hai। saath-saath saare kalpa mein kisi bhi janma mein ek hi paramatma baap bhi bane, shikshak bhi bane, satguru bhi bane aur sarva sambandh bhi nibhaaye - aisa satayug se kaliyug tak kisko bhaagya mila hai? aur abhi aapko mila hai! abhi aap nishchay aur nashe se kehte ho ki hamaara paalanhaar param aatma hai। duniya vaale kahne maatra kehte hain ki paramatma hi paal raha hai lekin aap practical anubhav se kehte ho ki paramatma baap hai aur baap hi paalanhaar hai, paalna kar rahe hain! nasha hai na ya thoda-thoda bhool jaate ho? chalte-chalte apne shreshtha bhaagya ko saadhaaran samajh lete ho, hai shreshtha lekin samajh saadhaaran lete ho। isliye jo nasha aur khushi ki jhalak sada honi chaahiye, woh nahin rehti। vaise ek second bhi bhool nahin sakte lekin common samajh lete ho ki baap mil gaya, hamaara ho gaya, ham bhi baap ke ho gaye… jab hamaara hai to nasha (fakhur) hona chaahiye na? lekin kabhi ooncha to kabhi madhyam, kabhi saadhaaran ho jaata hai। socho, hamaara baap param aatma hai! aur phir shikshak direct param aatma hai! kya shiksha di? aapko kya bana diya? trinetri, trikaaldarshi, trilokeenaath। aisi koi padhaai padhta hai! abhi tak ye degree suni hai? judge barrister, doctor, engineer ye to sab degrees dekhi hain lekin trilokeenaath, trikaaldarshi, trinetri, knowledgeful... aisi degree dekhi hai? dvaapar se kaliyug tak kisko mili hai? aapko mili thi? aapne bhi to 63 janma liye hain। to na kisko mili hai, na milni hai। aisa shikshak hamaara hai। science vaale science ki kitni bhi yojna karen to bhi trilok tak nahin pahunch sakte। teenon lokon ka knowledge praapta ho nahin sakta। aur aapmen to 5 varsha ka bachcha bhi teen lokon ki knowledge deta hai! vo bhi falak se kahega - haan, sookshm vatan hai, mool vatan hai। to param aatma shikshak bhi hai। shreshtha shiksha se ye degree to praapta karaai lekin duniya mein sabse bade te bada pad raajya pad hota hai। to padhaai se pad bhi milta hai na! to aapko raaja banaaya hai? abhi raaja ho ya banna hai? ho raaja aur baithe pat mein ho! pakka makaan bhi nahin, tent mein baithe ho! to dekho shreshtha mein shreshtha pad raaj-pad hai। abhi bhi svaraajya adhikaari ho aur bhavishya mein bhi vishwa raajya adhikaari banna hi hai। ye pakka hai na? kisko raajya karna hai? aap raajya karenge ki aapke oopar koi raaja raajya karega? nahin। ye sab itne raaja ban jaayenge! itne sab raajya karenge! praja bhi taiyaar ki hai ya apne oopar hi raajya karenge? to apna bhaagya dekho - param aatma mera shikshak hai, raajya pad dene vaala। aur phir satguru ban... guru kya karte hain? mantra dete hain na। to satguru ne kya mantra diya? manamnaabhav। satguru dvaara mahaamantra bhi mila aur sarva vardaan bhi mile। kitne vardaan mile hain? vardaanon ki list dekho kitni lambi hai! roz vardaan milta hai na! kitne samay se mil rahe hain! itne vardaan koi bhi follower ko koi guru de hi nahin sakte। aisa satguru jo roz vardaan de, aisa dekha? abhi nasha hai na! (haan ji) bahut achha। sada rakhna। aise nahin, yahaan se bas mein jaao to nasha utarna shuru ho jaaye। sada badhta rahe।

baapdaada sabhi bachchon ko sada hi har subject mein number one dekhna chaahte hain। to number one ho ki abhi banna hai? nashe se kaho ki ham nahin honge to kaun hoga! videshiyon ko double nasha hai na! achha hai। baap bhi khush hote hain ki ek-ek mera bachcha raaja bachcha hai। praja nahin hai। praja to peechhe aane vaali hai। aap to phir bhi lucky ho jo itna bhi milne ka chance mila hai। tent mein rehna pada to kya hua। mitti par to nahin so rahe ho na, gadele par so rahe ho। brahma bhojan to achha milta hai na? mitti vaala to nahin milta? pyaar se khaate ho na? thoda bahut to hota hi hai, hona hi hai। kyon? maaya aur prabhu ka khel saath-saath chal raha hai। agar paramatma dvaara mela hua to maaya bhi jhamela zaroor karti hai। aapka kaam hai mela karna, uska kaam hai jhamela karna। to jhamela bhi hua aur mela bhi hua। (kisi ne kaha aandhi chali) koi baat nahin। aapke purushaartha ki aandhi hai aur ye hava ki aandhi hai। ghabraate to nahin ho na ki kya ho gaya? nahin, aandhi aaye ya barsaat aaye, kitni bhi halchal ho lekin aapka man achal hai na? maataayen ghabra to nahin gai, tent ud gaya, kya karen? thoda-thoda ghabraaye, kya hoga, tabiyat achhi rahegi, nahin rahegi? kuchh bhi ho bhakti se to dhakke aur mehnat kam hi hai na। bhakti ke dhakke to nahin khaate ho na, maje mein rehte ho na! to ye mela achha laga ya jhamela dekhkar ghabra gaye? nahin, koi nahin ghabraaye? ek-do to ghabraaye honge? maja aa raha hai? aur bhi do din rakhen? achha। baapdaada bhi maaya ka jhamela dekh chakkar lagaate rehte hain। khel dekhte hain - bachche kya karte hain aur maaya kya karti hai?

baapdaada ko bachchon ka sneh dekh khushi hai। sneh ne mela rachaaya hai। baap ka bhi sneh hai to bachchon ka bhi sneh hai, donon mil gaye to kya ho gaya? mela। drishya bhi kitna achha lag raha hai। aisa kabhi socha tha - itna bada parivaar milega aur itna parivaar kisko hoga? aapke ghar kitne hain? (ek hai) aur aapke seva ke sthaan kitne hain? (anek hain) to usko bhi to baba ka ghar kehte ho na! to baba ka ghar aapka ghar hai। duniya kehti hai gharbaar chhodte hain aur aapne kitne ghar banaaye hain! ginti nahin kar sakte ho, yaad rakhna padta hai। to ye chhodna nahin hai, banaana hai। aur parivaar ko chhoda hai ya parivaar itna bada banaaya hai jo milna hi mushkil hota hai। saare brahman jitne bhi jahaan bhi hain, ek sthaan par mil sakte hain? mushkil hoga na। kyoki doosre ka raajya hai na, apna raajya to nahin hai। lekin baap mila, behad ka parivaar mila। to behad ko yaad karne se behad ki khushi, behad ka nasha hoga। agar had mein samajhte hain - main to phalaane desh mein hoon, phalaane desh ka hoon, phalaane zone ka hoon to had hoti hai lekin ye to nimitta maatra nishaani ke liye kehte hain - ye phalaana zone, ye phalaana sthaan। baaki apne ko behad ka samajhte ho na। niyam bhi rakhne padte hain। kai aise bhi sochte hain ki ye kya badge lagaao tabhi khaana milega। aapko khaane par tang karte hain na? lekin ye karna hi padta hai kyonki kaayde mein phaayde hain। ye bandhan nahin hai lekin vighnon se nirbandhan banaane ka saadhan hai। ye kya nai baat nikaali - ye nahin sochna। sankalp to baap ke paas pahunchte hain na। lekin maryaada purushottam aap hi ho na। ya sirf badi daadiyaan maryaada purushottam hain, aap free ho? maryaada purushottam arthaat maryaada ke andar rahne vaale, chalne vaale। haan ji ka paath pakka hai na? achha! aur jab koi baat ho jaati hai to haan ji hota hai ya na ji bhi hota hai? jab koi aisi baat karte hain to haan ji ke badle phir na ji mein itne pakke ho jaate hain jo baap bhi kahe to bhi nahin sunenge। jaise sthaapna mein jab chhote-chhote bachche aaye to baapdaada unhon ko paath pakka karaane ke liye hamesha kehte rahe ki na karna maana naastik, haan karna maana aastik। to aap sab kaun ho? aastik ho। naastik to nahin ho na! kabhi-kabhi ban jaate ho। khel karte hain! maaya ke bhi knowledgeful ho gaye! kyonki maaya bhi knowledgeful hai। giraane mein maaya knowledgeful hai aur udne mein aap knowledgeful ho। to maaya bhi dekhti hai ki iski udaan thodi neeche-oopar ho gai hai to dekh karke vaar karti hai। aur aap knowledgeful hone ke kaaran jaan jaate ho, to haar nahin khaate ho lekin vijay ka haar gale mein pada। sabke gale mein vijay ki maala hai ya kabhi-kabhi utaar dete ho? achha।

peechhe vaale mauz mein ho? yeh bhi madhuban ki hi area hui na, to sivaae madhuban ke aur kahaan itna bada mela ho sakta hai? nahin ho sakta na। to madhuban hai behad ka ghar। yahaan sab behad hai aur aur jagah phir bhi sab dekhna padta hai aur yahaan sankalp kiya aur ho gaya। to sabhi apne bhaagya dvaara parmaatma mele mein pahunch gaye। jo pahle baari is kalpa mein aaye hain vo haath uthaao। (kareeb 13-14 hajaar bhaai bahinon ki sabha hai, usmein bahut se naye bhaai-bahinen hain) achha hai, T.vi. mein dekh rahe ho। ye bhi dekho majority science ke saadhan abhi-abhi nikle hain। kuchh varsha pahle ye science ke saadhan bhi nahin the। lekin kiske liye nikle hain? aapke liye। baapdaada bhi science vaale bachchon ko mubaarak dete hain kyonki baap ke bachche usse sukh to le rahe hain na। to kitna achha lag raha hai। lekin baapdaada ab kya chaahte hain? sthaapna hue kitne varsha ho gaye? diamond jubilee manaane ki taiyaari kar rahe ho। to baapdaada ne abhi sabhi bachchon ko raaja bachche kaha na, sab raaja hain। raaja takhta nasheen hota hai na? raajya ki nishaani taaj, takhta aur tilak hota hai। to baapdaada is varsha mein chaahe naye ho, chaahe puraane - agar naye bhi ho to samaapti ka samay to nayon ke liye bhi sameep hai to puraanon ke liye bhi sameep hai। aise nahin samajhna ki hamaare ko bhi 60 varsha shaayad milne hain। nahin, aapko make up karna hai। agar last aaye ho to fast jaana hai। lekin sampanna hone ka, samaapti ka samay sabka ek hi hai isliye chaahe naye ho ya puraane ho lekin main svaraajya adhikaari aatma hoon - sada smriti ka tilak laga hua hi hai। kabhi mit jaaye, kabhi laga hua ho...। nahin, raajya adhikaari arthaat tilakdhaari - is smriti ka tilak avinaashi rahe, saadhaaran nahin। main tilakdhaari hoon, main vishwa kalyaan ke jimmevaari ka taajdhaari hoon। kitna bada vishwa hai aur aap sabhi vishwa kalyaankaari ho। akela baap nahin hai। baap ke saathi aap sabhi ho। to vishwa kalyaan ki jimmevaari ke taajdhaari aur sada baap ke diltakhtansheen। neeche nahin aana। sada takhtansheen। vaise bhi dekho jo bahut pyaare hote hain, laadle bachche hote hain to maa-baap unko mitti mein jaane nahin dete, dharni par paanv rakhne nahin dete। to aap kitne laadle ho! laadle ho ya aur aane vaale hain? aap ho। to takhta ko chhod karke saadhaaran swaroop, saadhaaran sankalp... is mitti mein ya dharni mein paanv nahin rakho। buddhi roopi paanv sada takhtansheen ho। parmaatma baap ke bachche ho। mahaatma, dharmaatma ke nahin ho, param aatma ke ho। abhi to sab nashe mein theek ho, vo to dikhaai de raha hai lekin sada rahega na? ki thoda-thoda rahega phir yuddha karenge, phir vijay praapta karenge - aise to nahin? brahman ho ya kshatriy ho? brahman ho। kshatriy nahin ho, yuddha nahin karte ho? ki kabhi brahman ban jaate ho, kabhi kshatriy ban jaate ho? agar maaya se yuddha karni padti hai to kshatriy hue। brahman maana vijayi aur kshatriy maana yuddha karne vaale। baapdaada ko to kabhi-kabhi bachchon par bahut raham aata hai, baithte yog mein hain aur karte yuddha hain! kahenge ek ghante yog lagaaya lekin ek ghante mein yuddha kitna samay chali aur yog kitna samay raha? agar kisi bhi kaaran se anubhooti nahin hoti hai to avashya hi yuddha ki stage hai। baapdaada kehte hain - yogi bachche hain aur ban jaate hain yoddhe bachche! kab tak yuddha karenge? ant tak yuddha karenge! chhutti de den - bhale yuddha karo। chhutti chaahiye? nahin chaahiye? phir karte kyon ho? kamjor ho jaate ho to maaya itna adheen bana deti hai jo chaahte nahin ho lekin kar lete ho। jaise koi-koi servant bahut bhole hote hain to maalik use adheen bana lete hain, servant jo nahin kar sakta uske liye bhi maalik kehta hai karo, nahin to naukri kyon karte ho। maaya bhi aise karti hai, aap chaahte nahin ho lekin kamjor hone ke kaaran maaya ke adheen banna padta hai। to us samay yogi ho ya yoddhe ho? yogi to nahin kahenge na? to baapdaada yahi chaahte hain ki har ek bachcha yogi bachcha ho, yuddha vaala nahin। baapdaada ko bachchon ke yuddha ki mehnat achhi nahin lagti। parmaatma bachche to sada mauj mein rahne vaale hain, maje mein rahne vaale hain, yuddha ki mehnat vaale nahin। to kya banenge? yogi bachche ya yoddhe bachche? yogi banenge ya thoda-thoda yuddha karna achha hai? kahne mein to haan-haan karte ho aur jab karte ho to us samay photo nikalta hai। to is varsha sabhi ka chart ho - sada raajya adhikaari। adheenta samaapta। achha।

sarva taraph ke desh-videsh ke sarva sookshm swaroop se drishya dekhne vaali aatmaayen, chaaron or ke sada shreshtha paalna mein palne vaali, shreshtha padhaai se raajya pad paane vaali aatmaayen, sadguru dvaara sarva vardaan praapta karne vaali aatmaayen, sada maayaajeet vijayi ratna, sada yuddha ko chhod raajayogi sthiti mein sthit rahne vaali sarvashreshtha aatmaon ko baapdaada ka yaad-pyaar aur namaste।

vardaan:- ekaanta aur ekaagrata ke attention dvaara teevragti se sookshm seva karne vaale sachche sevaadhaari bhav

door baithe behad vishwa ke aatmaon ki seva karne ke liye man aur buddhi sada free chaahiye। chhoti-chhoti saadhaaran baaton mein man aur buddhi ko busy nahin karo। teevragti ki sookshm seva ke liye ekaanta aur ekaagrata par vishesh attention do। busy hote bhi beech-beech mein ek ghadi, do ghadi nikaal ekaanta ka anubhav karo। baahar ki paristhiti bhal halchal ki ho lekin man-buddhi ko jis samay chaaho ek ke ant mein second mein ekaagra kar lo tab sachche sevaadhaari ban behad seva ke nimitta ban sakenge।

slogan:- gyaani tu aatma woh hai jo gyaan ke har raaz ko samajhkar raajayukta, yuktiyukta aur yogayukta ho karma kare।