Daily Murli for Tuesday 3 October 2023

03-10-2023 praatahmurli om shanti "baapdaada"' madhuban

“meethe bachche - grihastha vyavhaar mein rehte sabse tod nibhaana hai, naphrat nahin karni hai lekin kamal phool ke samaan pavitra zaroor banna hai''

prashn:- tumhaari vijay ka danka kab bajega? vaah-vaah kaise niklegi?

uttar:- ant samay jab tum bachchon par maaya ki grahchaari baithna banda ho jaayegi, sada line clear rahegi tab vaah-vaah niklegi, vijay ka danka bajega। abhi to bachchon par grahchaari baith jaati hai। vighna padte rehte hain। 3 pair prithvi ke bhi seva ke liye mushkil milte hain lekin woh bhi samay aayega jab tum bachche saare vishwa ke maalik honge।

geet:- dheeraj dhar manuva …

om shanti। bachche nambarvaar purushaartha anusaar jaante hain ki abhi puraana naatak poora hua hai। duhkh ke din baaki kuchh ghadiyaan hain aur phir sada sukh hi sukh hoga। jab sukh ka pata padta hai to samjha jaata hai yeh duhkhadhaam hai, vast different hai। abhi sukh ke liye tum purushaartha kar rahe ho। samajhte ho yeh duhkh ka puraana naatak poora hua। sukh ke liye ab baap-daada ki shreemat par chal rahe hain। koi ko bhi samjhaana bahut sahaj hai। abhi baba ke paas jaana hai। baba lene liye aaya hai। grihastha vyavhaar mein rehte kamal phool samaan pavitra ho rehna hai। tod zaroor nibhaana hai। agar tod nahin nibhaate ho to jaise sanyaasiyon misal ho jaate। woh tod nahin nibhaate hain to unko nivritti maarga, hathayog kaha jaata hai। sanyaasiyon dvaara jo sikhlaaya jaata hai woh hai hathayog। ham raajayog seekhte hain, jo bhagwan sikhlaate hain। bhaarat ka dharma shaastra hai hi geeta। doosron ka dharma shaastra kya hai unse apna koi tailuk nahin। tum abhi grihastha vyavhaar mein rehte ek baar sannyaas karte ho phir 21 janma uski praalabdha paate ho। unka hai had ka sannyaas aur hathayog, tumhaara hai behad ka sannyaas aur raajayog। woh to grihastha vyavhaar chhod dete hain। raajayog ka to bahut gaayan hai। bhagwan ne raajayog sikhlaaya to bhagwan zaroor oonch te oonch ko hi kahenge। shreekrishna to bhagwan ho na sake। behad ka baap hai hi woh niraakaar। behad ki baadshaahi vahi de sakte hain। yahaan grihastha vyavhaar se naphrat nahin ki jaati। baap kehte hain yeh antim janma grihastha vyavhaar mein rehte pavitra bano। patit-paavan kisi sannyaasi ko nahin kaha jaata। sannyaasi khud bhi gaate hain patit-paavan........ unko yaad karte hain, woh bhi paavan duniya chaahte hain। parantu yeh nahin jaante ki woh duniya hi ek aur hai। jabki woh grihastha vyavhaar mein hi nahin hain to devtaaon ko bhi nahin maanenge। woh kabhi raajayog sikhla na saken। na baap kabhi hathayog sikhla sakte, na sannyaasi kabhi raajayog sikhla sakte। yeh samajhne ki baat hai।

abhi dehli mein world conference hoti hai, unko samjhaana hai, likhat mein sabhi ko dena hai। vahaan to matbhed ho jaata hai। likhat mein hoga to sabhi samajh jaayenge inhon ka uddeshya kya hai। abhi tum samajhte ho ham hain brahman kul ke, ham shoodra kul ke member kaise ban sakte hain va vikaari kul mein ham apne ko kaise registered kar sakte hain, isliye na kar dete। ham hain aastik, woh hain naastik। woh hain eeshvar ko na maanne vaale, ham hain eeshvar se yog rakhne vaale। matbhed ho jaata hai। samjhaaya jaata hai jo baap ko nahin jaante woh naastik hain। to baap hi aakarke aastik banaayenge। baap ka banne se baap ka varsa mil jaata hai। yeh badi guhya baaten hain। pahle-pahle to buddhi mein yeh bithaana hai ki geeta ka bhagwan parampita paramatma hai। usne hi aadi sanaatan devi-devta dharma sthaapan kiya। bhaarat ka devi-devta dharma hi mukhya hai। bhaarat khanda ka koi to dharma chaahiye na। apne dharma ko bhool gaye hain। yeh bhi tum jaante ho ki draamaanusaar bhaaratvaasiyon ko apna dharma bhool jaana hai tab to phir baap aa karke sthaapan kare। nahin to phir baap aaye kaise? kehte hain jab-jab devi-devta dharma praayahlop ho jaata hai tab main aata hoon। praayahlop zaroor hona hi hai। kehte hain na bail ki ek taang toot gai hai, baaki 3 taang par khada hai। to mukhya hain hi 4 dharma। abhi devta dharma ki taang toot padi hai, yaani woh dharma gum ho gaya hai isliye bad ke jhaad ka misaal dete hain ki iska foundation sad gaya hai। baaki taal-taaliyaan kitni khadi hain। to inmen bhi foundation devta dharma hai hi nahin। baaki saari duniya mein math-panth aadi kitne hain! tumhaari buddhi mein abhi saari roshni hai। baap kehte hain tum bachche is drama ko jaan gaye ho। ab yeh saara jhaad puraana ho gaya hai। kaliyug ke baad satayug zaroor aana hai। chakra ko phirna zaroor hai। buddhi mein yeh rakhna hai - ab naatak poora hua hai, ham ja rahe hain। chalte-phirte uthte-baithte bhi yaad rahe - ab hamko vaapis jaana hai। manmanaabhav, madhyaaji bhav ka yahi arth hai। koi bhi badi sabha mein bhaashan aadi karna hai to yahi samjhaana hai - parampita paramatma phir se kehte hain ki he bachche, deh sahit deh ke sab dharma tyaag apne ko aatma samajh baap ko yaad karo to paap khatma honge। main tumko raajayog sikhlaata hoon। grihastha vyavhaar mein rehte kamal phool samaan ban mujhe yaad karo, pavitra raho, knowledge ko dhaaran karo। abhi sab durgati mein hain। satayug mein devtaayen sadgati mein the। phir baap hi aakar sadgati karte hain। sarvagun sampanna, 16 kala sampoorn........ yeh hain sadgati ke lakshan। yeh kaun dete hain? baap। unke phir lakshan kya hain? woh gyaan ka saagar hai, aananda ka saagar hai। unki mahima bilkul alag hai। aise nahin ki sab ek hi hain। ek baap ke bachche sabhi aatmaayen hain। prajaapita ke hi aulaad hote hain। ab nai rachna rachi jaati hai। prajaapita ki aulaad to sab hain parantu ve log in baaton ko jaante nahin। brahman varna hai sabse oonch। bhaarat ke hi varna gaaye jaate hain। 84 janma lene mein in varnon se paas karna hota hai। brahman varna hai hi sangamayug par।

tum bachche abhi sweet silence mein rehte ho। yeh silence sabse achhi hai। vaastav mein shanti ka haar to gale mein pada hua hai। chaahte to sab hain shanti ghar mein jaayen। parantu yeh raasta kaun bataaye? shanti ke saagar ke sivaae to koi bata na sake। title achha diya hua hai - shanti ka saagar, gyaan ka saagar। shreekrishna to svarga ka prince hai। woh hai manushya srishti ka beej-roop। kitna raat-din ka farka hai। krishna ko srishti ka beej kah nahin sakte। sarvavyaapi ka gyaan to thahar na sake। baap ki mahima apni hai। woh sadaiv poojya hai, kabhi pujaari nahin banta। oopar se pahle jo aate hain woh poojya se pujaari bante hain। points to dher samjhaai jaati hain। exhibition mein kitne aate hain, parantu koton mein koi hi nikalte hain kyonki manzil badi bhaari hai। praja to dher banti rahegi। maala mein aane vaale daane koton mein koi hi nikalte hain। naarad ka bhi misaal hai, unko kaha tum apni shakla dekho - lakshmi ko varne laayak ho? praja to bahut banni hai। raaja phir bhi raaja hai। ek-ek raaja ko laakhon praja rehti hai। purushaartha to oonch karna chaahiye। raajaaon mein bhi koi bada raaja, koi chhota raaja hai। bhaarat mein kitne raajaayen the! satayug mein bhi bahut mahaaraajaayen hote hain। yeh satayug se lekar chala aaya hai। mahaaraajaaon ko bahut property hoti hai, raajaaon ko kam। yeh hai shri lakshmi-naaraayan banne ki knowledge। uske liye hi purushaartha chalta hai। poochhte hain lakshmi-naaraayan ka pad paayenge va raam seeta ka? to kehte hain ham to lakshmi-naaraayan ka hi pad paayenge, maa-baap se poora varsa lenge। yeh to wonderful baaten hain na, aur koi jagah yeh baaten hain nahin, na koi shaastron mein hain। ab tumhaari buddhi ka taala khul gaya hai। baap samjhaate hain chalte-phirte aise samjho ham actors hain, ab hamko vaapis jaana hai। yeh yaad rahe, inko hi manmanaabhav, madhyaaji bhav kaha jaata hai। baap ghadi-ghadi yaad dilaate hain - main tumko vaapis le jaane aaya hoon। yeh hai roohaani yaatra। yeh yaatra baap ke sivaae koi kara na sake। bhaarat ki mahima bhi bahut karni hai। yeh bhaarat holiest land hai। sarva ka duhkh harta aur sukh karta, sabka sadgati daata ek hi baap hai। bhaarat unka birth place hai। woh baap sabka liberator hai। unka yahaan (bhaarat mein) bade te bada teertha sthaan hai। bhaaratvaasi bhal shiv ke mandir mein jaate hain parantu unko pata nahin hai। gaandhi ko jaante hain, samajhte hain woh bahut achha tha isliye jaakar un par phool aadi chadhaate hain, laakhon kharcha karte hain। ab is samay hai hi unhon ka raajya। jo chaahe so kar sakte hain। yeh to baap baith gupta dharma ki sthaapna karte hain, yeh raajya hi alag hai। bhaarat mein pahle-pahle devtaaon ka raajya tha। dikhaate hain asuron aur devtaaon ki ladaai lagi। parantu aisi baaten to hain nahin। yahaan to yuddha ke maidaan mein maaya par jeet paai jaati hai, maaya par jeet to zaroor sarvashaktimaan hi pahnaayenge। baba hi raavan raajya se chhudaakar raamraajya ki sthaapna kara rahe hain। baaki vahaan ladaai aadi ki baat hoti nahin। abhi dekhenge to srishti mein sarvashakti-maan is samay Christian log hain। woh chaahen to sab par jeet pa sakte hain parantu woh vishwa ke maalik banen, yeh kaayda nahin। is raaz ko tum hi jaante ho। is samay sarvashaktivaan raajdhaani Christian ki hai। nahin to unhon ki sankhya kam honi chaahiye kyonki last mein aaye hain। parantu 3 dharmon mein yeh dharma sabse teekha hai। sabko haathkar baithe hain। yeh bhi drama bana hua hai। inke dvaara hi phir hamko raajdhaani milni hai। kahaani bhi hai 2 bille lade, makkhan beech mein teesre ko mil jaata hai। to woh aapas mein ladte hain, makkhan beech mein bhaaratvaasiyon ko hi milna hai। kahaani to paai paise ki hai, arth kitna bada hai। manushya kitne besmajh hain। actor hote hue bhi drama ko nahin jaante, besmajh ho pade hain। samajhte bhi gareeb hain। saahookaar log kuchh bhi nahin samajhte। gareeb nivaaz patit-paavan baap gaaya hua hai। ab practical mein part baja rahe hain। badi-badi sabhaaon mein tumko samjhaana hai। vivek kehta hai ki dheere-dheere vaah-vaah niklegi, last movement mein danka bajna hai। abhi to bachchon par grahchaari baithti hai। line clear nahin। vighna padte rehte hain। yeh bhi drama anusaar padte rahenge। jitna purushaartha karenge, utna oonch pad paayenge। paandavon ko 3 pair prithvi ke nahin milte the। abhi ka yeh gaayan hai। parantu yeh kisko pata nahin hai ki vahi phir practical mein vishwa ke maalik banen। tum bachche ab jaante ho, ismen aphsos nahin kiya jaata। kalpa pahle bhi aise hua tha। drama ke patte par khada rehna chaahiye, hilna nahin chaahiye। ab naatak poora hota hai, chalte hain sukhdhaam। padhaai aisi padhni hai jo oonch pad pa leven। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chalte-phirte apne ko actor samajhna hai, drama ke patte par achal rehna hai। buddhi mein rahe ki abhi ham vaapas ghar jaate hain, ham yaatra par hain।

2) sadgati ke sarva lakshan svayan mein dhaaran karne hain। sarvagun sampanna, 16 kala sampoorn banna hai।

vardaan:- sangamayug par shreshtha mat dvaara shreshtha gati ko praapta karne vaale pratyaksha phal ke adhikaari bhav

sangamayug par shreshtha mat ke aadhaar par jo shreshtha karma karte ho uska pratyakshaphal arthaat saphalta abhi hi praapta hoti hai, isliye kehte hain jaisi mat vaisi gat। vo log samajhte hain marne ke baad gati milegi lekin aap bachchon ko is antim marjeeva janma mein har karma ki saphalta ka phal arthaat gati praapta hone ka vardaan mila hua hai। aap bhavishya ki intajaar mein nahin rehte। abhi-abhi karte aur abhi-abhi praapti ka adhikaar mil jaata - isko hi kehte hain rachayita ka rachna se sachcha pyaar।

slogan:- dridh sankalp se har kadam mein baap ko follow karne vaale hi sampanna bante hain।