Daily Murli for Wednesday 18 October 2023

18-10-2023 praatahmurli om shanti "baapdaada"' madhuban

“meethe bachche - deh ke sambandhon mein bandhan hai, isliye duhkh hai, dehi ke sambandh mein raho to athaah sukh mil jaayega, ek maat-pita ki yaad rahegi''

prashn:- kis nashe mein raho to maaya par jeet paane ki himmat aa jaayegi?

uttar:- nasha rahe ki kalpa-kalpa ham baap ki yaad se maaya dushman par vijayi ban heere jaisa bane hain। khud khuda hamaara maat-pita hai, isi smriti va nashe se himmat aa jaayegi। himmat rakhne vaale bachche vijayi avashya bante hain aur sada godly service par hi tatpar rehte hain।

geet:- tumhaare bulaane ko ji chaahta hai…

om shanti। devi-devtaaon ke pujaari paarlaukik maat-pita ko yaad to karte hi aaye hain aur bhakta bhi jaante hain hamko bhakti ka phal dene maat-pita ko aana hai zaroor। ab woh maat-pita kaun hai - yeh to bichaare jaante hi nahin। pukaarte hain isse siddha hota hai, unka sambandh zaroor hai। ek hota hai laukik sambandh, doosra hota hai paarlaukik sambandh। laukik sambandh to anek prakaar ke hain। kaaka, chaacha, maama aadi-aadi yeh hai laukik bandhan, isliye parampita paramatma ko bulaate hain। yeh to bachchon ko maaloom hai satayug mein koi bandhan nahin। baap ko bulaate hain ki ham abhi bandhan mein hain, aapke sambandh mein aana chaahte hain। bhakton ko yaad hai ham anek prakaar ke bandhanon mein hain। deh ka simran hone kaaran bandhan bahut hain। dehi ke sambandh se ek hi maat-pita yaad rehta hai। laukik aur paarlaukik ko yaad karne mein raat-din ka farka hai। yeh hai jismaani bandhan aur woh hai roohaani sambandh। jismaani sambandh mein satayug mein rehte hain kyonki vahaan sukh ka sambandh kahenge। yahaan phir duhkh ka bandhan kahenge। unko sambandh nahin kahenge। in baaton ka aage pata nahin tha। ab samajh gaye ho, pukaarte zaroor the - he maat-pita aao। baap to zaroor sabko sukh hi denge। parantu baap kya sukh dete hain - yeh kisko pata nahin hai। abhi baap se sambandh hai, unse sada sukh milta hai। sukh ko sambandh, duhkh ko bandhan kahenge। to bachche maat-pita ko bulaate hain ki aakar ke aisi meethi-meethi baaten sunaao। vo indirect bulaate hain, tum direct bulaate ho। woh bhi yaad karte hain - he parampita paramatma। pita hai to zaroor maata bhi honi chaahiye। nahin to baap create kaise kare? shivbaaba ko bachche chitthi kaise likhenge? aise to woh padh na sake। shivbaaba to yahaan baithe hain, isliye likhte hain shivbaaba through brahma। shivbaaba zaroor koi to shareer dhaaran karte hain। gaate bhi hain - aatmaayen paramatma alag rahe bahukaal, satguru usko kaha jaata hai। woh hai sarva ka sadgati daata। woh aakar is shareer mein pravesh karte hain। phir inko 84 janmon ka raaz baith batlaate hain। brahma ki raat, brahma ka din gaaya hua hai। pahle hai parampita paramatma rachta। brahma, vishnu, shankar ko rachte hain। barobar parampita, brahma ki raat ko phir brahma ka din banaane aate hain। prajaapita brahma ka din to prajaapita brahmaakumaar-kumaariyon ka bhi din hua। din kaha jaata hai satayug-treta ko। raat, dvaapar-kaliyug ko। abhi tum bachche aaye ho baap se svarga ka varsa lene। unke liye hi gaate hain tvamev maataashcha pita… sakha roop se halke roop mein aakar bahalte hain। mukhya hain teen sambandh - baap, teacher, satguru। inse hi faayda hai। baaki kaaka, chaacha, maama aadi sambandhon ki koi baat nahin। to sampoorn baap jo hai woh aakar bachchon ko sampoorn banaate hain। 16 kala sampoorn tum ban rahe ho। tum anubhvi ho। doosra koi kaise jaane। jab tak tum bachchon ke sang mein na aaye tab tak woh kaise samajh sake।

ab tum jaante ho bhakti maarga mein bhi bandhan hai। yaad tab karte hain jabki raavan roopi 5 vikaaron ke bandhan mein hain। baap ka naam hi hai liberator। angreji akshar bahut achha hai। liberate karte hain manushyon ko, liberate kiya jaata hai duhkh se, maaya ke bandhan se liberate karne aate hain। phir guide bhi hai। geeta mein bhi hai machchharon sadrishya sabko vaapis le jaate hain to zaroor vinaash bhi hoga। yeh to gaaya hua hai brahma dvaara sthaapna, shankar dvaara vinaash karaate hain। phir jo sthaapna karte hain un dvaara hi paalna bhi hoti hai। abhi tum taiyaar ho rahe ho - nambarvaar purushaartha anusaar। deh ke bandhan ko buddhi se todna hai। sannyaasi log to gharbaar chhod bhaag jaate hain। tum grihastha vyavhaar mein rehte raajayog seekhte ho। janak ka bhi misaal hai। woh phir jaakar anu janak bana। bahut bachche kehte hain janak misal ham apni raajdhaani mein rehte gyaan uthaaven। apne ghar ka to harek raaja hai na। maalik ko raaja kaha jaata hai। baap hai, unki stri bachche aadi hain - yeh ho gai had ki rachna। create bhi karte hain, paalna bhi karte hain। baaki sanhaar nahin kar sakte kyonki srishti ko to vriddhi ko paana hi hai। sab paida hi karte rehte hain। sirf behad ka baap hi aate hain jo nai rachna rachte hain aur puraani ka vinaash karaate hain। nai srishti ki sthaapna aur puraani ka vinaash so to brahma-vishnu-shankar ka rachayita parampita paramatma hi karenge। in baaton ko tum bachche achhi reeti samajhte ho। baaten to badi sahaj hai। naam hi rakha hua hai sahaj yog va yaad। bhaarat ka gyaan va yog naameegraami hai।

baap abhi tum bachchon ko daivi mat dete hain jisse tum sadaiv harshit rahenge। maat-pita se hi nai srishti ki rachna hoti hai। yeh to sab jaante hain hamko khuda ne paida kiya। abhi tum samajhte ho khuda kaise aakar nai srishti rachte hain। nai srishti adopt karte hain। maat-pita to zaroor hain। baap hai phir khud hi in dvaara adopt karte hain to yeh badi maata ho gai। phir pahle number mein sarasvati ko adopt kiya hai। baap ne inmen pravesh kiya hai na। yeh mama to adopted hai। tumhaare liye to maat-pita hai। hamaare liye pati bhi hua to pita bhi hua। pravesh kar apni vanni (yugal) bhi mujhe banaaya hai aur bachcha bhi banaaya hai। yeh to badi ramneek baaten hain, jo sammukh sunne ki hain। tumhaare mein bhi nambarvaar samajhte hain। agar sabhi samajhte hon to phir samjhaaven। samjha nahin sakte hain to goya kuchh nahin samjha। jad beej se jhaad kaise paida hota hai - yeh to koi bhi jhat batla sakta hai। is behad ke jhaad ka gyaan jab tak baap na aakar samjhaaye tab tak koi samajh nahin sakte। tum jaante ho ham baap se raajayog seekhkar varsa le rahe hain। yeh buddhi mein hona chaahiye। yeh double sambandh hai। vahaan to single sambandh rehta hai। paarlaukik baap ko yaad nahin karte। yahaan woh sab hai bandhan। tum jaante ho ham is samay us bandhan mein bhi hain। pita ke sambandh mein ab aaye hain, us bandhan se chhootne ke liye। aajkal to kitni maten ho gai hain। aapas mein ladte-jhagadte rehte hain। paani ke liye, dharni ke liye bhi ladte rehte hain। yeh hamaari had mein hai, yeh tumhaari had mein nahin hai। bilkul hi had mein aa gaye hain। yeh bhool gaye hain ki bhaaratvaasi satayug mein behad ke maalik the। jo maalik the vahi phir bhool jaate hain। bhoolna bhi zaroor hai tab hi phir baap aakar samjhaate hain। in baaton ko abhi tum jaante ho। vahaan hai bandhan। yahaan maat-pita se sambandh hai। jaante ho ham shreemat par chal athaah sukh ka varsa pa rahe hain। baap kehte hain main tumko sukh ka varsa deta hoon। phir shraap kaun dete hain? maaya raavan। shraap mein hai duhkh, varse mein to sukh hota hai। manushya yeh nahin jaante ki manushya ko duhkh ka varsa kaun dete hain? baap satayug sthaapan karte hain to zaroor sukh ka hi varsa denge। baap ko duhkh ka varsa dene vaala thode hi kahenge। duhkh to dushman dete hain। parantu yeh baaten koi samajhte nahin। kahaan ki baat kahaan le gaye hain। kehte hain lanka looti jaati hai, sona le aate hain। ab sona koi Ceylon mein nahin rakha hai। sona to milta hai khaaniyon se। kahaan nadiyon se bhi milta hai।

bachche jaan gaye hain yeh anaadi world drama hai। tum bachchon ki buddhi mein nambarvaar purushaartha anusaar baitha hai। jo samajhte nahin, na samjha sakte to woh kya pad paayenge! padhe hue ke aage bhari dhoyenge। raaja-raani, praja mein farka to hai na। jaise yeh mama-baba jaakar oonch pad paate hain। tum bhi purushaartha kar itna padho jo mama-baba ke takhta par baitho, vijay maala ka daana bano। temptation bahut di jaati hai। raajayog hai na। tum raajayog se raajaai to praapta kar lo। kam se kam purushaartha anusaar praja to banenge hi। hamesha kaha jaata hai follow father। tum bachche ho na। woh father phir yeh father, yahaan phir mother bhi hai। number one follow kar rahi hai। tum ho bhaai-behen। baap to ek hona chaahiye। O god father sab kehte hain to sab bhaai-behen ho gaye। aur jaasti koi sambandh nahin। bhaai-behen, bas। aur unhon ka baap, daada, bhaai, bahnen to bahut hain। baap ek hai, daada bhi ek hai। ek prajaapita brahma hai, unse phir rachna rachi jaati hai। tum behen-bhaai hi pad paate ho nambarvaar purushaartha anusaar। baaki jaakar apne-apne jhaad mein latkenge। thikaana to hai na। jahaan se phir nambarvaar aate hain। yahaan hai jeevanbandh। aatmaayen vahaan se pahle-pahle sukh mein aati hain isliye pahle jeevanmukta hoti hain। pahle-pahle hoti hai svarga mein bhaaratvaasiyon ki jeevanmukti। kitni achhi-achhi baaten baap sunaate hain। mera to ek sarvottam teacher doosra na koi। kanyaayen kahengi mera to ek shivbaaba..... kanyaaon ko ismen poora attention dena hai। is government ke ho gaye to phir eeshvareey service mein lag jaana hai। phir aasuri service kaise kar sakti? har ek ke karmabandhan anusaar raay di jaati hai। dekha jaata hai, nikal sakti hain va nahin। achhe shrewd buddhi hain to phir on godly service only ho jaati hai। tum bachchon ki hai godly service, nirvikaari banaane ki service। ham sena hain। god hamko maaya se yuddha karna sikhlaate hain। raavan sabse jaasti puraana dushman hai। yeh sirf tum hi jaante ho। tum raavan par vijay paakar heere jaisa banenge। bachchon ko woh himmat, woh nasha rehna chaahiye। manushya to ladte rehte hain, sab jagah dekho jhagda hi jhagda hai। hamaara koi se jhagda nahin। baap kehte hain mujhe yaad karo to vikarma vinaash honge। maaya ka vaar nahin hoga। phir varse ko yaad karo। yeh bhi kisko sunaana pade na। baap ka parichay de unse buddhiyog lagaana hai। woh hamaara maat-pita hai। shivbaaba hai to bataao tumhaari maata kaunsi hai? yeh bhi kitni guhya baaten hain। tum poochhte ho aatma ka baap kaun hai? woh bhi likh denge paramatma hai। achha, maata kahaan hai? maata bigar bachchon ko rachenge kaise? to phir jagat amba taraph chale jaayenge। achha, jagat amba ko kaise racha? yeh bhi kisko pata nahin hai। tum jaante ho brahma ki beti sarasvati hai। woh bhi mukh vanshaavli hai। rachta to baap hi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) mera to ek sarvottam teacher doosra na koi - isi nishchay se maat-pita samaan padhaai padhni hai। purushaartha mein poora follow karna hai।

2) deh ke bandhan ko buddhi se todna hai। daivi mat par chal sada harshit rehna hai। eeshvareey seva karni hai।

vardaan:- kinaara karne ke bajaae svayan ko adjust karne vaale sahansheelta ke avtaar bhav

kai bachchon mein sahanshakti ki kami hoti hai isliye koi chhoti si baat bhi hoti hai to chehra bahut jaldi badal jaata hai, phir ghabraakar ya to sthaan ko badalne ki sochenge ya jinse tang honge unko badal denge, apne ko nahin badlenge, lekin doosron se kinaara kar lenge isliye sthaan athva doosre ko badalne ke bajaae svayan ko badal lo, sahansheelta ka avtaar ban jaao। sabke saath svayan ko adjust karna seekho।

slogan:- parmaartha ke aadhaar se vyavhaar ko siddha karna - yahi yogi ka lakshan hai।