Daily Murli for Monday 27 November 2023

27-11-2023 praatahmurli om shanti "baapdaada"' madhuban

“meethe bachche - din mein shareer nirvaah arth karma karo, raat mein baith gyaan ka simran karo, baap ko yaad karo, buddhi mein svadarshan chakra phiraao to nasha chadhega''

prashn:- maaya kin bachchon ko yaad mein baithne hi nahin deti hai?

uttar:- jinki buddhi kisi na kisi mein phansi hui rehti hai, jinki buddhi ko taala laga hua hai, padhaai achhi reeti nahin padhte hain maaya unhein yaad mein baithne nahin deti। woh manamnaabhav rah nahin sakte। phir service ke liye bhi unki buddhi chalti nahin। shreemat par na chalne ke kaaran naam badnaam karte hain, dhokha dete hain to sajaayen bhi khaani padti hain।

geet:- tumhaare bulaane ko ji chaahta hai…

om shanti। bachchon ne geet suna। god father ko hi bulaate hain, shreekrishna ko nahin। baap ko kahenge - aao, phir se kansapuri ke badle krishnapuri banaao। krishnapuri ko to svarga kaha jaata hai। yeh koi bhi jaante nahin, kyonki shreekrishna ko dvaapar mein le gaye hain। yeh sab bhoolen shaastron se hui hain। abhi baap yathaartha baat samjhaate hain। vaastav mein saari duniya ka bada god father hai। sabko us ek god ko hi yaad karna hai। bhal manushya Christ, buddha athva devtaaon aadi ko yaad karte hain, harek dharma vaale apne dharma sthaapak ko yaad karte hain। yaad karna shuru hua hai dvaapar se। bhaarat mein gaaya hua bhi hai duhkh mein simran sab kare, sukh mein kare na koi। baad mein hi yaad karne ki rasma padti hai, kyonki duhkh hai। pahle-pahle bhaaratvaasiyon ne yaad shuru kiya। unhon ko dekhte doosre dharma vaale bhi apne dharma sthaapak ko yaad karne lag padte hain। baap bhi dharma sthaapan karne vaala hai। parantu manushyon ne baap ko bhool shreekrishna ka naam daal diya hai। lakshmi-naaraayan ke dharma ka unhein pata nahin hai। yaad to na lakshmi-naaraayan ko, na shreekrishna ko karna hai। yaad ek baap ko karna hai jo aadi sanaatan devi-devta dharma ki sthaapna kar rahe hain। phir jab yeh bhakti maarga mein shiv ki pooja karne lagte hain to samajhte hain geeta ka bhagwan shreekrishna hai। unko yaad karte hain। unhon ko dekh woh bhi apne dharma sthaapak ko yaad karte hain। yeh bhool jaate hain ki yeh devta dharma bhagwan ne sthaapan kiya hai। ham likh sakte hain ki geeta ka sermonizer shreekrishna nahin, shivbaaba hai। woh hai niraakaar - yeh wonderful baat hui na। kisi ke paas bhi shivbaaba ka parichay nahin hai। woh star hai। sab jagah shiv ke mandir hain to woh samajhte hain ki itna bada hai, akhanda jyoti tatva hai। parantu woh to mahtatva mein rehte hain, jahaan aatmaayen rehti hain। aatma ka roop barobar star misal hai, parampita paramatma bhi star hai। parantu woh knowledgeful, beejroop hone kaaran unmein taakat hai। aatmaon ka pita (beej) paramatma ko kahenge। hai woh niraakaar। manushya ko to ocean oph knowledge, ocean oph lav kah na saken isliye samjhaane vaale bachchon mein authority chaahiye, jinki buddhi vishaal ho। tum sabmen mukhya hai mama, vande maatram bhi gaaya hua hai। kanyaaon dvaara baan marvaaye। adhar kanya, kunvaari kanya ka raaz kahaan hai nahin। sirf mandir se hi siddha hota hai। jagdamba bhi barobar hai। parantu ve jaante nahin ki woh kaun hai?

baap kehte hain main brahma mukh kamal dvaara rachayita aur rachna ke aadi-madhya-ant ka raaz bataata hoon। drama mein kya hai - yeh manushyon ki buddhi mein aana chaahiye। yeh behad ka drama hai। iske ham actor hain to drama ke aadi-madhya-ant ka raaz buddhi mein rehna chaahiye। jinki buddhi mein yeh rehta hai unhein bahut nasha rehta hai। saara din shareer nirvaah kiya, raat ko baith smriti mein laao - yeh drama kaise chakra lagaata hai? yahi manamnaabhav hai। parantu maaya raat ko bhi baithne nahin deti hai। actors ki buddhi mein to drama ka raaz rehna chaahiye na। parantu hai bada mushkil। kahaan na kahaan phans padte hain to baba buddhi ka taala banda kar dete hain। bahut badi manzil hai। achhi padhaai vaale phir tankhaah bhi achhi lete hain na। yeh padhaai hai। parantu baahar jaane se bhool jaate hain phir apni mat par chal padte hain। baap kehte hain - meethe bachche, shreemat par chalne mein hi tumhaara kalyaan hai। yeh hai patit duniya। vikaar ko poison kaha jaata hai, jiska sannyaasi log sannyaas karte hain। yeh raavan raajya shuru hi hota hai dvaapar se, yeh ved-shaastra aadi sab bhakti maarga ki saamagri hain। service ke liye bachchon ki buddhi chalni chaahiye। shreemat par chalen to dhaarna bhi ho। bachche jaante hain vinaash saamne khada hai। sab duhkhi ho radi maarenge - he bhagwan, raham karo। traahi-traahi karte samay bhagwan ko yaad karenge। partition ke samay kitna yaad karte the - he bhagwan, raham karo, raksha karo। ab raksha kya karenge? raksha karne vaale ko hi jaante nahin to raksha karenge kaise? abhi baap aaya hai parantu mushkil koi ki buddhi mein baithta hai। baap samjhaate hain aise-aise service karo। yeh shreemat baap ki milti hai। aise baap ko pahchaan nahin sakte, yeh bhi kaisa wonder hai! kitni samajhne ki baaten hain! saara din shivbaaba ki yaad buddhi mein rahe। yeh bhi unka rath saathi thahra na।

baba dekhte hain - bachche aaj bahut achhe nishchaybuddhi hain, kal sanshaybuddhi ban jaate hain। maaya ka toofaan lagne se avastha girti hai to baba ismen kya kar sakte hain। tum gyaan mein aaye, surrender hue to tum trustee thahre। tum kyon phikra karte ho? surrender kiya hai, phir service bhi karni hai to return mein milega। agar surrender hua hai, service nahin karta to bhi unko khilaana to pade, to un paison se hi khaate-khaate apna khatma kar lete hain, service karte nahin hain। tumhein service karni hai manushya ko heere jaisa banaane ki। mukhya baba ki roohaani service karni hai, jisse manushya oonche bane। service nahin karte to jaakar daas-daasi banenge। jo padhaai achhi padhte hain, unka maan bhi ooncha hota hai, jo naapaas honge woh jaakar daas-daasi banenge।

baba kehte hain - bachche, mujhe yaad karo aur varsa lo। bas, yeh manamnaabhav akshar hi right hai। ocean oph knowledge kehte hain ki mujhe yaad karo to tumhaare vikarma vinaash honge। aise shreekrishna kah na sake, baap hi kehte hain - maamekam yaad karo aur bhavishya raajya pad ko yaad karo। yeh raajayog hai na। isse pravritti maarga siddha hota hai। yeh tum hi samjha sakte ho। tumhaare mein bhi jo serviceable teekhe hain, unhon ko bulaaya jaata hai। samjha jaata hai yeh hoshiyaar hand hai। bachchon ko yogayukta banna hai। shreemat par agar nahin chalte to naam badnaam karte hain। dhokha dete hain to phir sajaayen khaani padti hain। tribunal bhi baithti hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class

bachchon ko pahle-pahle samjhaani deni hai baap ki। behad ka baap hi hamko padhaate hain, geeta padhne vaale shreekrishna ko bhagwan kehte hain। unhein samjhaana hai ki bhagwan to niraakaar ko kaha jaata hai। dehdhaari to bahut hain। bigar deh hai hi ek। woh hai oonche se ooncha shivbaaba। yeh achhi reet buddhi mein bithaao। behad ke baap se behad ka varsa milta hai, vahi oonch te oonch niraakaar parampita paramatma hai। woh hai behad ka baap aur yeh hai had ka baap। aur koi 21 janmon ka varsa nahin dete hain। aisa bhi koi baap nahin jisse amar pad mile। amarlok hai satayug। yeh hai mrityulok। to baap ka parichay dene se samjhenge, baap se varsa milta hai jisko daivi svaraajya kaha jaata hai। woh baap hi dete hain। vahi patit-paavan gaaya jaata hai, woh kehte hain apne ko aatma samajh mujh baap ko yaad karo to paap kat jaayenge। patit se paavan ban paavan duniya mein chalne laayak ban sakte ho। kalpa-kalpa baap kehte hain maamekam yaad karo। yaad ki yaatra se hi pavitra banna hai। abhi paavan duniya aa rahi hai। patit duniya vinaash honi hai। pahle-pahle baap ka parichay de pakka karaana hai। jab pakka baap ko samajh jaayen tab baap se varsa mile। ismen maaya bhulaati bahut hai। tum koshish karte ho baba ko yaad karne ki phir bhool jaate ho। shivbaaba ko yaad karne se hi paap katenge। woh baba inke dvaara bataate hain bachche mujhe yaad karo। phir bhi dhandhe aadi mein bhool jaate hain। yeh bhoolna nahin chaahiye। yahi mehnat ki baat hai। baap ko yaad karte-karte karmaateet avastha tak pahunchna hai। karmaateet avastha vaale ko kaha jaata hai pharishta। to yeh pakka yaad karo kaise kisko samjhaayen। pakka nishchay bhi ho ki ham bhaaiyon ko (aatmaon ko) samjhaate hain। sabko baap ka paigaam dena hai। kai kehte hain baba paas chaloon, deedaar karoon। parantu ismen deedaar aadi ki to baat hi nahin hai। bhagwan aakar sikhlaate hain aur mukh se kehte hain tum mujh apne niraakaar baap ko yaad karo। yaad karne se sab paap kat jaate hain। kahaan bhi dhandhe aadi mein baithe ghadi-ghadi baap ko yaad karna hai। baap ne hukm diya hai mujhe yaad karo। nirantar yaad karne vaale hi win karenge। yaad nahin karenge to marks kam ho jaayenge। yeh padhaai hai hi manushya se devta banne ki, jo ek baap hi padhaate hain। tumhein chakravarti raaja banna hai, to 84 janmon ko (chakra ko) bhi yaad karna hai। karmaateet avastha tak pahunchne ke liye mehnat karni hai। woh ant mein honi hai। ant koi bhi samay aa sakti hai, isliye purushaartha lagaataar karna hai। nitya tumhaara purushaartha chalta rahe। laukik baap tumhein aise nahin kahenge ki deh ke sabhi sambandh chhod apne ko aatma samjho। shareer ka bhaan chhod mujhe yaad karo to paap katenge। yeh to behad ka baap hi kehte hain bachche mujh ek ki yaad mein raho to sab paap kat jaayenge। tum satopradhaan ban jaayenge। yeh dhandha to khushi se karna chaahiye na। bhojan khaate samay bhi baap ko yaad karna hai। yaad mein rahne ka gupta abhyaas tum bachchon ka chalta rahe to achha hai। tumhaara hi kalyaan hai। apne ko dekhna hai baba ko kitna samay yaad karta hoon? achha - meethe-meethe sikeeldhe bachchon prati yaadapyaar aur goodnight। om shanti।

dhaarna ke liye mukhya saar:-

1) manushyon ko heere jaisa banaane ki roohaani service karni hai। kabhi bhi sanshaybuddhi ban padhaai ko nahin chhodna hai। trustee hokar rehna hai।

2) shareer nirvaah arth karma karte bhi baap ko yaad karna hai। shreemat mein apna kalyaan samajh chalte rehna hai। apni mat nahin chalaani hai।

vardaan:- mansa aur vaacha ki shakti ko yathaartha aur samartha roop se kaarya mein lagaane vaale teevra purushaarthi bhav

teevra purushaarthi arthaat first division mein aane vaale bachche sankalp shakti aur vaani ki shakti ko yathaartha aur samartha reeti se kaarya mein lagaate hain। ve ismen loose nahin hote। unhein yeh slogan sada yaad rehta ki kam bolo, dheere bolo aur madhur bolo। unka har bol yogayukta, yuktiyukta hota। ve aavashyak bol hi bolte, vyartha bol, vistaar ke bol bolkar apni energy samaapta nahin karte। ve sada ekaantapriy rehte hain।

slogan:- sampoorn nashtomoha woh hai jo mere pan ke adhikaar ka bhi tyaag kar de।

maateshvari ji ke madhur mahaavaakyah

“man ke ashaanti ka kaaran hai karmabandhan aur shanti ka aadhaar hai karmaateet''

vaastav mein harek manushya ki yeh chaahna avashya rehti hai ki hamko man ki shanti praapta ho jaave isliye anek prayatna karte aaye hain magar man ko shanti ab tak praapta nahin hui, iska yathaartha kaaran kya hai? ab pahle to yeh soch chalna zaroori hai ki man ke ashaanti ki pahli jad kya hai? man ki ashaanti ka mukhya kaaran hai - karmabandhan mein phansana। jab tak manushya in paanch vikaaron ke karmabandhan se nahin chhoote hain tab tak manushya ashaanti se chhoot nahin sakte। jab karmabandhan toot jaata hai tab man ki shanti arthaat jeevanmukti ko praapta kar sakte hain। ab soch karna hai - yeh karmabandhan toote kaise? aur use chhutkaara dene vaala kaun hai? yeh to ham jaante hain koi bhi manushya aatma kisi bhi manushya aatma ko chhutkaara de nahin sakti। yeh karmabandhan ka hisaab-kitaab todne vaala sirf ek paramatma hai, vahi aakar is gyaan yogbal se karmabandhan se chhudaate hain isliye hi paramatma ko sukh daata kaha jaata hai। jab tak pahle yeh gyaan nahin hai ki main aatma hoon, asul mein main kiski santaan hoon, mera asli gun kya hai? jab yeh buddhi mein aa jaae tab hi karmabandhan toote। ab yeh knowledge humein paramatma dvaara hi praapta hoti hai goya paramatma dvaara hi karmabandhan tootte hain। achha। om shanti।