Daily Murli for Wednesday 13 December 2023

13-12-2023 praatahmurli om shanti "baapdaada"' madhuban

“meethe bachche - tumhaara roohaani yog hai ever pure banne ke liye kyonki tum pavitrata ke saagar se yog lagaate ho, pavitra duniya sthaapan karte ho''

prashn:- nishchaybuddhi bachchon ko pahle-pahle kaun-sa nishchay pakka hona chaahiye? us nishchay ki nishaani kya hogi?

uttar:- ham ek baap ke bachche hain, baap se hamko daivi svaraajya milta hai yeh pahle-pahle pakka nishchay chaahiye। nishchay hua to phauran buddhi mein aayega ki hamne jo bhakti ki hai woh ab poori hui, ab svayan bhagwan humein mila hai। nishchaybuddhi bachche hi vaaris bante hain।

geet:- O door ke musaaphir…

om shanti। baap baith bachchon ko samjhaate hain door ke musaaphir to sab hain। sab aatmaayen door se door paramdham ki rahne vaali hain। yeh bhi shaastron mein hai। aatma door rehti hai, jahaan soorya chaand ki roshni nahin rehti। mool vatan aur sookshm vatan mein koi drama nahin hai। drama is sthoolavtan ka hai, jisko hi manushya srishti kaha jaata hai। mool vatan aur sookshm vatan mein koi 84 janmon ka chakra nahin hai। chakra manushya srishti mein dikhaaya jaata hai। manushya srishti kya cheez hai, manushya kiska bana hua hai? manushya mein ek to aatma hai, doosra shareer hai। 5 tatvon ka putla banta hai। usmein aatma pravesh kar part bajaati hai। to door ke vaasi to sab hain। parantu tum nishchay karte ho। manushyon mein nishchay nahin hai। baap ne samjhaaya hai mujhe doordesh ka rahne vaala kehte ho parantu tum sab aatmaon ka nivaas sthaan ek hai। us naatak mein jo part bajaate hain usmein to har ek ka apna-apna ghar hota hai na। vahaan se aakar part bajaate hain। yahaan tum bachche samajhte ho ham sab ek hi baap ke bachche hain, ek hi ghar paramdham mein rahne vaale hain। woh hai brahm mahtatva, yeh hai aakaash tatva। yahaan part bajaate hain, raat-din hota hai isliye soorya-chaand bhi hain। mool vatan mein to din-raat nahin hota hai। yeh soorya-chaand koi devta nahin hain। yeh to maandave ko roshan karne vaali battiyaan hain। din mein soorya roshni deta hai, raat mein chaand ki roshni hoti hai। abhi sab manushya chaahte hain muktidhaam mein jaayen। jaante hain bhagwan oopar mein rehta hai। bhagwan ko bhi yaad karenge - he parampita paramatma, to buddhi oopar chali jaayegi। aatma samajhti hai parantu agyaan chhaaya hua hai। yeh bhi jaante hain ham yahaan ke rahne vaale nahin hain। hamaara baap woh hai। mukh se O god father kehte bhi hain। phir kah dete hain sab father hain, god sarvavyaapi hai। bachchon ko samjhaaya hai sab to father hain nahin। sab aatmaayen aapas mein brothers hain। yeh na jaanne kaaran ladte-jhagadte rehte hain। tum aatmaayen brothers ho, ek baap ki santaan bane ho। nishchaybuddhi bhi nambarvaar hain। laukik sambandh mein nishchay rehta hi hai ki baap se varsa paana hai। yahaan baap se maaya ghadi-ghadi munh pher deti hai। sarvashaktimaan baap ke bante ho to maaya bhi sarvashaktimaan hokar ladti hai। paanch vikaaron par jeet paane ki yuddha hai। yuddha to mashhoor hai। baaki shaastron mein jo kaurav-paandav dikhaaye hain woh baat hai nahin। yeh raavan ke saath yuddha badi bhaari hai। ham chaahte hain ki baap ki yaad mein rahkar ham sampoorn banen, aatma pure banen। aur to koi bhi raasta hai nahin sivaae yog ke। aur jo bhi yog seekhte hain woh koi purity ke liye nahin hai। woh to sab sthool yog hain, alpa-kaal ke liye aur yeh roohaani yog hai ever pure hone ke liye। pavitrata ke saagar ke saath ham yog lagaane se pavitra bante hain। baap kehte hain is yog agni se tumhaare janma-janmaantar ke paap bhasma hote hain। buddhi bhi kehti hai yeh patit duniya hai। koi se bhi poochho - yeh satayug hai ya kaliyug? to isko satayug koi bhi nahin kahenge। satayug to nai duniya thi। usko golden ej, isko iron ej kaha jaata hai। puraani duniya ko kaliyug aur nai duniya ko satayug kaha jaata hai। aise kah nahin sakte ki abhi satayug bhi hai to kaliyug bhi hai। nahin, narkavaasi maana hi narkavaasi। puraani duniya ko patit, nai duniya ko paavan duniya kahenge। manushyon ke liye hi samjhaaya jaata hai, jaanvar thode hi kahenge patit-paavan aao। koi se bhi poochho to kahenge yeh narka hai। bhaarat hi nai duniya svarga tha, bhaarat hi puraani duniya narka hai। bhaarat par hi jor dete raho। doosre sab to beech mein aate hain। usse hamaara tailuk nahin। hamaara dharma hi alag hai, jo ab praayah lop ho gaya hai।

abhi tum nishchaybuddhi bane ho। jaante ho ham ek baap ke bachche hain। baap se hamko svaraajya milta hai। pahle to yeh pakka nishchay chaahiye। gyaan sunte hain, woh to theek hai। praja ban jaati hai। baaki ham behad baap ke bachche hain - yeh nishchay ho jaae, samjhen hamne bhakti ki hai bhagwan se milne ke liye। abhi bhakti poori hoti hai। ab bhagwan svayan aakar mila hai। unse sooryavanshi svaraajya pad milta hai। ham itna oonch pad paate hain। jaise saahookaar log bachche ko god mein lete hain na। woh to ek bachcha lete hain। yahaan to behad ke baap ko anek bachche chaahiye। kehte hain jo mera bachcha banega unko svarga ka varsa milega। jo mera nahin bante to varsa le na saken। shreemat par hi nahin chalte। jinko nishchay ho jaata hai woh to kehte baba aap phir se aaye ho, bas, ham to aapka haath nahin chhodenge। baap bachchon ko samjhaate hain, bachche phir doosron ko samjhaate hain ki ham paarlaukik baap ke bachche bane hain। unki shreemat par ham chalte hain, hamko parampita paramatma padhaate hain। itne sab bi.ke. bane hain to zaroor nishchay hai, to ham bhi kyon na banen। likh karke bhej den ki ham aapke bane hain। baap kahenge ham koi door thode hi hain। ham to yahaan baithe hain, haazir hain। yahaan practical mein baithe hain। jaise president ke liye kahenge ki is srishti par haazir hai to iska matlab yeh nahin hai ki president sarvavyaapi hai। aisa parampita paramatma, jisko sukh karta duhkh harta kaha jaata hai woh sarvavyaapi nahin ho sakta। unki haaziri mein manushya itne duhkhi kaise ho sakte? jabki baap ki gairhaaziri (svarga) mein bhi koi duhkhi nahin rehta।

baap ne bachchon ke liye ghonsala banaaya hai। jaise chidiya bachchon ke liye ghonsala banaati hai, to baap bhi tumhaare liye tumhaare dvaara hi aakhera (ghonsala) banvaate hain। tumhaare hi rahne ke liye svarga ka aakhera ban raha hai। baap kehte hain tum meri mat par chalenge to svarga me raajya karenge। agar poora nishchay ho to ekdam pakad leven। aise bhi nahin ki yahaan baith jaana hai। gharbaar to chhodna nahin hai। woh to gharbaar chhodte hain। guru ko bhagwan samajhte hain। woh koi jeete ji marte nahin hain। tumko to jeete ji markar phir satayug mein jeena hai। tum baap se behad ka varsa lete ho। jab nishchay hua ki behad ka baap padhaate hain 21 janmon ka varsa dete hain to unki shreemat par chalna pade। bachcha bana to baap direction denge। pahle to ek haphta bhatthi mein baitho। tumko roz knowledge milti rahegi। sab to ek jaise nahin samajhte hain, har ek apne purooshaartha aur takdeer anusaar paate hain। purooshaartha aur takdeer ke oopar hi hota hai। pata lag jaata hai ki takdeer mein kya hai? kya pad paayenge? baap ka bankar phir grihastha vyavhaar mein bhi rehna hai। achha, grihastha vyavhaar nahin hai to jaakar andhon ki laathi bano। satya naaraayan ki katha sunaane zaroor jaana hai।

ab dekho, prem bachchi seva par gai hai। jinhonne nimantran diya unhonne aajayaan ki, bahuton se mulaakat karaai, prabhaavit hue। parantu baba kahe - nishchaybuddhi ek bhi nahin hain ki inhon ko behad ka baap padhaata hai, jisse 21 janmon ka varsa milta hai। prabhaavit hote hain parantu aise thode hi nishchay hua ki barobar gyaan ka saagar baap padha rahe hain। haan, sirf kahenge bahut achha hai। jaise hi baahar gaye phir khalaas। koi birla hi purooshaartha karenge। bhal aapas mein satsang karenge parantu jo karenge woh bhi nishchaybuddhi nahin। half caste kaha jaata hai। nishchay aur sanshay। abhi kahenge baap padhaate hain, abhi kahenge ki yeh kaise ho sakta hai? haan, pavitra banna achha hai parantu pavitrata mein rehna bada mushkil hai। pahle to nishchay chaahiye। gadgad hokar likhe। jaise baandheli gopikaayen patra likhti hain vaise chhutele kabhi likhte thode hi hain। baba likh dete hain ki ek ko bhi nishchaybuddhi nahin banaaya hai। haan, saadhaaran praja banaai, vaaris nahin banaaya। ek bhi nishchaybuddhi nahin bana hai। nishchaybuddhi hi vaaris bante hain। koi bhal nishchaybuddhi hain parantu gyaan nahin uthaate hain to usi gharaane ke andar jaakar daas-daasi bante hain। aage jaakar accurate saakshaatkaar hoga। pata bhi padega ki ham daas-daasi kaun-se number mein banenge? phir bahut pachhtaayenge। ham to shreemat par chale nahin tab yeh haal hua। phir bhi har haalat mein kahenge drama। inka drama mein aise hi kalpa-kalpaantar ka part hai। saakshaatkaar hona hi hai। pichhaadi mein result nikalni hai। phir kahenge bhaavi। hamaari takdeer mein yeh tha, tumhaari padhaai ki result aayegi। yeh to bada bhaari school hai। padhaane vaala ek hi hai, ek hi padhaai hai, ek hi imtahaan hai। teacher jaante hain yeh student kaisa hai, sab gallop karte rehte hain। aage chalkar bahut kuchh pata lag jaayega। ghadi-ghadi tum dhyaan mein chale jaayenge। jaise shuru mein jaate the। aap bhi samajhte rehte ho, baap bhi samjhaate rehte hain। tum gaphlat karte ho, shreemat par nahin chalte ho। aise chalte-chalte aadat pad jaati hai। bhal tum poochho - shivbaaba ham aapki shreemat par chalte hain? baba bata denge tum nahin chalte ho tab tumhaari takdeer aise dikhaai padti hai। samjha jaata hai abhi dasha kharaab hai, aage chalkar khul bhi jaae। koi kaam ke halke nashe mein girte hain। bhaarat paavan tha, shreshthaachaari tha jo ab bhrashtaachaari hai। un shreshtha devtaaon ki mahima to hai na। baap kehte hain yeh hai hi aasuri sampradaay, main aaya hoon daivi sampradaay sthaapan karne। yeh devi-devta dharma hai oonch te oonch। baap hi patit-paavan hai। parantu manushya kuchh bhi samajhte nahin hain। jo bhi dharma sthaapan karne aate hain - pavitra zaroor bante hain। har ek baat mein achhe aur bure hote hain। kam takdeer aur achhi takdeer vaale hain। ab yeh raavan raajya khatma hona hai। is raavan ki nagri ko aag lagni hai। tum raam ki sena baithe ho। jo is dharma ke honge woh samajhte jaayenge। nambarvaar samajhte hain। koi ko ek hi teer janak muaaphik lagne se surrender ho jaate hain। woh koi bhi bahaana nahin karenge। bahaana ismen chal na sake। parantu maaya ke toofaan bhi bahut aate hain। apne gharaane ko hi bhula dete hain ki ham eeshvareey santaan hain। to bachchon ko bahut meetha banna hai। kaam ka jara bhi nasha nahin chaahiye। kaam bada hi mahaashatru hai। yahi sabse badi bhaari pareeksha hai। baba kehte - bachche, ikatthe rah pavitra bankar dikhaao। baap bachchon ki avastha ko jaante hain। nishchaybuddhi vaale baap ko apna samaachaar denge ki baba main aapko yaad karta hoon, yeh aapki seva karta hoon। service ka samaachaar likhen tab vishvaas rakhoon। service ka saboot dikhaaye tab baba samjhe ismen ummeed achhi dikhaai padti hai aur phir yeh bhi samajhna chaahiye ki baba akela hai, ham bachche bahut hain। aise nahin, baba ko roz-roz response dena padega। nahin, baap hai hi gareeb nivaaz। daan gareeb ko diya jaata hai। yeh bhaarat khanda gareeb hai। bhaarat hi saahookaar se gareeb hua hai। yeh kisko bhi pata nahin padta hai। yeh bhaarat hi avinaashi khanda hai, jahaan bhagwan avtaar lete hain। bhaarat sone ki chidiya tha arthaat sarva sukhon ka bhandaar tha। jis sukhdhaam mein jaane ke liye ham sab purooshaartha kar rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi bahaana na kar baap ki shreemat par chalte rehna hai। service ka saboot dena hai।

2) ham eeshvareey santaan hain, hamaara oonch te oonch gharaana hai, yeh bhoolna nahin hai। nishchaybuddhi banna aur banaana hai।

vardaan:- shreshtha svamaan ki seat par rah sarva ko sammaan dene vaale sarva ke maanneey bhav

sada apne shreshtha svamaan mein sthit rahkar, nirmaan ban sabko sammaan dete chalo to yeh dena hi lena ban jaayega। sammaan dena arthaat us aatma ko umang-ulhaas mein laakar aage karna। sada svamaan mein rahne se sarva praaptiyaan svatah ho jaayengi। svamaan ke kaaran vishwa sammaan degi aur sarva dvaara shreshtha maan milne ke paatra, maanneey ban jaayenge।

slogan:- jo sarva ko regard deta hai uska record svatah theek ho jaata hai।