Daily Murli for Wednesday 27 December 2023

27-12-2023 praatahmurli om shanti "baapdaada"' madhuban

“meethe bachche - devtaaon se bhi uttam kalyaankaari janma tum braahmanon ka hai kyonki tum brahman hi baap ke madadgaar bante ho''

prashn:- abhi tum bachche baba ko kaun-si madad karte ho? madadgaar bachchon ko baap kya prize dete hain?

uttar:- baba purity pees ka raajya sthaapan kar rahe hain, ham unhein purity ki madad karte hain। baba ne jo yagya racha hai uski ham sambhaal karte hain to zaroor baba humein prize dega। sangam par bhi humein bahut badi prize milti hai, ham srishti ke aadi-madhya-ant ko jaanne vaale trikaaldarshi ban jaate hain aur bhavishya mein gaddi nasheen ban jaate hain, yahi prize hai।

geet:- pitu maat sahaayak svaami sakha…

om shanti। yeh kiski mahima hai? yeh hai parmapriy parampita paramatma jinka naam shiv hai, unki mahima। unka oonch te oonch naam bhi hai to oonche te ooncha dhaam bhi hai। parampita param aatma ka bhi arth hai - sabse oonche te oonchi aatma। aur kisko bhi parampita paramatma nahin kaha jaata। uski mahima aprampaar hai। aise kehte hain ki itni to mahima hai jo uska paar nahin pa sakte। rishi-muni bhi aise kehte the ki uska paar nahin pa sakte। vo bhi neti-neti kehte aaye hain। ab baba svayan aakar apna parichay dete hain। kyon? baba ka parichay to hona chaahiye na। to bachchon ko parichay mile kaise? jab tak woh is bhoomi par na aaye tab tak aur koi unka parichay de na sake। jab father shows san, tab san shows father। baap samjhaate hain mera bhi part noondha hua hai। mujhe hi aakar patiton ko paavan karna hai। saadhu-santa bhi gaate rehte hain - patit-paavan seetaaraam aao kyonki raavan ka raajya hai, raavan koi kam nahin hai। saari duniya ko tamopradhaan patit kisne banaaya? raavan ne। phir paavan banaane vaala samartha raam hai na। aadhaakalpa raam raajya hai to aadhaakalpa raavan ka bhi raajya chalta hai। raavan kya hai, yeh koi nahin jaante। varsha-varsha jalaate rehte hain। to bhi raavan ka raajya chalta rehta hai। jalta thode hi hai। manushya kehte hain paramatma samartha hai, to raavan ko raajya karne kyon dete hain। baap samjhaate hain yeh naatak hai haar jeet ka, hell aur heaven ka। bhaarat par hi saara khel bana hua hai। yahi bana banaaya drama hai। aise nahin parampita sarvashaktimaan hai to khel poora hone ke pahle hi aayega ya aadhe mein khel ko banda kar sakta hai। baap kehte hain jab saari duniya patit ho jaati hai tab main aata hoon isliye shivraatri bhi manaate hain। shivaae namah bhi kehte hain। brahma, vishnu, shankar ko phir bhi devta namah kahenge। shiv ko paramatma namah kahenge। shiv kya aisa hi hai jaisa babulnaath mein ya somnaath ke mandir mein hai? kya parampita paramatma ka itna bada roop hai? va aatma ka chhota, baap ka bada hai? question aayega na? jaise yahaan chhote ko bachcha, bade ko baap kaha jaata hai, vaise parampita paramatma anya aatmaon se bada hai aur ham aatmaayen chhoti hain? nahin। baap samjhaate hain - bachche, meri mahima gaate ho, kehte ho paramatma ki mahima aprampaar hai। manushya srishti ka beej hai, to pita ko beej kahenge na। woh creator hai। baaki jo itne ved, upnishad, geeta, yagya, tap, daan, punya.... yeh sab hai bhakti ki saamagri। inka bhi apna time hai। aadha kalpa bhakti ka, aadha kalpa gyaan ka। bhakti hai brahma ki raat, gyaan hai brahma ka din। yeh shivbaaba tumko samjhaate hain, inko apna tan to hai nahin। kehte hain main tumko phir se raajayog sikhlaata hoon raajya-bhaagya dilaane liye। ab brahma ki raat poori hoti hai, vahi dharma glaani ka samay aa pahuncha hai। sabse jaasti glaani kiski karte hain? parampita paramatma shiv ki। likha hai na yada yadaahi..... aise nahin, mainne kalpa pahle koi sanskrit mein gyaan diya hai। bhaasha to yahi hai। to jab bhaarat mein devi-devta dharma sthaapan karne vaale ki glaani hoti hai, mujhe thikkar-bhittar mein thok dete hain, tab main aata hoon। jo bhaarat ko svarga banaate hain, patiton ko paavan banaate hain, uski kitni glaani ki hai।

tum bachche jaante ho bhaarat hai sabse puraana khanda, jo kabhi vinaash nahin hota hai। satayug mein lakshmi-naaraayan ka raajya bhi yahaan hi hota hai। yeh raajya bhi svarga ke rachayita ne diya hai। ab to vahi bhaarat patit hai tab phir main aata hoon, tab to unki mahima gaate hain shivaae namah। is behad ke drama mein har ek aatma ka part noondha hua hai, jo repeat hota hai। jisse hi koi tukda nikaal had ka drama banaate hain। abhi ham brahman hain phir devta banenge। yeh hai eeshvareey varna। yeh hai tumhaara 84ven janma ka bhi ant। ismen chaaron varnon ka tumko gyaan hai isliye brahman varna sabse oonch hai। parantu mahima va pooja devtaaon ki hoti hai। brahma ka mandir bhi hai parantu koi ko pata nahin ki ismen paramatma aakar bhaarat ko svarga banaate hain। jab sthaapna ho rahi hai to vinaash bhi chaahiye isliye kehte hain ki roodra gyaan yagya se vinaash jvaala nikli।

ab vahi baap bachchon ko samjha rahe hain - meethe bachche, ab yeh tumhaara antim janma hai main tumko phir se svarga ka varsa dene aaya hoon। tumhaara hak hai, parantu jo meri shreemat par chalenge unko main svarga ki prize doonga। unhein bhi pees prize aadi milti hai। parantu baap to tum sabko svarga ki prize dete hain। kehte hain main nahin loonga। main tumhaare dvaara sthaapna karaata hoon to tumko hi doonga। tum ho shivbaaba ke potre, brahma ke bachche। itne bachche to prajaapita brahma hi adopt karte honge na। yeh brahman janma tumhaara sabse uttam hai। yeh kalyaankaari janma hai। devtaaon ka janma ya shoodron ka janma kalyaankaari nahin hai। yeh tumhaara janma bahut kalyaankaari hai kyonki baap ka madadgaar ban srishti par purity, pees sthaapan karte ho। woh inaam dene vaale thode hi jaante hain। vo to koi American aadi ko de dete hain। baap phir kehte hain jo mere madadgaar banenge main unko prize doonga। purity hai to srishti mein pees, prosperity bhi hai। yeh to veshyaalay hai। satayug hai shivaalay। shivbaaba ne sthaapan kiya hai। saadhu sannyaasi hain hathayogi, grihastha dharma vaalon ko sahaj raajayog to sikha nahin sakte। bhal hajaar baar geeta mahaabhaarat padhen। yeh to sabka baba hai। sabhi dharma vaalon ko kehte hain ki apna buddhiyog ek mere se lagaao। main bhi chhota-sa bindu hoon, itna bada nahin hoon। jaisi aatma vaisa hi main paramatma hoon। aatma bhi yahaan bhrakuti ke beech mein rehti hai। itni badi hoti to yahaan kaise baith sakti। main bhi aatma jaisa hi hoon। sirf main janma-maran rahit sada paavan hoon aur aatmaayen janma-maran mein aati hain। paavan se patit aur patit se paavan hoti hain। ab phir se patiton ko paavan banaane ke liye baap ne yeh roodra yagya racha hai। iske baad satayug mein koi yagya nahin hota। phir dvaapar se anek prakaar ke yagya rachte rehte hain। yeh roodra gyaan yagya saare kalpa mein ek hi baar racha jaata hai, ismen sabki aahuti pad jaati hai। phir koi yagya nahin racha jaata। yagya rachte tab hain jab koi aaphten aati hain। barsaat nahin padti hai va anya koi aaphten aati hain to yagya karte hain। satayug-treta mein to koi aaphten aati nahin। is samay anek prakaar ki aaphten aati hain isliye sabse bade seth shivbaaba ne yagya rachvaaya hai to pahle se hi saakshaatkaar karaate hain। kaise sab aahuti padni hai, kaise vinaash hona hai, puraani duniya kabristaan banni hai। to phir is puraani duniya se kya dil lagaani hai isliye tum bachche behad puraani duniya ka sannyaas karte ho। woh sannyaasi to sirf gharbaar ka sannyaas karte hain। tumko to gharbaar nahin chhodna hai। yahaan grihastha vyavhaar sambhaalte bhi isse sirf mamatva todna hai। yeh sab mare pade hain, inse kya dil lagaana। yeh to murdon ki duniya hai, isliye kehte hain ki paristaan ko yaad karo, kabristaan ko kyon yaad karte ho।

baba bhi dalaal ban tumhaari buddhi ka yog apne saath lagaate hain। kehte hain na aatma-paramatma alag rahe bahukaal..... yeh mahima bhi unki hai। kaliyugi guru ko patit-paavan kah nahin sakte। woh sadgati to kar nahin sakte। haan shaastra sunaate hain, kriya-karma karaate hain। shivbaaba ka koi teacher, guru nahin। baba to kehte main to tumko svarga ka varsa dene aaya hoon। phir soorya-vanshi bano, chaahe chandravanshi bano। woh kaise bante hain, ladaai se? nahin। na lakshmi-naaraayan ne ladaai se raajya liya, na raam-seeta ne। inhonne is samay maaya se ladaai ki hai। tum incognito warriors ho isliye tum shakti sena ko koi jaante nahin। tum yogbal se saare vishwa ke maalik bante ho। tumne hi vishwa ka raajya ganvaaya hai phir tum hi pa rahe ho। tumko prize dene vaala baap hai। ab jo baap ke madadgaar banenge unko hi aadhaakalpa ke liye pees, prosperity ki prize milegi। baba madadgaar unhein kehte hain jo ashareeri hokar baap ko yaad karte hain, svadarshan chakra phiraate hain, shantidham, sweet hom aur sweet raajdhaani ko yaad kar pavitra bante hain। kitna sahaj hai। ham aatma bhi star hain। hamaara baap paramatma bhi star hai। woh itna koi bada nahin hai parantu star ki pooja kaise ho isliye pooja ke liye itna bada bana diya hai। pooja to pahle baap ki hoti hai, peechhe doosron ki hoti hai। lakshmi-naaraayan ki kitni pooja hoti hai। parantu unko aisa banaane vaala kaun? sabka sadgati daata baap। balihaari us ek ki hai na। unki jayanti (birth) diamond tulya hai। baaki sabke birth kaudi tulya hain। shivaae namah - yeh unka yagya hai, tum braahmanon se rachvaaya hai। kehte hain jo mujhe purity pees sthaapan karne mein madad karenge unko itna phal doonga। braahmanon se yagya rachvaaya hai to dakshina to denge na। itna bada yagya racha hai। aur koi bhi yagya itna samay nahin chalta hai। kehte hain jo jitna mujhe madad karenge utni prize doonga। sabko prize dene vaala main hoon। main kuchh nahin leta hoon, sab tumko deta hoon। ab jo karega so paayega। thoda karega to praja mein chala jaayega। gaandhi ko bhi jinhonne madad ki to prezeedent, minister aadi bane na। yeh to hai alpakaal ka sukh। baap to tumko saare aadi-madhya-ant ka gyaan de aap samaan trikaaldarshi banaate hain। kehte hain meri biography ko jaanne se tum sab kuchh jaan jaayenge। sannyaasi thode hi yeh gyaan de sakte hain। unse varsa kya milega। woh to gaddi bhi ek ko denge। baaki ko kya milta hai? baba to tum sabko gaddi dete hain। kitni nishkaam seva karte hain aur tumne to mujhe thikkar-bhittar mein daal kitni glaani ki hai। yeh bhi drama bana hua hai। jab kaudi jaise ban jaate ho tab tumko heere jaisa banaata hoon। mainne to anginat baar bhaarat ko svarga banaaya hai phir maaya ne narka banaaya hai। ab agar praapti karni hai to baap ke madadgaar ban sachchi prize le lo। ismen purity first hai।

baba sannyaasiyon ki bhi mahima karte hain - woh bhi achhe hain, jo pavitra rehte hain। yeh bhi bhaarat ko thaamte (girne se bachaate) hain। nahin to pata nahin kya ho jaata। parantu ab to bhaarat ko svarga banaana hai to zaroor ghar grihastha mein rehte pavitra banna pade। baap-daada donon bachchon ko samjhaate hain। shivbaaba bhi is puraani jutti dvaara bachchon ko raay dete hain। nai le nahin sakte। maata ke garbha mein to aate nahin। patit duniya, patit shareer mein hi aate hain, is kaliyug mein hai ghor andhiyaara। ghor andhiyaare ko hi sojhra banaana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is behad ki duniya ka dil se sannyaas kar apna mamatva mita dena hai, isse dil nahin lagaani hai।

2) baap ka madadgaar ban prize lene ke liye - 1. ashareeri banna hai, 2. pavitra rehna hai, 3. svadarshan chakra phiraana hai, 4. sweet hom aur sweet raajdhaani ko yaad karna hai।

vardaan:- visheshtaaon ko saamne rakh sada khushi-khushi se aage badhne vaale nishchaybuddhi vijayi ratna bhav

apni jo bhi visheshtaayen hain, unko saamne rakho, kamjoriyon ko nahin to apne aapmen faith rahega। kamjori ki baat ko jyaada nahin socho to phir khushi mein aage badhte jaayenge। yeh nishchay rakho ki baap sarvashaktimaan hai to uska haath pakadne vaale paar pahunche ki pahunche। aise sada nishchaybuddhi vijayi ratna bante hain। apne aapmen nishchay, baap mein nishchay aur drama ki har scene ko dekhte hue usmein bhi poora nishchay ho tab vijayi banenge।

slogan:- purity ki royalty mein raho to had ki aakarshanon se nyaare ho jaayenge।