Daily Murli for Monday 8 January 2024

08-01-2024 praatahmurli om shanti "baapdaada"' madhuban

“meethe bachche - baap ki yaad mein rah sada harshit raho। yaad mein rahne vaale bahut ramneek aur meethe honge। khushi mein rah service karenge।''

prashn:- gyaan ki masti ke saath-saath kaun si checking karna bahut zaroori hai?

uttar:- gyaan ki masti to rehti hai lekin check karo dehi-abhimaani kitna bane hain? gyaan to bahut sahaj hai lekin yog mein maaya vighna daalti hai। grihastha vyavhaar mein anaasakta ho rehna hai। aisa na ho maaya choohi andar hi andar kaatti rahe aur pata bhi na pade। apni nabz aapehi dekhte raho ki baba ke saath hamaara haddi pyaar hai? kitna samay ham yaad mein rehte hain?

geet:- jale kyon na parvaana…

om shanti। meethe-meethe bachchon ne geet ki line suni। jabki baap itna jalva dikhaate hain, tum itne haseen ban jaate ho to kyon na aise baap ka ban jaana chaahiye, jo baap shyaam se sundar banaate hain। bachche samajhte hain ham saanvare se gore bante hain। ek ki baat nahin hai। vo log shreekrishna ko shyaam-sundar kah dete hain। chitra bhi aisa banaate hain। koi sundar to koi shyaam। manushya samajhte nahin ki yeh ho kaise sakta hai। satayug ka prince shreekrishna saanvara ho na sake। shreekrishna ke liye to sab kehte hain shreekrishna jaisa bachcha mile, pati mile। phir woh shyaam kaise ho sakta hai। kuchh bhi samajhte nahin hain। shreekrishna ko saanvara (shyaam) kyon banaaya hai, kaaran chaahiye। yeh jo dikhaate hain sarpa par dance kiya - aisi baat to ho na sake। shaastron mein aisi-aisi baaten sunkar kah dete hain। vaastav mein aisi koi baaten hain nahin। jaise chitron mein dikhaate hain sheshnaag ki shaiya par naaraayan baitha hai, aisi koi sarpa ki shaiya aadi hoti nahin। itne saikdon mukh hote hain kya? kaise-kaise chitra baith banaaye hain। baap samjhaate hain inmen kuchh bhi rakha nahin hai, yeh sab bhakti maarga ke chitra hain। parantu yeh bhi drama mein noondh hai। shuru se lekar is samay tak jo naatak shoot hua hai unko phir repeat karna hai। yeh sirf samjhaaya jaata hai ki bhakti mein kya-kya karte hain। kitna kharcha karte hain। kaise kaise chitra aadi banaate hain। aage jab yeh sab dekhte the to itna wonder nahin khaate the। ab jab baap ne samjhaaya hai to buddhi mein aata hai barobar yeh sab bhakti maarga ki baaten hain। bhakti mein jo kuchh hota hai woh phir bhi zaroor hoga। sivaae tumhaare aur koi bhi yeh samajh na sake। yeh to jaante ho drama mein jo pahle se noondh hai, vahi hota rehta hai। anek dharmon ka vinaash ek dharma ki sthaapna hoti hai। ismen bada kalyaan hai। abhi tum yeh praarthana aadi kuchh nahin karte ho। woh sab karte hain bhagwan se phal lene ke liye। phal hai jeevanmukti, to yeh sab samjhaaya jaata hai। yahaan hai praja ka praja par raajya। geeta mein hai bhaaratvaasi kaurav paandav kya karat bhaye। barobar yaadvon ne moosal nikaale। apne kul ka vinaash kiya। yeh sab aapas mein dushman hain। tum news aadi sunte nahin ho, jo sunte hain woh achhi tarah se samajh sakte hain। dinapratidin andar khitpit bahut hai। hain to sab Christian parantu andar khitpit bahut hai, ghar baithe hi ek do ko uda denge। tum raajayog seekh rahe ho to raajaai karne ke liye puraani duniya ki saphaai zaroor chaahiye। phir nai duniya mein sab kuchh naya hoga। 5 tatva bhi vahaan satopradhaan honge। samudra ki taakat nahin jo uchhalkar nuksaan kar de। abhi to 5 tatva kitna nuksaan karte hain। vahaan saari prakriti daasi ho jaayegi isliye duhkh ki koi baat nahin। yeh bhi bana banaaya drama ka khel hai। svarga kaha jaata hai satayug ko, Christian log bhi kehte hain pahle-pahle heaven tha। bhaarat avinaashi khanda hai। sirf unhon ko pata nahin ki hamko liberate karne vaala baap bhaarat mein aata hai। shiv jayanti bhi manaate hain to bhi samajh nahin sakte hain। abhi tum samjhaate ho ki bhaarat mein shiv jayanti manaai jaati hai, zaroor shivbaaba ne bhaarat mein aakar heaven banaaya hai, ab phir bana rahe hain। jo praja banne vaale honge unhon ki buddhi mein kuchh bhi baithega nahin। jo raajdhaani vaale honge woh samjhenge barobar ham shiv-baba ke bachche hain। prajaapita brahma bhi hai। liberator, gyaan ka saagar khud baba hai। brahma ko nahin kahenge। brahma bhi unse liberate hota hai। liberate sabko ek baap hi karte hain kyonki sab tamopradhaan hain। aise andar mein vichaar saagar manthan chalna chaahiye। ham aisi murli chalaayen jo manushya jhat samajh jaayen। bachche nambarvaar to hain hi। yeh hai knowledge, inki roz study karni chaahiye। dar ke maare padhaai na padhna, yeh to theek nahin hai। phir kahenge karmabandhan hai। dekho, shuru mein kitne chhootkar aaye phir kai chale bhi gaye। sindha mein bahut bachchiyaan aai phir hangaame ke kaaran kitne dushman ban pade। pahle unhon ko gyaan bahut achha lagta tha। samajhte the inko dot (bhagwan ki den) mili hui hai। ab bhi aise samajhte hain ki koi shakti hai, yeh nahin samajhte ki paramatma ki praveshta hai। aajkal riddhi siddhi ki taakat to bahuton mein hai। geeta uthaakar sunaate rehte hain। baap kehte hain yeh sab bhakti maarga ki pustake hain। gyaan ka saagar to main hoon। mujhe hi bhakti maarga mein sab yaad karte hain। drama plan anusaar yeh bhi drama mein noondh hai। saakshaatkaar bhi hote hain। bhakti maarga vaalon ko bhi raazi karte hain। gyaan nahin uthaate to unke liye bhakti bhi achhi phir bhi manushya sudharte to hain na। chori aadi nahin karenge। bhagwan ka bhajan karne vaalon ke liye kabhi bhi ulti baaten nahin karenge। phir bhi bhakta hain। aajkal to bhal bhakta hain phir bhi bahut devaala maar dete hain। aise nahin ki shivbaaba ka bachcha bana to devaala nahin maarenge। past ka karma hai to devaala maarte hain। gyaan mein aane se bhi devaala maar dete hain, ismen gyaan ka koi tailuk nahin।

tum bachche ab service par lage hue ho। samajhte ho shreemat par service mein lagne se phal paayenge। hamko sab kuchh vahaan transfer karna hai। bag baggage sab kuchh transfer kar dena hai। baba ko shuru mein bahut maja aaya tha। vahaan se jab nikla to geet banaaya-alpha ko mila allaah, be ko mili baadshaahi.... shreekrishna ka, chaturbhuj ka saakshaatkaar hua samjha dvaarika ka baadshaah banoonga। aisa nasha chadhta tha। ab yeh vinaashi paisa kya karenge। to tum bachchon ko bhi khushi honi chaahiye। hamko baba svarga ki baadshaahi dete hain। parantu bachche itna purushaartha hi nahin karte hain। chalte-chalte gir padte hain। achhe-achhe bachche, baba ko nimantran dene vaale kabhi baba ko yaad nahin karte। baba ke paas patra aana chaahiye ki baba ham bahut khush hain। aapki yaad mein masta rehte hain। bahut hain jo kabhi yaad nahin karte। yaad ki yaatra se hi khushi jor se chadhegi। gyaan mein bhal kitna bhi masta rehte hain parantu deh-abhimaan kitna hai। dehi-abhimaani-pana kahaan hai? gyaan to bada easy hai। yog mein hi maaya vighna daalti hai। grihastha vyavhaar mein bhi anaasakta ho rehna hai। aisa na ho jo maaya angoori laga de। maaya kaatti aise hai jaise chooha। chooha aise kaatta hai jo bhal khoon nikal aaye par pata na pade। bachchon ko pata nahin padta ki deh-abhimaan aane se kitna nuksaan hota hai। oonch pad pa nahin sakenge। baap se poora varsa lena chaahiye। mama baba muaaphik ham bhi takhtansheen banen। baap hai dil lene vaala। delvaada mandir mein bhi poora yaadgaar hai, andar haathiyon par mahaarthi baithe hain। tumhaare mein bhi mahaarthi, ghodesvaar, pyaade hain। har ek ko apni-apni nabz dekhni hai। baba kyon dekhe। tum apne ko dekho ham baba ko yaad karte hain aur baba misal service karte hain! hamaara baba ke saath yog hai! raat ko jaagkar baba ko yaad karte hain? ham bahuton ki service karte hain? chart rakhna chaahiye - baba ko haddi (jigri) kitna yaad karte hain? koi samajhte hain ham nirantar yaad karte hain, yeh nahin ho sakta। kai samajhte hain ham baba ke bachche ban gaye, bas। parantu apne ko aatma samajh baap ko yaad karna hai। baba ki yaad bigar kuchh kaam kiya goya baba ko yaad nahin karte। baba ki yaad mein sadaiv harshit rehna chaahiye। yaad mein rahne vaala sadaiv ramneek rahega, harshitmukh rahega। kisko bahut khushi se aur ramneekta se samjhaayenge। bahut thode hain jinko service ka bahut shauk hai। chitron par samjhaana bahut sahaj hai। yeh hai oonche te ooncha bhagwan phir unki rachna ham sab aatmaayen bhaai-bhaai hain। brotherhood hai, unhonne fatherhood kah diya hai। pahle shiv-baba ke chitra par samjhaana hai ki yeh hai sab aatmaon ka baap parampita paramatma niraakaar। ham aatma bhi niraakaar hain, bhrakuti ke beech mein rehti hain। shivbaaba bhi star hai parantu star ki pooja kaise ho isliye bada banaate hain। baaki aatma kabhi 84 laakh janma nahin leti hai। baap samjhaate hain aatma pahle ashareeri aati hai phir shareer dhaaran kar part bajaati hai। satopradhaan aatma punarjanma lete-lete iron ej mein aa jaati hai। baad mein aane vaale to 84 janma nahin lenge। sab to 84 janma le nahin sakte। aatma hi ek shareer chhod doosra leti hai। naam roop desh kaal sab badal jaata hai। aise bhaashan karna chaahiye। kehte hain self realisation। parantu karaaye kaun? aatma so paramatma kehna-yeh koi self realisation hua kya। yeh nai knowledge hai। baap jo gyaan ka saagar hai, patit-paavan hai, sarva ke sadgati daata hain, vahi baith samjhaate hain। phir unki khoob mahima karo, unki mahima suni। aatma ka parichay bataaya, ab paramatma ka bhi bataate hain। unko kaha jaata hai sabhi aatmaon ka baap। woh chhota bada ho na sake। parampita paramatma maana supreme soul। soul maana aatma। paramatma to pare te pare rahne vaala hai। woh punarjanma mein nahin aate hain isliye unko parampita kaha jaata hai। itni chhoti aatma mein part bhara hua hai। patit-paavan bhi unko hi kehte hain। unka naam hamesha shivbaaba hai। roodra baba nahin। bhakti maarga mein anek naam rakhe hain, unko sabhi yaad karte hain ki patit-paavan aakar paavan banaao। to zaroor aana pade। woh aate tab hain jab ek dharma ki sthaapna karni hoti hai। aadi sanaatan devi-devta dharma। abhi hai kaliyug, dher manushya hain। satayug mein bahut thode manushya hain। gaaya bhi hua hai brahma dvaara sthaapna, shankar dvaara vinaash.... geeta dvaara hi aadi sanaatan dharma ki sthaapna hui thi। sirf usmein bhi bhool kar shreekrishna ka naam daal diya hai। baap kehte hain woh to punarjanma mein aane vaala hai। main to punarjanma rahit hoon। to ab judge karo ki parampita paramatma niraakaar shiv ya shreekrishna। geeta ka bhagwan kaun? bhagwan to ek ko kaha jaata hai phir agar in baaton ko koi maanta nahin hai to samajhna chaahiye yeh apne dharma ka nahin hai। satayug mein aane vaala jhat maanega aur purushaartha karne lag padega। mool baat hi yeh hai। ismen tumhaari vijay hai। parantu dehi-abhimaani avastha kahaan hai? ek do ke naam roop mein phansate hain। bhakti maarga mein bhi kehte the parvaah thi paar brahm mein rahne vaale paramatma ki, baaki dar kiska। bahut himmat chaahiye। bhaashan karne vaalon ko aatma ka gyaan bahut masti se dena chaahiye। phir paramatma kisko kaha jaata hai - is par bhi samjhaana chaahiye। baap ki mahima hai prem ka saagar, gyaan ka saagar ...vaise bachchon ki bhi mahima hai। kisko gussa karna maana law haath mein uthaana। baba kitna meetha hai। bachche koi kaam mein nataate (mana karte) hain to natvar nahin banenge। bahut meetha banna hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna bag-baigez sab transfer kar bahut khushi aur masti mein rehna hai। mama baba samaan takhtansheen banna hai। jigri yaad mein rehna hai।

2) kisi ke dar se padhaai kabhi nahin chhodni hai। yaad se apne karmabandhan halke karne hain। kabhi krodh mein aakar law haath mein nahin uthaana hai। kisi seva mein na nahin karni hai।

vardaan:- royal aur simple donon ke balance se kaarya karne vaale brahma baap samaan bhav

jaise brahma baap saadhaaran rahe, na bahut ooncha na bahut neencha। braahmanon ka aadi se ab tak ka niyam hai ki na bilkul saada ho, na bahut royal ho। beech ka hona chaahiye। abhi saadhan bahut hain, saadhan dene vaale bhi hain phir bhi koi bhi kaarya karo to beech ka karo। aisa koi na kahe ki yahaan to raajaai thaath ho gaya hai। jitna simple utna royal - donon ka balance ho।

slogan:- doosron ko dekhne ke bajaae svayan ko dekho aur yaad rakho - “jo karma ham karenge humein dekh aur karenge''

avyakti silence dvaara double light pharishta sthiti ka anubhav karo

abhi aapki saari kaarobaar shreshtha sankalp dvaara ishaaron se chalni chaahiye। aise light roop mein raho jo vyartha sankalp, vyartha samay samaapta ho jaae, vahi sankalp uthe jo hona hai aur jisko karna hai unki buddhi mein bhi vahi sankalp uthe ki yahi karna hai, tab yeh saakaar vatan sookshm vatan banega।