Daily Murli for Friday 21 June 2024

21-06-2024 praatahmurli om shanti "baapdaada"' madhuban

“meethe bachche - devta banne ke pahle tumhein brahman zaroor banna hai, brahma mukh santaan hi sachche brahman hain jo raajayog ki padhaai se devta bante hain''

prashn:- doosre sabhi satsangon se tumhaara yeh satsang kis baat mein niraala hai?

uttar:- doosre satsangon mein koi bhi em object nahin hoti hai, aur hi dhan-daulat aadi sab kuchh ganva kar bhatakte rehte hain। is satsang mein tum bhatakte nahin ho। yeh satsang ke saath-saath school bhi hai। school mein padhna hota, bhatakna nahin। padhaai maana kamaai। jitna tum padhkar dhaaran karte aur karaate ho utni kamaai hai। is satsang mein aana maana faayda hi faayda।

om shanti। roohaani baap baith roohaani bachchon ko samjhaate hain। roohaani bachche hi in kaanon dvaara sunte hain। behad ka baap bachchon ko kehte hain - apne ko aatma samjho। yeh ghadi-ghadi sunne se buddhi bhatakna band kar sthir ho jaayegi। apne ko aatma samajh baith jaayenge। bachche samajhte hain yahaan ham aaye hain devta banne। ham adopted bachche hain। ham brahman padhte hain। kya padhte hain? brahman se devta bante hain। jaise koi bachche college mein jaate hain to samajhte hain ki ham ab padhkar engineer, doctor aadi bante hain। baithne se hi jhat samjhenge। tum bhi brahma ke bachche brahman bante ho to samajhte ho ham brahman so devta banenge। gaaya hua hai - manushya se devta… parantu kaun bante hain? hindu to sab devta nahin bante। vaastav mein hindu to koi dharma hai nahin। aadi sanaatan koi hindu dharma nahin hai। koi se bhi poochho ki hindu dharma kisne sthaapan kiya? to moonjh jaayenge। yeh agyaan se naam rakh diya hai। hindustaan mein rahne vaale apne ko hindu kehte hain। vaastav mein inka naam bhaarat hai, na ki hindustaan। bhaarat khanda kaha jaata hai, na ki hindustaan khanda। hai hi bhaarat। to unhon ko yeh bhi pata nahin hai ki yeh kaun-sa khanda hai। apvitra hone kaaran apne ko devta to samajh nahin sakte। devi-devta pavitra the। abhi woh dharma hai nahin। aur sab dharma chale aate hain - buddha ka bauddha dharma, ibraaham ka islaam, Christ ka Christian। baaki hindu dharma ka to koi hai nahin। yeh hindustaan naam to foreigners ne rakha hai। patit hone kaaran apne ko devta dharma ka samajhte nahin hain। baap ne samjhaaya hai aadi sanaatan hai devi-devta dharma, puraane te puraana। shuru ka dharma kaun-sa hai? devi-devta। hindu nahin kahenge। ab tum brahma ke adopted bachche brahman ho gaye। brahman se devta banne ke liye padhte ho। aise nahin, hindu se devta banne ke liye padhte ho। brahman se devta bante ho। yeh achhi reeti dhaaran karna hai। abhi to dekho dher dharma hain। add hote hi jaate hain। jab bhi kahaan bhaashan aadi karte ho to yeh samjhaana achha hai। abhi hai kaliyug, sab dharma abhi tamopradhaan hain। chitra par tum samjhaayenge to phir woh ghamanda toot jaayega - main phalaana hoon, yeh hoon....। samjhenge, ham to tamopradhaan hain। pahle-pahle baap ka parichay de diya, phir dikhaana hai yeh puraani duniya badalni hai। din-pratidin chitra bhi shobhnik hote jaate hain। jaise school mein nakshe bachchon ki buddhi mein hote hain। tumhaari buddhi mein phir yeh rehna chaahiye। number one map yeh hai, oopar mein trimoorti bhi hai, donon gole bhi hain satayug aur kaliyug। abhi ham purooshottam sangamayug par hain। yeh puraani duniya vinaash ko paayegi। ek aadi sanaatan devi-devta dharma sthaapan ho raha hai। tum ho aadi sanaatan devi-devta dharma ke। hindu dharma to hai nahin। jaise sannyaasiyon ne brahm, rahne ke sthaan ko eeshvar samajh liya hai, vaise hindustaan mein rahne vaalon ne hindu dharma samajh liya hai। unka bhi farka hai। tumhaara bhi farka hai। devi-devta naam to bahut oonch hai। kehte hain yeh to jaise devta hai। jismen achhe gun hote hain to aise kehte hain - ismen devtaai gun hain।

tum samajhte ho - yeh raadhe-krishna hi svayanvar ke baad lakshmi-naaraayan bante hain, unko vishnu kaha jaata hai। chitra sabke hain parantu koi jaanta nahin। tum bachchon ko ab baap baith samjhaate hain, baap ko hi sab yaad karte hain। aisa koi manushya nahin hoga jiske mukh mein bhagwan na ho। ab bhagwan ko kaha jaata hai niraakaar। niraakaar ka bhi arth nahin samajhte hain। abhi tum sab kuchh jaan jaate ho। pattharbuddhi se paarasbuddhi ban jaate ho। yeh knowledge bhaaratvaasiyon ke liye hi hai, na ki aur dharma vaalon ke liye। baaki yeh samjha sakte ho ki itni vriddhi kaise hoti hai aur khanda aate gaye hain। vahaan to bhaarat khanda ke sivaae baaki koi khanda nahin rahega। abhi woh ek dharma nahin hai, baaki sab khade hain। banyan tree ka misaal accurate hai। aadi sanaatan devi-devta dharma ka foundation hai nahin, baaki saara jhaad khada hai। to kahenge aadi sanaatan devi-devta dharma tha, na ki hindu dharma। tum abhi brahman bane ho, devta banne ke liye pahle brahman zaroor banna pade। shoodra varna aur brahman varna kaha jaata hai। shoodra dynasty nahin kahenge। raajaayen-raaniyaan hain। pahle devi-devta mahaaraaja-mahaaraani the। yahaan hindu mahaaraaja-mahaaraani। bhaarat to ek hi hai phir woh alag-alag kaise ho gaye? unhon ka naam-nishaan hi gum kar diya hai, sirf chitra hain। number one hain sooryavanshi। abhi tum aaye ho sooryavanshi banne ke liye। yeh raajayog hai na। tumhaari buddhi mein hai ham yeh lakshmi-naaraayan banenge। dil mein khushi rehti hai - baba hamko padhaate hain, mahaaraaja-mahaaraani banaane। satya naaraayan ki sachchi-sachchi katha yeh hai। aage janma-janmaantar tum satya naaraayan ki katha sunte ho। parantu woh koi sachchi kathaayen nahin hain। bhakti maarga mein kabhi manushya se devta ban nahin sakte। mukti-jeevanmukti ko pa nahin sakte। sabhi manushya mukti-jeevanmukti paate zaroor hain। abhi sab bandhan mein hain। oopar se aaj bhi aatma aayegi to jeevanmukti mein aayegi, na ki jeevan bandha mein। aadha samay jeevanmukti, aadha samay jeevanbandha mein jaayenge। yeh khel bana hua hai। is behad ke khel ke ham sabhi actors hain, yahaan aate hain part bajaane। ham aatmaayen yahaan ke nivaasi nahin hain। kaise aate hain - yeh sab baaten samjhaai jaati hain। kai aatmaayen yahaan hi punarjanma leti rehti hain। tum bachchon ko shuru se lekar ant tak saare world ki history-geography buddhi mein hai। behad ka baap oopar baith kya karte hain, kuchh nahin jaante isliye unhon ko kaha jaata hai tuchchha buddhi। tum bhi tuchchha buddhi the। ab baap ne tumko rachayita aur rachna ke aadi, madhya, ant ka raaz samjhaaya hai। tum gareeb, saadhaaran sab kuchh jaante ho। tum ho svachchha buddhi। svachchha pavitra ko kaha jaata hai। tuchchha buddhi apvitra thahre। tum abhi dekho kya ban rahe ho! school mein bhi padhaai se oonch pad pa sakte hain। tumhaari padhaai hai oonch te oonch, jisse tum raajaai pad paate ho। woh to daan-punya karne se raaja ke paas janma lete hain, phir raaja bante hain। parantu tum is padhaai se raaja bante ho। baap hi kehte hain main tum bachchon ko raajayog sikhlaata hoon। sivaae baap ke raajayog koi sikhla nahin sakte। baap hi tumko raajayog ki padhaai padhaate hain। tum phir doosron ko samjhaate ho। baap raajayog sikhlaate hain ki tum patit se paavan ban jaao। apne ko aatma samajh niraakaar baap ko yaad karo to tum pavitra ban jaayenge aur chakra ko jaanne se chakravarti raaja satayug mein ban jaayenge। yeh to samjhaana bahut sahaj hai। abhi devta dharma ka koi bhi nahin hai। sab convert ho gaye hain aur-aur dharmon mein। tum koi ko bhi samjhaao to pahle-pahle baap ka parichay do। baap samjhaate hain aur dharmon mein kitne chale gaye hain। bauddhi, musalmaan aadi dher ho gaye hain। talvaar ki jor se bhi musalmaan bane hain। bauddhi bhi bahut bane hain। ek baar hi speech ki to hajaaron bauddhi ban gaye। Christian log bhi aise aakar speech karte hain। sabse jaasti aadamshumaari is samay unhon ki hai। to ab tum bachchon ki buddhi mein saara srishti chakra phirta rehta hai, tab baap kehte hain tum svadarshan chakradhaari ho। svadarshan chakra vishnu ko dikhaate hain। manushya yeh nahin jaante ki vishnu ko kyon diya hai? svadarshan chakradhaari krishna ya naaraayan ko kehte hain। yeh bhi samjhaana chaahiye ki unhon ka kya connection hai। yeh teenon hi ek hain। vaastav mein yeh svadarshan chakra to tum braahmanon ke liye hai। svadarshan chakradhaari gyaan se bante ho। baaki svardashan chakra koi maarne kaatne ka nahin hai। yeh gyaan ki baaten hain। jitna tumhaara yeh gyaan ka chakra phirega, utne tumhaare paap bhasma honge। baaki sir kaatne ki koi baat nahin। chakra koi hinsa ka nahin hai। yeh chakra to tumko ahinsak banaata hai। kahaan ki baat kahaan le gaye hain। sivaae baap ke koi samjha na sake।

tum meethe-meethe bachchon ko athaah khushi hoti hai। abhi tum samajhte ho - ham aatma hain। pahle tum apne ko aatma bhi bhool gaye to ghar bhi bhool gaye। aatma ko to phir bhi aatma kehte hain। paramatma ko to thikkar-bhittar mein kah diya hai। aatmaon ke baap ki kitni glaani ki hai। baap phir aakar aatmaon ko gyaan dete hain। aatma ke liye kabhi nahin kahenge ki thikkar-bhittar, kan-kan mein hai। jaanvar ki to baat hi alag hai। padhaai aadi manushyon ki hi hoti hai। abhi tum samajhte ho, ham itne janma yeh-yeh bane hain। 84 janma poore kiye। baaki 84 laakh to hain nahin। manushya kitna agyaan andhere mein hain isliye kaha jaata hai - gyaan soorya pragta.......। aadhaakalpa dvaapar-kaliyug mein andhiyaara, aadhaakalpa satayug-treta mein prakaash। din aur raat, prakaash aur andhiyaare ka yeh gyaan hai। yeh behad ki baat hai। aadhaakalpa andhere mein kitni thokren khaai, bahut bhatakna hota hai। school mein jo padhte hain, unko bhatakna nahin kaha jaata hai। satsangon mein manushya kitna bhatakte hain। aamadni kuchh bhi nahin hoti, aur hi ghaata, isliye usko bhatakna kaha jaata hai। bhatakte-bhatakte dhan-daulat aadi sab ganvaae kangaal ban pade hain। ab is padhaai mein jo jitna-jitna achhi tarah dhaaran karenge aur karaayenge, phaayda hi phaayda hai। brahman ban gaya to phaayda hi phaayda। tum jaante ho ham brahman hi svargavaasi bante hain। svargavaasi to sab banenge। parantu tum usmein oonch pad paane ka purooshaartha karte ho।

abhi tum sabki vaanaprastha avastha hai। tum khud kehte ho - baba, hamko vaanaprastha ya pavitra duniya mein le jaao, woh hai aatmaon ki duniya। niraakaari duniya kitni chhoti hai। yahaan to ghoomne-phirne liye kitni badi jameen hai। vahaan yeh baat nahin, shareer nahin, part nahin। star misal aatmaayen khadi hain। yeh kudrat hai na। soorya, chaand, sitaare kaise khade hain। aatmaayen bhi brahm tatva mein apne aadhaar par natural khadi hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ka simran kar svadarshan chakradhaari banna hai। svadarshan chakra phiraate paapon ko kaatna hai। double ahinsak banna hai।

2) apni buddhi ko svachchha pavitra banaakar raajayog ki padhaai padhni hai aur oonch pad paana hai। dil mein sada yahi khushi rahe ki ham satya naaraayan ki sachchi-sachchi katha sunkar manushya se devta bante hain।

vardaan:- man-buddhi ko order pramaan vidhipoorvak kaarya mein lagaane vaale nirantar yogi bhav

nirantar yogi arthaat svaraajya adhikaari banne ka vishesh saadhan man aur buddhi hai। mantra hi manmanaabhav ka hai। yog ko buddhiyog kehte hain। to agar yeh vishesh aadhaar stambha apne adhikaar mein hain arthaat order pramaan vidhi-poorvak kaarya karte hain। jo sankalp jab karna chaaho vaisa sankalp kar sako, jahaan buddhi ko lagaana chaaho vahaan laga sako, buddhi aap raaja ko bhatkaaye nahin। vidhipoorvak kaarya kare tab kahenge nirantar yogi।

slogan:- master vishwa shikshak bano, samay ko shikshak nahin banaao।