Daily Murli for Wednesday 7 August 2024

07-08-2024 praatahmurli om shanti "baapdaada"' madhuban

meethe bachche - yaad ki yaatra se hi tumhaari kamaai jama hoti hai, tum ghaate se phaayde mein aate ho, vishwa ke maalik bante ho“

prashn:- sat ka sang taare kusang bore - iska arth kya hai?

uttar:- jab tum bachchon ko sat ka sang arthaat baap ka sang milta hai tab tumhaari chadhti kala ho jaati hai। raavan ka sang kusang hai, uske sang se tum neeche girte ho arthaat raavan tumhein dubota hai, baap paar le jaata hai। baap ki bhi kamaal hai jo second mein aisa sang dete jisse tumhaari gati sadgati ho jaati hai, isliye use jaadoogar bhi kaha jaata hai।

om shanti। bachche yaad mein baithe the isko kaha jaata hai yaad ki yaatra। baap kehte hain yog akshar kaam mein na laao। baap ko yaad karo, woh hai aatmaon ka baap, parampita, patit-paavan। us patit-paavan ko hi yaad karna hai। baap kehte hain deh ke sab sambandh chhod ek baap ko yaad karo। kehte hain na aap muye mar gai duniya… deh sahit deh ke jo bhi sambandh aadi dekhne mein aate hain, unko yaad nahin karo। ek baap ko hi yaad karo to tumhaare paap jal jaayenge। tum janma-janmaantar ki paap aatmaayen ho na। yeh hai hi paap aatmaon ki duniya। satayug hai punya aatmaon ki duniya। ab paap sab katkar punya kaise jama ho? baap ki yaad se hi jama honge। aatma mein man-buddhi hai na। to aatma ko buddhi se yaad karna hai। baap kehte hain tumhaare jo bhi mitra-sambandhi hain, un sabko bhoolo। woh sab ek-do ko duhkh dete hain। ek paap karte hain jo kaam kataari chalaate hain, doosra paap phir kya karte hain? jo baap sarva ka sadgati daata hai, bachchon ko behad ka sukh dete hain arthaat svarga ka maalik banaate hain, use sarva-vyaapi kah dete hain। yeh paathshaala hai, tum aaye ho yeh padhne। yeh lakshmi-naaraayan hai tumhaari em-object। aur koi aise kah na sake। tum jaante ho abhi hamko pavitra ban pavitra duniya ka maalik banna hai। ham hi vishwa ke maalik the। poore 5 hazaar varsha hue। devi-devta vishwa ke maalik hain na। kitna oonch pad hai। zaroor yeh baap hi banaayenge। baap ko hi paramatma kehte hain, unka asul naam hai shiv। phir bahut naam rakh diye hain। jaise baambe mein babulnaath ka mandir hai arthaat kaanton ke jangal ko phoolon ka bageecha banaane vaala hai। nahin to unka asli naam ek hi shiv hai, inmen pravesh karte hain to bhi naam shiv hi hai। tumko in brahma ko yaad nahin karna hai। yeh to dehdhaari hai। tumko yaad karna hai videhi ko। tumhaari aatma patit bani hai, unko paavan banaana hai। kehte bhi hain mahaan aatma, paap aatma। mahaan paramatma nahin kehte hain। apne ko paramatma va eeshvar bhi koi kah na saken। kehte bhi hain mahaatma, pavitra aatma। sannyaasi sannyaas karte hain, isliye pavitra aatma hain। baap ne samjhaaya hai woh bhi sabhi punarjanma lete hain। dehdhaariyon ko punarjanma zaroor lena padta hai। vikaar se janma le phir jab bade baalig ban jaate hain to sannyaas kar lete hain। devtaayen to aise nahin karte। woh to ever pavitra hain। baap abhi tumko aasuri se daivi banaate hain, daiveegun dhaaran karne se daivi sampradaay banenge। daivi sampradaay rehte hain satayug mein, aasuri sampradaay rehte hain kaliyug mein। abhi hai sangamayug। ab tumko baap mila hai, kehte hain ab tumko phir daivi sampradaay banna hai zaroor। tum yahaan aaye hi ho daivi sampradaay banne। daivi sampradaay vaalon ko athaah sukh hain। is duniya ko kaha jaata hai hinsak, devtaayen hain ahinsak।

baap kehte hain - meethe-meethe roohaani bachchon, baap ko yaad karo। tumhaare jo guru log hain, woh bhi sab dehdhaari hain। abhi tum aatmaon ko paramatma baap ko yaad karna hai। sukh tab milega jab tum punya aatma banenge। 84 janmon ke baad hi tum paap aatma ban jaate ho। abhi tum punya jama karte ho। yogbal se paapon ko khatma karte ho। is yaad ki yaatra se hi tum vishwa ke maalik bante ho। tum vishwa ke maalik the to sahi na। woh phir kahaan gaye, yeh bhi baap hi bataate hain। tumne 84 janma liye, sooryavanshi-chandravanshi banen। kehte bhi hain bhakti ka phal bhagwan dete hain। bhagwan koi dehdhaari ko nahin kaha jaata hai। woh hai hi niraakaar shiv। unki shivraatri manaate hain to zaroor aate hain na। parantu kehte main tumhaare sadrishya janma nahin leta hoon, mujhe shareer ka loan lena padta hai। mujhe apna shareer nahin hai। agar hota to unka naam hota। brahma naam to inka apna hai। isne sannyaas kiya tab naam brahma rakha hai। tum ho brahmaakumaar-kumaariyaan। nahin to brahma kahaan se aaya। brahma hai shiv ka beta। shivbaaba apne bachche brahma mein pravesh kar tumko gyaan dete hain। brahma, vishnu, shankar bhi inke bachche hain। niraakaar baap ke sab bachche niraakaar hain। aatmaayen yahaan aakar shareer dhaaran kar part bajaati hain। baap kehte hain main aata hi hoon patiton ka paavan banaane। main is shareer ka loan leta hoon। shiv bhagvaanuvaach hai na। shreekrishna ko to bhagwan nahin kah sakte। bhagwan to ek hi hai। shreekrishna ki mahima hi alag hai। pahla number devta hain raadhe-krishna, jo svayanvar ke baad phir lakshmi-naaraayan bante hain। parantu yeh koi jaante nahin। raadhe-krishna ka kisko bhi pata nahin hai। woh phir kahaan chale jaate hain? raadhe-krishna hi svayanvar ke baad phir lakshmi-naaraayan bante hain। donon alag-alag mahaaraajaaon ke bachche hain। vahaan apvitrata ka naam nahin hai kyonki 5 vikaar roopi raavan hi nahin hai। hai hi raam raajya। ab baap aatmaon ko kehte hain ki mujhe yaad karo to tumhaare paap kat jaayenge। tum satopradhaan the, ab tamopradhaan bane ho, ghaata pada hai phir jama karna hai। bhagwan ko vyaapaari bhi kaha jaata hai। koi virla unse vyaapaar kare। jaadoogar bhi unko kehte hain, kamaal karte hain, jo saari duniya ki sadgati karte hain। sabko mukti-jeevanmukti dete hain। jaadu ka khel hai na। manushya, manushya ko de nahin sakte। tum 63 janma bhakti karte aaye ho, is bhakti se koi ne sadgati ko paaya hai? koi hai jo sadgati de? ho nahin sakta। ek bhi vaapis ja nahin sakta। behad ka baap hi aakar sabko vaapis le jaate hain। kaliyug mein anek raajaayen hain। vahaan tum thode raajya karte ho। baaki sab aatmaayen mukti mein chali jaati hain। tum jaate ho jeevanmukti mein via muktidhaam। yeh chakra phirta rehta hai। abhi tum aatmaon ko darshan hua hai is srishti chakra ka, rachayita aur rachna ke aadi-madhya-ant ka। tum hi is gyaan se nar se naaraayan bante ho। devtaaon ki raajdhaani sthaapan ho gai phir tumko gyaan ki darkaar nahin rahegi। bhakton ko bhagwan ne phal diya aadhaakalpa sukh ka, phir raavan raajya mein duhkh shuru hota hai। aahiste-aahiste seedhi utarte hain। tum satayug mein ho to bhi ek din jo beeta, seedhi utarni hoti hai। tum 16 kala sampoorn bante ho, phir seedhi utarte hi rehte ho। second by second tik-tik hoti hai। utarte hi jaate hain। samay beette-beette is jagah aakar pahunche ho। vahaan bhi to aise hi ghadiyaan beetti jaayengi। ham seedhi chadhte hain ekdam phat se। phir seedhi utarni hai joon misal।

baap kehte hain main sarva ki sadgati karne vaala hoon। manushya, manushya ki sadgati kar na saken kyonki woh vikaar se paida hote hain, patit hain। vaastav mein shreekrishna ko hi sachcha mahaatma kah sakte hain। yeh mahaatma log to phir bhi vikaar se janma le phir sannyaas karte hain। woh to hain devta। devtaayen to sadaiv pavitra hain। unmein koi vikaar hota nahin। unko kaha hi jaata hai nirvikaari duniya, inko kaha jaata hai vikaari duniya। no purity। chalan kitni kharaab hai। devtaaon ki chalan to badi achhi hoti hai। sab unko namaste karte hain। characters unhon ke achhe hain tab to apvitra manushya un pavitra devtaaon ke aage maatha tekte hain। abhi to ladna-jhagadna kya-kya laga pada hai। bada hangaama hai। abhi to rahne ki bhi jagah nahin। chaahte hain manushya kam hon। parantu yeh to baap ka hi kaam hai। satayug mein bahut thode manushya hote hain। itne sab shareeron ki holika ho jaati hai, baaki sab aatmaayen chali jaati hain apne sweet hom। sajaayen to nambarvaar bhogte hain zaroor। jo poora purooshaartha kar vijay maala ka daana bante hain, woh sajaaon se chhoot jaate hain। maala ek ki to nahin hoti। jisne unhon ko aisa banaaya, woh hai phool। phir hai meru, pravritti maarga hai na। to jodi ki maala hai। single ki maala nahin hoti। sannyaasiyon ki maala hoti nahin। woh hain nivriti maarga vaale। woh pravritti maarga vaalon ko gyaan de na saken। pavitra banne ke liye unka hai had ka sannyaas, woh hain hathayogi। yeh hai raajayog, raajaai praapta karne ke liye baap tumko yeh raajayog sikhlaate hain। baap har 5 hajaar varsha baad aate hain। aadhaakalpa tum raajaai karte ho sukh mein, phir raavan raajya mein aahiste-aahiste tum duhkhi ho jaate ho। isko kaha jaata hai sukh-duhkh ka khel। tum paandavon ko jeet pahnaate hain। ab tum ho pande। ghar jaane ki yaatra karaate ho। woh yaatraayen to manushya janma-janmaantar karte aaye hain। ab tumhaari yaatra hai ghar jaane ki। baap aakar sabko mukti-jeevanmukti ka raasta bataate hain। tum jeevanmukti mein baaki sab mukti mein chale jaayenge। haahaakaar ke baad phir jay-jaykaar ho jaati hai। abhi hai kaliyug ka ant। aaphten to bahut aane ki hain, phir us samay tum yaad ki yaatra mein rah nahin sakenge kyonki hangaama bahut ho jaayega isliye baap kehte hain ab yaad ki yaatra ko badhaate jaao to paap bhasma ho jaayen aur phir jama bhi karo। satopradhaan to bano। baap kehte hain main har kalpa ke purooshottam sangamayug par aata hoon। yeh to bahut chhota sa braahmanon ka yug hai। braahmanon ki nishaani choti hoti hai। brahman, devta, kshatriy, vaishya, shoodra - yeh chakra phirta hi rehta hai। braahmanon ka bahut chhota kul hota hai, is chhote se yug mein baap aakar tumko padhaate hain। tum bachche bhi ho to student bhi ho, followers bhi ho। ek ke hi hain। aisa koi manushya hota nahin jo baap bhi ho, shiksha dene vaala teacher bhi ho, srishti ke aadi-madhya-ant ka gyaan deta ho, phir saath mein bhi le jaaye। aisa koi manushya ho na sake। yeh baaten abhi tum samajhte ho। satayug mein bhi pahle-pahle bahut chhota jhaad hota hai, baaki sab shantidham mein chale jaayenge। baap ko kaha jaata hai sarva ka sadgati daata। baap ko bulaate hain - he patit-paavan baba aao। doosre taraph phir kehte hain paramatma kutte-billi, patthar-thikkar sabmen hai। behad ke baap ka apkaar karte hain। baap jo vishwa ka maalik banaate, unko defame karte hain। ise hi kaha jaata hai raavan ka sangadosh। sat ka sang taare, kusang duboye। raavan raajya shuru hota hai to tum girne lag padte ho। baap aakarke tumhaari chadhti kala karte hain। baap aakar manushya ko devta banaate hain to sarva ka bhala ho jaata hai। abhi to sab yahaan hain, baaki jo bhi rahe hue hain, woh aate rehte hain। jab tak niraakaari duniya se sab aatmaayen aa jaayengi tab tak tum imtahaan mein bhi number-vaar paas hote jaayenge। inko kaha jaata hai roohaani college। roohaani baap roohaani bachchon ko padhaane aate hain, raavan raajya aaya to phir shareer chhod apvitra raaja banen aur pavitra devtaaon ke aage maatha tekne lage। aatma hi patit athva paavan banti hai। aatma patit to shareer bhi patit milta hai। sachche sone mein khaad padti hai to khaad ka jevar ho jaata hai। ab aatma se khaad nikle kaise? yog agni chaahiye, unse tumhaare vikarma vinaash ho jaayenge। aatma mein chaandi, taamba, loha pad gaya hai। yeh hai khaad। aatma sachcha sona hai। ab jhoothi ban gai hai। woh khaad nikle kaise? yeh hai yog agni, gyaan chita par baithe ho। aage the kaam chita par। baap gyaan chita par bithaate hain। sivaae gyaan saagar baap ke aur koi gyaan chita par bitha na sake। manushya bhakti maarga mein kitni pooja karte rehte hain lekin kisko jaante nahin। abhi tum sabko jaan gaye ho। tum sab devta bante ho to phir pooja ki baat hi khatma ho jaati hai। jab raavan raajya shuru hota hai tab bhakti shuru hoti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sajaaon se mukta hone ke liye vijay maala ka daana banne ka purooshaartha karna hai, roohaani panda ban sabko shantidham ghar ki yaatra karaani hai।

2) yaad ki yaatra ko badhaate-badhaate sab paapon se mukta ho jaana hai। yog agni se aatma ko sachcha sona banaana hai, satopradhaan banna hai।

vardaan:- har ghadi ko antim ghadi samajh sada ever ready rahne vaale teevra purooshaarthi bhav

apni antim ghadi ka koi bharosa nahin hai isliye har ghadi ko antim ghadi samajhte hue ever ready raho। ever ready arthaat teevra purushaarthi। aise nahin socho ki abhi to vinaash hone mein kuchh time lagega phir taiyaar ho jaayenge। nahin। har ghadi antim ghadi hai isliye sada nirmohi, nirvikalp, nir-vyartha.. vyartha bhi nahin, tab kahenge ever ready। koi bhi kaarya rahe hue hon lekin apni sthiti sada upraam ho, jo hoga vo achha hoga।

slogan:- apne haath mein law uthaana bhi krodh ka ansh hai।