Daily Murli for Wednesday 28 August 2024

28-08-2024 praatahmurli om shanti "baapdaada"' madhuban

“meethe bachche - tum jitna baap ko yaad karenge utna aatma mein light aayegi, gyaanvaan aatma chamkeeli ban jaati hai''

prashn:- maaya kin bachchon ko zara bhi tang nahin kar sakti?

uttar:- jo pakke yogi hain, jinhonne yogbal se apni sarva karmendriyon ko sheetal banaaya hai, jo yog mein hi rahne ki mehnat karte hain, unhein maaya zara bhi tang nahin kar sakti। jab tum pakke yogi ban jaayenge tab laayak banenge। laayak banne ke liye purity first hai।

om shanti। meethe-meethe bachchon ko baap baith samjhaate hain। agyaan ke kaaran tumhaari aatma dull ho gai hai। heere mein chamak hoti hai na, patthar mein chamak nahin hoti isliye kaha jaata hai patthar misal dull ho gai hai। phir jaagti hai to kaha jaata hai yeh jaise paarsamni hai। ab agyaan ke kaaran aatma ki jyoti dim ho gai hai, kaali nahin hoti hai। naam yeh rakha hua hai। aatma sabki ek jaisi hoti hai, shareeron ki banaavat anek prakaar ki hoti hai। aatma to ek hi hai। ab tum samajhte ho ham aatma hain, baap ke bachche hain। yeh saara gyaan tha woh phir dheere-dheere nikal gaya hai। nikalta-nikalta aakhreen kuchh nahin rehta to kahenge agyaan। tum bhi agyaani the। ab gyaan ke saagar se gyaani bante jaate ho, aatma to bahut sookshm hai। in aankhon se dekhne mein nahin aati। baap aakar samjhaate hain, bachchon ko knowledgeful banaate hain, tab suzaag hote ho। ghar-ghar mein sojhra ho jaata hai। abhi ghar-ghar mein andhiyaara hai arthaat aatma dim ho gai hai। ab baap kehte hain mujhe yaad karo to light aa jaayegi phir tum gyaanvaan ban jaayenge। baap kiski glaani nahin karte hain। yeh to drama ka raaz samjhaate hain। bachchon ko kaha hai na yeh to sab moodhamti ho gaye hain। kaun kehte hain? baap। bachche, tumhaari kitni sundar buddhi bani thi shreemat par। abhi tum feel karte ho na। tumhein gyaan mila hai। gyaan ko padhaai kaha jaata hai। baap ki padhaai se hamaari jyoti jag gai hai, inko hi sachchi-sachchi deepaavli kaha jaata hai। chhote-pan mein mitti ke deepak mein tel daal jyoti jagaate the। woh to rasma chalti rehti hai। unse koi deepaavli nahin hoti। yeh to aatma jo andar hai, woh dim ho gai hai। unki jyoti aakar baap jagaate hain। bachchon ko aakar knowledge dete hain, padhaate hain। school mein teacher padhaate hain na। woh hai had ki knowledge, yeh hai behad ki knowledge। koi saadhu-santa bhi padhaate hain kya! rachayita aur rachna ke aadi, madhya aur ant ki knowledge kab suni? kabhi koi ne aakar padhaai? jaakar dekho kahaan yeh knowledge padhaate hain? sirf ek baap hi padhaate hain to unke paas padhna chaahiye। baap anaayaas hi aa jaate hain। dhindhora thode hi peette hain ki main aa raha hoon। anaayaas hi aakar pravesh karte hain। woh aavaaz to kar hi nahin sakte jab tak unko organs na milen। aatma bhi organs bigar aavaaz nahin kar sakti, shareer mein jab aayi hai, tab aavaaz karti hai। tum samjhaao to koi maanenge nahin। bachchon ko jab yeh knowledge di jaati hai tab samajhte hain। yeh knowledge ek baap ke sivaae koi de na sake। vinaash ka saakshaatkaar bhi koi chaahte thode hi hain। yeh baap hi aakar karaate hain। draamaanusaar puraani duniya ab khatma honi hai। nai duniya sthaapan ho rahi hai। jinko baap se knowledge leni hai woh aate rehte hain। kitnon ko gyaan diya hoga? anginat, gaanv-gaanv se kitne dher aate hain। yeh aatmaon aur paramatma ka mela ek hi baar lagta hai। sangamayug par hi aate hain। baap aakar nai duniya sthaapan karte hain, jinki jyoti jagaate hain woh phir jaakar auron ki jyoti jagaate hain। abhi tum sabko vaapis jaana hai। ismen buddhi se kaam lena hota hai। bhakti maarga mein to hai andhiyaara। gyaan dene vaala to ek baap chaahiye। woh aate hi hain sangam par। puraani duniya mein gyaan mil na sake। manushyon ke khyaal mein hai abhi to 40 hazaar varsha pade hain, bilkul hi ghor andhiyaare mein hain। samajhte hain 40 hazaar varsha baad bhagwan aayega। zaroor aakar gyaan de sadgati karenge to goya agyaan hai na। inko agyaan andhiyaara kaha jaata hai। agyaan vaalon ko gyaan chaahiye। bhakti ko gyaan nahin kaha jaata hai। aatma mein gyaan hai nahin parantu dull buddhi hone kaaran samajhte hain bhakti hi gyaan hai। ek taraph kehte hain gyaan soorya ke aane se sojhra hoga, parantu samajhte kuchh nahin। gaate hain gyaan soorya pragta… kiske liye kehte hain gyaan soorya? kab aaya yeh koi nahin jaante। pandit aadi hoga to kahega jab kaliyug poora hoga tab sojhra hoga। yeh sab baaten baap aakar samjhaate hain। bachche nambarvaar samajhte hain। teacher bachchon ko padhaate hain, ekras to bachche nahin padhenge। padhaai mein ekras marks kabhi hoti nahin।

tum jaante ho ki behad ka baap aaya hua hai। ab puraani duniya ka vinaash bhi saamne khada hai। abhi hi baap se gyaan lena hai aur yog bhi seekhna hai। yaad se hi vikarma vinaash honge। baap kehte hain is sangam par hi aakar is shareer ka loan leta hoon arthaat prakriti ka aadhaar leta hoon। geeta mein bhi yeh akshar hai, aur koi shaastra ka naam baba nahin lete hain। ek hi geeta hai। yeh hai hi raajayog ki padhaai। naam rakh diya hai geeta। ismen pahle-pahle likha hai bhagvaanuvaach। ab bhagwan kisko kaha jaata hai? bhagwan to hai niraakaar, unko apna shareer to hai nahin। woh hai niraakaari duniya, jahaan aatmaayen rehti hain। sookshm vatan ko duniya nahin kaha jaata। yeh hai sthool saakaar duniya, woh hai aatmaon ki duniya। khel saara yahaan chalta hai। niraakaari duniya mein aatmaayen kitni chhoti-chhoti hain। phir part bajaane aati hain। yeh khyaalaat tum bachchon ki hi buddhi mein bithaaye jaate hain। isko hi gyaan kaha jaata hai। ved-shaastra ko kaha jaata hai bhakti, gyaan nahin। tumhaari saadhu-sannyaasiyon se itni bhent nahin hui hai, baba ka to bahut sang raha hai। bahut guru kiye hain। poochha jaata hai aapne sannyaas kyon kiya? gharbaar kyon chhoda? kehte the vikaar se buddhi bhrashta ho jaati hai isliye gharbaar chhoda। achha, jangal mein jaakar rehte ho phir gharbaar ki yaad aati hogi? bola haan। baba ka to dekha hua hai ek sannyaasi to phir vaapis ghar bhi gaya tha। yeh bhi shaastron mein hai। manushya vaanaprastha avastha mein tab jaate hain jab aayu badi ho jaati hai, chhoti aayu mein to vaanaprastha le na saken। kumbha ke mele mein bahut chhote-chhote naange log aate hain। davaai khilaate hain, jisse karmendriyaan thandi pad jaati hain। tumhaara to hai yogbal se karmendriyon ko vash mein karna। yogbal se vash hote hote aakhreen thandi ho hi jaayengi। kai kehte hain baba maaya bahut tang karti hai। vahaan to aisi baaten hoti nahin। karmendriyaan vash tab hongi jab yog mein tum pakke honge। karmendriyaan shant ho jaayengi। ismen badi mehnat hai। vahaan aise chhi-chhi kaam hote nahin। baap aaye hain aise svargadhaam mein le jaane। tumko laayak bana rahe hain। maaya tumko na-laayak banaati hai arthaat svarga va jeevanmukti dhaam mein chalne laayak nahin। to baap baith laayak banaate hain। uske liye purity hai first। gaate bhi hain - baba, ham patit ban pade hain, hamko aakar paavan banaao। paavan maana pavitra, gaayan bhi hai amrit chhod vish kaahe ko khaaye। unka naam vish bhi hai, jo aadi madhya ant duhkh deta hai। yeh bhi drama mein noondh hai। baap kitna baar aaye hain, tum bachchon se aakar mile hain। tumhein kanishta se uttam puroosh banaaya jaata hai। aatma pavitra hoti hai to aayu bhi badi ho jaati hai। health, wealth aur happiness sab mil jaati hai। yeh bhi tum board par likh sakte ho। health, wealth, happiness for 21generation one second। baap se yeh varsa milta hai 21 janmon ke liye। kai bachche board lagaane se bhi darte hain। board to sabke ghar par rehta hi hai। tum surgeon ke bachche ho na। tumko health, wealth, happiness sab milti hai। to tum phir auron ko do। de sakte ho to kyon nahin board par likh dete ho! to manushya aakar samjhen ki bhaarat mein aaj se 5 hazaar varsha pahle health-wealth thi, pavitrata bhi thi। behad ke baap ka varsa ek second mein। tumhaare paas bahut aayenge। tum baith samjhaao yahi bhaarat sone ki chidiya thi, inhon ka raajya tha। phir yeh kahaan gaye? 84 janma pahle yeh lenge। yeh number one hai na, yahi phir last mein aate hain। baap kehte hain ab tumhaara 84 ka chakra poora hua। phir shuru hona hai। behad ka baap hi aakar yeh pad praapta karaate hain। sirf kehte hain, tum mujhe yaad karo to paavan ban jaayenge। 84 janmon ko jaankar baap se varsa lena hai। parantu padhaai to chaahiye na।

tumko kaha jaata hai svadarshan chakradhaari। naya to koi samajh na sake। tum jaante ho sva aatma ko kaha jaata hai। ham aatma jo pavitra thi, shuru se lekar 84 ka chakra lagaaya। woh bhi baap bataate hain, tumne pahle-pahle shiv ki bhakti shuru ki। tum to avyabhichaari bhakta the। baap ke sivaae koi samjha na sake। baap kehte hain meethe-meethe bachchon tumne pahle-pahle yeh janma liya। koi saahookaar hoga to kahenge na ki aage janma mein isne aisa karma kiya hai। koi rogi hoga to kahenge pichhle karma ka hisaab-kitaab hai। achha, in lakshmi-naaraayan ne kaun se karma kiye? yeh baap baith samjhaate hain। inke 84 janma poore hue phir first number mein aana hai। bhagwan sangamayug par hi aakar raajayog sikhlaate hain। abhi tum samajh rahe ho ki baba humein raajayog sikhla rahe hain। phir bhi tum bhool jaayenge। karma, akarma aur vikarma ki guhya gati bhi baap ne samjhaai hai, raavan raajya mein tumhaare karma vikarma ho jaate hain। vahaan karma akarma hote hain। vahaan raavan raajya hi nahin। vikaar hota nahin। vahaan hai hi yogbal jabki yogbal se ham vishwa ke maalik bante hain to zaroor pavitra duniya bhi chaahiye। puraani duniya ko apvitra, nai daniya ko pavitra duniya kaha jaata hai। woh hai viceless world, yeh hai vicious world। baap hi aakar veshyaalay ko shivaalay banaate hain। satayug hai shivaalay। shivbaaba aakar tumko satayug ke liye laayak bana rahe hain। lakshmi-naaraayan ke mandir mein jaakar tum poochh sakte ho। aapko maaloom hai inhon ne yeh pad kaise paaya? vishwa ke maalik kaise bane? baap kehte hain tum nahin jaante ho, ham jaante hain। tum baap ke bachche hi kah sakte ho ki ham aapko bata sakte hain - inhon ne yeh pad kaise paaya। inhon ne hi poore 84 janma liye phir purooshottam sangamayug par aakar baap ne raajayog sikhlaaya hai aur raajaai di hai। uske pahle number one patit the phir number one paavan banen। saari raajdhaani hai na। tumhaare chitron mein sab clear hai - inhon ko raajayog kisne sikhlaaya। oonch te oonch hai hi paramatma। devtaayen to sikhla na sake, bhagwan hi sikhlaate hain, jisko knowledgeful kaha jaata hai। baap teacher satguru bhi kaha jaata hai।

yeh sab baaten vahi samajh sakte hain jisne shuru se shiv ki bhakti ki hogi। mandir banaane vaalon se tum poochho - aapne yeh mandir banaaya hai, inhonne yeh pad kaise paaya? inhon ka raajya kab tha? phir yeh kahaan gaye? ab yeh kahaan hain? tum 84 ki kahaani bataao to bahut khush ho jaayenge। chitra pocket mein pada ho। tum kisko bhi samjha sakte ho। shuru se jisne shiv ki bhakti ki hogi, woh sunte rahenge khush hote rahenge। tum samajh jaayenge yeh hamaare kul ka hai। din-pratidin baba bahut sahaj yuktiyaan batlaate hain। tumko ab samajh mili hai parampita paramatma hi sarva ka sadgati daata hai। 21 janmon ke liye satayugi baadshaahi mil jaati hai। 21 janmon ka varsa is padhaai se hi milta hai। topic bhi bahut hain, veshyaalay aur shivaalay kisko kaha jaata hai - is topic par ham parampita paramatma ki jeevan kahaani bata sakte hain। lakshmi-naaraayan ke 84 janmon ki kahaani - yeh bhi topic hai। vishwa mein shanti kaise thi, phir ashaanti kaise hui, ab phir shanti kaise sthaapan ho rahi hai - yeh bhi topic hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab uttam puroosh banne ke liye yaad ke bal se aatma ko pavitra banaana hai karmendriyon se koi bhi vikarma nahin karna hai।

2) gyaanvaan ban aatmaon ko sujaag karne ki seva karni hai। aatma roopi jyoti mein gyaan-yog ka ghrit daalna hai। shreemat par buddhi ko svachchha banaana hai।

vardaan:- point swaroop mein sthit ho man buddhi ko negative ke prabhaav se safe rakhne vaale vishesh aatma bhav

jaise koi season hoti hai to season se bachne ke liye usi pramaan attention rakha jaata hai। baarish aayegi to chhaate, raincoat aadi ka attention rakhenge। sardi aayegi to garam kapde rakhenge....aise vartamaan samay man buddhi mein negative bhaav aur bhaavna paida karne ka vishesh kaarya maaya kar rahi hai isliye vishesh safety ke saadhan apnaao। iska sahaj saadhan hai - ek point swaroop mein sthit hona। aashcharya aur question mark ke bajaae bindu lagaana arthaat vishesh aatma banna।

slogan:- aagyaakaari woh hai jo har sankalp, bol aur karma mein ji hajoor karta hai।