Daily Murli for Monday 16 September 2024

16-09-2024 praatahmurli om shanti "baapdaada"' madhuban

“meethe bachche - yeh wonderful satsang hai jahaan tumhein jeete ji marna sikhlaaya jaata hai, jeete ji marne vaale hi hans bante hain''

prashn:- tum bachchon ko abhi kaun-si ek phikraat hai?

uttar:- humein vinaash ke pahle sampanna banna hai। jo bachche gyaan aur yog mein majboot hote jaate hain, unhein manushya ko devta banaane ki hobby (aadat) hoti jaati hai। woh service ke bina rah nahin sakte hain। jinna ki tarah bhaagte rahenge। service ke saath-saath svayan ko bhi sampanna banaane ki chinta hogi।

om shanti। roohaani baap baith roohaani bachchon ko samjhaate hain - rooh ab saakaar mein hai aur phir prajaapita brahma ki santaan hai kyonki adopt kiye hue hain। tumhaare liye sab kehte hain yeh bhaai-behen banaati hain। bachchon ko baap ne samjhaaya hai asul mein tum aatmaayen bhaai-bhaai ho। ab nai srishti hoti hai to pahle-pahle brahman choti chaahiye। tum shoodra the, abhi transfer hue ho। brahman bhi to chaahiye zaroor। prajaapita brahma ka naam to baala hai। is hisaab se tum samajhte ho ham sab bachche - bhaai behen thahre। jo bhi apne ko brahmaakumaar-kumaari kahlaate hain woh zaroor bhaai-behen thahre। sabhi prajaapita brahma ki santaan hain to bhaai-behen zaroor hona chaahiye। yeh samjhaana hai besamjhon ko। besmajh bhi hain aur phir blind faith bhi hai। jinki pooja karte hain, faith rakhte hain yeh phalaana hai, parantu use jaante kuchh bhi nahin। lakshmi-naaraayan ki pooja karte hain parantu woh kab aaye, kaise banen, phir kahaan gaye? koi bhi nahin jaante। koi bhi manushya nehru aadi ko jaante hain, to unhon ki history-geography ka bhi sab pata hai। agar biography ko nahin jaante to woh kya kaam ka। pooja karte hain, parantu unki jeevan kahaani ko nahin jaante। manushyon ki jeevan kahaani ko to jaante hain parantu jo bade past ho gaye hain, unki ek ki bhi jeevan kahaani ko nahin jaante। shiv ke kitne dher pujaari hain। pooja karte hain, phir mukh se kah dete woh to patthar-bhittar mein hai, kan-kan mein hai। kya yeh jeevan kahaani thahri? yeh to akla ki baat nahin hui। apne ko bhi patit kehte hain। patit akshar kitna fit hai। patit maana vikaari। tum samjha sakte ho ki ham brahmaakumaar-kumaari kyon kahlaate hain? kyonki brahma ki aulaad hain aur adopted hain। ham kukh vanshaavli nahin, mukh vanshaavli hain। brahman-braahmaniyaan to bhaai-behen thahre na। to unki aapas mein criminal aai ho na sake। kharaab khyaalaat mukhya hain hi kaam ke। tum kehte ho ham prajaapita brahma ki santaan bhaai-behen bante hain। tum samajhte ho ham sab hain shivbaaba ki santaan bhaai-bhaai। yeh bhi pakka hai। duniya ko kuchh bhi pata nahin hai। aise hi sirf kah dete hain। tum samjha sakte ho sabhi aatmaon ka baap woh ek hai। unko sab pukaarte hain। tumne chitra bhi dikhaaya hai। bade-bade dharma vaale bhi is niraakaar baap ko maante hain। woh hai niraakaar aatmaon ka baap aur phir saakaar mein sabhi ka baap prajaapita brahma hai jinse phir vriddhi ko paate rehte hain, jhaad badhta jaata hai। bhinna-bhinna dharmon mein aate jaate hain। aatma to is shareer se nyaari hai। shareer ko dekhkar kehte hain - yeh American hai, yeh phalaana hai। aatma ko to nahin kehte। aatmaayen sab shantidham mein rehti hain। vahaan se aati hain part bajaane। tum koi bhi dharma vaale ko sunaao, punarjanma to sab lete hain aur oopar se bhi nai aatmaayen aati rehti hain। to baap samjhaate hain - tum bhi manushya ho, manushya ko hi to srishti ke aadi-madhya-ant ka maaloom hona chaahiye ki yeh srishti chakra kaise ghoomta hai, inka rachayita kaun hai, kitna samay inke phirne mein lagta hai? yeh tum hi jaante ho, devtaayen to nahin jaante hain। manushya hi jaan-kar phir devta bante hain। manushya ko devta banaane vaala hai baap। baap apna aur rachna ka bhi parichay dete hain। tum jaante ho ham beejroop baap ke beejroop bachche hain। jaise baap is ulte vriksha ko jaante hain, vaise ham bhi jaan gaye hain। manushya, manushya ko kabhi yeh samjha na sake। parantu tumko baap ne samjhaaya hai।

jab tak tum brahma ke bachche nahin bane ho tab tak yahaan aa nahin sakte। jab tak poora course lekar samajhte nahin hain tab tak tum braahmanon ki sabha mein baitha kaise sakte। isko indra sabha bhi kehte hain। indra koi woh paani ki barsaat nahin barsaate hain। ‘indra sabha' kaha jaata hai। pariyaan bhi tumko banna hai। anek prakaar ki pariyaan gaai hui hain। koi bachche achhe shobhaavaan hote hain to kehte hain na yeh to jaise pari hai। powder aadi lagaakar sundar ban jaate hain। satayug mein tum bante ho pariyaan, pareejaade। abhi tum gyaan saagar mein gyaan snaan karne se pariyaan (devi-devta) ban jaate ho। tum jaante ho ham kya se kya ban rahe hain। jo sada pure baap hai, sada khoobsoorat hai, woh musaaphir tumko aisa banaane ke liye saanvare tan mein pravesh karte hain। ab gora kaun banaave? baba ko banaana pade na। srishti ka chakra to phirna hai। ab tumko gora banna hai। padhaane vaala gyaan saagar ek hi baap hai। gyaan ka saagar, prem ka saagar hai। us baap ki jo mahima gaai jaati hai, woh laukik baap ki thode hi ho sakti hai। behad ke baap ki hi mahima hai। unko hi sab pukaarte hain ki hamko aisi mahima vaala aakar banaao। abhi tum ban rahe ho na, nambarvaar purooshaartha anusaar। padhaai mein sab ekras nahin hote hain। raat-din ka pharka rehta hai na। tumhaare paas bhi bahut aayenge। brahman zaroor banna hai। phir koi achhi reeti padhte hain, koi kam। jo padhaai mein sabse achha hoga to doosron ko bhi padha sakenge। tum samajh sakte ho, itne college nikalte rehte hain। baba bhi kehte hain college aisa banaao jo koi bhi samajh sake ki is college mein rachta aur rachna ke aadi, madhya, ant ka knowledge milta hai। baap bhaarat mein hi aate hain to bhaarat mein hi college khulte rehte hain। aage chal videsh mein bhi khulte jaayenge। bahut college, universities chaahiye na। jahaan bahut aakar padhenge phir jab padhaai poori hogi to devi-devta dharma mein sab transfer ho jaayenge arthaat manushya se devta ban jaayenge। tum manushya se devta bante ho na। gaayan bhi hai - manushya se devta kiye…। yahaan yeh hai manushyon ki duniya, woh hai devtaaon ki duniya। devtaaon aur manushyon mein raat-din ka pharka hai! din mein hain devtaayen, raat mein hain manushya। sab bhakta hi bhakta hain, pujaari hain। abhi tum pujaari se poojya bante ho। satayug mein shaastra, bhakti aadi ka naam nahin hota hai। vahaan hain sab devta। manushya hote hain bhakta। manushya hi phir devta bante hain। woh hai daivi duniya, isko kaha jaata hai aasuri duniya। raam raajya aur raavan raajya। aage tumhaari buddhi mein yeh thode hi tha ki raavan raajya kisko kaha jaata hai? raavan kab aaya? kuchh bhi pata nahin tha। kehte hain lanka samudra mein doob gai। aise hi phir dvaarika ke liye bhi kehte hain। abhi tum jaante ho yeh saari lanka doobne ki hai, saari duniya bhi behad ki lanka hai। yeh sab doob jaayegi, paani aa jaayega। baaki svarga koi doobta thode hi hai। kitna athaah dhan tha। baap ne samjhaaya hai ek hi somnaath mandir ko musalmaanon ne kitna loota। abhi dekho kuchh nahin raha hai। bhaarat mein kitna athaah dhan tha। bhaarat ko hi svarga kaha jaata hai। abhi svarga kahenge? abhi to narka hai, phir svarga banega। svarga kaun, narka kaun banaate hain? yeh abhi tum jaan gaye ho। raavan raajya kitna samay chalta hai, woh bhi bataaya hai। raavan raajya mein kitne athaah dharma ho jaate hain। raamraajya mein to sirf sooryavanshi-chandravanshi rehte hain। abhi tum padh rahe ho। yeh padhaai aur koi ki buddhi mein nahin hai। woh to hai hi raavan raajya mein। raamraajya hota hai satayug mein। baap kehte hain ham tumko laayak banaate hain। phir tum na laayak ban jaate ho। na laayak kyon kehte hain? kyonki patit ban jaate ho। devtaaon ke laayki ki mahima aur apni na laayki ki mahima gaate hain।

baap samjhaate hain - tum jab poojya the to nai duniya thi। bahut thode manushya the। saare vishwa ke tum hi maalik the। abhi tumko khushi bahut honi chaahiye। bhaai-behen to bante ho na। woh kehte yeh ghar phitaate hain। vahi phir aakar jab shiksha lete hain to yahaan aane se samajhte hain ki knowledge to bahut achhi hai। arth samajhte hain na। bhaai-behen bigar pavitrata kahaan se aaye। saara madaar pavitrata par hi hai। baap aate bhi hain magadh desh mein, jo ki bahut gira hua desh hai, bahut patit hai, khaan-paan bhi ganda hai। baap kehte hain main bahut janmon ke ant vaale shareer mein hi pravesh karta hoon। yahi 84 janma lete hain। last so phir first, first so last। misaal to ek ka bataayenge na। tumhaari dynasty banne vaali hai। jitna achhi reeti samajhte jaayenge, phir to tumhaare paas bahut aayenge। abhi yeh bahut chhota jhaad hai। toofaan bhi bahut lagte hain। satayug mein toofaanon ki baat hi nahin। oopar se nai-nai aatmaayen aati rehti hain। yahaan toofaan lagte hi gir padte hain। vahaan to maaya ka toofaan hota hi nahin। yahaan to baithe-baithe mar jaate hain aur phir tumhaari maaya ke saath yuddha hai, to woh bhi hairaan karti hai। satayug mein yeh nahin hoga। doosre koi dharma mein aisi baat hoti nahin। raavan raajya aur raam raajya ko aur koi samajhte hi nahin hain। bhal satsang mein jaate hain, vahaan marne-jeene ki baat nahin hoti। yahaan to bachche adopt hote hain। kehte hain ham shivbaaba ke bachche hain, unse varsa lete hain। lete-lete phir gir padte hain to varsa bhi khalaas। hans se badalkar bagula ban jaate hain। phir bhi baap merciful hai to samjhaate rehte hain। koi phir se chadh jaate hain। jo thame (sthir) rehte hain, unko kahenge mahaaveer, hanoomaan। tum ho mahaaveer-mahaaveerni। nambarvaar to hain hi। sabse pahalvaan ko mahaaveer kaha jaata hai। aadi dev ko bhi mahaaveer kehte hain, jisse hi yeh mahaaveer paida hote hain jo vishwa par raajya karte hain। nambarvaar purooshaartha anusaar raavan par vijay paane ke liye purooshaartha karte rehte hain। raavan hain 5 vikaar। yeh to samajh ki baat hai। abhi tumhaari buddhi ka taala baap kholte hain। phir taala ekdam banda ho jaata hai। yahaan bhi aise hain jinka taala khulta hai to woh jaakar service karte hain। baap kehte hain jaakar service karo, gutter mein jo pade hain unko nikaalo। aise nahin ki tum bhi gutter mein giro। tum baahar nikal auron ko bhi nikaalo। vishay vaitarni nadi mein aprampaar duhkh hain। abhi aprampaar sukhon mein chalna hai। jo aprampaar sukh dete hain, unki mahima gaai jaati hai। raavan jo duhkh dete hain, unki mahima hogi kya? raavan ko kaha jaata hai asur। baap kehte hain tum raavan raajya mein the, abhi apaar sukh paane ke liye tum yahaan aaye ho। tumko kitne apaar sukh milte hain। khushi kitni rahni chaahiye aur khabardaar bhi rehna chaahiye। position to nambarvaar hoti hain। har ek actor ka position alag hai। sabmen to eeshvar ho na sake। baap har baat baith samjhaate hain। tum baap ko aur rachna ke aadi-madhya-ant ko jaan jaate ho nambarvaar purooshaartha anusaar। nambarvaar padhaai par hi marks hoti hain। yeh hai behad ki padhaai, ismen bachchon ka bahut attention hona chaahiye। padhaai ek roz bhi miss na ho। ham hain student, god father padhaate hain - woh nasha bachchon ko chadha rehna chaahiye। bhagvaanuvaach, sirf unhon ne naam badalkar shreekrishna ka naam daal diya hai। bhool se shreekrishna bhagvaanuvaach samajh liya hai kyonki shreekrishna hua next tu god। svarga jo baap sthaapan karte hain unmein number one yeh hai na। yeh gyaan abhi tumko mila hai। nambarvaar purooshaartha anusaar apna bhi kalyaan karte hain aur doosron ka bhi kalyaan karte rehte hain, unko service bigar kabhi sukh nahin aayega।

tum bachche yog aur gyaan mein majboot ho jaayenge to kaam aise karenge jaise jinna। manushya ko devta banaane ki hobby (aadat) lag jaayegi। maut ke pahle hi paas hona hai। service bahut karni hai। peechhe to ladaai lagegi। natural calamities bhi aayengi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) last so first jaane ke liye mahaaveer ban purooshaartha karna hai। maaya ke toofaanon mein hilna nahin hai। baap samaan merciful ban manushyon ke buddhi ka taala kholne ki seva karni hai।

2) gyaan saagar mein roz gyaan snaan kar pareezaada banna hai। ek din bhi padhaai miss nahin karni hai। bhagwan ke ham student hain - is nashe mein rehna hai।

vardaan:- gambheerta ke gun dvaara full marks jama karne vaale gambheerta ki devi va devta bhav

vartamaan samay gambheerta ke gun ki bahut-bahut aavashyakta hai kyonki bolne ki aadat bahut ho gai hai, jo aata hai vo bol dete ho। kisi ne koi achha kaam kiya aur bol diya to aadha khatma ho jaata hai। aadha hi jama hota hai aur jo gambheer hota hai uska full jama hota hai isliye gambheerta ki devi va devta bano aur apni full marks iktthi karo। varnan karne se marks kam ho jaayengi।

slogan:- bindu roop mein sthit raho to samasyaaon ko second mein bindu laga sakenge।