Daily Murli for Tuesday 1 April 2025

01-04-2025 praatahmurli om shanti "baapdaada"' madhuban

“meethe bachche - baap knowledgeful hai, unhein jaani jaananhaar kehna, yeh ulti mahima hai, baap aate hi hain tumhein patit se paavan banaane''

prashn:- baap ke saath-saath sabse adhik mahima aur kiski hai aur kaise?

uttar:- 1. baap ke saath bhaarat ki mahima bhi bahut hai। bhaarat hi avinaashi khanda hai। bhaarat hi svarga banta hai। baap ne bhaaratvaasiyon ko hi dhanvaan, sukhi aur pavitra banaaya hai। 2. geeta ki bhi aparmaapaar mahima hai, sarvashaastramai shiromni geeta hai। 3. tum chaitanya gyaan gangaaon ki bhi bahut mahima hai। tum direct gyaan saagar se nikli ho।

om shanti। om shanti ka arth to naye va puraane bachchon ne samjha hai। tum bachche jaan gaye ho - ham sab aatmaayen paramatma ki santaan hain। paramatma oonch te oonch aur bahut pyaare te pyaara sabhi ka maashook hai। bachchon ko gyaan aur bhakti ka raaz to samjhaaya hai, gyaan maana din - satayug-treta, bhakti maana raat - dvaapar-kaliyug। bhaarat ki hi baat hai। pahle-pahle tum bhaaratvaasi aate ho। 84 ka chakra bhi tum bhaaratvaasiyon ke liye hai। bhaarat hi avinaashi khanda hai। bhaarat khanda hi svarga banta hai, aur koi khanda svarga nahin banta। bachchon ko samjhaaya gaya hai - nai duniya satayug mein bhaarat hi hota hai। bhaarat hi svarga kahlaata hai। bhaaratvaasi hi phir 84 janma lete hain, narkavaasi bante hain। vahi phir svargavaasi banenge। is samay sabhi narkavaasi hain phir bhi aur sabhi khanda vinaash ho baaki bhaarat rahega। bhaarat khanda ki mahima aparmaapaar hai। bhaarat mein hi baap aakar tumko raajayog sikhlaate hain। yeh geeta ka purushottam sangamayug hai। bhaarat hi phir purushottam banne ka hai। abhi woh aadi sanaatan devi-devta dharma bhi nahin hai, raajya bhi nahin hai to woh yug bhi nahin hai। tum bachche jaante ho world almighty authority ek bhagwan ko hi kaha jaata hai। bhaaratvaasi yeh bahut bhool karte hain jo kehte hain woh antaryaami hai। sabhi ke andar ko woh jaante hain। baap kehte hain main koi ke bhi andar ko nahin jaanta hoon। mera to kaam hi hai patiton ko paavan banaana। bahut kehte hain shivbaaba aap to antaryaami ho। baba kehte hain main hoon nahin, main kiske bhi dil ko nahin jaanta hoon। main to sirf aakar patiton ko paavan banaata hoon। mujhe bulaate hi patit duniya mein hain। aur main ek hi baar aata hoon jabki puraani duniya ko naya banaana hai। manushya ko yeh pata nahin hai ki yeh jo duniya hai woh nai se puraani, puraani se nai kab hoti hai? har cheez nai se puraani sato, rajo, tamo mein zaroor aati hai। manushya bhi aise hote hain। baalak satopradhaan hai phir yuva hote hain phir vriddha hote hain arthaat rajo, tamo mein aate hain। budha shareer hota hai to woh chhodkar phir bachcha banenge। bachche jaante hain nai duniya mein bhaarat kitna oonch tha। bhaarat ki mahima aparmaapaar hai। itna sukhi, dhanvaan, pavitra aur koi khanda hai nahin। phir satopradhaan banaane baap aaye hain। satopradhaan duniya ki sthaapna ho rahi hai। trimoorti brahma, vishnu, shankar ko create kisne kiya? oonch te oonch to shiv hai। kehte hain trimoorti brahma, arth to samajhte nahin। vaastav mein kehna chaahiye trimoorti shiv, na ki brahma। ab gaate hain dev-dev mahaadev। shankar ko oonch rakhte hain to trimoorti shankar kahen na। phir trimoorti brahma kyon kehte? shiv hai rachayita। gaate bhi hain parampita paramatma brahma dvaara sthaapna karte hain braahmanon ki। bhakti maarga mein knowledgeful baap ko jaani-jaananhaar kah dete hain, ab woh mahima arth sahit nahin hai। tum bachche jaante ho baap dvaara humein varsa milta hai, woh khud ham braahmanon ko padhaate hain kyonki woh baap bhi hai, supreme teacher bhi hai, world ki history-geography kaise chakra lagaati hai, woh bhi samjhaate hain, vahi knowledgeful hai। baaki aise nahin ki woh jaani-jaananhaar hai। yeh bhool hai। main to sirf aakar patiton ko paavan banaata hoon, 21 janma ke liye raajya-bhaagya deta hoon। bhakti maarga mein hai alpakaal ka sukh, jisko sannyaasi, hathayogi jaante hi nahin। brahm ko yaad karte hain। ab brahm to bhagwan nahin। bhagwan to ek niraakaar shiv hai, jo sarva aatmaon ka baap hai। ham aatmaon ke rahne ka sthaan brahmaanda sweet hom hai। vahaan se ham aatmaayen yahaan part bajaane aati hain। aatma kehti hai ham ek shareer chhod doosra-teesra leti hoon। 84 janma bhi bhaaratvaasiyon ke hi hain, jinhonne bahut bhakti ki hai vahi phir gyaan bhi jaasti uthaayenge।

baap kehte hain grihastha vyavhaar mein bhal raho parantu shreemat par chalo। tum sabhi aatmaayen aashik ho ek paramatma maashuk ki। bhaktimaarga se lekar tum yaad karte aaye ho। aatma baap ko yaad karti hai। yeh hai hi duhkhadhaam। ham aatmaayen asul shanti-dhaam ki nivaasi hain। peechhe aaye sukhdhaam mein phir hamne 84 janma liye। ‘ham so, so ham' ka arth bhi samjhaaya hai। woh to kah dete aatma so paramatma, paramatma so aatma। ab baap ne samjhaaya hai - ham so devta, kshatriy, vaishya, so shoodra। abhi ham so brahman bane hain so devta banne ke liye। yeh hai yathaartha arth। woh hai bilkul wrong। satayug mein ek devi-devta dharma, advait dharma tha। peechhe aur dharma hue hain to dvait hua hai। dvaapar se aasuri raavan raajya shuru ho jaata hai। satayug mein raavanraajya hi nahin to 5 vikaar bhi nahin ho sakte। woh hain hi sampoorn nirvikaari।

abhi tum ho godly student। to yeh teacher bhi hua, father bhi hua।phir tum bachchon ko sadgati de, svarga mein le jaate hain to baap teacher guru teenon hi ho gaya। unke tum bachche bane ho to tumko kitni khushi honi chaahiye। manushya to kuchh bhi nahin jaante, raavan raajya hai na। har varsha raavan ko jalaate aate hain parantu raavan hai kaun, yeh nahin jaante। tum bachche jaante ho - yeh raavan bhaarat ka sabse bada dushman hai। yeh knowledge tum bachchon ko hi knowledgeful baap se milti hai। woh baap hi gyaan ka saagar, aananda ka saagar hai। gyaan saagar se tum baadal bharkar phir jaae varsha barsaate ho। gyaan gangaayen tum ho, tumhaari hi mahima hai। baap kehte hain main tumko abhi paavan banaane aaya hoon, yeh ek janma pavitra bano, mujhe yaad karo to tum tamopradhaan se satopradhaan ban jaayenge। main hi patit-paavan hoon, jitna ho sake yaad ko badhaao। mukh se shivbaaba kehna bhi nahin hai। jaise aashik maashuk ko yaad karte hain, ek baar dekha, bas phir buddhi mein unki hi yaad rahegi। bhakti maarga mein jo jis devta ko yaad karte, pooja karte, uska saakshaatkaar ho jaata hai। woh hai alpakaal ke liye। bhakti karte neeche utarte aaye hain। ab to maut saamne khada hai। haay-haay ke baad phir jay-jaykaar honi hai। bhaarat mein hi rakta ki nadi bahni hai। civil war ke aasaar bhi dikhaai de rahe hain। tamopradhaan ban gaye hain। ab tum satopradhaan ban rahe ho। jo kalpa pahle devta bane hain, vahi aakar baap se varsa lenge। kam bhakti ki hogi to gyaan thoda uthaayenge। phir praja mein bhi nambarvaar pad paayenge। achhe purushaarthi shreemat par chal achha pad paayenge। manners bhi achhe chaahiye। daiveegun bhi dhaaran karne hain woh phir 21 janma chalenge। abhi hain sabke aasuri gun। aasuri duniya, patit duniya hai na। tum bachchon ko world ki history-geography bhi samjhaai gai hai। is samay baap kehte hain yaad karne ki mehnat karo to tum sachcha sona ban jaayenge। satayug hai golden ej, sachcha sona phir treta mein chaandi ki alloy padti hai। kala kam hoti jaati hai। abhi to koi kala nahin hai, jab aisi haalat ho jaati hai tab baap aate hain, yeh bhi drama mein noondh hai।

is raavan raajya mein sabhi besmajh ban gaye hain, jo behad drama ke paartadhaari hokar bhi drama ke aadi-madhya-ant ko nahin jaante hain। tum actors ho na। tum jaante ho ham yahaan part bajaane aaye hain। parantu paartadhaari hokar jaante nahin। to behad ka baap kahenge na ki tum kitne besmajh ban gaye ho। ab main tumhein samajhdaar heere jaisa banaata hoon। phir raavan kaudi jaisa bana deta hai। main hi aakar sabko saath le jaata hoon phir yeh patit duniya bhi vinaash hoti hai। machchharon sadrishya sabko le jaata hoon। tumhaari em object saamne khadi hai। aisa tumko banna hai tab to tum svargavaasi banenge। tum brahmaakumaar-kumaariyaan yeh purushaartha kar rahe ho। manushyon ki buddhi tamopradhaan hai to samajhte nahin। itne bi.ke. hain to zaroor prajaapita brahma bhi hoga। brahman hain choti, brahman phir devta… chitron mein braahmanon ko aur shiv ko gum kar diya hai। tum brahman abhi bhaarat ko svarga bana rahe ho। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) oonch pad ke liye shreemat par chal achhe manners dhaaran karne hain।

2) sachcha aashik ban ek maashook ko hi yaad karna hai। jitna ho sake yaad ka abhyaas badhaate jaana hai।

vardaan:- nimittapan ki smriti se maaya ka get banda karne vaale double light bhav

jo sada svayan ko nimitta samajhkar chalte hain unhein double light sthiti ka svatahanubhav hota hai। karnakraavanhaar kara rahe hain, main nimitta hoon - isi smriti se saphalta hoti hai। main pan aaya arthaat maaya ka get khula, nimitta samjha arthaat maaya ka get banda hua। to nimitta samajhne se maayaajeet bhi ban jaate aur double light bhi ban jaate। saath-saath saphalta bhi avashya milti hai। yahi smriti number one lene ka aadhaar ban jaati hai।

slogan:- trikaaldarshi bankar har karma karo to saphalta sahaj milti rahegi।

maateshvari ji ke mahaavaakya

1) “manushya aatma apni poori kamaai anusaar bhavishya praalabdha bhogta hai''

dekho, bahut manushya aise samajhte hain hamaare poorva janmon ki achhi kamaai se abhi yeh gyaan praapta hua hai parantu aisi baat hai hi nahin, poorva janma ka achha phal hai yeh to ham jaante hain। kalpa ka chakra phirta rehta hai sato, rajo, tamo badli hota rehta hai parantu drama anusaar purushaartha se praalabdha banne ki margin rakhi hai tab to vahaan satayug mein koi raaja-raani, koi daasi, koi praja pad paate hain। to yahi purushaartha ki siddhi hai vahaan dvait, eershya hoti nahin, vahaan praja bhi sukhi hai। raaja-raani praja ki aisi sambhaal karte hain jaise maa baap apne bachchon ki sambhaal karte hain, vahaan gareeb saahookaar sab santushta hain। is ek janma ke purushaartha se 21 peedhi ke liye sukh bhogenge, yeh hai avinaashi kamaai, jo is avinaashi kamaai mein avinaashi gyaan se avinaashi pad milta hai, abhi ham satayugi duniya mein ja rahe hain yeh practical khel chal raha hai, yahaan koi chhu mantra ki baat nahin hai।

2) “guru mat, shaastron ki mat koi paramatma ki mat nahin hai''

paramatma kehte hain bachche, yeh guru mat, shaastra mat koi meri mat nahin hai, yeh to sirf mere naam ki mat dete hain parantu meri mat to main jaanta hoon, mere milan ka pata main aakar deta hoon, uske pahle meri address koi nahin jaanta। geeta mein bhal bhagvaanuvaach hai parantu geeta bhi manushyon ne banaai hai, bhagwan to svayan gyaan ka saagar hai, bhagwan ne jo mahaavaakya sunaaye hain unka yaadgaar phir geeta bani hai। yeh vidvaan, pandit, aachaarya kehte hain paramatma ne sanskrit mein mahaavaakya uchchaaran kiye, use seekhne bigar paramatma mil nahin sakega। yeh to aur hi ulta karmakaanda mein phansaate hain, ved, shaastra padh agar seedhi chadh jaave to phir utna hi utarna pade arthaat unko bhulaae ek paramatma se buddhiyog jodna pade kyonki paramatma saaph kehta hai in karmakaanda, ved, shaastra padhne se meri praapti nahin hoti hai। dekho dhruv, prahlaad, meera ne kya shaastra padha? yahaan to padha hua bhi sab bhoolna padta hai। jaise arjun ne padha tha to unko bhi bhoolna pada। bhagwan ke saaph mahaavaakya hain - shvaanso-shvaans mujhe yaad karo ismen kuchh bhi karne ki jaroorat nahin hai। jab tak yeh gyaan nahin hai to bhakti maarga chalta hai parantu gyaan ka deepak jag jaata hai to karmakaanda chhoot jaate hain kyonki karmakaanda karte-karte agar shareer chhoot jaave to phaayda kya mila? praalabdha to bani nahin, karmabandhan ke hisaab-kitaab se to mukti mili nahin। log to samajhte hain jhooth na bolna, chori na karna, kisi ko duhkh na dena... yeh achha karma hai। parantu yahaan to sadaakaal ke liye karmon ki bandhaaymaani se chhootna hai aur vikarmon ki jad ko nikaalna hai। ham to ab chaahte hain, aisa beej daalen jisse achhe karmon ka jhaad nikle, isliye manushya jeevan ke kaarya ko jaan shreshtha karma karna hai। achha - om shanti।

avyakt ishaare - “combined roop ki smriti se sada vijayi bano''

shiv shakti ka arth hi hai combined। baap aur aap - donon ko milaakar kehte hain shivshakti। to jo combined hai, use koi alag nahin kar sakta। yahi yaad rakho ki ham combined rahne ke adhikaari ban gaye। pahle dhoondhane vaale the aur abhi saath rahne vaale hain - yeh nasha sada rahe।