Daily Murli for Thursday 17 April 2025

17-04-2025 praatahmurli om shanti "baapdaada"' madhuban

“meethe bachche - yeh roohaani hospital tumhein aadhaakalpa ke liye ever healthy banaane vaali hai, yahaan tum dehi-abhimaani hokar baitho''

prashn:- dhandha aadi karte bhi kaun-sa direction buddhi mein yaad rehna chaahiye?

uttar:- baap ka direction hai tum kisi saakaar va aakaar ko yaad nahin karo, ek baap ki yaad rahe to vikarma vinaash hon। ismen koi ye nahin kah sakta ki phursat nahin। sab kuchh karte bhi yaad mein rah sakte ho।

om shanti। meethe-meethe roohaani bachchon prati baap ka good morning। good morning ke baad bachchon ko kaha jaata hai baap ko yaad karo। bulaate bhi hain - he patit-paavan aakar paavan banaao to baap pahle-pahle hi kehte hain - roohaani baap ko yaad karo। roohaani baap to sabka ek hi hai। father ko kabhi sarvavyaapi nahin maana jaata hai। to jitna ho sake bachche pahle-pahle baap ko yaad karo, koi bhi saakaar va aakaar ko yaad nahin karo, sivaae ek baap ke। yeh to bilkul sahaj hai na। manushya kehte hain ham busy rehte hain, phursat nahin। parantu ismen to phursat sadaiv hai। baap yukti batlaate hain yeh bhi jaante ho baap ko yaad karne se hi hamaare paap bhasma honge। mukhya baat hai yeh। dhandhe aadi ki koi mana nahin hai। woh sab karte hue sirf baap ko yaad karo to vikarma vinaash hon। yeh to samajhte hain ham patit hain, saadhu-santa rishi-muni aadi sab saadhna karte hain। saadhna ki jaati hai bhagwan se milne ki। so jab tak unka parichay na ho tab tak to mil nahin sakte। tum jaante ho baap ka parichay duniya mein koi ko bhi nahin hai। deh ka parichay to sabko hai। badi cheez ka parichay jhat ho jaata hai। aatma ka parichay to jab baap aaye tab samjhaaye। aatma aur shareer do cheezen hain। aatma ek star hai aur bahut sookshm hai। unko koi dekh nahin sakte। to yahaan jab aakar baithte hain to dehi-abhimaani hokar baithna hai। yeh bhi ek hospital hai na - aadhaakalpa ke liye ever healthy hone ki। aatma to hai avinaashi, kabhi vinaash nahin hoti। aatma ka hi saara part hai। aatma kehti hai main kabhi vinaash ko nahin paati hoon। itni sab aatmaayen avinaashi hain। shareer hai vinaashi। ab tumhaari buddhi mein yeh baitha hua hai ki ham aatma avinaashi hain। ham 84 janma lete hain, yeh drama hai। ismen dharma sthaapak kaun-kaun kab aate hain, kitne janma lete honge, yeh to jaante ho। 84 janma jo gaaye jaate hain zaroor kisi ek dharma ke honge। sabhi ke to ho na sake। sab dharma ikatthe to aate nahin। ham doosron ka hisaab kyon baith nikaalen? jaante hain phalaane-phalaane samay par dharma sthaapan karne aate hain। uski phir vriddhi hoti hai। sab satopradhaan se tamopradhaan to hone hi hain। duniya jab tamopradhaan hoti hai tab phir baap aakar satopradhaan satayug banaate hain। abhi tum bachche jaante ho ham bhaaratvaasi hi phir nai duniya mein aakar raajya karenge, aur koi dharma nahin hoga। tum bachchon mein bhi jinko oonch martaba lena hai woh jaasti yaad mein rahne ka purooshaartha karte hain aur samaachaar bhi likhte hain ki baba ham itna samay yaad mein rehta hoon। kai to poora samaachaar lajja ke maare dete nahin। samajhte hain baba kya kahenge। parantu maaloom to padta hai na। school mein teacher students ko kahenge na ki tum agar padhenge nahin to fail ho jaayenge। laukik maa-baap bhi bachche ki padhaai se samajh jaate hain, yeh to bahut bada school hai। yahaan to nambarvaar bithaaya nahin jaata hai। buddhi se samjha jaata hai, nambarvaar to hote hi hain na। ab baba achhe-achhe bachchon ko kahaan bhej dete hain, woh phir chale jaate hain to doosre likhte hain hamko mahaarthi chaahiye, to zaroor samajhte hain woh hamse hoshiyaar naameegraami hain। nambarvaar to hote hain na। pradarshani mein bhi anek prakaar ke aate hain to guides bhi khade rahne chaahiye jaanch karne ke liye। receive karne vaale to jaante hain yeh kis prakaar ka aadmi hai। to unko phir ishaara karna chaahiye ki inko tum samjhaao। tum bhi samajh sakte ho first grade, second grade, third grade sab hain। vahaan to sabki service karni hi hai। koi bada aadmi hai to zaroor bade aadmi ki khaatiri to sab karte hi hain। yeh kaayda hai। baap athva teacher bachchon ki class mein mahima karte hain, yeh bhi sabse badi khaatiri hai। naam nikaalne vaale bachchon ki mahima athva khaatiri ki jaati hai। yeh phalaana dhanvaan hai, religious minded hai, yeh bhi khaatiri hai na। ab tum yeh jaante ho oonch te oonch bhagwan hai। kehte bhi hain barobar oonch te oonch hai, parantu phir bolo unki biography bataao to kah denge sarvavyaapi hai। bas ekdam neeche kar dete hain। ab tum samjha sakte ho sabse oonche te oonch hai bhagwan, woh hai mool vatan vaasi। sookshm vatan mein hain devtaayen। yahaan rehte hain manushya। to oonch te oonch bhagwan woh niraakaar thahra।

abhi tum jaante ho ham jo heere misal the so phir kaudi misal ban pade hain phir bhagwan ko apne se bhi jaasti neeche le gaye hain। pahchaante hi nahin hain। tum bhaaratvaasiyon ko hi pahchaan milti hai phir pahchaan kam ho jaati hai। abhi tum baap ki pahchaan sabko dete jaate ho। dheron ko baap ki pahchaan milegi। tumhaara mukhya chitra hai hi yeh trimoorti, gola, jhaad। inmen kitni roshni hai। yeh to koi bhi kahenge yeh lakshmi-naaraayan satayug ke maalik the। achha, satayug ke aage kya tha? yeh bhi abhi tum jaante ho। abhi hai kaliyug ka ant aur hai bhi praja ka praja par raajya। abhi raajaai to hai nahin, kitna pharka hai। satayug ke aadi mein raajaayen the aur abhi kaliyug mein bhi raajaayen hain। bhal koi woh paavan nahin hain parantu koi paisa dekar bhi title le lete hain। mahaaraaja to koi hai nahin, title khareed kar lete hain। jaise patiyaala ka mahaaraaja, jodhpur, beekaaner ka mahaaraaja… naam to lete hain na। yeh naam avinaashi chala aata hai। pahle pavitra mahaaraajaayen the, abhi hain apvitra। raaja, mahaaraaja akshar chala aata hai। in lakshmi-naaraayan ke liye kahenge yeh satayug ke maalik the, kisne raajya liya? abhi tum jaante ho raajaai ki sthaapna kaise hoti hai। baap kehte hain main tumko abhi padhaata hoon - 21 janmon ke liye। woh to padhkar isi janma mein hi barrister aadi bante hain। tum abhi padhkar bhavishya mahaaraaja-mahaaraani bante ho। drama plan anusaar nai duniya ki sthaapna ho rahi hai। abhi hai puraani duniya। bhal kitne bhi achhe-achhe bade mahal hain parantu heere-javaahraaton ke mahal to banaane ki koi mein taakat nahin hai। satayug mein yeh sab heere-javaahraaton ke mahal banaate hain na। banaane mein koi deri thode hi lagti hai। yahaan bhi earthquake aadi hoti hai to bahut kaareegar laga dete hain, ek-do varsha mein saara shahar khada kar dete hain। nai dehli banaane mein karke 8-10 varsha lage parantu yahaan ke labour aur vahaan ke labours mein to farka rehta hai na। aajkal to nai-nai invention bhi nikaalte rehte hain। makaan banaane ki science ka bhi zor hai, sab kuchh taiyaar milta hai, jhat flat taiyaar। bahut jaldi-jaldi bante hain to yeh sab vahaan kaam mein to aate hain na। yeh sab saath chalne hain। sanskaar to rehte hain na। yeh science ke sanskaar bhi chalenge। to ab baap bachchon ko samjhaate rehte hain, paavan banna hai to baap ko yaad karo। baap bhi good morning kar phir shiksha dete hain। bachche baap ki yaad mein baithe ho? chalte phirte baap ko yaad karo kyonki janma-janmaantar ka sir par bojha hai। seedhi utarte-utarte 84 janma lete hain। abhi phir ek janma mein chadhti kala hoti hai। jitna baap ko yaad karte rahenge utna khushi bhi hogi, taakat milegi। bahut bachche hain jinko aage number mein rakha jaata hai parantu yaad mein bilkul rehte nahin hain। bhal gyaan mein teekhe hain parantu yaad ki yaatra hai nahin। baap to bachchon ki mahima karte hain। yeh bhi number one mein hai to zaroor mehnat bhi karte honge na। tum hamesha samjho ki shivbaaba samjhaate hain to buddhiyog vahaan laga rahega। yeh bhi seekhta to hoga na। phir bhi kehte hain baba ko yaad karo। kisko bhi samjhaane ke liye chitra hain। bhagwan kaha hi jaata hai niraakaar ko। woh aakar shareer dhaaran karte hain। ek bhagwan ke bachche sab aatmaayen bhaai-bhaai hain। abhi is shareer mein viraajmaan hain। sabhi akaalmoorta hain। yeh akaalmoorta (aatma) ka takhta hai। akaaltakhta aur koi khaas cheez nahin hai। yeh takhta hai akaalmoorta ka। bhrikuti ke beech mein aatma viraajmaan hoti hai, isko kaha jaata hai akaaltakhta। akaaltakhta, akaalmoorta ka। aatmaayen sab akaal hain, kitni ati sookshm hain। baap to hai niraakaar। woh apna takhta kahaan se laaye। baap kehte hain mera bhi yeh takhta hai। main aakar is takhta ka loan leta hoon। brahma ke saadhaaran boodhe tan mein akaal takhta par aakar baithta hoon। abhi tum jaan gaye ho sab aatmaon ka yeh takhta hai। manushyon ki hi baat ki jaati hai, jaanavron ki to baat nahin। pahle jo manushya jaanvar se bhi badtar ho gaye hain, woh to sudhren। koi jaanvar ki baat poochhe, bolo pahle apna to sudhaar karo। satayug mein to jaanvar bhi bade achhe first class honge। kichda aadi kuchh bhi nahin hoga। king ke mahal mein kabootar aadi ka kichda ho to danda daal de। zara bhi kichda nahin। vahaan badi khabardaari rehti hai। pahre par rehte hain, kabhi koi jaanvar aadi andar ghus na sake। badi saphaai rehti hai। lakshmi-naaraayan ke mandir mein bhi kitni saphaai rehti hai। shankar-paarvati ke mandir mein kabootar bhi dikhaate hain। to zaroor mandir ko bhi kharaab karte honge। shaastron mein to bahut danta kathaayen likh di hain।

abhi baap bachchon ko samjhaate hain, unmein bhi thode hain jo dhaarna kar sakte hain। baaki to kuchh nahin samajhte। baap bachchon ko kitna pyaar se samjhaate hain - bachche, bahut-bahut meethe bano। mukh se sadaiv ratna nikalte rahen। tum ho roop-basanta। tumhaare mukh se patthar nahin nikalne chaahiye। aatma ki hi mahima hoti hai। aatma kehti hai - main president hoon, phalaana hoon.......। mere shareer ka naam yeh hai। achha, aatmaayen kiske bachche hain? ek paramatma ke। to zaroor unse varsa milta hoga। woh phir sarvavyaapi kaise ho sakta hai! tum samajhte ho ham bhi pahle kuchh nahin jaante the। abhi kitni buddhi khuli hai। tum koi bhi mandir mein jaayenge, samjhenge yeh to sab jhoothe chitra hain। 10 bhujaaon vaala, haathi ki soondh vaala koi chitra hota hai kya! yeh sab hai bhakti maarga ki saamagri। vaastav mein bhakti honi chaahiye ek shivbaaba ki, jo sabka sadgati daata hai। tumhaari buddhi mein hain - yeh lakshmi-naaraayan bhi 84 janma lete hain। phir oonch te oonch baap hi aakar sabko sadgati dete hain। unse bada koi hai nahin। yeh gyaan ki baaten tumhaare mein bhi nambarvaar dhaaran kar sakte hain। dhaarna nahin kar sakte to baaki kya kaam ke rahe। kai to andhon ki laathi banne ke badle andhe ban jaate hain। gau jo doodh nahin deti to use pinjarpur mein rakhte hain। yeh bhi gyaan ka doodh nahin de sakte hain। bahut hain jo kuchh purooshaartha nahin karte। samajhte nahin ki ham kuchh to kiska kalyaan karen। apni takdeer ka khyaal hi nahin rehta hai। bas jo kuchh mila so achha। to baap kahenge inki takdeer mein nahin hai। apni sadgati karne ka purooshaartha to karna chaahiye। dehi-abhimaani banna hai। baap kitna oonch te oonch hai aur aate dekho kaise patit duniya, patit shareer mein hain। unko bulaate hi patit duniya mein hain। jab raavan bilkul hi bhrashta kar dete hain, tab baap aakar shreshtha banaate hain। jo achha purooshaartha karte hain woh raaja-raani ban jaate hain, jo purooshaartha nahin karte woh gareeb ban jaate hain। takdeer mein nahin hai to tadbeer kar nahin sakte। koi to bahut achhi takdeer bana lete hain। har ek apne ko dekh sakte hain ki ham kya service karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roop-basanta ban mukh se sadaiv ratna nikaalne hain, bahut-bahut meetha banna hai। kabhi bhi patthar (katu vachan) nahin nikaalna hai।

2) gyaan aur yog mein teekha ban apna aur doosron ka kalyaan karna hai। apni oonch takdeer banaane ka purooshaartha karna hai। andhon ki laathi banna hai।

vardaan:- tri-smriti swaroop ka tilak dhaaran karne vaale sampoorn vijayi bhav

svayan ki smriti, baap ki smriti aur drama ke knowledge ki smriti - inheen teen smritiyon mein saare gyaan ka vistaar samaaya hua hai। knowledge ke vriksha ki yeh teen smritiyaan hain। jaise vriksha ka pahle beej hota hai, us beej dvaara do patte nikalte hain phir vriksha ka vistaar hota hai aise mukhya hai beej baap ki smriti phir do patte arthaat aatma aur drama ki saari knowledge। in teen smritiyon ko dhaaran karne vaale smriti bhav va sampoorn vijayi bhav ke vardaani ban jaate hain।

slogan:- praaptiyon ko sada saamne rakho to kamjoriyaan sahaj samaapta ho jaayengi।

avyakt ishaare - “combined roop ki smriti se sada vijayi bano''

sangamayug par brahmaakumaar brahmaakumaari akele nahin ho sakte। sirf baap ke saath ka anubhav, combined pan ka anubhav emerge karo। aise nahin ki baap to hai hi mera, saath hai hi। nahin, saath ka practical anubhav emerge ho। to yeh maaya ka vaar, vaar nahin hoga, maaya haar kha legi। sirf ghabraao nahin, kya ho gaya! himmat rakho, baap ke saath ko smriti mein rakho to vijay aapka janma siddha adhikaar hai।