Daily Murli for Sunday 20 April 2025

20-04-25 praatahmurli om shanti ''avyakt-baapdaada'' revise 18-01-2005 madhuban

second mein dehbhaan se mukta ho jeevanmukta sthiti ka anubhav karo aur master mukti-jeevanmukti daata bano

aaj baapdaada chaaron or ke lucky aur lovely bachchon ko dekh rahe hain। har ek bachcha sneh mein samaaya hua hai। yeh parmaatma sneh alaukik sneh hai। is sneh ne hi bachchon ko baap ka banaaya hai। sneh ne hi sahaj vijayi banaaya hai। aaj amritvele se chaaron or ke har bachche ne apne sneh ki maala baap ko pahnaai kyonki har bachcha jaanta hai ki yeh parmaatma sneh kya se kya bana deta hai। sneh ki anubhooti anek parmaatma khajaane ke maalik banaane vaali hai aur sarva parmaatma khajaanon ki golden chaabi baap ne sarva bachchon ko di hai। jaante ho na! woh golden chaabi kya hai? woh golden chaabi hai - “mera baba''। mera baba kaha aur sarva khajaanon ke adhikaari ban gaye। sarva praaptiyon ke adhikaar se sampanna ban gaye, sarva shaktiyon se samartha ban gaye, master sarvashaktivaan aatmaayen ban gaye। aise sampanna aatmaon ke dil se kya geet nikalta? apraapta nahin koi vastu ham braahmanon ke khajaane mein।

aaj ke din ko smriti divas kehte ho, aaj sabhi bachchon ko vishesh aadi dev brahma baap jyaada smriti mein aa raha hai। brahma baap aap brahman bachchon ko dekh harshit hote hain, kyon? har brahman bachcha koton mein koi bhaagyavaan bachcha hai। apne bhaagya ko jaante ho na! baapdaada har bachche ke mastak mein chamakta hua bhaagya ka sitaara dekh harshit hote hain। aaj ka smriti divas vishesh baapdaada ne vishwa seva ki jimmevaari ka taaj bachchon ko arpan kiya। to yeh smriti divas aap bachchon ke raajya tilak ka divas hai। bachchon ke vishesh saakaar swaroop mein will powers will karne ka din hai। san shows father is kahaavat ko saakaar karne ka divas hai। baapdaada bachchon ke nimitta ban nihsvaartha vishwa seva ko dekh khush hote hain। baapdaada karaavanhaar ho, karanhaar bachchon ke har kadam ko dekh khush hote hain kyonki seva ki saphalta ka vishesh aadhaar hi hai - karaavanhaar baap mujh karanhaar aatma dvaara kara raha hai। main aatma nimitta hoon kyonki nimitta bhaav se nirmaan sthiti svatah ho jaati hai। main pan jo dehbhaan mein laata hai woh svatah hi nirmaan bhaav se samaapta ho jaata hai। is brahman jeevan mein sabse jyaada vighna roop banta hai to dehbhaan ka main-pan। karaavanhaar kara raha hai, main nimitta karanhaar ban kar raha hoon, to sahaj deh-abhimaan mukta ban jaate hain aur jeevanmukti ka maza anubhav karte hain। bhavishya mein jeevanmukti to praapta honi hai lekin ab sangamayug par jeevanmukti ka alaukik aanand aur hi alaukik hai। jaise brahma baap ko dekha - karma karte karma ke bandhan se nyaare। jeevan mein hote kamal pushpa samaan nyaare aur pyaare। itne bade parivaar ki jimmevaari, jeevan ki jimmevaari, yogi banaane ki jimmevaari, pharishta so devta banaane ki jimme-vaari hote hue bhi bephikar baadshaah। isi ko hi jeevanmukta sthiti kaha jaata hai iseelie bhakti maarga mein bhi brahma ka aasan kamal pushpa dikhaate hain। kamal aasandhaari dikhaate hain। to aap sabhi bachchon ko bhi sangam par hi jeevanmukti ka anubhav karna hi hai। baapdaada se mukti jeevanmukti ka varsa is samay hi praapta hota hai। is samay hi master mukti jeevanmukti daata banna hai। bane hain aur banna hai। mukti jeevanmukti ke master daata banne ki vidhi hai - second mein deh-bhaan mukta ban jaayen। is abhyaas ki abhi aavashyakta hai। man ke oopar aisi controlling power ho, jaise yeh sthool karmendriyaan haath hain, paanv hain, usko jab chaaho jaise chaaho vaise kar sakte ho, time lagta hai kya! abhi socho haath ko oopar karna hai, time lagega? kar sakte ho na! abhi baapdaada kahe haath oopar karo, to kar lenge na! karo nahin, kar sakte ho। aise man ke oopar itna control ho, jahaan ekaagra karne chaaho, vahaan ekaagra ho jaae। man chaahe haath, paanv se sookshm hai lekin hai to aapka na! mera man kehte ho na, tera man to nahin kehte ho na! to jaise sthool karmendriyaan control mein rehti hain, aise hi man-buddhi-sanskaar control mein hon tab kahenge number-one vijayi। science vaale to rocket dvaara va apne saadhnon dvaara isi lok tak pahunchte hain, jyaada mein jyaada grah tak pahunchte hain। lekin aap brahman aatmaayen teenon lok tak pahunch sakte ho। second mein sookshm lok, niraakaari lok aur sthool mein madhuban tak to pahunch sakte ho na! agar man ko order karo madhuban mein pahunchna hai to second mein pahunch sakte ho? tan se nahin, man se। order karo sookshm vatan jaana hai, niraakaari vatan mein jaana hai to teenon lokon mein jab chaahe man ko pahuncha sakte ho? hai practice? abhi is abhyaas ki aavashyakta jyaada hai। baapdaada ne dekha hai abhyaas to karte ho lekin jab chaahe, jitna samay chaahe ekaagra ho jaae, achal ho jaae, halchal mein nahin aaye, iske oopar aur attention। jo gaayan hai man jeet jagat jeet, abhi kabhi-kabhi man dhokha bhi de deta hai।

to baapdaada aaj ke samartha divas par yahi samarthi vishesh attention mein de rahe hain। he svaraajya adhikaari bachche, abhi is vishesh abhyaas ko chalte-phirte check karo kyonki samay pramaan abhi achaanak ke khel bahut dekhenge। iske liye ekaagrata ki shakti aavashyak hai। ekaagrata ki shakti se dridhta ki shakti bhi sahaj aa jaati hai aur dridhta saphalta svatah praapta karaati hai। to vishesh samartha divas par is samarthi ka abhyaas vishesh attention mein rakho iseelie bhakti maarga mein bhi kehte hain man ke haare haar, man ke jeete jeet। to jab mera man kehte ho, to mere ke maalik ban shaktiyon ki lagaam se vijay praapta karo। is naye varsha mein is homework par vishesh attention! isi ko hi kaha jaata hai yogi to ho lekin abhi prayogi bano।

baaki aaj ke din ki sneh ki roohrihaan, sneh ke ulhanen aur samaan banne ke umang-utsaah teenon prakaar ki roohrihaan baap-daada ke paas pahunchi hai। chaaron or ke bachchon ki sneh bhari yaaden, sneh bhara pyaar baapdaada ke paas pahuncha। patra bhi pahunche to roohrihaan bhi pahunchi, sandesh bhi pahunche, baapdaada ne bachchon ka sneh sveekaar kiya। dil se return mein yaadapyaar bhi diya। dil ki duaayen bhi di। ek-ek ka naam to nahin le sakte hain na। bahut hain। lekin kone-kone, gaanv-gaanv, shahar-shahar sab taraph ke bachchon ka, baandheliyon ka, vilaap karne vaalon ka sabka yaadapyaar pahuncha, ab baapdaada yahi kehte - sneh ke return mein ab apne aapko tarna karo, parivartan karo। ab stage par apna sampanna swaroop pratyaksha karo। aapki sampannata se duhkh aur ashaanti ki samaapti honi hai। abhi apne bhaai-bahinon ko jyaada duhkh dekhne nahin do। is duhkh, ashaanti se mukti dilaao। bahut bhaybheet hain। kya karen, kya hoga…, is andhakaar mein bhatak rahe hain। ab aatmaon ko roshni ka raasta dikhaao। umang aata hai? raham aata hai? abhi behad ko dekho। behad mein drishti daalo। achha। homework to yaad rahega na! bhool nahin jaana। prize denge। jo ek maas mein man ko bilkul controlling power se poora maas jahaan chaahe, jab chaahe vahaan ekaagra kar sake, is chart ki result mein inaam denge। theek hain? kaun inaam lenge? paandav, paandav pahle। mubaarak ho paandavon ko aur shaktiyaan? A one। paandav number one to shaktiyaan A one। shaktiyaan A one nahin hongi to paandav A one। abhi thodi raphtaar teevra karo। aaraam vaali nahin। teevra gati se hi aatmaon ka duhkh darda samaapta hoga। raham ki chhatrachhaaya aatmaon ke oopar daalo। achha।

double videshi bhaai bahinon se:- double videshi, baapdaada kehte hain double videshi arthaat double purushaartha mein aage badhne vaale। jaise double videshi title hai na, nishaani hai na aapki। aise hi double videshi number one lene mein bhi double raphtaar se aage badhne vaale। achha hai, har group mein baapdaada double videshiyon ko dekh karke khush hote hain kyonki bhaaratvaasi aap sabko dekh karke khush hote hain। baapdaada bhi vishwa kalyaankaari title ko dekh karke khush hote hain। abhi double videshi kya plan bana rahe ho? baapdaada ko khushi hui, aphreeka vaale teevra purushaartha kar rahe hain। to aap sabhi bhi aas-paas jo aapke bhaai behen rah gaye hain, unhon ko sandesh dene ka umang-utsaah rakho। ulhana nahin rah jaae। vriddhi ho rahi hai aur hoti bhi rahegi lekin abhi ulhana poora karna hai। yeh visheshta to double videshiyon ki sunaate hi hain ki bhole baap ko raazi karne ka jo saadhan hai - sachchi dil par saaheb raaji, woh double videshiyon ki visheshta hai। baap ko raazi karna bahut hoshiyaari se aata hai। sachchi dil baap ko kyon priy lagti hai? kyonki baap ko kehte hi hain satya। god is truth kehte hain na! to baapdaada ko saaph dil, sachchi dil vaale bahut priy hain। aise hai na! saaph dil hai, sachchi dil hai। satyata hi brahman jeevan ki mahaanta hai। isliye double videshiyon ko baapdaada sada yaad karte hain। bhinna-bhinna desh mein aatmaon ko sandesh dene ke nimitta ban gaye। dekho kitne deshon ke aate hain? to in sabhi deshon ka kalyaan to hua hai na! to baapdaada, yahaan to aap nimitta aaye hue hain lekin chaaron or ke double videshi bachchon ko, nimitta bane hue bachchon ko mubaarak de rahe hain, badhaai de rahe hain, udte raho aur udaate raho। udti kala sarva ka bhala ho hi jaana hai। sabhi refresh ho rahe hain? refresh hue? sada amar rahegi ya madhuban mein hi aadha chhodkar jaayenge? saath rahegi, sada rahegi? amar bhav ka vardaan hai na! to jo parivartan kiya hai woh sada badhta rahega। amar rahega। achha। baapdaada khush hai aur aap bhi khush hain auron ko bhi khushi dena। achha।

gyaan sarovar ko 10 saal hua hai:- achha। achha hai, gyaan sarovar ne ek visheshta aarambha ki, jabse gyaan sarovar shuru hua hai to vi.aai.pi., aai.pi. ke vishesh vidhi poorvak programmes shuru hue hain। har varga ke programmes ek do ke peechhe chalte rehte hain। aur dekha gaya hai ki gyaan sarovar mein aane vaali aatmaon ki sthool seva aur alaukik seva bahut achhi roochi se karte hain isliye gyaan sarovar vaalon ko baapdaada vishesh mubaarak dete hain ki seva ki result sab khush hokar jaate hain aur khushi khushi se aur saathiyon ko saath le aate hain। chaaron or aavaaj phailaane ke nimitta gyaan sarovar bana hai। to mubaarak hai aur sada mubaarak lete rehna। achha।

abhi ek second mein man ko ekaagra kar sakte ho? sab ek second mein bindu roop mein sthit ho jaao। (baapdaada ne drill karaai) achha - aisa abhyaas chalte phirte karte raho।

chaaron or ke snehi, lavleen aatmaon ko, sada merciful ban har aatma ko duhkh ashaanti se mukta karne vaale shreshtha aatmaon ko, sada apne man, buddhi, sanskaar ko controlling power dvaara control mein rakhne vaale mahaaveer aatmaon ko, sada sangamayug ke jeevanmukta sthiti ko anubhav karne vaale baap samaan aatmaon ko baapdaada ka padamguna yaadapyaar aur namaste।

vardaan:- sabhi ko thikaana dene vaale merciful baap ke bachche merciful bhav

merciful baap ke merciful bachche kisi ko bhi bhikhaari ke roop mein dekhenge to unhein raham aayega ki is aatma ko bhi thikaana mil jaae, iska bhi kalyaan ho jaae। unke samparka mein jo bhi aayega use baap ka parichay zaroor denge। jaise koi ghar mein aata hai to pahle use paani poochha jaata hai, aise hi chala jaae to bura samajhte hain, aise jo bhi samparka mein aata hai use baap ke parichay ka paani zaroor poochho arthaat daata ke bachche daata bankar kuchh na kuchh do taaki use bhi thikaana mil jaae।

slogan:- yathaartha vairaagya vritti ka sahaj arth hai - jitna nyaara utna pyaara।

avyakt ishaare - “combined roop ki smriti se sada vijayi bano''

main aur mera baba, isi smriti mein combined raho to maayaajeet ban jaayenge। karan-karaavanhaar - is shabd mein baap aur bachche donon combined hain। haath bachchon ka aur kaam baap ka। haath badhaane ka golden chance bachchon ko hi milta hai। lekin anubhav hota hai ki karaane vaala kara raha hai। nimitta banaae chala raha hai - yahi aavaaj sada man se nikalta hai।