Daily Murli for Saturday 3 May 2025

03-05-2025 praatahmurli om shanti "baapdaada"' madhuban

“meethe bachche - apne ko raajtilak dene ke laayak banaao, jitna padhaai padhenge, shreemat par chalenge to raajtilak mil jaayega''

prashn:- kis smriti mein raho to raavnapne ki smriti vismrit ho jaayegi?

uttar:- sada smriti rahe ki ham stri-purush nahin, ham aatma hain, ham bade baba (shivbaaba) se chhote baba (brahma) dvaara varsa le rahe hain। yeh smriti raavnapne ki smriti ko bhula degi। jabki smriti aai ki ham ek baap ke bachche hain to raavnapne ki smriti samaapta ho jaati hai। yeh bhi pavitra rahne ki bahut achhi yukti hai। parantu ismen mehnat chaahiye।

geet:- tumhein paake hamne…

om shanti। roohaani baap baith roohaani bachchon ko samjhaate hain। dekho sab tilak yahaan (bhrikuti mein) dete hain। is jagah ek to aatma ka nivaas hai, doosra phir raajtilak bhi yahaan diya jaata hai। yeh aatma ki nishaani to hai hi। ab aatma ko baap ka varsa chaahiye svarga ka। vishwa ka raajya tilak chaahiye। sooryavanshi-chandravanshi mahaaraaja-mahaaraani banne ke liye padhte hain। yeh padhna goya apne liye apne ko raajtilak dena hai। tum yahaan aaye hi ho padhne liye। aatma jo yahaan nivaas karti hai woh kehti hai baba ham aapse vishwa ka svaraajya avashya praapta karenge। apne liye har ek ko apna purushaartha karna hai। kehte hain baba ham aise sapoot bankar dikhaayenge। aap hamaari chalan ko dekhte rehna ki kaise chalte hain। aap bhi jaan sakte ho ham apne ko raajtilak dene laayak bane hain ya nahin? tum bachchon ko baap ka sapoot ban kar dikhaana hai। baba ham aapka naam zaroor baala karenge। ham aapke madadgaar so apne madadgaar ban bhaarat par apna raajya karenge। bhaaratvaasi kehte hain na - hamaara raajya hai। parantu un bichaaron ko pata nahin hai ki abhi ham vishay vaitarni nadi mein pade hain। ham aatma ka raajya to hai nahin। abhi to aatma ulti latki padi hai। khaane ko bhi nahin milta hai। jab aisi haalat hoti hai tab baba kehte hain ab to hamaare bachchon ko khaane liye bhi nahin milta hai, ab ham jaakar inhon ko raajayog sikhlaaoon। to baap aate hain raajayog sikhaane। behad ke baap ko yaad karte hain। woh hai hi nai duniya rachne vaala। baap patit-paavan bhi hai, gyaan saagar bhi hai। yeh sivaae tumhaare aur koi ki buddhi mein nahin hai। yeh sirf tum bachche jaante ho - barobar hamaara baba gyaan ka saagar, sukh ka saagar hai। yeh mahima pakki yaad kar lo, bhoolo nahin। baap ki mahima hai na। woh baap punarjanma rahit hai। krishna ki mahima bilkul nyaari hai। prime minister, president ki mahima to alag-alag hoti hai na। baap kehte hain mujhe bhi is drama mein oonch te oonch part mila hua hai। drama mein actors ko maaloom hona chaahiye na ki yeh behad ka drama hai, inki aayu kitni hai। agar nahin jaante to unko besmajh kahenge। parantu yeh koi samajhte thode hi hain। baap aakar contrast batlaate hain ki manushya kya se kya ho jaate hain। abhi tum samajh sakte ho, manushyon ko bilkul pata nahin hai ki 84 janma kaise liye jaate hain। bhaarat kitna oonch tha, chitra hain na। somnaath mandir se kitna dhan lootkar le gaye। kitna dhan tha। abhi tum bachche yahaan behad ke baap se milne aaye ho। bachche jaante hain baba se raajtilak shreemat par lene aaye hain। baap kehte hain pavitra zaroor banna padega। janma-janmaantar vishay vaitarni nadi mein gote khaakar thake nahin ho! kehte bhi hain ham paapi hain, mujh nirgun haare mein koi gun naahi, to zaroor kabhi gun the jo ab nahin hain।

abhi tum samajh gaye ho - ham vishwa ke maalik, sarvagun sampanna the। abhi koi gun nahin raha hai। yeh bhi baap samjhaate hain। bachchon ka rachayita hai hi baap। to baap ko hi taras padta hai sabhi bachchon par। baap kehte hain mera bhi drama mein yeh part hai। kitne tamopradhaan ban gaye hain। jhooth paap, jhagda kya-kya laga pada hai। sab bhaaratvaasi bachche bhool gaye hain ki ham koi samay vishwa ke maalik double sirtaaj the। baap unhein smriti dilaate hain, tum vishwa ke maalik the phir tum 84 janma lete aaye ho। tum apne 84 janmon ko bhool gaye ho। wonder hai, 84 ke badle 84 laakh janma laga diye hain phir kalpa ki aayu bhi laakhon varsha kah dete। ghor andhiyaare mein hain na। kitni jhooth hai। bhaarat hi sachkhanda tha, bhaarat hi jhoothkhanda hai। jhoothkhanda kisne banaaya, sachkhanda kisne banaaya - yeh kisko pata nahin। raavan ko bilkul hi jaante nahin। bhakta log raavan ko jalaate hain। koi religious aadmi ho, unko tum bataao ki manushya yeh kya-kya karte hain। satayug jisko heaven paradise kehte ho vahaan shaitaan raavan kahaan se aaya। hell ke manushya vahaan ho kaise sakte। to samjhenge yeh to barobar bhool hai। tum raamraajya ke chitra par samjha sakte ho, ismen raavan kahaan se aaya? tum samjhaate bhi ho parantu samajhte nahin। koi virla nikalta hai। tum kitne thode ho so bhi aage chal dekhna hai, kitne thaharte hain।

to baba ne samjhaaya - aatma ki chhoti nishaani bhi yahaan hi dikhaate hain। badi nishaani hai raajtilak। abhi baap aaya hua hai। apne ko bada tilak kaise dena hai, tum svaraajya kaise praapta kar sakte ho? woh raasta bataate hain। uska naam rakh diya hai raaj-yog। sikhlaane vaala hai baap। shri krishna thode hi baap ho sakta। woh to bachcha hai phir raadhe ke saath svayanvar hota hai tab ek bachcha hoga। baaki shri krishna ko itni raaniyaan aadi de di hain yeh to jhooth hai na। parantu yeh bhi drama mein noondh hai, aisi baaten phir bhi sunenge। abhi tum bachchon ki buddhi mein hai - kaise ham aatmaayen oopar se aati hain part bajaane। ek shareer chhod doosra leti hain। yeh to bahut sahaj hai na। bachcha paida hua, unko sikhlaate hain - yeh bolo। to sikhlaane se seekh jaata hai। tumko baba kya sikhlaate hain? sirf kehte hain baap aur varse ko yaad karo। tum gaate bhi ho tum maat-pita...... aatma gaati hai na barobar sukh ghanere milte hain। tum bachche jaante ho shivbaaba hamko padha rahe hain। yahaan tum shivbaaba ke paas aaye ho। bhaageerath to manushya ka rath hai na। ismen parampita paramatma viraajmaan hote hain, parantu rath ka naam kya hai? abhi tum jaante ho naam hai brahma kyonki brahma dvaara brahman rachte hain na। pahle hote hi hain brahman choti phir devta। pahle to brahman chaahiye isliye viraat roop bhi dikhaaya hai। tum brahman hi phir devta bante ho। baap bahut achhi reeti samjhaate hain, phir bhi bhool jaate hain। baap kehte bachche sada smriti rakho ki ham stri-purush nahin, ham aatma hain। ham bade baba (shivbaaba) se chhote baba (brahma) dvaara varsa le rahe hain to raavnapne ki smriti vismrit ho jaayegi। yeh pavitra rahne ki bahut achhi yukti hai। baba ke paas bahut jode aate hain, donon hi kehte hain baba। jabki smriti aai hai ham ek baap ke bachche hain to phir raavnapne ki smriti vismrit ho jaani chaahiye, ismen mehnat chaahiye। mehnat bigar to kuchh chal na sake। ham baba ke bane hain, unko hi yaad karte hain। baap bhi kehte hain mujhe yaad karo to vikarma vinaash honge। 84 janmon ki kahaani bhi bilkul sahaj hai। baaki mehnat hai baap ko yaad karne mein। baap kehte hain kam se kam purushaartha kar 8 ghanta to yaad karo। ek ghadi aadhi ghadi.....। class mein aao to smriti aayegi - baap hamko yeh padhaate hain। abhi tum baap ke sammukh ho na। baap bachche-bachche kah samjhaate hain। tum bachche sunte ho। baap kehte hain hear no evil..... yeh bhi abhi ki hi baat hai।

abhi tum bachche jaante ho ham gyaan saagar baap ke paas sammukh aaye hain। gyaan saagar baap tumko saare srishti ka gyaan suna rahe hain। phir koi uthaaye na uthaaye, vo to unke oopar hai। baap aakar abhi hamko gyaan de rahe hain। ham abhi raajayog seekhte hain। phir koi bhi shaastra aadi bhakti ka ansh nahin rahega। bhakti maarga mein gyaan rinchak maatra nahin, gyaan maarga mein phir bhakti rinchak maatra nahin। gyaan saagar jab aaye tab woh gyaan sunaaye। unka gyaan hai hi sadgati ke liye। sadgati daata hai hi ek, jisko hi bhagwan kaha jaata hai। sab ek hi patit-paavan ko bulaate hain phir doosra koi ho kaise sakta। abhi baap dvaara tum bachche sachchi baaten sun rahe ho। baap ne sunaaya - bachche, main tumko kitna saahookaar banaakar gaya tha। 5 hazaar varsha ki baat hai। tum double sirtaaj the, pavitrata ka bhi taaj tha phir jab raavan raajya hota hai tab tum pujaari ban jaate ho। ab baap padhaane aaye hain to unki shreemat par chalna hai, auron ko bhi samjhaana hai। baap kehte hain mujhe yeh shareer loan lena padta hai। mahima saari us ek ki hi hai, main to unka rath hoon। bail nahin hoon। balihaari saari tumhaari hai, baba tumko sunaate hain, main beech mein sun leta hoon। mujh akele ko kaise sunaayenge। tumko sunaate hain main bhi sun leta hoon। yeh bhi purushaarthi student hai। tum bhi student ho। yeh bhi padhte hain। baap ki yaad mein rehte hain। kitni khushi mein rehte hain। lakshmi-naaraayan ko dekh khushi hoti hai - ham yeh banne vaale hain। tum yahaan aaye hi ho svarga ke prince-princess banne। raajayog hai na। em object bhi hai। padhaane vaala bhi baitha hai phir itni khushi kyon nahin hoti hai। andar mein bahut khushi honi chaahiye। baba se ham kalpa-kalpa varsa lete hain। yahaan gyaan saagar ke paas aate hain, paani ki to baat hi nahin hai। yeh to baap sammukh samjha rahe hain। tum bhi yeh (devta) banne ke liye padh rahe ho। bachchon ko bahut khushi honi chaahiye - abhi ham jaate hain apne ghar। ab jo jitna padhenge utna oonch pad paayenge। har ek ko apna purushaartha karna hai। dilhol (dilshikasta) mat bano। bahut badi lottery hai। samajhte hue bhi phir aashcharyavat bhaaganti ho padhaai ko chhod dete hain। maaya kitni prabal hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne ko raajtilak dene ke laayak banaana hai। sapoot bachcha bankar saboot dena hai। chalan badi royal rakhni hai। baap ka poora-poora madadgaar banna hai।

2) ham student hain, bhagwan humein padha rahe hain, is khushi se padhaai padhni hai। kabhi bhi purushaartha mein dilshikasta nahin banna hai।

vardaan:- apne adhikaar ki shakti dvaara trimoorti rachna ko sahayogi banaane vaale master rachta bhav

trimoorti shaktiyaan (man, buddhi aur sanskaar) yeh aap master rachta ki rachna hain। inhen apne adhikaar ki shakti se sahayogi banaao। jaise raaja svayan kaarya nahin karta, karaata hai, karne vaale raajya kaarobaari alag hote hain। aise aatma bhi karaavanhaar hai, karanhaar ye vishesh trimoorti shaktiyaan hain। to master rachayita ke vardaan ko smriti mein rakh trimoorti shaktiyon ko aur saakaar karmendriyon ko sahi raaste par chalaao।

slogan:- avyakt paalna ke vardaan ka adhikaar lene ke liye spashtavaadi bano।

avyakt ishaare - roohaani royalty aur purity ki personality dhaaran karo

pavitrata sirf brahmacharya nahin, woh to foundation hai lekin saath mein aur chaar bhi hain। krodh aur sabhi saathi jo hain, un mahaabhooton ka tyaag, saath-saath unke bhi jo baal bachche chhote-chhote ansh maatra, vansh maatra hain, unka bhi tyaag karo tab kahenge purity ki roohaani royalty dhaaran ki hai।