Daily Murli for Sunday 11 May 2025

11-05-25 praatahmurli om shanti ''avyakt-baapdaada'' revise 07-03-2005 madhuban

“sampoorn pavitrata ka vrat rakhna aur main pan ko samarpit karna hi shivjayanti manaana hai''

aaj vishesh shiv baap apne shaaligraam bachchon ka birth de manaane aaye hain। aap bachche baap ka janma din manaane aaye ho aur baapdaada bachchon ka birth de manaane aaye hain kyonki baap ka bachchon se bahut pyaar hai। baap avatrit hote hi yagya rachte hain aur yagya mein braahmanon ke bina yagya sampanna nahin hota hai isliye yeh birth de alaukik hai, nyaara aur pyaara hai। aisa birth de jo baap aur bachchon ka ikattha ho yeh saare kalpa mein na hua hai, na kabhi ho sakta hai। baap hai niraakaar, ek taraph niraakaar hai doosre taraph janma manaate hain। ek hi shiv baap hai jisko apna shareer nahin hota isliye brahma baap ke tan mein avatrit hote hain, yeh avatrit hona hi jayanti ke roop mein manaate hain। to aap sabhi baap ka janma din manaane aaye ho va apna manaane aaye ho? mubaarak dene aaye ho va mubaarak lene aaye ho? yeh saath-saath ka vaayda bachchon se baap ka hai। abhi bhi sangam par combined saath hai, avatran bhi saath hai, parivartan karne ka kaarya bhi saath hai aur ghar paramdham mein chalne mein bhi saath-saath hai। yeh hai baap aur bachchon ke pyaar ka swaroop।

shiv jayanti bhagat bhi manaate hain lekin woh sirf pukaarte hain, geet gaate hain। aap pukaarte nahin, aapka manaana arthaat samaan banna। manaana arthaat sada umang-utsaah se udte rehna iseelie isko utsav kehte hain। utsav ka arth hi hai utsaah mein rehna। to sada utsav arthaat utsaah mein rahne vaale ho na! sada hai ya kabhi-kabhi hai? vaise dekha jaae to brahman jeevan ka shvaans hi hai - umang-utsaah। jaise shvaans ke bina rah nahin sakte hain, aise brahman aatmaayen umang-utsaah ke bina brahman jeevan mein rah nahin sakte hain। aise anubhav karte ho na? dekho vishesh jayanti manaane ke liye kahaan-kahaan se, door-door se bhaag karke aaye hain। baapdaada ko apne janma din ki itni khushi nahin hai jitni bachchon ke janma din ki hai isliye baapdaada ek-ek bachche ko padamguna khushi ki thaaliyaan bhar-bhar ke mubaarak de rahe hain। mubaarak ho, mubaarak ho, mubaarak ho।

baapdaada ko aaj ke din sachche bhagat bhi bahut yaad aa rahe hain। woh vrat rakhte hain ek din ka aur aapne vrat rakha hai saare jeevan mein sampoorn pavitra banne ka। woh khaane ka vrat rakhte hain, aapne bhi man ke bhojan vyartha sankalp, negative sankalp, apvitra sankalpon ka vrat rakha hai। pakka vrat rakha hai na? yeh double foreigners aage-aage baithe hain। yeh kumaar bolo, kumaaron ne vrat rakha hai, pakka? kachcha nahin। maaya sun rahi hai। sab jhandiyaan hila rahe hain na to maaya dekh rahi hai, jhandiyaan hila rahe hain। jab vrat rakhte hain - pavitra banna hi hai, to vrat rakhna arthaat shreshtha vritti banaana। to jaisi vritti hoti hai vaise hi drishti, kriti svatah hi ban jaati hai। to aisa vrat rakha hai na? pavitra shubh vritti, pavitra shubh drishti, jab ek do ko dekhte ho to kya dekhte ho? face ko dekhte ho ya bhrikuti ke beech chamakti hui aatma ko dekhte ho? koi bachche ne poochha ki jab baat karna hota hai, kaam karna hota hai to face ko dekh karke hi baat karni padti hai, aankhon ke taraph hi nazar jaati hai, to kabhi-kabhi face ko dekh karke thoda vritti badal jaati hai। baapdaada kehte hain - aankhon ke saath-saath bhrikuti bhi hai, to bhrikuti ke beech aatma ko dekh baat nahin kar sakte hain! abhi baapdaada saamne baithe bachchon ke aankhon mein dekh rahe hain ya bhrikuti mein dekh rahe hain, maaloom padta hai? saath-saath hi to hai। to face mein dekho lekin face mein bhrikuti mein chamakta hua sitaara dekho। to yeh vrat lo, liya hai lekin aur attention do। aatma ko dekh baat karna hai, aatma se aatma baat kar raha hai। aatma dekh raha hai। to vritti sada hi shubh rahegi aur saath-saath doosra phaayda hai jaisi vritti vaisa vaayumandal banta hai। vaayumandal shreshtha banaane se svayan ke purushaartha ke saath-saath seva bhi ho jaati hai। to double phaayda hai na! aisi apni shreshtha vritti banaao jo kaisa bhi vikaari, patit aapke vritti ke vaayumandal se parivartan ho jaae। aisa vrat sada smriti mein rahe, swaroop mein rahe।

aajkal baapdaada ne bachchon ka chart dekha, apne vritti se vaayumandal banaane ke bajaae kahaan-kahaan, kabhi-kabhi doosron ke vaayumandal ka prabhaav pad jaata hai। kaaran kya hota? bachche roohrihaan mein bahut meethi-meethi baaten karte hain, kehte hain iski visheshta achhi lagti hai, inka sahayog bahut achha milta hai, lekin visheshta prabhu ki den hai। brahman jeevan mein jo bhi praapti hai, jo bhi visheshta hai, sab prabhu prasaad hai, prabhu den hai। to daata ko bhool jaae, levta ko yaad kare…! prasaad kabhi kiska personal gaaya nahin jaata, prabhu prasaad kaha jaata hai। phalaane ka prasaad nahin kaha jaata hai। sahayog milta hai, achhi baat hai lekin sahayog dilaane vaala daata to nahin bhoole na! to pakka-pakka birth de ka vrat rakha hai? vritti badal gai hai? sampanna pavitrata, yeh sachcha-sachcha vrat lena va pratigya karna। check karo - bade-bade vikaar ka vrat to rakha hai lekin chhote-chhote unke baal-bachchon se mukta hain? vaise bhi dekho jeevan mein pravritti vaalon ka bachchon se jyaada potre-dhotre se pyaar hota hai। maataaon ka pyaar hota hai na। to bade bade roop se to jeet liya lekin chhote-chhote sookshm swaroop mein vaar to nahin karte? jaise kai kehte hain - aasakti nahin hai lekin achha lagta hai। yeh cheez jyaada achhi lagti hai lekin aasakti nahin hai। vishesh achha kyon lagta? to check karo chhote-chhote roop mein bhi apvitrata ka ansh to nahin rah gaya hai? kyonki ansh se kabhi vansh paida ho sakta hai। koi bhi vikaar chaahe chhote roop mein, chaahe bade roop mein aane ka nimitta ek shabd ka bhaav hai, woh ek shabd hai - “main''। body-conscious ka main। is ek main shabd se abhimaan bhi aata hai aur abhimaan agar poora nahin hota to krodh bhi aata hai kyonki abhimaan ki nishaani hai - woh ek shabd bhi apne apmaan ka sahan nahin kar sakta, isliye krodh aa jaata। to bhagat to bali chadhaate hain lekin aap aaj ke din jo bhi had ka main pan ho, usko baap ko dekar samarpit karo। yeh nahin socho karna to hai, banna to hai... to to nahin karna। samartha ho aur samartha ban samaapti karo। koi nai baat nahin hai, kitne kalpa, kitne baar sampoorn bane ho, yaad hai? koi nai baat nahin hai। kalpa-kalpa bane ho, bani hui ban rahi hai, sirf repeat karna hai। bani ko banaana hai, isliye kaha jaata hai bana banaaya drama। bana hua hai sirf abhi repeat karna arthaat banaana hai। mushkil hai ki sahaj hai? baapdaada samajhte hain sangamayug ka vardaan hai - sahaj purushaartha। is janma mein sahaj purushaartha ke vardaan se 21 janma sahaj jeevan svatah hi praapta hogi। baap-daada har bachche ko mehnat se mukta karne aaye hain। 63 janma mehnat ki, ek janma parmaatma pyaar, muhabbat se mehnat se mukta ho jaao। jahaan muhabbat hai vahaan mehnat nahin, jahaan mehnat hai vahaan muhabbat nahin। to baapdaada sahaj purushaarthi bhav ka vardaan de raha hai aur mukta hone ka saadhan hai - muhabbat, baap se dil ka pyaar। pyaar mein lavleen aur maha yantra hai - manamnaabhav ka mantra। to yantra ko kaam mein lagaao। kaam mein lagaana to aata hai na! baapdaada ne dekha sangamayug mein parmaatma pyaar dvaara, baapdaada dvaara kitni shaktiyaan mili hain, gun mile hain, gyaan mila hai, khushi mili hai, in sab prabhu den ko, khajaanon ko samay par kaarya mein lagaao।

to baapdaada kya chaahte hain, suna? har ek bachcha sahaj purushaarthi, sahaj bhi, teevra bhi। dridhta ko use karo। banna hi hai, ham nahin banenge to kaun banega। ham hi the, ham hi hain aur har kalpa ham hi honge। itna dridh nishchay svayan mein dhaaran karna hi hai। karenge nahin kehna, karna hi hai। hona hi hai। hua pada hai।

baapdaada desh videsh ke bachchon ko dekh khush hai। lekin sirf aap saamne sammukh vaalon ko nahin dekh rahe hain, chaaron or ke desh aur videsh ke bachchon ko dekh rahe hain। majority jahaan-tahaan se birth de ki mubaarken aai hain, card bhi mile hain, ee-mel bhi mile hain, dil ka sankalp bhi mila hai। baap bhi bachchon ke geet gaate hain, aap log geet gaate ho na - baba aapne kar di kamaal, to baap bhi geet gaate hain meethe bachchon ne kar di kamaal। baapdaada sada kehte hain ki aap to sammukh baithe ho lekin door vaale bhi baapdaada ke dil par baithe hain। aaj chaaron or bachchon ke sankalp mein hai - mubaarak ho, mubaarak ho, mubaarak ho। baapdaada ke kaanon mein aavaaj pahunch raha hai aur man mein sankalp pahunch rahe hain। yeh nimitta card hain, patra hain lekin bahut bade heere se bhi jyaada moolyavaan gift hain। sabhi sun rahe hain, harshit ho rahe hain। to sabhi ne apna birth de mana liya। chaahe do saal ka ho, chaahe ek saal ka ho, chaahe ek saptaah ka ho, lekin yagya ki sthaapna ka birth de hai। to sabhi brahman yagya nivaasi to hain hi, isliye sabhi bachchon ko bahut-bahut dil ka yaadapyaar bhi hai, duaayen bhi hain, sada duaaon mein hi palte raho, udte raho। duaayen dena aur lena sahaj hai na! sahaj hai? jo samajhte hain sahaj hai, woh haath uthaao। jhandiyaan hilaao। to duaayen chhodte to nahin? sabse sahaj purushaartha hi hai - duaayen dena, duaayen lena। ismen yog bhi aa jaata, gyaan bhi aa jaata, dhaarna bhi aa jaati, seva bhi aa jaati। chaaron hi subject aa jaati hain duaayen dene aur lene mein।

to double foreigners duaayen dena aur lena sahaj hai na! sahaj hai? 20 saal vaale jo aaye hain woh haath uthaao। aapko to 20 saal hue hain lekin baapdaada aap sabko padam guna mubaarak de rahe hain। kitne deshon ke aaye hain? (69 deshon ke) mubaarak ho। 69 vaan birth de manaane ke liye 69 deshon se aaye hain। kitna achha hai। aane mein takleeph to nahin hui na। sahaj aa gaye na! jahaan muhabbat hai vahaan kuchh mehnat nahin। to aaj ka vishesh vardaan kya yaad rakhenge? sahaj purushaarthi। sahaj kaarya jaldi-jaldi kiya hi jaata hai। mehnat ka kaam mushkil hota hai na to time lagta hai। to sabhi kaun ho? sahaj purushaarthi। bolo, yaad rakhna। apne desh mein jaake mehnat mein nahin lag jaana। agar koi mehnat ka kaam aave bhi to dil se kehna, baba, mera baba, to mehnat khatma ho jaayegi। achha। mana liya na! baap ne bhi mana liya, aapne bhi mana liya। achha।

abhi ek second mein drill kar sakte ho? kar sakte ho na! achha। (baapdaada ne drill karaai)

chaaron or ke sada umang-utsaah mein rahne vaale shreshtha bachchon ko, sada sahaj purushaarthi sangamayug ke sarva vardaani bachchon ko, sada baap aur main aatma isi smriti se main bolne vaale, main aatma, sada sarva aatmaon ko apne vritti se vaayumandal ka sahayog dene vaale aise master sarvashaktivaan bachchon ko baapdaada ka yaadapyaar, duaayen, mubaarak aur namaste।

double videshi badi bahinon se:- sabhi ne mehnat achhi ki hai। group-group banaaya hai na to mehnat achhi ki hai। aur yahaan vaayumandal bhi achha hai, sangathan ki bhi shakti hai, to sabko refreshment achhi mil jaati hai aur aap nimitta ban jaate ho। achha hai। door-door rehte hain na, to sangathan ki jo shakti hoti hai woh bhi bahut achhi hai। itna saara parivaar ikattha hota hai to har ek ki visheshta ka prabhaav to padta hai। achha plan banaaya hai। baapdaada khush hai। sabki khushbu aap le lete ho। woh khush hote hain aapko duaayen milti hain। achha hai, yeh jo sabhi ikatthe ho jaate ho yeh bahut achha hai, aapas mein len den bhi ho jaati hai aur refreshment bhi ho jaati hai। ek do ki visheshta jo achhi pasanda aati hai, usko use karte hain, isse sangathan achha ho jaata hai। yeh theek hai।

centre vaasi bhaai bahinon se:- (sabhi banner dikha rahe hain, us par likha hai - prem aur daya ki jyoti jaga kar rakhenge) bahut achha sankalp liya hai। apne par bhi daya drishti, saathiyon ke oopar bhi daya drishti aur sarva ke oopar bhi daya drishti। eeshvareey lav chumbak hai, to aapke paas eeshvareey lav ka chumbak hai। kisi bhi aatma ko eeshvareey lav ke chumbak se baap ka bana sakte ho। baapdaada centre par rahne vaalon ko vishesh dil ki duaayen dete hain, jo aap sabhi ne vishwa mein naam baala kiya hai। kone-kone mein brahmaakumaareez ka naam to phailaaya hai na! aur baapdaada ko bahut achhi baat lagti hai ki jaise double videshi ho, vaise double job karne vaale ho। majority laukik job bhi karte hain to alaukik job bhi karte hain aur baapdaada dekhte hain, baapdaada ki T.vi. bahut badi hai, aisi badi T.vi. yahaan nahin hai। to baapdaada dekhte hain kaise phataaphat class karte, naashta khade-khade karte, job mein time par pahunchte, kamaal karte hain। baapdaada dekhte-dekhte dil ka pyaar dete rehte hain। bahut achha, seva ke nimitta bane ho aur nimitta banne ki gift baap sada vishesh drishti dete rehte hain। bahut achha lakshya rakha hai, achhe ho, achhe rahenge, achhe banaayenge। achha।

vardaan:- sarva khajaanon ki economy ka budget banaane vaale maheen purushaarthi bhav

jaise laukik reeti mein yadi economy vaala ghar na ho to theek reeti se nahin chal sakta। aise yadi nimitta bane hue bachche economy vaale nahin hain to centre theek nahin chalta। woh hui had ki pravritti, yeh hai behad ki pravritti। to check karna chaahiye ki sankalp, bol aur shaktiyon mein kya-kya extra kharcha kiya? jo sarva khajaanon ki economy ka budget banaakar usi anusaar chalte hain unhein hi maheen purushaarthi kaha jaata hai। unke sankalp, bol, karma va gyaan ki shaktiyaan kuchh bhi vyartha nahin ja sakti।

slogan:- sneh ke khajaane se maalaamaal ban sabko sneh do aur sneh lo।

avyakt ishaare - roohaani royalty aur purity ki personality dhaaran karo

pavitrata ki shakti parampoojya banaati hai। pavitrata ki shakti se is patit duniya ko parivartan karte ho। pavitrata ki shakti vikaaron ki agni mein jalti hui aatmaon ko sheetal bana deti hai। aatma ko anek janmon ke vikarmon ke bandhan se chhuda deti hai। pavitrata ke aadhaar par dvaapar se yeh srishti kuchh na kuchh thami hui hai। iske mahatva ko jaankar pavitrata ke light ka crown dhaaran kar lo।