Daily Murli for Sunday 18 May 2025

18-05-25 praatahmurli om shanti ''avyakt-baapdaada'' revise 25-03-2005 madhuban

“master gyaan soorya ban anubhooti ki kirnen phailaao, vidhaata bano, tapasvi bano''

aaj baapdaada apne chaaron or ke holeehans bachchon se holi manaane ke liye aaye hain। bachche bhi pyaar ki dor mein bandhe hue holi manaane ke liye pahunch gaye hain। milan manaane ke liye kitne pyaar se pahunch gaye hain। baapdaada sarva bachchon ke bhaagya ko dekh rahe the - kitna bada bhaagya, jitne hi holiest hain utne hi highest bhi hain। saare kalpa mein dekho aap sabke bhaagya se ooncha bhaagya aur kisi ka nahin hai। jaante ho na apne bhaagya ko? vartamaan samay bhi parmaatma paalna, parmaatma padhaai aur parmaatma vardaanon se pal rahe ho। bhavishya mein bhi vishwa ke raajya adhikaari bante ho। banna hi hai, nishchit hai, nishchay hi hai। baad mein bhi jab poojya bante ho to aap shreshtha aatmaon jaisi pooja vidhipoorvak aur kisi ki bhi nahin hoti hai। to vartamaan, bhavishya aur poojya swaroop mein highest arthaat oonche te oonche hain। aapke jad chitra unhon ki bhi har karma ki pooja hoti hai। anek dharma pita, mahaan aatmaayen hue hain lekin aise vidhipoorvak pooja aap oonche te oonche parmaatma bachchon ki hoti hai kyonki is samay har karma mein karmayogi ban karma karne ki vidhi ka phal pooja bhi vidhipoorvak hoti hai। is sangam samay ke purushaartha ki praalabdha milti hai। to oonche te oonche bhagvan aap bachchon ko bhi oonche te oonchi praapti karaate hain।

holi arthaat pavitrata, holiest bhi ho to highest bhi ho। is brahman jeevan ka foundation hi pavitrata hai। sankalp maatra bhi apvitrata shreshtha banne nahin deti। pavitrata hi sukh, shanti ki janni hai। pavitrata sarva praaptiyon ki chaabi hai, isliye aap sabka slogan yahi hai - “pavitra bano, yogi bano।'' jo holi bhi yaadgaar hai, usmein bhi dekho pahle jalaate hain phir manaate hain। jalaane ke bina nahin manaate hain। apvitrata ko jalaana, yog ke agni dvaara apvitrata ko jalaate ho, uska yaadgaar woh aag mein jalaate hain aur jalaane ke baad jab pavitra bante hain to khushiyon mein manaate hain। pavitra banne ka yaadgaar milan manaate hain kyonki aap sabhi bhi jab apvitrata ko jalaate ho, parmaatma sang ke rang mein laal ho jaate ho to sarva aatmaon ke prati shubh bhaavna, shubh kaamna ka milan manaate ho। iska yaadgaar mangal milan manaate hain। isliye baapdaada sabhi bachchon ko yahi smriti dilaate hain ki sada har ek se duaayen lo aur duaayen do। apne duaaon ki shubh bhaavna se mangal milan manaao kyonki agar koi bad-dua deta bhi hai, woh to parvash hai apvitrata se lekin agar aap bad-dua ko man mein samaate ho to kya khush rehte ho? sukhi rehte ho? ya vyartha sankalpon ka kyon, kya, kaise, kaun… is duhkh ka anubhav karte ho? bad-dua lena arthaat apne ko bhi duhkh aur ashaanti anubhav karaana। jo baapdaada ki shreemat hai sukh do aur sukh lo, us shreemat ka ullanghan ho jaata hai। to abhi sabhi bachche dua lena aur dua dena seekh gaye ho na! seekha hai?

pratigya aur dridhta, dridhta se pratigya karo - sukh dena hai aur sukh lena hai। dua deni hai, leni hai। hai pratigya? himmat hai? jismen himmat hai aaj se dridhta ka sankalp lete hain - dua lenge, dua denge, woh haath uthaao। pakka? pakka? kachcha nahin hona। kachche banenge na - to kachche phal ko chidiya bahut khaati hai। dridhta saphalta ki chaabi hai। sabhi ke paas chaabi hai? hai chaabi? chaabi kaayam hai, maaya chori to nahin kar leti? usko bhi chaabi se pyaar hai। sadaiv sankalp karte hue yeh sankalp emerge karo, merge nahin, emerge। emerge karo mujhe karna hi hai। banna hi hai। hona hi hai। hua hi pada hai। isko kaha jaata hai nishchaybuddhi, vijayanti। drama vijay ka bana hi pada hai। sirf repeat karna hai। bana banaaya drama hai। bana hua hai, repeat kar banaana hai। mushkil hai? kabhi-kabhi mushkil ho jaata hai! mushkil kyon hota hai? apne aap hi sahaj ko mushkil kar dete ho। chhoti si galti kar lete ho - pata hai kaun si galti karte ho? baapdaada ko us samay bachchon par bahut raham kya kahen, pyaar aata hai। kya pyaar aata hai? ek taraph to kehte ho ki baap hamaare saath combined hai। saath nahin combined hai। to combined hai? double foreigners combined hai? peechhe vaale combined hai? gallery vaale combined hai?

achha - aaj to baapdaada ko samaachaar mila ki madhuban nivaasi paandav bhavan, gyaan sarovar aur yahaan vaale bhi alag hall mein sun rahe hain। to unhon se bhi baapdaada poochh rahe hain ki baapdaada combined hain? haath utha rahe hain। jab sarva shaktivaan baapdaada combined hai phir akele kyon ban jaate? agar aap kamjor bhi ho to baapdaada to sarvashaktivaan hai na! akele ban jaate ho tab hi kamjor ban jaate ho। combined roop mein raho। baapdaada har ek bachche ke har samay sahayogi hain। shiv baap paramdham se aaye kyon hain? kislie aaye hain? bachchon ke sahayogi banne ke liye aaye hain। dekho brahma baap bhi vyakta se avyakt hue kislie? saakaar shareer se avyakt roop mein jyaada se jyaada sahayog de sakte hain। to jab baapdaada sahayog dene ke liye offer kar rahe hain to akele kyon ban jaate? mehnat mein kyon lag jaate? 63 janma to mehnat ki hai na! kya woh mehnat ke sanskaar abhi bhi kheenchate hain kya? muhabbat mein raho, lav mein leen raho। muhabbat mehnat se mukta karaane vaali hai। mehnat achhi lagti hai kya? kya aadat se majboor ho jaate ho? sahaj yogi hain, baapdaada vishesh bachchon ke liye paramdham se saugaat laaye hain, pata hai kya saugaat laaye hain? tiri par bahista laaya hai। (hatheli par svarga laaye hain) aapka chitra bhi hai na। raajya bhaagya laaye hain bachchon ke liye, isliye baapdaada ko mehnat achhi nahin lagti।

baapdaada har bachche ko mehnat mukta, muhabbat mein magan dekhne chaahte hain। to mehnat va maaya ki yuddha se mukta banne ki aaj sankalp dvaara holi jalaayenge? jalaayenge? jalaana maana naam-nishaan gum। koi bhi cheez jalaate hain to naam-nishaan khatma ho jaata hai na! to aisi holi manaayenge? haath to hila rahe hain। baapdaada haath dekh karke khush ho raha hai। lekin... lekin hai? lekin bolen kya ki nahin? man ka haath hilaana। yeh haath hilaana to bahut easy hai। agar man ne maana karna hi hai, to hua hi pada hai। naye-naye bhi bahut aaye hain। jo pahle baari milan manaane ke liye aaye hain, woh haath uthaao। double foreigners mein bhi hain।

abhi jo bhi pahle baari aaye hain, baapdaada vishesh unhon ko apna bhaagya banaane ki mubaarak de rahe hain, lekin yeh mubaarak smriti mein rakhna aur abhi sabko last so fast jaane ka chance hai, kyonki final result out nahin hui hai। to last mein aane vaale bhi, pahle vaalon se last mein aaye ho na, to last vaale last so fast aur fast so first aa sakte hain। chhutti hai, ja sakte ho। to sada yeh lakshya yaad rakhna ki mujhe arthaat mujh aatma ko fast aur first class mein aana hi hai। haan, vi.aai.pi bahut aaye hain na, title vi.aai.pi ka hai। jo vi.aai.pi aaye hain woh lamba haath uthaao। (kareeb 150 bhaarat ke mehmaan baapdaada ke saamne baithe hain) welcome। apne ghar mein aane ki welcome, bhale padhaare। abhi to parichay ke liye vi.aai.pi. kehte hain lekin abhi vi.aai.pi se vi.vi.vi.aai.pi banna hai। dekho, devtaayen aapke jad chitra vi.vi.vi.aai.pi hain to aapko bhi poorvaj jaisa banna hi hai। baapdaada bachchon ko dekhkar khush hote hain। relation mein aaye। jo vi.aai.pi aaye hain utho। baithe-baithe thak bhi gaye honge, thoda utho। achha।

vartamaan samay baapdaada do baaton par baar-baar attention dila rahe hain - ek stop, bindi lagaao, point lagaao। doosra - stock jama karo। donon zaroori hain। teen khajaane vishesh jama karo - ek apne purushaartha ki praalabdha arthaat pratyaksha phal, woh jama karo। doosra - sada santushta rehna, santushta karna। sirf rehna nahin, karna bhi। uske phal swaroop duaayen jama karo। duaaon ka khaata kabhi-kabhi koi bachche jama karte hain lekin chalte-chalte koi chhoti-moti baat mein confuse ho karke, himmatheen ho karke jama hue khajaane mein bhi lakeer laga dete hain। to duaaon ka khaata bhi jama ho। uski vidhi santushta rehna, santushta karna। teesra - seva dvaara seva ka phal jama karna ya khajaana jama karna aur seva mein bhi vishesh nimitta bhaav, nirmaan bhaav, nirmal vaani। behad ki seva। mera nahin, baba। baba karaavanhaar mujh karanhaar se kara raha hai, yeh hai behad ki seva। yeh teenon khaate check karo - teenon hi khaate jama hain? meraapan ka abhaav ho। ichchha maatram avidya। sochte hain is varsha mein kya karna hai? season poori ho rahi hai, ab 6 maas kya karna hai? to ek to khaate jama karna, achhi tarah se check karna। kahaan kone mein bhi had ki ichchha to nahin hai? main aur meraapan to nahin hai? levta to nahin hai? vidhaata bano, levta nahin। na naam, na maan, na shaan, kisi ke bhi levta nahin, daata, vidhaata bano।

abhi duhkh bahut-bahut badh raha hai, badhta rahega, isliye master soorya ban anubhooti ki kirnen phailaao। jaise soorya ek hi samay mein kitni praaptiyaan karaata hai, ek praapti nahin karaata। sirf roshni nahin deta, power bhi deta hai। anek praaptiyaan karaata hai। aise aap sabhi in 6 maas mein gyaan soorya ban sukh ki, khushi ki, shanti ki, sahayog ki kirnen phailaao। anubhooti karaao। aapki soorat ko dekhte hi duhkh ki lahar mein kam se kam muskaan aa jaaye। aapki drishti se himmat aa jaaye। to yeh attention dena hai। vidhaata banna hai, tapasvi banna hai। aisi tapasya karo jo tapasya ki jvaala koi na koi anubhooti karaaye। sirf vaani nahin sunen, anubhooti karaao। anubhooti amar hoti hai। sirf vaani thoda samay achhi lagti hai, sada yaad nahin rehti, isliye anubhav ki authority ban anubhav karaao। jo bhi sambandh-samparka mein aa rahe hain unhon ko himmat, umang-utsaah apne sahayog se, baapdaada ke connection se dilaao। jyaada mehnat nahin karaao। na khud mehnat karo na auron ko karaao। nimitta hain na! to vibration aise umang-utsaah ka banaao jo gambheer bhi umang-utsaah mein aa jaaye। khushi mein man naachne lage। suna kya karna hai? dekhenge result। kis sthaan ne kitni aatmaon ko dridh banaaya, khud dridh bane, kitni aatmaon ko dridh banaaya? saadhaaran potaamel nahin dekhenge, bhool nahin ki, jhooth nahin bola, koi vikarma nahin kiya, lekin kitni aatmaon ko umang-utsaah mein laaya, anubhooti karaai, dridhta ki chaabi di? theek hai na, karna hi hai na। baapdaada bhi kyon kahe ki karenge! nahin, karna hi hai। aap nahin karenge to kaun karega? peechhe aane vaale? aap hi kalpa-kalpa baap se adhikaari bane the, bane hain aur har kalpa banenge। aisa dridhta poorvak bachchon ka sangathan baapdaada ko dekhna hi hai। theek hai na! haath uthaao, banna hi hai, man ka haath uthaao। dridh nishchay ka haath uthaao। yeh to sab paas ho gaye hain। paas hain na? achha।

chaaron or ke diltakhtansheen bachchon ko, door baithe bhi parmaatma pyaar ka anubhav karne vaale bachchon ko, sada holi arthaat pavitrata ka foundation dridh karne vaale, svapna maatra bhi apvitrata ke anshamaatra se bhi door rahne vaale mahaaveer, mahaaveerni bachchon ko, sada har samay sarva jama ka khaata, jama karne vaale sampanna bachchon ko, sada santushtamni ban santushta rahne aur santushta karne vaale baap samaan bachchon ko baapdaada ka yaadapyaar, duaayen aur namaste।

daadiyon se:- daadiyaan to guru bhaai hain na, to saath mein baitho। bhaai saath mein baithte hain। achha hai। baapdaada roz sneh ki maalish karte hain। nimitta hai na! yeh maalish chala rahi hai। achha hai - aap sabhi ka example dekh karke sabhi ko himmat aati hai। nimitta daadiyon ke samaan seva mein, nimitta bhaav mein aage badhna hai। achha hai, aap logon ka yeh jo pakka nishchay hai na - karaavanhaar kara raha hai, chalaane vaala chala raha hai। yeh nimitta bhaav seva kara raha hai। main pan hai? kuchh bhi main pan aata hai? achha hai। saare vishwa ke aage nimitta example hai na। to baapdaada bhi sada vishesh pyaar aur duaayen dete hi rehte hain। achha। bahut aaye hain to achha hai na! last tarna fast gaya hai। achha।

double videshi mukhya teachers bahinon se:- sabhi milke sabhi ki paalna karne ke nimitta bante ho yeh bahut achha part bajaate ho। khud bhi refresh ho jaate ho aur doosron ko bhi refresh kar dete ho। achha programme banaate ho। baapdaada ko pasanda hai। khud refresh honge tab to refresh karenge। bahut achha। sabhi ne refreshment achhi ki। baapdaada khush hai। bahut achha। om shanti।

vardaan:- knowledgeful sthiti dvaara paristhitiyon ko paar karne vaale angad samaan achal-adol bhav

raavan raajya ki koi bhi paristhiti va vyakti jara bhi sankalp roop mein bhi hila na sake। aise achal-adol bhav ke vardaani bano। kyonki koi bhi vighna giraane ke liye nahin, majboot banaane ke liye aata hai। knowledgeful kabhi paper ko dekhkar confuse nahin hote। maaya kisi bhi roop mein aa sakti hai - lekin aap yogaagni jagaakar rakho, knowledgeful sthiti mein raho to sab vighna svatah samaapta ho jaayenge aur aap achal adol sthiti mein sthit rahenge।

slogan:- shuddh sankalp ka khajaana jama ho to vyartha sankalpon mein samay nahin jaayega।

avyakt ishaare - roohaani royalty aur purity ki personality dhaaran karo

purity ki personality ke aadhaar par brahma baap aadi dev va pahla prince banen। aise aap bhi follow father kar one number ki personality ki list mein aa jaao kyonki brahman janma ke sanskaar hi pavitra hain। aapki shreshthata va mahaanta hi pavitrata hai।