Daily Murli for Saturday 14 June 2025

14-06-2025 praatahmurli om shanti "baapdaada"' madhuban

“meethe bachche - tumhein ab gyaan ka teesra netra mila hai, isliye ab tumhaari aankh kisi mein bhi doobni nahin chaahiye''

prashn:- jinhen puraani duniya se behad ka vairaagya hoga, unki nishaani kya hogi?

uttar:- vo apna sab kuchh baap ko arpan kar denge, hamaara kuchh bhi nahin। baba hamaari yeh deh bhi nahin hai, yeh to puraani deh hai, inko bhi chhodna hai। unka moh sabse tootta jaayega, nashtomoha honge। unki buddhi mein rehta ki yahaan ka kuchh bhi kaam nahin aana hai, kyonki yeh sab had ka hai।

om shanti। baap bachchon ko brahmaanda aur srishti chakra ke aadi-madhya-ant ka gyaan suna rahe hain। jo aur koi bhi suna nahin sakte। ek geeta hi hai, jismen raajayog ka varnan hai, bhagwan aakar nar se naaraayan banaate hain। yeh sivaae geeta ke aur koi shaastra mein nahin hai। yeh bhi baap ne batlaaya hai, kehte hain mainne tumko raajayog sikhaaya tha। yeh samjhaaya tha ki yeh gyaan koi parampara nahin chalta hai। baap aakar ek dharma ki sthaapna karte hain। baaki aur sab dharma vinaash ho jaate hain। koi bhi shaastra aadi parampara nahin chalte। aur jo dharma sthaapan karne aate hain us samay koi vinaash nahin hota hai, jo sab khalaas ho jaaen। bhaktimaarga ke shaastra padhte hi aate hain, inka (brahman dharma ka) bhal shaastra hai geeta, parantu woh bhi bhakti maarga mein hi banaate hain kyonki satayug mein to koi shaastra rehta hi nahin aur dharmon ke samay vinaash to hota hi nahin। puraani duniya khatma hoti nahin jo phir nai ho। vahi chalti aati hai। abhi tum bachche samajhte ho yeh puraani duniya khatma honi hai। hamko baap padha rahe hain। gaayan bhi ek geeta ka hi hai। geeta jayanti bhi manaate hain। ved jayanti to hai nahin। bhagwan ek hai, to ek ki hi jayanti manaani chaahiye। baaki hai rachna, unse kuchh mil nahin sakta। varsa baap se hi milta hai। chaacha, kaaka aadi se koi varsa nahin milta। abhi yeh hai tumhaara behad ka baap, behad ka gyaan dene vaala। yeh koi shaastra nahin sunaate hain। kehte hain yeh sab bhakti maarga ke hain। in sabka saar tumko samjhaata hoon। shaastra koi padhaai nahin। padhaai se to pad praapta hota hai, yeh padhaai baap padha rahe hain bachchon ko। bhagvaanuvaach bachchon prati - phir 5 hazaar varsha baad bhi aise hi hoga। bachche jaante hain ham baap se rachta aur rachna ke aadi-madhya-ant ko jaan gaye hain। yeh koi aur to samjha na sake sivaae baap ke। is mukh kamal se sunaate hain। yeh bhagwan ka loan liya hua mukh hai na, jisko gaoomukh bhi kehte hain। badi maata hai na। inke mukh se gyaan ke versions nikalte hain, na ki jal aadi। bhakti maarga mein phir gaoomukh se jal dikha diya hai। abhi tum bachche samajhte ho bhakti maarga mein kya-kya karte hain। kitna door gaoomukh aadi par jaate hain paani peene। abhi tum manushya se devta ban rahe ho। yeh to jaante ho - baap kalpa-kalpa aakar manushya se devta banaane ke liye padhaate hain। dekhte ho kaise padha rahe hain। tum sabko yeh batlaate ho - bhagwan humein padha rahe hain। kehte hain maamekam yaad karo to tumhaare vikarma vinaash ho jaaen। tum jaante ho satayug mein thode manushya hote hain। kaliyug mein kitne dher manushya hain। baap aakarke aadi sanaatan devi-devta dharma ki sthaapna kar rahe hain। ham manushya se devta ban rahe hain। manushya se devta banne vaale bachchon mein daiveegun dikhaai denge। unmein krodh ka ansh bhi nahin hoga। agar kabhi krodh aa gaya to jhat baap ko likhenge, baba aaj hamse yeh bhool ho gai। hamne krodh kar liya, vikarma kar liya। baap se tumhaara kitna connection hai। baba kshama karna। baap kahenge kshama aadi hoti nahin। baaki aage ke liye aisi bhool nahin karna। teacher koi kshama nahin karte hain। register dikhaate hain - tumhaare manners achhe nahin hain। behad ka baap bhi kehte hain - tum apne manners dekh rahe ho। roz apna potaamel dekho, kisko duhkh to nahin diya, kisko tang to nahin kiya? daiveegun dhaaran karne mein time to lagta hai na। deh-abhimaan bada hi mushkil se tootta hai। jab apne ko dehi samjhen tab baap mein bhi lav jaae। nahin to deh ke karmabandhan mein hi buddhi latki rehti hai। baap kehte hain tumko shareer nirvaah arth karma bhi karna hai, unse time nikaal sakte ho। bhakti ke liye bhi time nikaalte hain na। meera shreekrishna ki hi yaad mein rehti thi na। punarjanma to yahaan hi leti gai।

abhi tum bachchon ko is puraani duniya se vairaagya aata hai। jaante hain is puraani duniya mein phir punarjanma lena hi nahin hai। duniya hi khatma ho jaati hai। yeh sab baaten tumhaari buddhi mein hain। jaise baba mein gyaan hai vaise bachchon mein bhi hai। yeh srishti ka chakra aur koi ki buddhi mein nahin hai। tumhaare mein bhi nambarvaar hain, jinki buddhi mein yeh rehta hai oonch te oonch patit-paavan baap hai, woh hamko padhaate hain। yeh bhi tum hi jaante ho। tumhaari buddhi mein saara 84 ka chakra hai। smriti rehti hai - abhi is narka mein yeh antim janma hai, inko kaha jaata hai raurav narka। bahut gand hai, isliye sannyaasi log gharbaar chhod jaate hain। woh ho jaati hai shaareerik baat। tum sannyaas karte ho buddhi se kyonki tum jaante ho hamko abhi vaapis jaana hai। sabko bhoolna padta hai। yeh puraani chhi-chhi duniya khatma hui padi hai। makaan puraana hota hai, naya bankar taiyaar hota hai to dil mein aata hai na - yeh makaan toot hi jaayega। abhi tum bachche padh rahe ho na। jaante ho nai duniya ki sthaapna ho rahi hai। abhi thodi deri hai। bahut bachche aakar padhenge। naya makaan abhi ban raha hai, puraana tootta ja raha hai। baaki thode din hai। tumhaari buddhi mein yeh behad ki baaten hain। ab hamaari is puraani duniya se dil nahin lagti hai। yeh kuchh bhi aakhir kaam mein nahin aana hai, ham yahaan se jaana chaahte hain। baap bhi kehte hain puraani duniya se dil nahin lagaani hai। mujh baap ko aur ghar ko yaad karo to vikarma vinaash hon। nahin to bahut sazaayen khaayenge। pad bhi bhrashta ho jaayega। aatma ko phurna laga hua hai hamne 84 janma bhoge hain। ab baap ko yaad karna hai, tab vikarma vinaash honge। baap ki mat par chalna hai tab hi shreshtha jeevan banegi। baap hai oonch te oonch। yeh bhi tum hi jaante ho। baap achhi reeti smriti dilaate hain, woh behad ka baap hi gyaan ka saagar hai, vahi aakar padhaate hain। baap kehte hain yeh padhaai bhi padho, shareer nirvaah arth bhi sab kuchh karo। parantu trustee hokar raho।

jin bachchon ko puraani duniya se behad ka vairaagya hoga woh apna sab kuchh baap ko arpan kar denge। hamaara kuchh bhi nahin। baba hamaari yeh deh bhi nahin hai। yeh to puraani deh hai, inko bhi chhodna hai, sabse moh tootta jaata hai। nashto-moha ho jaana hai। yeh hai behad ka vairaagya। woh had ka vairaagya hota hai। buddhi mein hai ham svarga mein jaakar apne mahal banaayenge। yahaan ka kuchh bhi kaam nahin aayega kyonki yeh sab had ka hai। tum abhi had se nikal behad mein jaate ho। tumhaari buddhi mein yeh behad ka gyaan hi rehna chaahiye। abhi aur koi mein bhi aankh nahin doobti hai। ab to apne ghar jaana hai। kalpa-kalpa baap aakar hamko padhaae phir saath le jaate hain। tumhaare liye yeh koi nai padhaai nahin hai। tum jaante ho kalpa-kalpa ham padhte hain। tumhaare mein bhi nambarvaar hain। saari duniya mein kitne dher manushya hain, parantu tum thode hi jaante ho, aahiste-aahiste yeh braahmanon ka jhaad vriddhi ko paata rehta hai। drama plan anusaar sthaapna honi hi hai। bachche jaante hain hamaari roohaani government hai। ham divya drishti se nai duniya ko dekhte hain। vahaan hi jaana hai। bhagwan bhi ek hai, vahi padhaane vaala hai, raajayog baap ne hi sikhlaaya tha। us samay ladaai bhi barobar lagi thi anek dharmon ka vinaash, ek dharma ki sthaapna hui thi। tum bhi vahi ho, kalpa-kalpa tum hi padhte aaye ho, varsa lete aaye ho। purushaartha har ek ko apna karna hai। yeh hai behad ki padhaai। yeh shiksha koi manushya maatra de na sake।

baap ne shyaam aur sundar ka bhi raaz samjhaaya hai। tum bhi samajhte ho abhi ham sundar ban rahe hain। pahle shyaam the। shreekrishna koi akela thode hi tha। saari raajdhaani thi na। abhi tum samajhte ho ham narkavaasi se svargavaasi ban rahe hain। abhi tumko is narka se naphrat aati hai। tum abhi purushottam sangamayug par aa gaye ho। itne dher aate hain, inse niklenge phir bhi vahi jo kalpa pahle nikle honge। sangamayug ko bhi achhi reeti yaad karna hai। ham purushottam arthaat manushya se devta ban rahe hain। manushya to yeh bhi nahin samajhte ki narka kya hai aur svarga kya hai? kehte hain sab kuchh yahaan hi hai, jo sukhi hain woh svarga mein hain, jo duhkhi hain woh narka mein hain। anek mat hain na। ek ghar mein bhi anek maten ho jaati hain। bachchon aadi mein moh ki rag hai, woh tootti nahin। mohvash kuchh samajhte thode hi hain ki ham kaise rehte hain। poochhte hain bachche ki shaadi karaayen? parantu bachchon ko yeh bhi law (niyam) samjhaaya jaata hai ki tum svargavaasi hone ke liye ek taraph knowledge le rahe ho, doosre taraph poochhte ho unko narka mein daalen? poochhte ho to baba kahenge jaakar karo। baba se poochhte hain to baba samjhaate hain inka moh hai। ab na karenge to bhi avagya kar denge। bachchi ki to karaani hi hai, nahin to sangadosh mein kharaab ho jaati hai। bachchon ko nahin kara sakte। parantu himmat chaahiye na! baba ne inse act karaaya na। inko dekhkar phir aur karne lag pade। ghar mein bhi bahut jhagde lag padte hain। yeh hai hi jhagdon ki duniya, kaanton ka jangal hai na। ek-do ko kaatte rehte hain। svarga ko kaha jaata hai garden। yeh hai jangal। baap aakar kaanton se phool banaate hain। koi virle nikalte hain, pradarshani mein bhal haan haan karte hain parantu samajhte kuchh bhi nahin। ek kaan se sunte hain aur doosre kaan se nikaal dete hain। raajdhaani sthaapan karne mein time to lagta hai na। manushya apne ko kaanta samajhte thode hi hain। is samay soorat manushya ki bhal hai parantu seerat bandar se bhi badtar hai। parantu apne ko aisa samajhte nahin hain to baap kehte hain apni rachna ko samjhaana hai। agar nahin samajhte hain to phir bhaga dena chaahiye। parantu woh taakat chaahiye na। moh ka keeda aisa laga rehta hai jo nikal na sake। yahaan to nashtomoha banna hai। mera to ek doosra na koi। ab baap aaya hai, lene ke liye। paavan banna hai। nahin to bahut saza khaayenge, pad bhi bhrashta ho jaayega। ab apne ko satopradhaan banaane ka hi phurna laga hua hai। shiv ke mandir mein jaakar tum samjha sakte ho - bhagwan ne bhaarat ko svarga ka maalik banaaya tha, ab woh phir se bana rahe hain, kehte hain sirf maamekam yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is puraani duniya se behad ka vairaagi ban apna sab kuchh arpan kar dena hai। hamaara kuchh bhi nahin, yeh deh bhi hamaari nahin। inse moh tod nashtomoha banna hai।

2) kabhi bhi aisi koi bhool nahin karni hai jo register par daag lag jaae। sarva daiveegun dhaaran karne hain, andar krodh ka zara bhi ansh na ho।

vardaan:- kehna, sochna aur karna - in teenon ko samaan banaane vaale gyaani tu aatma bhav

abhi vaanaprastha avastha mein jaane ka samay sameep aa raha hai - isliye kamjoriyon ke mere pan ko va vyartha ke khel ko samaapta kar kehna, sochna aur karna samaan banaao tab kahenge gyaan swaroop। jo aise gyaan swaroop gyaani tu aatmaayen hain unka har karma, sanskaar, gun aur kartavya samartha baap ke samaan hoga। ve kabhi vyartha ke vichitra khel nahin khel sakte। sada parmaatma milan ke khel mein busy rahenge। ek baap se milan manaayenge aur auron ko baap samaan banaayenge।

slogan:- sevaaon ka umang chhoti-chhoti beemaariyon ko merge kar deta hai।

avyakt ishaare-aatmik sthiti mein rahne ka abhyaas karo, antarmukhi bano

antarmukhi arthaat mukh aur man ka maun rakhne vaale। mukh ka maun to duniya mein bhi rakhte hain lekin yahaan vyartha sankalp se man ka maun hona chaahiye। jaise traffic control karte ho to vyartha ki traffic ko control karte ho vaise beech-beech mein ek din man ke vyartha ka traffic control karo।