Daily Murli for Friday 18 July 2025

18-07-2025 praat:murleeom shanti"baapdaada"' madhuban

“meethe bachche - apne oopar aapehi raham karo, baap jo shreemat dete hain us par chalte raho, baap ki shreemat hai - bachche, time vesta na karo, sulta kaarya karo''

prashnah- jo takdeervaan bachche hain, unki mukhya dhaarna kaun-si hogi?

uttar:- takdeervaan bachche savere-savere uthkar baap ko bahut pyaar se yaad karenge। baba se meethi-meethi baaten karenge। kabhi bhi apne oopar berahmi nahin karenge। woh paas with honour hone ka purushaartha kar svayan ko raajaai ke laayak banaayenge।

om shanti। bachche baap ke saamne baithe hain to jaante hain ki hamaara behad ka baap hai aur hamko behad ka sukh dene ke liye shreemat de rahe hain। unke liye gaaya hi jaata hai - merciful, liberator....... bahut mahima karte hain। baap kehte hain sirf mahima ki bhi baat nahin। baap ka to pharz hai bachchon ko mat dena। behad ka baap bhi mat dete hain। oonch te oonch baap hai to zaroor unki mat bhi oonch te oonch hogi। mat lene vaali aatma hai, achha va bura kaam aatma hi karti hai। is samay duniya ko milti hai raavan ki mat। tum bachchon ko milti hai raam ki mat। raavan ki mat se berham ho ulta kaam karte hain। baap mat dete hain sulta achha kaarya karo। sabse achha kaarya apne oopar raham karo। tum jaante ho ham aatma satopradhaan thi, bahut sukhi thi phir raavan ki mat milne se tum tamopradhaan ban gaye ho। ab phir baap mat dete hain ki ek to baap ki yaad mein raho। ab apne par raham karo, yeh mat dete hain। baap raham nahin karte। baap to shreemat dete hain aise-aise karo। apne oopar aapehi raham karo। apne ko aatma samajh aur apne patit-paavan baap ko yaad karo to tum paavan ban jaayenge। baap raay dete hain, tum paavan kaise banenge। baap hi patit ko paavan banaane vaala hai। woh shreemat dete hain। agar unki mat par nahin chalte hain to apne oopar berham hote hain। baap shreemat dete hain ki bachche time vesta mat karo। yeh paath pakka kar lo ki ham aatma hain। shareer nirvaah arth dhandha aadi bhal karo phir bhi time nikaal yukti racho। kaam karte aatma ki buddhi baap taraph honi chaahiye। jaise aashik-maashuk bhi kaam to karte hain na। donon ek-do ke oopar aashik hote hain। yahaan aise nahin hai। tum bhakti maarga mein bhi yaad karte ho। kai kehte hain kaise yaad karen? aatma ka, paramatma ka roop kya hai, jo yaad karen? kyonki bhakti maarga mein to gaaya jaata hai ki paramatma naam-roop se nyaara hai। parantu aise nahin hai। kehte bhi hain bhrakuti ke beech mein aatma star misal hai phir kyon kehte hain ki aatma kya hai, unko dekh nahin sakte। woh to hai hi jaanne ki cheez। aatma ko jaana jaata hai, paramatma ko bhi jaana jaata hai। woh ati sookshm cheez hai। firefly se bhi maheen hai। shareer se kaise nikal jaati, pata bhi nahin padta। aatma hai, saakshaatkaar hota hai। aatma ka deedaar hua so kya। woh to star misal sookshm hai। apne ko aatma samajh baap ko yaad karo। jaise aatma, vaise paramatma bhi soul hai। parantu paramatma ko kaha jaata hai - supreme soul। woh janma-maran mein nahin aate। aatma ko supreme tab kaha jaae jab janma-maran rahit ho। baaki muktidhaam mein to sabko pavitra hokar jaana hai। unmein bhi nambarvaar hain, jinka hero-heroine ka part hai। aatmaayen nambarvaar to hain na। naatak mein bhi koi bahut pagaar vaale, koi kam vaale hote hain। lakshmi-naaraayan ki aatma ko manushya aatmaon mein supreme kahenge। bhal pavitra to sabhi bante hain phir bhi nambarvaar part hai। koi mahaaraaja, koi daasi, koi praja। tum actors ho। jaante ho itne sab devtaayen nambarvaar hain। achha purushaartha karenge, oonch aatma banenge, oonch pad paayenge। tumko smriti aai hai hamne 84 janma kaise liye। ab baap ke paas jaana hai। bachchon ko yeh khushi bhi hai to phakhur (nasha) bhi hai। sab kehte hain ham nar se naaraayan vishwa ke maalik banenge। phir to aisa purushaartha karna pade। purushaartha anusaar nambarvaar pad paate hain। sabko nambarvaar part mila hua hai। yeh drama bana banaaya hai।

abhi baap tumko shreshtha mat dete hain। kaise bhi karke baap ko yaad karo to vikarma vinaash hon, to tum tamopradhaan se satopradhaan ban jaao। paapon ka bojha to sir par bahut hai। unko kaise bhi karke yahaan khalaas karna hai tab aatma pavitra banengi। tamopradhaan bhi tum aatma bani ho to satopradhaan bhi aatma ko banna hai। is samay jaasti insolvent bhaarat hai। yeh khel hi bhaarat par hai। baaki woh to sirf dharma sthaapan karne aate hain। punarjanma lete-lete pichhaadi mein sab tamopradhaan bante hain। svarga ke maalik tum bante ho। jaante ho bhaarat bahut oonch desh tha। abhi kitna gareeb hai, gareeb ko hi sab madad dete hain। har baat ki bheekh maangate hi rehte hain। aage to bahut anaaj yahaan se jaata tha। abhi gareeb bane hain to phir return service ho rahi hai। jo le gaye hain woh udhaar mil raha hai। shreekrishna aur Christian raashi ek hi hai। Christian ne hi bhaarat ko hap kiya hai। ab phir drama anusaar woh aapas mein ladte hain, makkhan tum bachchon ko mil jaata hai। aise nahin ki shreekrishna ke mukh mein maakhan tha। yeh to shaastron mein likh diya hai। saari duniya shreekrishna ke haath mein aati hai। saare vishwa ka tum maalik bante ho। tum bachche jaante ho ham vishwa ke maalik bante hain to tumko kitni khushi honi chaahiye। tumhaare kadam-kadam mein padma hain। sirf ek lakshmi-naaraayan ka raajya nahin tha। dynasty thi na। yatha raaja-raani tatha praja - sabke paanv mein padma hote hain। vahaan to anginat paise hote hain। paise ke liye koi paap aadi nahin karte, athaah dhan hota hai। allaah avaldeen ka khel dikhaate hain na। allaah jo avaldeen arthaat jo devi-devta dharma sthaapan karte hain। second mein jeevanmukti de dete hain। second mein saakshaatkaar ho jaata hai। kaaroon ka khajaana dikhaate hain। meera shreekrishna se saakshaatkaar mein dance karti thi। woh tha bhakti maarga। yahaan bhakti maarga ki baat nahin। tum to vaikuntha mein practical mein jaakar raajya-bhaagya karenge। bhakti maarga mein sirf saakshaatkaar hota hai। is samay tum bachchon ko em object ka saakshaatkaar hota hai, jaante ho ham yeh banenge। bachchon ko bhool jaata hai isliye badge diye jaate hain। abhi ham behad ke baap ke bachche bane hain। kitni khushi honi chaahiye। yeh to ghadi-ghadi pakka kar dena chaahiye। parantu maaya opposition mein hai to woh khushi bhi ud jaati hai। baap ko yaad karte rahenge to nasha rahega - baba hamko vishwa ka maalik banaate hain। phir maaya bhula deti hai to phir kuchh na kuchh vikarma ho jaata hai। tum bachchon ko smriti aai hai - hamne 84 janma liye hain, aur koi 84 janma nahin lete hain। yeh bhi samajhna hai - jitna ham yaad karenge utna oonch pad paayenge aur phir aap-samaan bhi banaana hai, praja banaani hai। charity begins at hom। teerthon par bhi pahle khud jaate hain phir mitra-sambandhiyon aadi ko bhi ikattha le jaate hain। to tum bhi pyaar se sabko samjhaao। sab nahin samjhenge। ek hi ghar mein baap samjhega to bachcha nahin samjhega। maa-baap kitna bhi bachchon ko kahenge puraani duniya se dil nahin lagaao phir bhi maanenge nahin। tang kar dete hain। jo yahaan ka sapling hoga vahi phir aakar samjhenge। is dharma ki sthaapna dekho kaise hoti hai, aur dharma vaalon ki sapling nahin lagti। woh to oopar se aate hain। unke followers bhi aate rehte hain। yeh to sthaapna karte hain aur phir sabko paavan banaakar le jaate hain isliye unko satguru liberator kaha jaata hai। sachcha guru ek hi hai। manushya kabhi kiski sadgati nahin karte। sadgati daata hai hi ek, unko hi satguru kaha jaata hai। bhaarat ko sachkhanda bhi woh banaate hain। raavan jhoothkhanda bana dete hain। baap ke liye bhi jhooth, devtaaon ke liye bhi jhooth kah dete hain। tab baap kehte hain hear no evil...... inko kaha jaata hai veshyaalay। satayug hai shivaalay। manushya samajhte thode hi hain। woh to apni mat par hi chalte hain। kitna ladna-jhagadna chalta rehta hai। bachche maa ko, pati stri ko maarne mein deri nahin karte। ek-do ko kaatte rehte hain। bachcha dekhta hai baap ke paas bahut dhan hai, deta nahin hai to maarne mein bhi deri nahin karte hain। kaisi gandi duniya hai। abhi tum kya ban rahe ho। yeh tumhaari em object khadi hai। tum to sirf kehte the he patit-paavan aakar hamko paavan banaao। aise thode hi kehte the ki vishwa ka maalik banaao। god father to heaven sthaapan karte hain to ham heaven mein kyon nahin hain। phir raavan tumko narkavaasi banaate hain। kalpa ki aayu laakhon varsha kah dene se bhool gaye hain। baap kehte hain tum heaven ke maalik the। ab phir chakra lagaae hell ke maalik bane ho। abhi phir baap tumko heaven ka maalik banaate hain। kehte hain meethi aatmaayen, bachchon baap ko yaad karo to tum tamopradhaan se satopradhaan ban jaayenge। tamopradhaan banne mein aadhaakalpa laga hai, balki saara hi kalpa kahen kyonki kala to kam hoti jaati hai। is samay koi kala nahin hai। kehte hain main nirgun haare mein koi gun naahi, inka arth kitna clear hai। yahaan phir nirgun baalak ki sanstha bhi hai। baalkon mein koi gun nahin hai। nahin to baalak ko mahaatma se bhi oonch kaha jaata hai, unko vikaaron ka bhi pata nahin। mahaatmaaon ko to vikaaron ka pata rehta hai to akshar bhi kitne wrong bolte hain। maaya bilkul unrighteous bana deti hai। geeta padhte bhi hain, kehte bhi hain bhagvaanuvaach - kaam mahaashatru hai, yeh aadi-madhya-ant du:kh dene vaala hai phir bhi pavitra banne mein kitne vighna daalte hain। bachcha shaadi nahin karta to kitna bigadte hain। baap kehte hain tum bachchon ko shreemat par chalna hai। jo phool banne ka nahin hoga, kitna bhi samjhaao kabhi nahin maanega। kahaan bachche kehte hain ham shaadi nahin karenge to maa-baap kitne atyaachaar karte hain।

baap kehte hain jab gyaan yagya rachta hoon to anek prakaar ke vighna padte hain। teen pair prithvi ke bhi nahin dete। tum sirf baap ki mat par yaad kar pavitra bante ho, aur koi takleeph nahin। sirf apne ko aatma samajh baap ko yaad karo। jaise tum aatmaayen is shareer mein avatrit ho vaise baap bhi avatrit hain। phir kachchha avtaar, machchha avtaar kaise ho sakte! kitni gaali dete hain! kehte hain kankad-kankad mein bhagwan hai। baap kehte hain meri aur devtaaon ki glaani karte hain। mujhe aana padta hai, aakar tum bachchon ko phir se varsa deta hoon। main varsa deta hoon, raavan shraap deta hai। yeh khel hai। jo shreemat par nahin chalte hain to samjha jaata hai inki takdeer itni oonch nahin hai। takdeer vaale savere-savere uthkar yaad karenge, baba se baaten karenge। apne ko aatma samajh baap ko yaad karo to vikarma vinaash hon। khushi ka paara bhi chadhega। jo paas with honour hote hain vahi raajaai ke laayak ban sakte hain। sirf ek lakshmi-naaraayan nahin raajya karte hain। dynasty hai। ab baap kehte hain tum kitna svachchha buddhi bante ho। inko kaha jaata hai satsang। satsang ek hi hota hai। jo baap sachchi-sachchi knowledge de sachkhanda ka maalik banaate hain। kalpa ke sangam par hi sat ka sang milta hai। svarga mein koi bhi prakaar ka satsang hota nahin।

abhi tum ho roohaani salvation army। tum vishwa ka beda paar karte ho। tumko salvage karne vaala, shreemat dene vaala baap hai। tumhaari mahima bahut bhaari hai। baap ki mahima, bhaarat ki mahima aparmaapaar hai। tum bachchon ki bhi mahima aparmaapaar hai। tum brahmaanda ke bhi aur vishwa ke bhi maalik bante ho। main to sirf brahmaanda ka maalik hoon। pooja bhi tumhaari double hoti hai। main to devta nahin banta hoon jo double pooja ho। tumhaare mein bhi nambarvaar samajhte hain aur khushi mein aakar purushaartha karte hain। padhaai mein pharka kitna hai। satayug mein lakshmi-naaraayan ka raajya chalta hai। vahaan vajeer hote nahin। lakshmi-naaraayan, jinko bhagwan bhagavti kehte hain woh phir vajeer ki raay lenge kya! jab patit raajaayen bante hain tab phir vajeer aadi rakhte hain। abhi to hai praja ka praja par raajya। tum bachchon ko is puraani duniya se vairaagya hai। gyaan, bhakti, vairaagya। gyaan sirf roohaani baap sikhlaate hain aur koi sikhla na sake। baap hi patit-paavan sarva ka sadgati daata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki yaad ke saath-saath aap samaan banaane ki seva bhi karni hai। charity begins at hom.... sabko pyaar se samjhaana hai।

2) is puraani duniya se behad ka vairaagi banna hai। hear no evil, si no evil.....। us behad baap ke bachche hain, woh humein kaaroon ka khajaana dete hain, isi khushi mein rehna hai।

vardaan:- har sankalp, bol aur karma ko phaldaayak banaane vaale roohaani prabhaavshaali bhav

jab bhi kisi ke samparka mein aate ho to unke prati man ki bhaavna sneh, sahayog aur kalyaan ki prabhaavshaali ho। har bol kisi ko himmat ullaas dene ke prabhaavshaali hon। saadhaaran baat-cheet mein samay na chala jaae। aise hi har karma phaldaayak ho - chaahe sva ke prati, chaahe doosron ke prati। aapas mein bhi har roop mein prabhaavshaali bano। seva mein roohaani prabhaavshaali bano tab baap ko pratyaksha karne ke nimitta ban sakenge।

slogan:- aisi shubhchintak mani bano jo aapki kirnen vishwa ko roshan karti rahen।

avyakt ishaare - sankalpon ki shakti jama kar shreshtha seva ke nimitta bano

samay pramaan sheetalta ki shakti dvaara har paristhiti mein apne sankalpon ki gati ko, bol ko sheetal aur dhairyavat banaao। yadi sankalp ki speed fast hogi to bahut samay vyartha jaayega, control nahin kar sakenge isliye sheetalta ki shakti dhaaran kar lo to vyartha se bach jaayenge। yeh kyon, kya, aisa nahin vaisa, is vyartha ki fast gati se chhoot jaayenge।