Daily Murli for Saturday 2 August 2025

02-08-2025 praatahmurli om shanti "baapdaada"' madhuban

“meethe bachche - kabhi thak kar yaad ki yaatra ko chhodna nahin, sada dehi-abhimaani rahne ka prayatna karo, baap ka pyaar kheenchane va sweet banne ke liye yaad mein raho''

prashn:- 16 kala sampoorn athva perfect banne ke liye kaun-sa purushaartha zaroor karna hai?

uttar:- jitna ho sake svayan ko aatma samjho। pyaar ke saagar baap ko yaad karo to perfect ban jaayenge। gyaan bahut sahaj hai lekin 16 kala sampoorn banne ke liye yaad se aatma ko perfect banaana hai। aatma samajhne se meethe ban jaayenge। sab khitkhiten samaapta ho jaayengi।

geet:- tu pyaar ka saagar hai…

om shanti। pyaar ka saagar apne bachchon ko bhi aisa pyaar ka saagar banaate hain। bachchon ki em object hi hai ki ham aise lakshmi-naaraayan banen। inko sab kitna pyaar karte hain। bachche jaante hain baba hamko in jaisa meetha banaate hain। meetha yahaan hi banna hai aur banenge yaad se। bhaarat ka yog gaaya hua hai, yeh hai yaad। is yaad se hi tum in jaise vishwa ke maalik bante ho। yahi bachchon ko mehnat karni hai। tum is ghamanda mein mat aao ki hamko gyaan bahut hai। mool baat hai yaad। yaad hi pyaar deti hai। bahut meethe, bahut pyaare banne chaahte ho, oonch pad paana chaahte ho to mehnat karo। nahin to bahut pachhtaayenge kyonki bahut bachche hain jinse yaad mein rehna pahunchta nahin hai, thak jaate hain to chhod dete hain। ek to dehi-abhimaani banne ke liye bahut prayatna karo। nahin to bahut kam pad pa lenge। itna sweet kabhi nahin honge। bahut thode bachche hain jo kheenchate hain kyonki yaad mein rehte hain। sirf baap ki yaad chaahiye। jitna yaad karenge utna bahut sweet banenge। in lakshmi-naaraayan ne bhi agle janma mein bahut yaad kiya hai। yaad se sweet bane hain। satayug ke sooryavanshi pahle number mein hain, chandravanshi second number ho gaye। yeh lakshmi-naaraayan bahut priy lagte hain। in lakshmi-naaraayan ke features aur raam-seeta ke features mein bahut farka hai। in lakshmi-naaraayan par kabhi koi kalank nahin lagaaya hai। shreekrishna par bhool se kalank lagaaye hain, raam-seeta par bhi lagaaye hain।

baap kehte hain bahut meetha tab banenge jab samjhenge ki ham aatma hain। aatma samajh baap ko yaad karne mein bahut maza hai। jitna yaad karenge utna satopradhaan, 16 kala sampoorn banenge। 14 kala phir bhi defected hua phir aur defect hoti jaati hai। 16 kala perfect banna hai। gyaan to bilkul sahaj hai। koi bhi seekh jaayenge। 84 janma kalpa-kalpa lete aaye hain। ab vaapis to koi nahin ja sakte, jab tak poora pavitra na banen। nahin to sazaayen khaani pade। baba baar-baar samjhaate hain, jitna ho sake pahle-pahle yeh ek baat pakki karo ki main aatma hoon। ham aatma apne ghar mein rehti hain to ham satopradhaan hain phir yahaan janma lete hain। koi kitne janma, koi kitne janma lete hain। pichhaadi mein tamopradhaan bante hain। duniya ki woh ijjat kam hoti jaati hai। naya makaan hota hai to usmein kitni aaraam aati hai। phir defected ho jaata hai, kalaayen kam hoti jaati hain। agar tum bachche chaahte ho perfect duniya mein jaayen to perfect banna hai। sirf knowledge ko perfect nahin kaha jaata। aatma ko perfect banna hai। jitna ho sake koshish karo - main aatma hoon, baba ka bachcha hoon। andar mein bahut khushi rahni chaahiye। manushya apne ko dehdhaari samajh khush hote hain। ham phalaane ka bachcha hoon ....... woh hai alpakaal ka nasha। ab tum bachchon ko baap ke saath poora buddhiyog lagaana hai, ismen moonjhana nahin hai। bhal vilaayat mein kahaan bhi jaao sirf ek baat pakki rakho, ki baba ko yaad karna hai। baba pyaar ka saagar hai। yeh mahima koi manushya ki nahin। aatma apne baap ki mahima karti hai। aatmaayen sab aapas mein bhaai-bhaai hain। sabhi ka baap ek hai। baap sabko kehte hain - bachche, tum satopradhaan the so ab tamopradhaan bane। tamopradhaan banne se tum duhkhi bane ho। ab mujh aatma ko paramatma baap kehte hain tum pahle perfect the। sab aatmaayen vahaan perfect hi hain। bhal part alag-alag hai, parantu perfect to hain na। purity bigar to vahaan koi ja na sake। sukhdhaam mein tumko sukh bhi hai to shanti bhi hai, isliye tumhaara oonch te oonch dharma hai। athaah sukh rehta hai। vichaar karo ham kya bante hain। svarga ke maalik bante hain। woh hai heere jaisa janma। abhi to kaudi jaisa janma hai। ab baap ishaara dete hain yaad mein rahne ka। tum bulaate hi ho ki hamko aakar patit se paavan banaao। satayug mein hain sampoorn nirvikaari। raam-seeta ko bhi sampoorn nahin kahenge। woh second grade mein chale gaye। yaad ki yaatra mein paas nahin hue। knowledge mein bhal kitna bhi teekha ho, kabhi bhi baap ko meetha nahin lagenge। yaad mein rahenge tab hi meethe banenge। phir baap bhi tumko meetha lagega। padhaai to bilkul common hai, pavitra banna hai, yaad mein rehna hai। yeh achhi reeti note kar do phir yeh jo kahaan-kahaan khit-khit hoti hai, ahankaar aa jaata hai, woh kabhi nahin hoga - yaad ki yaatra mein rahne se। mool baat apne ko aatma samajh baap ko yaad karo। duniya mein manushya kitna ladte jhagadte hain। jeevan hi jaise zahar misal kar dete hain। yeh akshar satayug mein nahin honge। aage chal yahaan to manushyon ki jeevan aur hi zahar hoti jaayegi। yeh hai hi vishay saagar। raurav narka mein sab pade hain, bahut ganda hai। din-pratidin ganda vriddhi ko paata rehta hai। inko kaha jaata hai dirty world। ek-do ko duhkh hi dete rehte kyonki deh-abhimaan ka bhoot hai। kaam ka bhoot hai। baap kehte hain in bhooton ko bhagaao। yeh bhoot hi tumhaara kaala munh karte hain। kaam chita par baith kaale ban jaate hain tab baap kehte hain phir ham aakar gyaan amrit ki varsha karte hain। abhi tum kya bante ho! vahaan to heeron ke mahal hote hain, sab prakaar ke vaibhav hote hain। yahaan to sab milaavti cheejen hain। gaooon ka khaana dekho, sabse tanta (saar) nikaal baaki de dete hain। gaay ko khaana bhi theek nahin milta। shreekrishna ki gaayen dekho kaisi first class dikhaate hain। satayug mein gaayen aisi hoti hain, baat mat poochho। dekhne se hi pharhat aa jaati hai। yahaan to har cheez se essence nikaal dete hain। yeh bahut chhi-chhi gandi duniya hai। tumhein isse dil nahin lagaani hai। baap kehte hain tum kitne vikaari ban gaye ho। ladaai mein kaise ek-do ko maarte rehte hain। atomic bombs banaane vaalon ka bhi maan kitna hai, inse sabka vinaash ho jaata hai। baap baith bataate hain - aaj ke manushya kya hain, kal ke kya honge। abhi tum ho beech mein। sang taare kusang bore। tum purushottam banne ke liye baap ka haath pakadte ho। koi tairna seekhte hain to sikhlaane vaale ka haath pakadna hota hai। nahin to ghutka aa jaae, ismen bhi haath pakadna hai। nahin to maaya kheench leti hai। tum is saare vishwa ko svarga banaate ho। apne ko nashe mein laana chaahiye। ham shreemat se apni raajaai sthaapan kar rahe hain। sabhi manushya maatra daan to karte hi hain। phakeeron ko dete hain। teertha yaatra par pandon ko daan dete hain, chaaval mutthi bhi daan zaroor karenge। woh sab bhakti maarga mein chala aata hai। abhi baba hamko double daani banaate hain। baap kehte hain teen pair prithvi par tum yeh eeshvareey university, eeshvareey hospital kholo jismen manushya 21 janmon ke liye aakar shapha paayenge। yahaan to kaisi-kaisi beemaariyaan hoti hain। beemaari mein kitni baans ho jaati hai। hospital mein dekho to naphrat aati hai। karmabhog kitna hai। in sab duhkhon se chhootne ke liye baap kehte hain - sirf yaad karo aur koi takleeph tumko nahin deta hoon। baba jaante hain bachchon ne bahut takleeph dekhi hai। vikaari manushyon ki shakla hi badal jaati hai। ekdam jaise murde ban jaate hain। jaise sharaabi sharaab bigar rah nahin sakte। sharaab se bahut nasha chadhta hai parantu alpakaal ke liye। isse vikaari manushyon ki aayu bhi kitni chhoti ho jaati hai। nirvikaari devtaaon ki aayu average 125-150 varsha hoti hai। ever healthy banenge to aayu bhi to badhegi na। nirogi kaaya ho jaati hai। baap ko avinaashi surgeon bhi kaha jaata hai। gyaan injection satguru diya agyaan andher vinaash। baap ko jaante nahin hain isliye agyaan andhera kaha jaata hai, bhaaratvaasiyon ki hi baat hai। Christ ko to jaante hain phalaane sanvat mein aaya। unhon ki saari list hai। kaise nambarvaar pope gaddi par baithte hain। ek hi bhaarat hai jo koi ki biography nahin jaante। bulaate bhi hain he duhkh harta sukh karta paramatma, he maat-pita....... achha, maat-pita ki biography to bataao। kuchh bhi pata nahin।

tum jaante ho - yeh hai purushottam sangamayug। ham abhi purushottam ban rahe hain to poora padhna chaahiye। lok-laaj kul ki maryaada mein bhi bahut phanse rehte hain। is baba ne to koi ki bhi parvaah nahin ki। kitni gaaliyaan aadi khaai, na man na chit। raaste chalte-chalte brahman phans gaya। baba ne brahman banaaya to gaali khaane lage। saari panchaayat thi ek taraph, daada doosri taraph। saari sindhi panchaayat kahe ki yeh kya karte ho! are geeta mein bhagvaanuvaach hai na - kaam mahaashatru hai, in par jeet paane se vishwa ke maalik banoge। yeh to geeta ke akshar hain। mujh se bhi koi kahlaate hain ki kaam vikaar ko jeetne se tum jagatjeet banenge। in lakshmi-naaraayan ne bhi jeet paai hai na। ismen ladaai aadi ki koi baat nahin। tumko svarga ki baadshaahi dene aaya hoon। ab pavitra bano aur baap ko yaad karo। stri kahe ham paavan banengi, pati kahe main nahin banoonga। ek hans ek bagula ho jaata। baap aakar gyaan ratna chugne vaala hans banaate hain। parantu ek banta, doosra nahin banta to jhagda hota hai। shurooaat mein to bahut taakat thi। abhi itni himmat koi mein nahin hai। bhal kehte hain ham vaaris hain, parantu vaaris banne ki baat aur hai। shuru mein to kamaal thi। bade-bade ghar vaale phat se chhod aaye varsa paane। to woh laayak ban gaye। pahle-pahle aane vaalon ne to kamaal ki। abhi aise koi virle niklenge। lok-laaj bahut hai। pahle jo aaye unhon ne bahut himmat dikhaai। abhi koi itna saahas rakhen - bahut mushkil hai। haan, gareeb rakh sakte hain। maala ka daana banna hai to purushaartha karna pade। maala to bahut badi hai। 8 ki bhi hai, 108 ki bhi hai, phir 16108 ki bhi hai। baap khud kehte hain bahut-bahut mehnat karo। apne ko aatma samjho। sach batlaate nahin hain। achhe-achhe jo apne ko samajhte hain, unse bhi vikarma ho jaate hain। bhal gyaani tu aatma hain। samjhaani achhi hai parantu yog hai nahin, dil par nahin chadhte। yaad mein hi nahin rehte to dil par bhi nahin chadhte। yaad se hi yaad milegi na। shuru mein phat se vaari gaye। ab vaari jaana maasi ka ghar nahin। mool baat hai yaad, tab hi khushi ka paara chadhega। jitni kalaayen kam hoti gai hain utna duhkh badhta gaya hai। ab phir jitni kalaayen badhegi utna khushi ka paara chadhega। pichhaadi mein tumko sab saakshaatkaar honge। jaasti yaad karne vaalon ko kya pad milta hai। bahut pichhaadi mein saakshaatkaar hoga। jab vinaash hoga tab tum svarga ke saakshaatkaar ke halve khaayenge। baba baar-baar samjhaate hain - yaad ko badhaao। kisko thoda samjhaaya - ismen baba khush nahin hote। ek pandit ki bhi katha hai na। bola raam-raam kahne se saagar paar ho jaayenge। yeh dikhaate hain - nishchay mein hi vijay hai। baap mein sanshay aane se vinshanti ho jaate hain। baap ki yaad se hi paap katte hain, raat-din koshish karni chaahiye। phir karmendriyon ki chanchalta banda ho jaayegi। ismen bahut mehnat hai। bahut hain jinki yaad ka chart hai nahin। goya foundation hai nahin। jitna ho sake kaise bhi yaad karna hai tab hi satopradhaan, 16 kala banenge। pavitrata ke saath yaad ki yaatra bhi chaahiye। pavitra rahne se hi yaad mein rah sakenge। yeh point achhi reeti dhaaran karo। baap kitna nirhankaari hai। aage chal tumhaare charnon mein sab jhukenge। kahenge barobar yeh maataayen svarga ka dvaar kholti hain। yaad ka jauhar abhi kam hai। koi bhi dehdhaari ko yaad nahin karna hai। tamopradhaan se satopradhaan banne mein hi mehnat hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is patit chhi-chhi duhkhadaai duniya se dil nahin lagaani hai। ek baap ka haath pakad isse paar jaana hai।

2) maala ka daana banne ke liye bahut saahas rakh purushaartha karna hai। gyaan ratna chugne vaala hans banna hai। koi bhi vikarma nahin karne hain।

vardaan:- nimitta bhaav dvaara seva mein saphalta praapta karne vaale shreshtha sevaadhaari bhav

nimitta bhaav - seva mein svatah saphalta dilaata hai। nimitta bhaav nahin to saphalta nahin। shreshtha sevaadhaari arthaat har kadam baap ke kadam par rakhne vaale। har kadam shreshtha mat par shreshtha banaane vaale। jitna seva mein, sva mein vyartha samaapta ho jaata hai utna hi samartha bante hain aur samartha aatma har kadam mein saphalta praapta karti hai। shreshtha sevaadhaari woh hai jo svayan bhi sada umang utsaah mein rahe aur auron ko bhi umang utsaah dilaaye।

slogan:- eeshvareey seva mein svayan ko offer karo to aaphreen milti rahegi।

avyakt ishaare - sahajyogi banna hai to parmaatma pyaar ke anubhvi bano

yeh parmaatma pyaar ki dor door-door se kheenchakar le aati hai। yeh aisa sukhdaai pyaar hai jo is pyaar mein ek second bhi kho jaao to anek duhkh bhool jaayenge aur sada ke liye sukh ke jhoole mein jhoolne lagenge। baap ka aap bachchon se itna pyaar hai jo jeevan ke sukh-shanti ki sab kaamnaayen poorn kar dete hain। baap sukh hi nahin dete lekin sukh ke bhandaar ka maalik bana dete hain।