Daily Murli for Thursday 14 August 2025

14-08-2025 praatahmurli om shanti "baapdaada"' madhuban

“meethe bachche - baap se honest raho, apna sachcha-sachcha chart rakho, kisi ko bhi duhkh na do, ek baap ki shreshtha mat par chalte raho''

prashn:- jo poore 84 janma lene vaale hai, unka purushaartha kya hoga?

uttar:- unka vishesh purushaartha nar se naaraayan banne ka hoga। apni karmendriyon par unka poora control hoga। unki aankhen criminal nahin hogi। agar ab tak bhi kisi ko dekhne se vikaari khyaalaat aate hain, criminal aai hoti hai to samjho poore 84 janma lene vaali aatma nahin hai।

geet:- is paap ki duniya se…

om shanti। meethe-meethe roohaani bachche jaante hain ki yeh paap ki duniya hai। punya ki duniya ko bhi manushya jaante hain। mukti aur jeevanmukti punya ki duniya ko kaha jaata hai। vahaan paap hota nahin। paap hota hai duhkhadhaam raavan raajya mein। duhkh dene vaale raavan ko bhi dekha hai, raavan koi cheez nahin hai phir bhi effigy jalaate hain। bachche jaante hain ham is samay raavan raajya mein hain, parantu kinaara kiya hua hai। ham abhi purushottam sangamayug par hain। bachche jab yahaan aate hain to buddhi mein yeh hai - ham us baap ke paas jaate hain jo hamko manushya se devta banaate hain। sukhdhaam ka maalik banaate hain। sukhdhaam ka maalik banaane vaala koi brahma nahin hai, koi bhi dehdhaari nahin hai। woh hai hi shivbaaba, jisko deh nahin hai। deh tumko bhi nahin thi, parantu tum phir deh lekar janma-maran mein aate ho to tum samajhte ho ham behad ke baap paas jaate hain। woh hamko shreshtha mat dete hain। tum aisa purushaartha karne se svarga ka maalik ban sakenge। svarga ko to sab yaad karte hain। samajhte hain nai duniya zaroor hai। woh bhi zaroor koi sthaapan karne vaala hai। narka bhi koi sthaapan karte hain। tumhaara sukhdhaam ka part kab poora hota hai, woh bhi tum jaante ho। phir raavan raajya mein tum duhkhi hone lagte ho। is samay yeh hai duhkhadhaam। bhal kitne bhi karodapti, padmapti ho parantu patit duniya to zaroor kahenge na। yeh kangaal duniya, duhkhi duniya hai। bhal kitne bhi bade-bade makaan hain, sukh ke sab saadhan hain to bhi kahenge patit puraani duniya hai। vishay vaitarni nadi mein gota khaate rehte hain। yeh bhi nahin samajhte ki vikaar mein jaana paap hai। kehte hain iske bigar srishti vriddhi ko kaise paayegi। bulaate bhi hain - he bhagwan, he patit-paavan aakar is patit duniya ko paavan banaao। aatma kehti hai shareer dvaara। aatma hi patit bani hai tab to pukaarti hai। svarga mein ek bhi patit hota nahin।

tum bachche jaante ho ki sangamayug par jo achhe purushaarthi hain vahi samajhte hain ki hamne 84 janma liye hain phir in lakshmi-naaraayan ke saath hi ham satayug mein raajya karenge। ek ne to 84 janma nahin liya hai na। raaja ke saath praja bhi chaahiye। tum braahmanon mein bhi nambarvaar hain। koi raaja-raani bante hain, koi praja। baap kehte hain bachche abhi hi tumhein daiveegun dhaaran karne hain। yeh aankhen criminal hain, koi ko dekhne se vikaar ki drishti jaati hai to unke 84 janma nahin honge। woh nar se naaraayan ban nahin sakenge। jab in aankhon par jeet pa lenge tab karmaateet avastha hogi। saara madaar aankhon par hai, aankhen hi dhokha deti hain। aatma in khidkiyon se dekhti hai, ismen to double aatma hai। baap bhi in khidkiyon se dekh rahe hain। hamaari bhi drishti aatma par jaati hai। baap aatma ko hi samjhaate hain। kehte hain mainne bhi shareer liya hai, tab bol sakte hain। tum jaante ho baba hamko sukh ki duniya mein le jaate hain। yeh hai raavan raajya। tumne is patit duniya se kinaara kar liya hai। koi bahut aage badh gaye, koi pichhaadi mein hat gaye। har ek kehte bhi hain paar lagaao। ab paar to jaayenge satayug mein। parantu vahaan pad oonch paana hai to pavitra banna hai। mehnat karni hai। mukhya baat hai baap ko yaad karo to vikarma vinaash hon। yeh hai pahli subject।

tum abhi jaante ho ham aatma actor hain। pahle-pahle ham sukhdhaam mein aaye phir ab duhkhadhaam mein aaye hain। ab baap phir sukhdhaam mein le jaane aaye hain। kehte hain mujhe yaad karo aur pavitra bano। koi ko bhi duhkh na do। ek-do ko bahut duhkh dete rehte hain। koi mein kaam ka bhoot aaya, koi mein krodh aaya, haath chalaaya। baap kahenge yeh to duhkh dene vaali paap aatma hai। punya aatma kaise banenge। ab tak paap karte rehte hain। yeh to naam badnaam karte hain। sab kya kahenge! kehte hain hamko bhagwan padhaate hain! ham manushya se devta vishwa ke maalik bante hain! woh phir aise kaam karte hain kya! isliye baba kehte hain roz raat mein apne ko dekho। agar sapoot bachche hain to chart bhejen। bhal koi chart likhte hain, parantu saath mein yeh likhte nahin ki hamne kisko duhkh diya va yeh bhool ki। yaad karte rahe aur karma ulte karte rahe, yeh bhi theek nahin। ulte karma karte tab hain jab deh-abhimaani ban padte hain।

yeh chakra kaise phirta hai - yeh to bahut sahaj hai। ek din mein bhi teacher ban sakte hain। baap tumko 84 ka raaz samjhaate hain, teach karte hain। phir jaakar us par manan karna hai। hamne 84 janma kaise liye? us sikhlaane vaale teacher se daiveegun bhi jaasti dhaaran kar lete hain। baba siddha kar batla sakte hain। dikhaate hain baba hamaara chart dekho। hamne zara bhi kisko duhkh nahin diya hai। baba kahenge yeh bachcha to bada meetha hai। achhi khushbu nikaal rahe hain। teacher banna to second ka kaam hai। teacher se bhi student yaad ki yaatra mein teekhe nikal jaate hain। to teacher se bhi oonch pad paayenge। baba to poochhte hain, kisko teach karte ho? roz shiv ke mandir mein jaakar teach karo। shivbaaba kaise aakar svarga ki sthaapna karte hain? svarga ka maalik banaate hain। samjhaana bahut hi sahaj hai। baba ko chart bhej dete hain - baba hamaari avastha aisi hai। baba poochhte hain bachche koi vikarma to nahin karte ho? criminal aai ulta-sulta kaam to nahin karaati hai? apne manners, characters dekhne hain। chaal-chalan ka saara madaar aankhon par hai। aankhen anek prakaar se dhokha deti hain। zara bhi bigar poochhe cheez uthaakar khaaya to woh bhi paap ban jaata hai kyonki bigar chhutti ke uthaai na। yahaan kaayde bahut hain। shivbaaba ka yagya hai na। charge vaali ke bigar poochhe cheez kha nahin sakte। ek khaayenge to aur bhi aise karne lag padenge। vaastav mein yahaan koi cheez taale ke andar rakhne ki darkaar nahin hai। law kehta hai is ghar ke andar, kitchen ke saamne koi bhi apvitra aane nahin chaahiye। baahar mein to apvitra-pavitra ka savaal hi nahin। parantu patit to apne ko kehte hain na। sab patit hain। koi vallabhaachaari ko athva shankaraachaarya ko haath laga na saken kyonki woh samajhte hain ham paavan, yeh patit hain। bhal yahaan sabke shareer patit hain to bhi purushaartha anusaar vikaaron ka sanyaas karte hain। to nirvikaari ke aage vikaari manushya maatha tekte hain। kehte hain yeh bada svachchha dharmaatma manushya hai। satayug mein to malechchha hote nahin। hai hi pavitra duniya। ek hi kaitegri hai। tum is saare raaz ko jaante ho। shuru se lekar srishti ke aadi-madhya-ant ka raaz buddhi mein rehna chaahiye। ham sab kuchh jaante hain। baaki kuchh bhi jaanne ka rehta hi nahin। rachta baap ko jaana, sookshm vatan ko jaana, bhavishya martabe ko jaana, jiske liye hi purushaartha karte ho phir agar chalan aisi ho jaati hai to oonch pad pa nahin sakenge। kisko duhkh dete, vikaar mein jaate hain ya buri drishti rakhte hain, to yeh bhi paap hai। drishti badal jaae badi mehnat hai। drishti bahut achhi chaahiye। aankhe dekhti hain - yeh krodh karte hain to khud bhi lad padte hain। shivbaaba mein zara bhi lav nahin, yaad hi nahin karte। balihaari shivbaaba ki hai। balihaari guru aapki...... balihaari us satguru ki jisne govinda shreekrishna ka saakshaatkaar karaaya। guru dvaara tum govinda bante ho। saakshaatkaar se sirf mukh meetha nahin hota। meera ka mukh meetha hua kya? sachmuch svarga mein to gai nahin। woh hai bhakti maarga, unko svarga ka sukh nahin kahenge। govinda ko sirf dekhna nahin hai, aisa banna hai। tum yahaan aaye hi ho aisa banne। yeh nasha rehna chaahiye ham unke paas jaate hain jo hamko aisa banaate hain। to baba sabko yeh raay dete hain chart mein yeh bhi likho - aankhon ne dhokha to nahin diya? paap to nahin kiya? aankhen koi na koi baat mein dhokha zaroor deti hain। aankhen bilkul sheetal ho jaani chaahiye। apne ko ashareeri samjho। yeh karmaateet avastha pichhaadi mein hogi so bhi jab baba ko apna chart bhej denge। bhal dharmaraaj ke register mein sab jama ho jaata hai automatically। parantu jabki baap saakaar mein aaye hain to kehte hain saakaar ko maaloom padna chaahiye। to khabardaar karenge। criminal aai athva deh-abhimaan vaala hoga to vaayumandal ko ashuddha kar denge। yahaan baithe bhi buddhiyog baahar chala jaata hai। maaya bahut dhokha deti hai। man bahut toofaani hai। kitni mehnat karni padti hai - yeh banne ke liye। baba ke paas aate hain, baba gyaan ka shrringaar karaate hain aatma ko। samajhte ho ham aatma gyaan se pavitra hongi। phir shareer bhi pavitra milega। aatma aur shareer donon pavitra satayug mein hote hain phir aadhaakalpa baad raavan raajya hota hai। manushya kahenge bhagwan ne aise kyon kiya? yeh anaadi drama bana hua hai। bhagwan ne thode hi kuchh kiya। satayug mein hota hi hai - ek devi-devta dharma। koi-koi kehte hain aise bhagwan ko ham yaad hi kyon karen। lekin tumhaara doosre dharma se koi matlab nahin। jo kaante bane hain vahi aakar phool banenge। manushya kehte hain kya bhagwan sirf bhaaratvaasiyon ko hi svarga mein le jaayenge, ham maanenge nahin, bhagwan ko bhi do aankhe hain kya! parantu yeh to drama bana hua hai। sab svarga mein aayen to phir anek dharmon ka part kaise chale? svarga mein itne karod hote nahin। pahli-pahli mukhya baat bhagwan kaun hai, unko to samjho। yeh nahin samjha hai to anek prashn karte rahenge। apne ko aatma samjhenge to kahenge yeh to baat theek hai। hamko patit se paavan zaroor banna hai। yaad karna hai us ek ko। sab dharmon mein bhagwan ko yaad karte hain।

tum bachchon ko abhi yeh gyaan mil raha hai। tum samajhte ho yeh srishti chakra kaise phirta hai। tum kitna pradarshani mein bhi samjhaate ho। nikalte bilkul thode hain। parantu aise thode hi kahenge ki isliye karni nahin chaahiye। drama mein tha, kiya, kahaan nikalte bhi hain pradarshani se। kahaan nahin nikalte hain। aage chal aayenge, oonch pad paane ka purushaartha karenge। koi ko kam pad paana hoga to itna purushaartha nahin karenge। baap bachchon ko phir bhi samjhaate hain, vikarma koi nahin karo। yeh bhi note karo ki hamne kisi ko duhkh to nahin diya? koi se lada-jhagda to nahin? ulta-sulta to nahin bola? koi akartavya kaarya to nahin kiya? baba kehte hain vikarma jo kiye hain so likho। yeh to jaante ho dvaapar se lekar vikarma karte abhi bahut vikarmi ban gaye। baba ko likhkar dene se bojha halka ho jaayega। likhte hain ham kisko duhkh nahin dete hain। baba kahenge achha, chart lekar aana to dekhenge। baba bulaayenge bhi aise achhe bachche ko ham dekhen to sahi। sapoot bachchon ko baap bahut pyaar karte hain। baba jaante hain abhi koi sampoorn bana nahin hai। baba har ek ko dekhte hain, kaise purushaartha karte hain। bachche chart nahin likhte hain to zaroor kuchh khaamiyaan hain, jo baba se chhipaate hain। sachcha honest bachcha unko hi samajhta hoon jo chart likhte hain। chart ke saath phir manners bhi chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan ka bojh halka karne ke liye jo bhi vikarma hue hain, woh baap ko likhkar dena hai। ab kisi ko bhi duhkh nahin dena hai। sapoot bankar rehna hai।

2) apni drishti bahut achhi banaani hai। aankhen dhokha na den - iski sambhaal karni hai। apne manners bahut-bahut achhe rakhne hain। kaam-krodh ke vash ho koi paap nahin karne hain।

vardaan:- lakshya aur manzil ko sada smriti mein rakh teevra purushaartha karne vaale sada holi aur happy bhav

brahman jeevan ka lakshya hai bina koi had ke aadhaar ke sada aantarik khushi mein rehna। jab yeh lakshya badal had ki praaptiyon ki chhoti-chhoti galiyon mein phans jaate ho tab manzil se door ho jaate ho। isliye kuchh bhi ho jaae, had ki praaptiyon ka tyaag bhi karna pade to unhein chhod do lekin avinaashi khushi ko kabhi nahin chhodo। holi aur happy bhav ke vardaan ko smriti mein rakh teevra purushaartha dvaara avinaashi praaptiyaan karo।

slogan:- gun moorta bankar gunon ka daan dete chalo - yahi sabse badi seva hai।

avyakt ishaare - sahajyogi banna hai to parmaatma pyaar ke anubhvi bano

master knowledgeful, master sarvashaktivaan ki stage par sthit rah bhinna-bhinna prapaar ki queue se nikal, baap ke saath sada milan manaane ki lagan mein apne samay ko lagaao aur lavleen sthiti mein raho to aur sab baaten sahaj samaapta ho jaayengi, phir aapke saamne aapki praja aur bhakton ki queue lagegi।