Daily Murli for Sunday 17 August 2025

17-08-25 praatahmurli om shanti ''avyakt-baapdaada'' revise 16-11-06 madhuban

apne svamaan ki shaan mein raho aur samay ke mahatva ko jaan ever ready bano

aaj baapdaada chaaron or ke apne parmaatma pyaar ke paatra svamaan ki seat par set bachchon ko dekh rahe hain। seat par set to sab bachche hain lekin kai bachche ekaagra sthiti mein set hain aur koi bachche sankalp mein thoda-thoda upset hain। baapdaada vartamaan samay ke pramaan har bachche ko ekaagrata ke roop mein svamaandhaari swaroop mein sada dekhne chaahte hain। sabhi bachche bhi ekaagrata ki sthiti mein sthit hona chaahte hain। apne bhinna-bhinna prakaar ke svamaan jaante bhi hain, sochte bhi hain lekin ekaagrata ko halchal mein le aati hai। sada ekras sthiti kam rehti hai। anubhav hota hai aur yeh sthiti chaahte bhi hain lekin kab-kab kyon hoti hai, kaaran! sada attention ki kami। agar svamaan ki list nikaalo to kitni badi hai। sabse pahla svamaan hai - jis baap ko yaad karte rahe, unke direct bachche bane ho, number one santaan ho। baapdaada ne aap koton mein se koi bachchon ko kahaan-kahaan se chunkar apna bana liya। 5 hi khandon se direct baap ne apne bachchon ko apna bana liya। kitna bada svamaan hai। srishti rachta ki pahli rachna aap ho। jaante ho na is svamaan ko! baapdaada ne apne saath-saath aap bachchon ko saare vishwa ki aatmaon ka poorvaj banaaya hai। vishwa ke poorvaj ho, poojya ho। baapdaada ne har bachche ko vishwa ke aadhaarmoorta, udaahranmoorta banaaya hai। nasha hai? thoda-thoda kabhi kam ho jaata hai। socho, sabse amoolya jo saare kalpa mein aisa amoolya takhta kisko nahin praapta hota, woh parmaatma takhta, light ka taaj, smriti ka tilak diya। smriti aa rahi hai na - main kaun! mera svamaan kya! nasha chadh raha hai na! kitna bhi saare kalpa mein satayugi amoolya takhta hai lekin parmaatma diltakhta aap bachchon ko hi praapta hota hai।

baapdaada sada last number bachche ko bhi pharishta so devta swaroop mein dekhte hain। abhi-abhi brahman hain, brahman se pharishta, pharishta se devta banna hi hai। jaante ho apne svamaan ko? kyonki baapdaada jaante hain ki svamaan ko bhoolne ke kaaran hi dehbhaan, deh-abhimaan aata hai। pareshaan bhi hote hain, jab baapdaada dekhte hain deh-abhimaan va dehbhaan aata hai to kitne pareshaan hote hain। sabhi anubhvi hain na! svamaan ki shaan mein rehna aur is shaan se pare pareshaan rehna, donon ko jaante ho। baapdaada dekhte hain ki sabhi bachche majority knowledgeful to achhe bane hain, lekin power mein full, powerful nahin hain। percentage mein hain।

baapdaada ne har ek bachche ko apne sarva khajaanon ke baalak so maalik banaaya, sabhi ko sarva khajaane diye hain, kam jyaada nahin diye hain kyonki anginat khajaana hai, behad khajaana hai isliye har bachche ko behad ka baalak so maalik banaaya hai। behad ka baap hai, behad ka khajaana hai, to abhi apne aapko check karo ki aapke paas bhi behad hai? sada hai ki kabhi-kabhi kuchh chori ho jaata hai? gum ho jaata hai? baba kyon attention dila rahe hain? pareshaan na ho, svamaan ki seat par set raho, upset nahin। 63 janma to upset ka anubhav kar liya na! abhi aur karne chaahte ho? thak nahin gaye ho? abhi svamaan mein rehna arthaat apne oonche te oonche shaan mein rehna। kyon? kitna samay beet gaya। 70 saal mana rahe ho na! to svayan ki pahchaan arthaat svamaan ki pahchaan, svamaan mein sthit rehna। samay anusaar abhi sada shabd ko practical life mein laana, shabd ko underline nahin karna lekin practical life mein underline karo। rehna hai, rahenge, kar to rahe hain, kar lenge…। yeh behad ke baalak aur maalik ke bol nahin hain। abhi to har ek ke dil se yeh anhad shabd nikle, paana tha woh pa liya। pa rahe hain... yeh behad khajaane ke behad baap ke bachche nahin bol sakte। pa liya, jab baapdaada ko pa liya, mera baba kah diya, maan liya, jaan bhi liya, maan bhi liya, to yeh anhad shabd pa liya... kyonki baapdaada jaante hain ki bachche svamaan mein kabhi-kabhi hone ke kaaran samay ke mahatva ko bhi smriti mein kam rakhte hain। ek hai svayan ka svamaan, doosra hai samay ka mahatva। aap saadhaaran nahin ho, poorvaj ho, aap ek-ek ke peechhe vishwa ki aatmaon ka aadhaar hai। socho, agar aap hal-chal mein aayenge to vishwa ki aatmaon ka kya haal hoga! aise nahin samjho ki jo mahaarthi kahlaaye jaate hain, unke peechhe hi vishwa ka aadhaar hai, agar naye-naye bhi hain, kyonki aaj naye bhi bahut aaye honge। (pahli baar aane vaalon ne haath uthaaya) naye hain, jisne dil se maana “mera baba''। maan liya hai? jo naye naye aaye hain woh maante hain? jaante hain nahin, maante hain “mera baba'', woh haath uthaao। lamba uthaao। naye naye haath utha rahe hain। puraane to pakke hi hain na, jisne dil se maana mera baba aur baap ne bhi maana mera bachcha, woh sabhi jimmevaar hain। kyon? jab se aap kehte ho main brahmaakumaar, brahmaakumaari hoon, brahmaakumaar aur kumaari ho va shivkumaar shivkumaari ho, ya donon ke ho? phir to bandh gaye। jimmevaari ka taaj pad gaya। pad gaya hai na? paandav bataao jimmevaari ka taaj pada hai? bhaari to nahin lag raha hai? halka hai na! hai hi light ka। to light kitni halki hoti hai। to samay ka bhi mahatva attention mein rakho। samay poochh kar nahin aana hai। kai bachche abhi bhi kehte hain, sochte hain, ki thoda sa andaaj maaloom hona chaahiye। chalo 20 saal hain, 10 saal hain, thoda maaloom ho। lekin baapdaada kehte hain samay ka, final vinaash ka chhodo, aapko apne shareer ke vinaash ka pata hai? koi hai jisko pata hai ki main phalaane taareekh mein shareer chhodoonga, hai pata? aur aajkal to braahmanon ke jaane ka bhog bahut lagaate ho। koi bharosa nahin isliye samay ka mahatva jaano। yeh chhota sa yug aayu mein chhota hai, lekin bade te badi praapti ka yug hai kyonki bade te bada baap is chhote se yug mein hi aata hai aur bade yugon mein nahin aata। yahi chhota sa yug hai jismen saare kalpa ki praapti ka beej daalne ka samay hai। chaahe vishwa ka raajya praapta karo, chaahe poojya bano, saare kalpa ke beej daalne ka samay yeh hai aur double phal praapta karne ka samay hai। bhakti ka phal bhi abhi milta aur pratyakshaphal bhi abhi milta hai। abhi-abhi kiya, abhi-abhi pratyaksha phal milta hai aur bhavishya bhi banta hai। saare kalpa mein dekho, aisa koi yug hai? kyonki is samay hi baap ne har bachche ki hatheli par bade te badi saugaat di hai, apni saugaat yaad hai? svarga ka raaj-bhaag। nai duniya ke svarga ki gift, har bachche ki hatheli mein di hai। itni badi gift koi nahin deta aur kabhi nahin de sakta। abhi milti hai। abhi aap master sarvashaktivaan bante ho aur koi yug mein master sarvashaktivaan ka martaba nahin milta hai। to svayan ke svamaan mein bhi ekaagra raho aur samay ke mahatva ko bhi jaano। svayan aur samay, svayan ka svamaan hai, samay ka mahatva hai। albela nahin banna। 70 saal beet chuke hain, abhi agar albele bane to bahut kuchh apni praapti kam kar denge kyonki jitna aage badhte hain na utna ek albelaapan aata hai, bahut achhe hain, bahut achhe chal rahe hain, pahunch jaayenge, dekhna peechhe nahin rahenge, ho jaayega... yeh albelaapan aur doosra royal aalasya aata hai। albelaapan aur aalasya। kab shabd hai aalasya, ab shabd hai turat daan mahaapunya।

abhi aaj pahla tarna hai na! to baapdaada attention khinchava raha hai। is season mein na svamaan se utarna hai, na samay ke mahatva ko bhoolna hai। alert, hoshiyaar, khabardaar। pyaare hain na! jisse pyaar hota hai na uski jara bhi kamjori-kami dekhi nahin jaati hai। sunaaya na ki baapdaada ka last bachcha bhi hai to usse bhi ati pyaar hai। bachcha to hai na। to abhi is chalti hui season mein, season bhale India vaalon ki hai lekin double videshi bhi kam nahin hain, baapdaada ne dekha hai, koi bhi tarna aisa nahin hota jismen double videshi nahin ho। yeh unhon ki kamaal hai। abhi haath uthaao double videshi। dekho kitne hain! special season beet gai, phir bhi dekho kitne hain! mubaarak hai। bhale padhaare, bahut-bahut mubaarak hai।

to suna abhi kya karna hai? is season mein kya-kya karna hai, woh hom work de diya। svayan ko realise karo, svayan ko hi karo, doosre ko nahin aur riyal gold bano kyoki baapdaada samajhte hain jisne mera baba kaha, woh saath mein chale। baraati hoke nahin chale। baapdaada ke saath shreemat ka haath pakad saath chale aur phir brahma baap ke saath pahle raajya mein aave। maja to pahle naye ghar mein hota hai na। ek maas ke baad bhi kehte ek maas puraana hai। naya ghar, nai duniya, nai chaal, naya rasam rivaaj aur brahma baap ke saath raajya mein aaye। sabhi kehte hain na - brahma baap se hamaara bahut pyaar hai। to pyaar ki nishaani kya hoti hai? saath rahen, saath chalen, saath aayen। yeh hai pyaar ka saboot। pasanda hai? saath rehna, saath chalna, saath aana, pasanda hai? hai pasanda? to jo cheez pasanda hoti hai usko chhoda thode hi jaata hai! to baap ki har bachche ke saath preet ki reet yahi hai ki saath chalen, peechhe-peechhe nahin। agar kuchh rah jaayega to dharmaraaj ki saja ke liye rookna padega। haath mein haath nahin hoga, peechhe-peechhe aayenge। maja kismen hai? saath mein hai na! to pakka vaayda hai na ki saath chalna hai? ya peechhe-peechhe aana hai? dekho haath to bahut achha uthaate hain। haath dekh karke baapdaada khush to hote hain lekin shreemat ka haath uthaana। shivbaaba ko to haath hoga nahin, brahma baba, aatma ko bhi haath nahin hoga, aapko bhi yeh sthool haath nahin hoga, shreemat ka haath pakadkar saath chalna। chalenge na! kaandh to hilaao। achha haath hila rahe hain। baapdaada yahi chaahte hain ek bhi bachcha peechhe nahin rahe, sab saath-saath chalen। ever ready rehna padega। achha।

ab baapdaada chaaron or ke bachchon ka register dekhta rahega। vaayda kiya, nibhaaya arthaat phaayda uthaaya। sirf vaayda nahin karna, phaayda uthaana। achha। abhi sabhi dridh sankalp karenge! dridh sankalp ki sthiti mein sthit hokar baitho, karna hi hai, chalna hi hai। saath chalna hai। abhi yeh dridh sankalp apne se karo, is sthiti mein baith jaao। ge ge nahin karna, karna hi hai। achha।

sab taraph ke double sevaadhaari bachchon ko, chaaron or ke sada ekaagra svamaan ki seat par set rahne vaale baapdaada ke mastak maniyaan, chaaron or ke samay ke mahatva ko jaan teevra purushaartha ka saboot dene vaale sapoot bachchon ko, chaaron or ke umang-utsaah ke pankhon se sada udne, udaane vaale double light pharishte bachchon ko baapdaada ka yaadapyaar aur namaste।

daadiyon se:- sabhi saath dete chal rahe hain - yeh baapdaada ko khushi hai, har ek apni visheshta ki anguli de rahe hain। (daadi ji se) sabhi ko aadi ratna dekh karke khushi hoti hai na। aadi se leke seva mein apni haddiyaan lagaai hain। haddi seva ki hai, bahut achha hai। dekho kuchh bhi hota hai lekin ek baat dekho, chaahe bed par hain, chaahe kahaan bhi hain lekin baap ko nahin bhoole hain। baap dil mein samaaya hua hai। aise hai na। dekho kitna achha muskara rahi hai। baaki aayu badi hai, aur dharmaraajpuri se taata karke jaana hai, saja nahin khaani hai, dharmaraaj ko bhi sir jhukaana padega। svaagat karni padegi na। taata karna padega, iseelie yahaan thoda bahut baap ki yaad mein hisaab poora kar rahe hain। baaki kashta nahin hai, beemaari bhale hai lekin duhkh ki maatra nahin hai। (pardaadi se) yeh bahut muskara rahi hai। sabko drishti do। achha।

vardaan:- baahyamukhi chaturaai se mukta rahne vaale baap pasanda sachche saudaagar bhav

baapdaada ko duniya ki baahyamukhi chaturaai pasanda nahin। kaha jaata hai bholon ka bhagwan। chatur sujaan ko bhole bachche hi pasanda hain। parmaatma directory mein bhole bachche hi vishesh vi.aai.pi.hain। jinmen duniya vaalon ki aankh nahin jaati - vahi baap se sauda karke parmaatma naynon ke sitaare ban gaye। bhole bachche hi dil se kehte “mera baba'', isi ek second ke ek bol se anginat khajaane ka sauda karne vaale sachche saudaagar ban gaye।

slogan:- sarva ka sneh praapta karna hai to mukh se sada meethe bol bolo।

avyakt-ishaare - sahajyogi banna hai to parmaatma pyaar ke anubhvi bano

jo sada baap ki yaad mein lavleen arthaat samaaye hue hain। aisi aatmaon ke nainon mein aur mukh ke har bol mein baap samaaya hua hone ke kaaran shakti-svarup ke bajaay sarva shaktivaan nazar aayega। jaise aadi sthaapna mein brahma rup mein sadaiv shreekrishna dikhaai deta tha, aise aap bachchon dvaara sarvashaktivaan dikhaai de।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay apne poorvaj pan ke svamaan mein sthit ho, kalpa vriksha ki jadon mein baith poore vriksha ko shaktishaali yog ka daan dete hue, apni vanshaavli ki divya paalna karen।