Daily Murli for Tuesday 19 August 2025

19-08-2025 praatahmurli om shanti "baapdaada"' madhuban

“meethe bachche - apne svadharma ko bhoolna hi sabse badi bhool hai, abhi tumhein abhul banna hai, apne ghar aur raajya ko yaad karna hai''

prashn:- aap bachchon ki kaun-si avastha hi samay ke sameepta ki nishaani hai?

uttar:- aap bachche jab yaad ki yaatra mein sada masta rahenge, buddhi ka bhatakna banda ho jaayega, vaani mein yaad ka jauhar aa jaayega, apaar khushi mein rahenge, ghadi-ghadi apni satayugi duniya ke nazaare saamne aate rahenge tab samjho samay sameep hai। vinaash mein time nahin lagta, iske liye yaad ka chart badhaana hai।

geet:- tumhein paake hamne jahaan pa liya hai…

om shanti। roohaani bachche is geet ka arth to samajhte honge। ab behad ke baap ko to pa liya hai। behad ke baap se svarga ka varsa milta hai, jis varse ko koi bhi chheen nahin sakta। varse ka nasha tab chala jaata hai, jab raavan raajya shuru hota hai। yeh bhi drama bana hua hai। bachchon ko srishti drama ka bhi gyaan hai। yeh chakra kaise phirta hai। inko naatak bhi kahen, drama bhi kahen। bachche samajhte hain barobar baap aakar srishti ka chakra bhi samjhaate hain। jo brahman kul ke hain, unhon ko hi samjhaate hain। bachche tum apne janmon ko nahin jaante ho, main tumko samjhaata hoon। pahle tum sunte the 84 laakh janma lene baad phir ek janma manushya ka milta hai। aise nahin hai। abhi tum sab aatmaayen nambarvaar aati jaati ho। buddhi mein aaya hai - pahle-pahle ham aadi sanaatan devi-devta dharma ke poojya the, phir ham hi pujaari bane hain। aapehi poojya aapehi pujaari - yeh bhi gaayan hai। manushya phir bhagwan ke liye samajhte hain ki aapehi poojya aapehi pujaari bante hain। aapke hi yeh sab roop hain। anek mat-mataantar hain na। tum abhi shreemat par chalte ho। tum samajhte ho ham student pahle to kuchh nahin jaante the phir padhkar oonch imtahaan paas karte jaate hain। woh student bhi shuru mein to kuchh bhi nahin jaante hain, phir imtahaan paas karte-karte samajhte hain ki abhi hamne bairistari paas kar li hai। tum bhi ab jaante ho - ham padhkar manushya se devta ban rahe hain so bhi vishwa ke maalik। vahaan to hai hi ek dharma, ek raajya। tumhaara raajya koi chheen na sake। vahaan tumko pavitrata-shanti-sukh-sampatti sab kuchh hai। geet mein bhi suna na। ab yeh geet tumne to nahin banaaye hain। anaayaas hi drama anusaar is samay ke liye yeh bane hue hain। manushyon ke banaaye hue geeton ka arth baap baith samjhaate hain। abhi tum yahaan shanti mein baith baap se varsa le rahe ho, jo koi chheen na sake। aadhaakalpa sukh ka varsa rehta hai। baap samjhaate hain meethe-meethe bachchon aadhaakalpa se bhi jaasti tum sukh bhogte ho। phir raavan raajya shuru hota hai। mandir bhi aise hain jahaan chitra dikhaate hain - devtaayen vaam maarga mein kaise jaate hain। dress to vahi hai। dress baad mein badalti hai। har ek raaja ki apni-apni dress, taaj aadi sab alag-alag hote hain।

ab bachche jaante hain ham shivbaaba se brahma dvaara varsa le rahe hain। baap to bachche-bachche hi kehte hain। bachchon tum apne janmon ko nahin jaante ho। sunti to aatma hai na। ham aatma hain, na ki shareer। aur jo bhi manushya maatra hain unhon ko apne shareer ke naam ka nasha hai kyonki deh-abhimaani hain। ham aatma hain yeh jaante hi nahin। woh to aatma so paramatma, paramatma so aatma kah dete hain। abhi tumko baap ne samjhaaya hai tum aatma so vishwa ke maalik devi-devta ban rahe ho। yeh gyaan abhi hai, ham so devta phir kshatriy gharaane mein aayenge। 84 janmon ka hisaab bhi chaahiye na। sab to 84 janma nahin lenge। sab ikatthe thode hi aa jaate hain। tum jaante ho kaun se dharma kaise aate rehte hain। history puraani phir nai hoti hai। abhi yeh hai hi patit duniya। woh hai paavan duniya। phir doosre-doosre dharma aate hain, yahaan karmakshetra par yeh ek hi naatak chalta hai। mukhya hain 4 dharma। is sangam par baap aakar brahman sampradaay sthaapan karte hain। viraat roop ka chitra banaate hain, parantu usmein yeh bhool hai। baap aakar sab baaten samjhaae abhul banaate hain। baap to na kabhi shareer mein aate hain, na bhool karte hain। woh to thode samay ke liye tum bachchon ko sukh-dhaam ka aur apne ghar ka raasta bataane ke liye inke rath mein aate hain। na sirf raasta bataate hain parantu life bhi banaate hain। kalpa-kalpa tum ghar jaate ho phir sukh ka part bhi bajaate ho। bachchon ko bhool gaya hai - ham aatmaon ka svadharma hai hi shant। is duhkh ki duniya mein shanti kaise hogi - in sab baaton ko tum samajh gaye ho। tum sabko samjhaate bhi ho। aahiste-aahiste sab aate jaayenge, vilaayat vaalon ko bhi maaloom padega - yeh srishti chakra kaise phirta hai, inki aayu kitni hai। foreigners bhi tumhaare paas aayenge va bachche vahaan jaakar srishti chakra ka raaz samjhaayenge। woh samajhte hain ki Christ god ke paas jaae pahuncha। Christ ko god ka bachcha samajhte hain। kai phir yeh samajhte hain ki Christ bhi punarjanma lete-lete abhi beggar hai। jaise tum bhi beggar ho na। beggar arthaat tamopradhaan। samajhte hain Christ bhi yahaan hai, phir kab aayenge, yeh nahin jaante। tum samjha sakte ho - tumhaara dharma sthaapak phir apne samay par dharma sthaapan karne aayega। unko guru nahin kah sakte। woh dharma sthaapan karne aate hain। sadgati daata sirf ek hai, woh jo bhi dharma sthaapan karne aate hain woh sab punarjanma lete-lete abhi aakar tamopradhaan bane hain। ant mein saara jhaad jadajdeebhoot avastha ko pa liya hai। abhi tum jaante ho - saara jhaad khada hai, baaki devi-devta dharma ka foundation hai nahin। (bad ka misaal) yeh baaten baap hi bachchon ko baith samjhaate hain। tum bachchon ko to bahut khushi honi chaahiye। tumko maalmu pada hai ham so devi-devta the phir ab bante hain। yahaan tum aate hi ho satya naaraayan ki katha sunne, jisse nar se naaraayan banenge। naaraayan banenge to zaroor lakshmi bhi hogi। lakshmi-naaraayan honge to zaroor unhon ki raajdhaani bhi hogi na। akele lakshmi-naaraayan to nahin banenge। lakshmi banne ki alag katha thode hi hai। naaraayan ke saath lakshmi bhi banti hai। lakshmi bhi kabhi naaraayan banti hai। naaraayan phir kabhi lakshmi bante hain। koi-koi geet bahut achhe hain। maaya ke ghutke aane par geet sunne se harshitapna aa jaayega। jaise tairna seekhna hota hai to pahle ghutke aate hain phir unko pakad lete hain। yahaan bhi maaya ke ghutke bahut khaate hain। tairne vaale to bahut hote hain। unhon ki bhi race hoti hai to tumhaari bhi race hoti hai - us paar jaane ki। maamekam yaad karna hai। yaad nahin karte to ghutka khaate hain। baap kehte hain - yaad ki yaatra se hi beda paar hoga। tum us paar chale jaayenge। taaru (tairaak) koi bahut teekhe hote hain, koi kam। yahaan bhi aise hain। baba ke paas chart bhej dete hain। baba jaanch karte hain। yaad ke chart ko yeh right reeti samajhte hain ya wrong samajhte hain। koi-koi dikhaate hain - ham saare din mein 5 ghanta yaad mein raha। ham vishvaas nahin karte, zaroor bhool hui hai। koi samajhte hain ham jitna samay yahaan padhte hain utna samay to chart theek rehta hai। parantu nahin। bahut hain yahaan baithe hue bhi, sunte hue bhi buddhi baahar mein kahaan-kahaan chali jaati hai। poora sunte bhi nahin hain। bhakti maarga mein aise-aise hota hai। sanyaasi log katha sunaate hain phir beech-beech mein poochhte hain, hamne kya sunaaya? dekhte hain yeh tavaai ho baitha hai to poochhte hain phir bata nahin sakte। buddhi kahaan na kahaan chali jaati hai। ek akshar bhi nahin sunte। yahaan bhi aise hain। baba dekhte rehte hain - samjha jaata hai inki buddhi kahaan baahar bhatakti rehti hai। idhar-udhar dekhte rehte hain। aise-aise bhi koi-koi naye aate hain। baba samajh jaate hain poora samjha nahin hai isliye baba kehte hain naye-naye ko jaldi yahaan class mein aane ki chhutti na do। nahin to vaayumandal ko bigaadte hain। aage chal tum dekhenge jo achhe-achhe bachche honge yahaan baithe-baithe vaikuntha mein chale jaayenge। bahut khushi hoti rahegi। ghadi-ghadi chale jaayenge - abhi time najdeek hai। nambarvaar purushaartha anusaar tumhaari avastha aisi ho jaayegi। ghadi-ghadi svarga mein apne mahal dekhte rahenge। jo kuchh bataana karna hoga unka saakshaatkaar hota rahega। samay to dekh rahe ho। kaise-kaise taiyaariyaan ho rahi hain। baap kehte hain - dekhna kaise ek second mein saari duniya ke manushya khaak mein mil jaayenge। bomb lagaaya aur yeh khalaas hue।

tum bachche jaante ho abhi apni raajaai sthaapan ho rahi hai। abhi to yaad ki yaatra mein masta rehna hai। woh jauhar bharna hai jo koi ko bhi drishti se teer lag jaae। pichhaadi mein bheeshma pitaamah aadi jaise ko tumne hi gyaan ke baan maare hain। jhat samajh jaayenge, yeh to satya kehte hain। gyaan ka saagar patit-paavan to niraakaar bhagwan hai। shreekrishna ho na sake। unka to janma dikhaate hain। shreekrishna ke vahi features phir kabhi mil na saken। phir satayug mein vahi features milenge। har ek janma mein, har ek ke features alag-alag hote hain। yeh drama ka part aisa bana hua hai। vahaan to natural beautiful features hote hain। ab to din-pratidin tan bhi tamopradhaan hote jaate hain। pahle-pahle satopradhaan phir sato-rajo-tamo ho jaate hain। yahaan to dekho kaise-kaise bachche janma lete hain। koi ki taang nahin chalti, koi jaamde hote hain। kya-kya ho jaata hai। satayug mein aise thode hi hota hai। vahaan devtaaon ko daadhi aadi bhi nahin hoti। kleenshev hoti hai। nain-chain se maaloom padta hai yeh mel hai, yeh female hai। aage chal tumko bahut saakshaatkaar hote rahenge। tum bachchon ko kitni khushi honi chaahiye। baba kalpa-kalpa aakar hamko raajayog sikhlaae manushya se devta banaate hain। yeh bhi tum bachche jaante ho ki aur jo bhi dharma vaale hain sab apne-apne section mein chale jaayenge। aatmaon ka jhaad bhi dikhaate hain na। chitron mein bahut correction karte, badalte jaayenge। jaise baba sookshm vatan ke liye samjhaate hain, sanshay buddhi to kahenge yeh kya! aage yeh kehte the, abhi yeh kehte hain! lakshmi-naaraayan ke do roop ko milaakar vishnu kehte hain। baaki 4 bhuja vaala manushya thode hi hota hai। raavan ke 10 sheesh dikhaate hain। aise koi manushya hote nahin। har varsha baith jalaate hain। jaise gudiyon ka khel।

manushya kehte hain - shaastron bigar ham ji nahin sakte। shaastra to hamaare praan hain। geeta ka dekho maan kitna hai। yahaan to tumhaare paas murliyon ka dher ikattha ho jaata hai। tum rakhkar kya karenge! din-pratidin tum nai-nai points sunte rehte ho। haan points note karna achha hai। bhaashan karte samay rehearsal karenge। yeh-yeh points samjhaayenge। topic ki list honi chaahiye। aaj is topic par samjhaayenge। raavan kaun hai, raam kaun hai? sach kya hai, woh ham aapko bataate hain। is samay raavan raajya saari duniya mein hai। 5 vikaar to sabmen hain। baap aakar phir raamraajya ki sthaapna karte hain। yeh haar aur jeet ka khel hai। haar kaise hoti hai! 5 vikaaron roopi raavan se। aage pavitra grihastha aashram tha so ab patit ban gaye hain। lakshmi-naaraayan so phir brahma-sarasvati। baap bhi kehte hain main inke bahut janmon ke ant mein pravesh karta hoon। tum kahenge ham bhi bahut janmon ke ant mein baap se gyaan le rahe hain। yeh sab samajhne ki baaten hain। koi ki dullhead buddhi hai to samajhte nahin hain। yeh to raajdhaani sthaapan ho rahi hai। bahut aaye phir chale gaye, woh phir aa jaayenge। praja mein paai paise ka pad pa lenge। woh bhi to chaahiye na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada isi nashe mein rehna hai ki ham abhi yeh padhaai poori kar manushya se devta so vishwa ke maalik banenge। hamaare raajya mein pavitrata-sukh-shanti sab kuchh hoga। use koi chheen nahin sakta।

2) is paar se us paar jaane ke liye yaad ki yaatra mein achha tairaak banna hai। maaya ke ghutke nahin khaane hain। apni jaanch karni hai, yaad ke chart ko yathaartha samajhkar likhna hai।

vardaan:- purushaartha aur praalabdha ke hisaab ko jaankar teevragti se aage badhne vaale knowledgeful bhav

purushaartha dvaara bahutkaal ki praalabdha banaane ka yahi samay hai isliye knowledgeful ban teevragti se aage badho। ismen yeh nahin socho ki aaj nahin to kal badal jaayenge। ise hi albelaapan kaha jaata hai। abhi tak baapdaada sneh ke saagar ban sarva sambandh ke sneh mein bachchon ka albelaapan, saadhaaran purushaartha dekhte sunte bhi extra madad se, extra marks dekar aage badha rahe hain। to knowledgeful ban himmat aur madad ke vishesh vardaan ka laabh lo।

slogan:- prakriti ka daas banne vaale hi udaas hote hain, isliye prakritijeet bano।

avyakt ishaare - sahajyogi banna hai to parmaatma pyaar ke anubhvi bano

jaise koi saagar mein sama jaae to us samay sivaay saagar ke aur kuchh nazar nahin aayega। to baap arthaat sarvagunon ke saagar mein sama jaana, isko kaha jaata hai lavleen sthiti। to baap mein nahin samaana hai, lekin baap ki yaad mein, sneh mein sama jaana hai।