Daily Murli for Wednesday 24 September 2025

24-09-2025 praatahmurli om shanti "baapdaada"' madhuban

'“meethe bachche - baap aaye hain tumhaari battery charge karne, jitna tum yaad mein rahenge utna battery charge hoti rahegi''

prashn:- tumhaari sach ki bedi (naanv) ko toofaan kyon lagte hain?

uttar:- kyonki is samay artificial bahut nikal pade hain। koi apne ko bhagwan kehte, koi riddhi-siddhi dikhaate, isliye manushya sach ko parakh nahin sakte। sach ki bedi ko hilaane ki koshish karte hain। parantu tum jaante ho ki hamaari sach ki naanv kabhi doob nahin sakti। aaj jo vighna daalte hain, woh kal samjhenge ki sadgati ka raasta yahaan hi milna hai। sabke liye yeh ek hi hatti hai।

om shanti। roohaani bachchon prati athva roohon prati kyonki rooh athva aatma sunti hai kaanon dvaara। dhaarna aatma mein hoti hai। baap ki aatma mein bhi gyaan bhara hua hai। bachchon ko aatma-abhimaani banna hai is janma mein। bhakti maarga ke 63 janma, dvaapar yug se tum deh-abhimaan mein rehte ho। aatma kya hai, yeh pata nahin rehta hai। aatma hai zaroor। aatma hi shareer mein pravesh karti hai। duhkh bhi aatma ko hi hota hai। kaha bhi jaata hai patit aatma, paavan aatma। patit paramatma kabhi nahin suna hai। sarva ke andar paramatma agar hota to patit paramatma ho jaae। to mukhya baat hai aatma-abhimaani banna। aatma kitni chhoti hai, usmein kaise part bhara hua hai, yeh kisko bhi pata nahin hai। tum to nai baat sunte ho। yeh yaad ki yaatra bhi baap hi sikhlaate hain, aur koi sikhla na sake। mehnat bhi hai ismen। ghadi-ghadi apne ko aatma samajhna hai। jaise dekho yeh imarjensi light aai hai, jo battery par chalti hai। isko phir charge karte hain। baap hai sabse badi power। aatmaayen kitni dher hain। sabko us power se bharna hai। baap hai sarvashaktimaan। ham aatmaon ka unse yog nahin hoga to battery charge kaise ho? saara kalpa lagta hai discharge hone mein। abhi phir battery ko charge karna hota hai। bachche samajhte hain hamaari battery discharge ho gai hai, ab phir charge karni hai। kaise? baba kehte hain mere se yog lagaao। yeh to bahut sahaj samajhne ki baat hai। baap kehte hain mere saath buddhi yog lagaao to tumhaari aatma mein power bharkar satopradhaan ban jaayegi। padhaai to hai hi kamaai। yaad se tum paavan bante ho। aayu badi hoti hai। battery charge hoti hai। har ek ko dekhna hai - kitna baap ko yaad karte hain। baap ko bhool jaane se hi battery discharge hoti hai, koi ka bhi sachcha connection nahin hai। sachcha connection hai hi tum bachchon ka। baap ko yaad karne bigar jyot jagegi kaise? gyaan bhi sirf ek baap hi dete hain।

tum jaante ho gyaan hai din, bhakti hai raat। phir raat se hota hai vairaagya, phir din shuru hota hai। baap kehte hain raat ko bhoolo, ab din ko yaad karo। svarga hai din, narka hai raat। tum bachche ab chaitanya mein ho, yeh shareer to vinaashi hai। mitti ka banta hai, mitti mein mil jaata hai। aatma to avinaashi hai na। baaki battery discharge hoti hai। abhi tum kitne samajhdaar bante ho। tumhaari buddhi chali jaati hai ghar mein। vahaan se ham aaye hain। yahaan sookshm vatan ka to maaloom pad gaya। vahaan 4 bhujaayen vishnu ki dikhaate hain। yahaan to 4 bhuja hoti nahin। yeh kisko bhi buddhi mein nahin hoga ki brahma-sarasvati phir lakshmi-naaraayan bante hain, isliye vishnu ko 4 bhuja di hain। sivaae baap ke koi samjha na sake। aatma mein hi sanskaar bharte hain। aatma hi tamopradhaan se phir satopradhaan banti hai। aatmaayen hi baap ko pukaarti hain - O baba ham discharge ho gaye hain, ab aap aao, hamko charge hona hai। ab baap kehte hain - jitna yaad karenge utna taakat aayegi। baap se bahut lav hona chaahiye। baba ham aapke hain, aapke saath hi ghar jaane vaale hain। jaise piyar ghar se sasurghar vaale le jaate hain na। yahaan tumko do baap mile hain, shrringaar karaane vaale। shrringaar bhi achha chaahiye arthaat sarvagun sampanna banna hai। apne se poochhna hai, mere mein koi avgun to nahin hain। mansa mein bhal toofaan aate hain, karmana se to kuchh nahin karta hoon? kisko duhkh to nahin deta hoon? baap hai duhkh harta, sukh karta। ham bhi sabko sukh ka raasta bataate hain। baba bahut yuktiyaan batlaate rehte hain। tum to ho sena। tumhaara naam hi hai prajaapita brahmaakumaar-kumaariyaan, koi bhi andar aaye, pahle-pahle to ye poochho ki kahaan se aaye ho? kiske paas aaye ho? kahenge ham bi. ke. ke paas aaye hain। achha brahma kaun hai? prajaapita brahma ka naam kabhi suna hai? haan prajaapita ke to tum bhi bachche ho। praja to sab ho gaye na। tumhaara baap hai, tum sirf jaante nahin ho। brahma bhi zaroor kisi ka bachcha hoga na। unke baap ka koi shareer to dekhne mein nahin aata hai। brahma-vishnu-shankar in teenon ke oopar hai shivbaaba। trimoorti shiv kaha jaata hai teenon ka rachayita। oopar mein ek shivbaaba, phir hain teen। jaise sijra hota hai na। brahma ka baap zaroor bhagwan hi hoga। woh hai aatmaon ka pita। achha, phir brahma kahaan se aaya। baap kehte hain main inmen pravesh kar, inka naam rakhta hoon brahma। tum bachchon ke naam rakhe, to inka bhi naam rakha brahma। kehte hain yeh mera divya alaukik janma hain। tum bachchon ko to adopt karta hoon। baaki inmen pravesh karta hoon phir tumko sunaata hoon isliye yeh ho gaye baap-daada। jismen pravesh kiya unki aatma to hai na। unke baaju mein aakar baithta hoon। do aatmaon ka part to yahaan bahut chalta hai। aatma ko bulaate hain to aatma kahaan aakar baithegi। zaroor brahman ke baaju mein aakar baithegi। yeh bhi do aatmaayen hain baap aur daada। inke liye baap kehte hain apne janmon ko nahin jaante ho। tumko bhi kehte hain tum apne janmon ko nahin jaante the। ab smriti aai hai kalpa-kalpa 84 ka chakra lagaaya hai, phir vaapis jaate hain। yeh hai sangamayug। ab transfer hote hain। yog se tum satopradhaan ban jaayenge, battery charge ho jaayegi। phir satayug mein aa jaayenge। buddhi mein saara chakra phirta rehta hai। detail mein to nahin ja sakenge। jhaad ki bhi aayu hoti hai, phir sookh jaata hai। yahaan bhi sab manushya jaise sookh gaye hain। sab ek-do ko duhkh dete rehte hain। abhi sabka shareer khalaas ho jaayega। baaki aatmaayen chali jaayengi। yeh gyaan baap ke sivaae koi de na sake। baap hi vishwa ki baadshaahi dete hain, unko kitna yaad karna chaahiye। yaad mein na rahne se maaya ka thappad lag jaata hai। sabse kada thappad hai vikaar ka। yuddha ke maidaan mein tum brahman hi ho na, to tumko hi toofaan aayenge। parantu koi vikarma nahin karna hai। vikarma kiya to haar khaai। baba se poochhte hain yeh karna padta hai। bachche tang karte hain to gussa aa jaata hai। bachchon ko achhi reeti sambhaalenge nahin to kharaab ho jaayenge। koshish karke thappad nahin lagaao। shreekrishna ke liye bhi dikhaate hain na okhli se baandha। rassi se baandho, khaana na do। ro-ro kar aakhir kahenge achha ab nahin karenge। bachcha hai phir bhi karega, shiksha deni hai। baba bhi bachchon ko shiksha dete hain - bachche, kabhi vikaar mein mat jaana, kul-kalankit nahin banna। laukik mein bhi koi kapoot bachcha hota hai to maa-baap kehte hain na - yeh kya kaala munh karte ho। kul ko kalank lagaate ho। haar-jeet, jeet-haar, hote-hote aakhreen jeet ho jaayegi। sach ki bedi (naanv) hai, toofaan bahut aayenge kyonki artificial bahut nikal pade hain। koi apne ko bhagwan kehte, koi kya kehte hain। riddhi-siddhi bhi bahut dikhaate hain। saakshaatkaar bhi karaate hain। baap aate hi hain sarva ki sadgati karne। phir na to yeh jangal rahega, na jangal mein rahne vaale rahenge। abhi tum ho sangamayug par, jaante ho ki yeh puraani duniya kabristaan hui padi hai। koi marne vaale se dil thode hi lagaate hain, yeh duniya to gai ki gai। vinaash hua ki hua। baap aate hi tab hain jab nai duniya puraani hoti hai। baap ko achhi reeti yaad karenge to battery charge hogi। bhal vaani to bahut achhi-achhi chalaate hain। parantu yaad ka jauhar nahin to woh taakat nahin rehti hai। jauhardaar talvaar nahin। baap kehte hain yeh koi nai baat nahin hai। 5 hazaar varsha pahle bhi aaye the। baap poochhte hain aage kab mile ho? to kehte hain kalpa pahle mile the। koi phir kah dete drama aapehi purushaartha karaayega। achha ab drama purushaartha kara raha hai na, to karo। ek jagah baith to nahi jaana hai। jinhonne kalpa pahle purushaartha kiya hai, woh karenge। abhi tak jo aaye nahin hain, woh aane hain। jo chalte-chalte bhaag gaye, shaadi aadi jaakar ki, unka bhi drama mein part hoga to aakar phir purushaartha karenge, jaayenge kahaan। baap ke paas hi sabko poonchh latkaana padega। likha hua hai bheeshma-pitaamah aadi bhi ant mein aate hain। abhi to kitna ghamanda hai phir woh ghamanda unhon ka poora ho jaayega। tum bhi har 5 hazaar varsha ke baad part bajaate ho, raajaai lete ho, ganvaate ho। din-pratidin centres badhte jaate hain। bhaarat-vaasi jo khaas devi-devtaaon ke pujaari hain unko samjhaana hai, satayug mein devi-devta dharma tha to unki pooja karte hain। Christian log kaaista ki mahima karte, ham aadi sanaatan devi-devta dharma ki mahima karte hain। woh kisne sthaapan kiya। vo log samajhte hain krishna ne sthaapan kiya tab unki pooja karte rehte। tumhaare mein bhi nambarvaar hain। koi kitni mehnat karte hain, koi kitni। dikhaate hain na govardhan parvat ko anguli par utha liya।

abhi yeh puraani duniya hai, sab cheezon se taakat nikal gai hai। sona bhi khaaniyon se nahin nikalta hai, svarga mein to sone ke mahal bante hain, abhi to government tang ho jaati hai kyonki karja dena padta hai। vahaan to athaah dhan hai। deevaaron mein bhi heere-javaahraat lage rehte hain। heeron ki jadat ka shauk rehta hai। vahaan dhan ki kami hai nahin। kaaroon ka khajaana rehta hai। allaah avaldeen ka ek khel dikhaate hain। thaka karne se mahal nikal aate hain। yahaan bhi divya-drishti milne se svarga mein chale jaate hain। vahaan prince-princess ke paas murli aadi sab cheezen heeron ki rehti hain। yahaan to koi aisi cheez pahankar baithe to lootkar le jaayenge। chhoora maar kar bhi le jaayenge। vahaan yeh baaten hoti nahin। yeh duniya hi badi puraani gandi hai। in lakshmi-naaraayan ki duniya to vaah-vaah thi। heeron-javaahraaton ke mahal the। akele to nahin honge na। usko kaha jaata tha svarga, tum jaante ho barobar ham svarga ke maalik the। hamne ye somnaath ka mandir banaaya tha। yeh samajhte hain - ham kya the phir bhakti maarga mein kaise mandir banaakar pooja ki। aatma ko apne 84 janmon ka gyaan hai। kitne heere-javaahraat the, woh sab kahaan gaye। aahiste-aahiste sab khalaas hote gaye। musalmaan aaye, itna to lootkar le gaye jo kabron mein jaakar heere lagaaye, taaj mahal aadi banaaya। phir British government vahaan se khodkar le gai। abhi to kuchh bhi nahin hai। bhaarat beggar hai, karja hi karja lete rehte hain। anaaj, cheeni aadi kuchh nahin milta। ab vishwa ko badalna hai। parantu unse pahle aatma ki battery ko satopradhaan banaane liye charge karna hai। baap ko yaad zaroor karna hai। buddhi ka yog baap ke saath ho, unse hi to varsa milta hai। maaya ki ismen hi ladaai hoti hai। aage in baaton ko tum thode hi samajhte the। jaise doosre vaise tum the। tum abhi ho sangamayugi aur woh sab hain kaliyugi। manushya kahenge inhon ko to jo aata hai so kehte rehte hain। lekin samjhaane ki yuktiyaan bhi hoti hain na। dheere-dheere tumhaari vriddhi hoti jaayegi। abhi baba badi university khol rahe hain। ismen samjhaane ke liye chitra to chaahiye na। aage chalkar tumhaare paas yeh sab chitra translight ke ban jaayenge jo phir tumko samjhaane mein bhi sahaj ho।

tum jaante ho ham apni baadshaahi phir se sthaapan kar rahe hain, baap ki yaad aur gyaan se। maaya beech mein bahut dhokha deti hai। baap kehte hain dhokhe se bachte raho। yuktiyaan to batlaate rehte hain। mukh se sirf itna bolo ki baap ko yaad karo to tumhaare vikarma vinaash honge aur tum yeh lakshmi-naaraayan ban jaayenge। yeh baizes aadi bhagwan ne khud banaaye hain, to inka kitna kadar hona chaahiye। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sarva gunon se apna shrringaar karna hai, kabhi kisi ko duhkh nahin dena hai। sabko sukh ka raasta bataana hai।

2) saari duniya kabristaan hui padi hai isliye isse dil nahin lagaani hai। smriti rahe ki abhi ham transfer ho rahe hain, humein to nai duniya mein jaana hai।

vardaan:- maaya va vighnon se safe rahne vaale baapdaada ki chhatrachhaaya ke adhikaari bhav

jo baapdaada ke sikeeldhe laadle hain unhein baapdaada ki chhatrachhaaya adhikaar roop mein praapta hoti hai। jis chhatrachhaaya mein maaya ke aane ki taakat nahin। woh sada maaya par vijayi ban jaate hain। yeh yaad roopi chhatrachhaaya sarva vighnon se safe kar deti hai। kisi bhi prakaar ka vighna chhatrachhaaya mein rahne vaale ke paas aa nahin sakta। chhatrachhaaya mein rahne vaalon ke liye mushkil se mushkil baat bhi sahaj ho jaati hai। pahaad samaan baaten rooi ke samaan anubhav hoti hain।

slogan:- prabhu priy, lok priy aur svayan priy banne ke liye santushtata ka gun dhaaran karo।

avyakt ishaare - ab lagan ki agni ko prajvalit kar yog ko jvaala roop banaao

vishesh yaad ki yaatra ko powerful banaao, gyaan-swaroop ke anubhvi bano। aap shreshtha aatmaon ki shubh vritti va kalyaan ki vritti aur shaktishaali vaataavran anek tadapti hui, bhatakti hui, pukaar karne vaali aatmaon ko aananda, shanti aur shakti ki anubhooti karaayegi।