Daily Murli for Sunday 19 October 2025

19-10-25 praatahmurli om shanti ''avyakt-baapdaada'' revise 31-03-07 madhuban

sapoot ban apni soorat se baap ki soorat dikhaana, nirmaan (seva) ke saath nirmal vaani, nirmaan sthiti ka balance rakhna

aaj baapdaada chaaron or ke bachchon ke bhaagya ki rekhaayen dekh harshit ho rahe hain। sabhi bachchon ke mastak mein chamakti hui jyoti ki rekha chamak rahi hai। naynon mein roohaaniyat ki bhaagya rekha dikhaai de rahi hai। mukh mein shreshtha vaani ke bhaagya ki rekha dikhaai de rahi hai। hothon mein roohaani muskaraahat dekh rahe hain। haathon mein sarva parmaatma khajaane ki rekha dikhaai de rahi hai। har yaad ke kadam mein padmon ki rekha dekh rahe hain। har ek ke hriday mein baap ke lav mein lavleen ki rekha dekh rahe hain। aisa shreshtha bhaagya har ek bachcha anubhav kar rahe hain na! kyonki yeh bhaagya ki rekhaayen svayan baap ne har ek ke shreshtha karma ki kalam se kheenchi hai। aisa shreshtha bhaagya jo avinaashi hai, sirf is janma ke liye nahin hai lekin anek janmon ki avinaashi bhaagya rekhaayen hain। avinaashi baap hai aur avinaashi bhaagya ki rekhaayen hain। is samay shreshtha karma ke aadhaar par sarva rekhaayen praapta hoti hain। is samay ka purushaartha anek janma ki praalabdha bana deta hai।

sabhi bachchon ko jo praalabdha anek janma milni hai, baapdaada woh abhi is samay, is janma mein purushaartha ke praalabdha ki praapti dekhne chaahte hain। sirf bhavishya nahin lekin abhi bhi yeh sab rekhaayen sada anubhav mein aayen kyonki abhi ke yeh divya sanskaar aapka naya sansaar bana raha hai। to check karo, check karna aata hai na! svayan hi svayan ke checker bano। to sarva bhaagya ki rekhaayen abhi bhi anubhav hoti hain? aise to nahin samajhte ki yeh praalabdha ant mein dikhaai degi? praapti bhi ab hai to praalabdha ka anubhav bhi abhi karna hai। bhavishya sansaar ke sanskaar abhi pratyaksha jeevan mein anubhav hona hai। to kya check karo? bhavishya sansaar ke sanskaaron ka gaayan karte ho ki bhavishya sansaar mein ek raajya hoga। yaad hai na woh sansaar! kitne baar us sansaar mein raajya kiya hai? yaad hai ki yaad dilaane se yaad aata hai? kya the, woh smriti mein hai na? lekin vahi sanskaar abhi ke jeevan mein pratyaksha roop mein hain? to check karo abhi bhi man mein, buddhi mein, sambandh-samparka mein, jeevan mein ek raajya hai? va kabhi-kabhi aatma ke raajya ke saath-saath maaya ka raajya bhi to nahin hai? jaise bhavishya praalabdha mein ek hi raajya hai, do nahin hai। to abhi bhi do raajya to nahin hai? jaise bhavishya raajya mein ek raajya ke saath ek dharma hai, woh dharma kaun sa hai? sampoorn pavitrata ki dhaarna ka dharma hai। to abhi check karo ki pavitrata sampoorn hai? svapna mein bhi apvitrata ka naamnishaan nahin ho। pavitrata arthaat sankalp, bol, karma aur sambandh-samparka mein ek hi dhaarna sampoorn pavitrata ki ho। brahmaachaari ho। apni checking karne aati hai? jisko apni checking karni aati hai woh haath uthaao। aati hai aur karte bhi hain? karte hain, karte hain? teachers ko aata hai? double foreigners ko aata hai? kyon? abhi ki pavitrata ke kaaran aapke jad chitra se bhi pavitrata ki maang karte hain। pavitrata arthaat ek dharma ab ki sthaapna hai jo bhavishya mein bhi chalti hai। aise hi bhavishya ka kya gaayan hai? ek raajya, ek dharma aur saath mein sada sukh-shanti, sampatti, akhanda sukh, akhanda shanti, akhanda sampatti। to ab ke aapke svaraajya ke jeevan mein, woh hai vishwa raajya aur is samay hai svaraajya, to check karo avinaashi sukh, parmaatma sukh, avinaashi anubhav hota hai? koi saadhan va koi salvation ke aadhaar par sukh ka anubhav to nahin hota? kabhi kisi bhi kaaran se duhkh ki lahar anubhav mein nahin aani chaahiye। koi naam, maan-shaan ke aadhaar par to sukh anubhav nahin hota hai? kyon? yeh naam maan shaan, saadhan, salvation yeh svayan hi vinaashi hain, alpakaal ke hain। to vinaashi aadhaar se avinaashi sukh nahin milta। check karte jaao। abhi bhi sunte bhi jaao aur apne mein check bhi karte jaao to pata padega ki ab ke sanskaar aur bhavishya sansaar ki praalabdha mein kitna antar hai! aap sabne janmate hi baapdaada se vaayda kiya hai, yaad hai vaayda ki bhool gaya hai? yahi vaayda kiya ki ham sabhi baap ke saathi ban, vishwa kalyaankaari ban naya sukh shaantimay sansaar banaane vaale hain। yaad hai? apna vaayda yaad hai? yaad hai to haath uthaao। pakka vaayda hai ya thoda gadbad ho jaati hai? naya sansaar ab parmaatma sanskaar ke aadhaar se banaane vaale hain। to sirf abhi purushaartha nahin karna hai lekin purushaartha ki praalabdha bhi abhi anubhav karni hai। sukh ke saath shanti ko bhi check karo - ashaanta circumstance, ashaanta vaayumandal usmein bhi aap shanti saagar ke bachche sada kamal pushpa samaan ashaanti ko bhi shanti ke vaayumandal mein parivartan kar sakte ho? shant vaayumandal hai, usmein aapne shanti anubhav ki, yeh koi badi baat nahin hai lekin aapka vaayda hai ashaanti ko shanti mein parivartan karne vaale hain। to check karo - check kar rahe hain na? parivartak ho, parvash to nahin ho na? parivartak ho। parivartak kabhi parvash nahin ho sakta। isi prakaar se sampatti, akhut sampatti, woh svaraajya adhikaari ki kya hai? gyaan, gun aur shaktiyaan svaraajya adhikaari ki sampattiyaan yeh hain। to check karo - gyaan ke saare vistaar ke saar ko spashta jaan gaye ho na? gyaan ka arth yeh nahin hai ki sirf bhaashan kiya, course karaaya, gyaan ka arth hai samajh। to har sankalp, har karma bol, gyaan arthaat samajhdaar, knowledgeful banke karte hain? sarvagun practical jeevan mein emerge rehte hain? sarva hain va yathaashakti hain? isi prakaar sarva shaktiyaan - aapka title hai - master sarvashaktivaan, shaktivaan nahin hain। to sarva shaktiyaan sampanna hain? aur doosri baat sarva shaktiyaan samay par kaarya karti hain? samay par haazir hoti hain ya samay beet jaata hai phir yaad aata hai? to check karo teenon hi baaten ek raajya, ek dharma aur avinaashi sukh-shanti, sampatti kyonki naye sansaar mein yeh baaten jo abhi svaraajya ke samay ka anubhav hai, woh nahin ho sakega। abhi in sabhi baaton ka anubhav kar sakte hain। abhi se yeh sanskaar emerge honge tab anek janma praalabdha ke roop mein chalenge। aise to nahin samajhte hain ki dhaaran kar rahe hain, ho jaayega, ant tak to ho hi jaayenge!

baapdaada ne pahle se hi ishaara de diya hai ki bahutkaal ka abhi ka abhyaas bahutkaal ki praapti ka aadhaar hai। ant mein ho jaayega nahin sochna, ho jaayega nahin, hona hi hai। kyon? svaraajya ka jo adhikaar hai woh abhi bahutkaal ka abhyaas chaahiye। agar ek janma mein adhikaari nahin ban sakte, adheen ban jaate to anek janma kaise honge! isliye baapdaada sabhi chaaron or ke bachchon ko baar-baar ishaara de rahe hain ki abhi samay ki raphtaar teevragti mein ja rahi hai isliye sabhi bachchon ko abhi sirf purushaarthi nahin banna hai lekin teevra purushaarthi ban, purushaartha ki praalabdha ka abhi bahutkaal se anubhav karna hai। teevra purushaartha ki nishaaniyaan baapdaada ne pahle bhi sunaai hain। teevra purushaarthi sada master daata hoga, levta nahin devta, dene vaala। yeh ho to mera purushaartha ho, yeh kare to main bhi karoon, yeh badle to main bhi badloon, yeh badle, yeh kare, yeh daataapan ki nishaani nahin hai। koi kare na kare, lekin main baapdaada samaan karoon, brahma baap samaan bhi, saakaar mein bhi dekha, bachche karen to main karoon - kabhi nahin kaha, main karke bachchon se karaaoon। doosri nishaani hai teevra purushaartha ki, sada nirmaan, kaarya karte bhi nirmaan, nirmaan aur nirmaan donon ka balance chaahiye। kyon? nirmaan bankar kaarya karne mein sarva dvaara dil ka sneh aur duaayen milti hain। baapdaada ne dekha ki nirmaan arthaat seva ke kshetra mein aajkal sabhi achhe umang-utsaah se naye-naye plan bana rahe hain। iski baapdaada chaaron or ke bachchon ko mubaarak de rahe hain।

baapdaada ke paas nirmaan ke, seva ke plan bahut achhe-achhe aaye hain। lekin baapdaada ne dekha ki nirmaan ke kaarya to bahut achhe lekin jitna seva ke kaarya mein umang-utsaah hai utna agar nirmaan stage ka balance ho to nirmaan arthaat seva ke kaarya mein saphalta aur jyaada pratyaksha roop mein ho sakti hai। baapdaada ne pahle bhi sunaaya hai - nirmaan svabhaav, nirmaan bol aur nirmaan sthiti se sambandh-samparka mein aana, devtaaon ka gaayan karte hain lekin hai braahmanon ka gaayan, devtaaon ke liye kehte hain unke mukh se jo bol nikalte woh jaise heere moti, amoolya, nirmal vaani, nirmal svabhaav। abhi baapdaada dekhte hain, result suna den na, kyonki is season ka last tarna hai। to baapdaada ne dekha ki nirmal vaani, nirmaan sthiti usmein abhi attention chaahiye।

baapdaada ne khajaane ke teen khaate jama karo, yeh pahle bataaya hai। to result mein kya dekha? teen khaate kaun se hain? woh to yaad hoga na! phir bhi revise kar rahe hain - ek hai apne purushaartha se jama ka khaata badhaana। doosra hai - sada svayan bhi santushta rahe aur doosre ko bhi santushta kare, bhinna-bhinna sanskaar ko jaante hue bhi santushta rehna aur santushta karna, isse duaaon ka khaata jama hota hai। agar kisi bhi kaaran se santushta karne mein kami rah jaati hai to punya ke khaate mein jama nahin hota। santushtata punya ki chaabi hai, chaahe rehna, chaahe karna। aur teesra hai - seva mein bhi sada nihsvaartha, main pan nahin। mainne kiya, ya mera hona chaahiye, yeh main aur meraapan jahaan seva mein aa jaata hai vahaan punya ka khaata jama nahin hota। meraapan, anubhvi ho yeh royal roop ka bhi meraapan bahut hai। royal roop ke merepan ki list saadhaaran merepan se lambi hai। to jahaan bhi main aur merepan ka svaartha aa jaata hai, nihsvaartha nahin hai vahaan punya ka khaata kam jama hota hai। merepan ki list phir kabhi sunaayenge, badi lambi hai aur badi sookshm hai। to baapdaada ne dekha ki apne purushaartha se yathaashakti sabhi apna-apna khaata jama kar rahe hain lekin duaaon ka khaata aur punya ka khaata woh abhi bharne ki aavashyakta hai isliye teenon khaate jama karne ka attention। sanskaar variety abhi bhi dikhaai denge, sabke sanskaar abhi sampanna nahin hue hain lekin hamaare oopar auron ke kamjor svabhaav, kamjor sanskaaron ka prabhaav nahin padna chaahiye। main master sarvashaktivaan hoon, kamjor sanskaar shaktishaali nahin hain। mujh master sarvashaktivaan ke oopar kamjor sanskaar ka prabhaav nahin padna chaahiye। safety ka saadhan hai baapdaada ki chhatrachhaaya mein rehna। baapdaada ke saath combined rehna। chhatrachhaaya hai shreemat।

aaj baapdaada ishaara de rahe hain ki sva prati har ek ko sankalp, bol, samparka-sambandh, karma mein naveenta laane ka plan banaana hi hai। baapdaada pahle result dekhenge kya naveenta laaya? kya puraana sanskaar dridh sankalp se parivartan kiya? yeh result pahle dekhenge। kya sochte ho, aisa karen? karen? haath uthaao jo kehte hain karenge, karenge? achha। karenge ya doosre ko dekhenge? kya karenge? doosre ko nahin dekhna, baapdaada ko dekhna, apni badi daadi ko dekhna। kitni nyaari aur pyaari stage hai। baapdaada kehte hain agar kisko main aur had ka meraapan se nyaara dekhna ho to apne baapdaada ke diltakhtansheen daadi ko dekho। saari life mein had ka meraapan, had ka main-pan isse nyaari rahi hai, uski result beemaari kitni bhi hai lekin duhkh darda ki bhaasna se nyaari hai। ek hi shabd pakka hai, koi bhi poochhta daadi kuchh darda hai, daadi kuchh ho raha hai? kya uttar milta? kuchh nahin kyonki nihsvaartha aur dil badi, sarva ko samaane vaali, sarva ki pyaari, iski practical nishaani dekh rahe hain। to jab brahma baap ki baat kehte hain, to kehte hain usmein to baap tha na, lekin daadi to aapke saath prabhu paalna mein rahi, padhaai mein rahi, seva mein saathi rahi, to jab ek ban sakta hai, nihsvaartha sthiti mein to kya aap sabhi nahin ban sakte? ban sakte hain na! baapdaada ko nishchay hai ki aap hi banne vaale hain। kitne baar bane hain? yaad hai? anek kalpa baap samaan bane hain aur abhi bhi aap hi banne vaale ho। isi umang se, utsaah se udte chalo। baap ko aapmen nishchay hai to aap bhi apne mein sada nishchaybuddhi, banna hi hai aisa nishchaybuddhi ban udte chalo। jab baap se pyaar hai, pyaar mein 100 percent se bhi jyaada hai, aise kehte ho। yeh theek hai? jo bhi sabhi baithehain va jo bhi apne-apne sthaan par sun rahe hain, dekh rahe hain woh sabhi pyaar ki subject mein apne ko 100 percent samajhte hain? woh haath uthaao। 100 percent? (sabhi ne uthaaya) achha। peechhe vaale lambe haath uthaao, hilaao। (aaj 22 hajaar se bhi adhik bhaai bahinen pahunche hue hain) ismen to sabhi ne haath uthaaya। to pyaar ki nishaani hai samaan banna। jisse pyaar hota hai us jaisa bolna, us jaisa chalna, us jaisa sambandh-samparka nibhaana, yeh hai pyaar ki nishaani।

aaj baapdaada abhi-abhi dekhna chaahte hain ki ek second mein svaraajya ke seat par controlling power, ruling power ke sanskaar mein emerge roop se second mein baith sakte hain! to ek second mein do teen minute ke liye raajya adhikaari ki seat par set ho jaao। achha। (drill)

chaaron or ke bachchon ki yaadapyaar ke patra aur saath-saath jo bhi science ke saadhan hain unhon dvaara yaadapyaar baapdaada ke paas pahunch gai hai। apne dil ka samaachaar bhi bahut bachche likhte bhi hain aur roohrihaan mein bhi sunaate hain। baapdaada un sabhi bachchon ko respond de rahe hain ki sada sachchi dil par saaheb raazi hai। dil ki duaayen aur dil ka dulaar baapdaada ka vishesh un aatmaon prati hai। chaaron or ke jo bhi samaachaar dete hain, sabhi achhe-achhe umang-utsaah ke plan jo bhi banaaye hain, uski baapdaada mubaarak bhi de rahe hain aur vardaan bhi de rahe hain, badhte chalo, badhaate chalo।

chaaron or ke baapdaada ke koton mein koi, koi mein bhi koi shreshtha bhaagyavaan bachchon ko baapdaada ka vishesh yaadapyaar, baapdaada sabhi bachchon ko himmat aur umang-utsaah ki mubaarak bhi de rahe hain। aage teevra purushaarthi banne ki, balance ki padma-padamguna blessing bhi de rahe hain। sabhi ke bhaagya ka sitaara sada chamakta rahe aur auron ka bhaagya banvaate rahen iski bhi duaayen de rahe hain। chaaron or ke bachche apne apne sthaan par sun bhi rahe hain, dekh bhi rahe hain aur baapdaada bhi sabhi chaaron or ke door baithebachchon ko dekh-dekh khush ho rahe hain। dekhte raho aur madhuban ki shobha sada badhaate raho। to sabhi bachchon ko dil ki duaaon saath namaste।

vardaan:- attention roopi ghrit dvaara aatmik swaroop ke sitaare ki chamak ko badhaane vaale aakarshan moorta bhav

jab baap dvaara, knowledge dvaara aatmik swaroop ka sitaara chamak gaya to bujh nahin sakta, lekin chamak ki percentage kam aur jyaada ho sakti hai। yeh sitaara sada chamakta hua sabko aakarshit tab karega jab roz amritvele attention roopi ghrit daalte rahenge। jaise deepak mein ghrit daalte hain to woh ekras jalta hai। aise sampoorn attention dena arthaat baap ke sarva gun va shaktiyon ko svayan mein dhaaran karna। isi attention se aakarshan moorta ban jaayenge।

slogan:- behad ki vairaagyavritti dvaara saadhna ke beej ko pratyaksha karo।

avyakt ishaare - svayan aur sarva ke prati mansa dvaara yog ki shaktiyon ka prayog karo

yog ki shakti jama karne ke liye karma aur yog ka balance aur badhaao। karma karte yog ki powerful stage rahe - iska abhyaas badhaao। jaise seva ke liye invention karte vaise in vishesh anubhvon ke abhyaas ke liye samay nikaalo aur naveenta laakarke sabke aage ekjaampul bano।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay master sarvashaktivaan ke shaktishaali swaroop mein sthit ho prakriti sahit sarva aatmaon ko pavitrata ki kirnen den, satopradhaan banaane ki seva karen।