Daily Murli for Friday 12 December 2025

12-12-2025 praatahmurli om shanti "baapdaada"' madhuban

“meethe bachche - sat baap dvaara sangam par tumhein satya ka vardaan milta hai isliye tum kabhi bhi jhooth nahin bol sakte ho''

prashn:- nirvikaari banne ke liye aap bachchon ko kaun si mehnat zaroor karni hai?

uttar:- aatma-abhimaani banne ki mehnat zaroor karni hai। bhrikuti ke beech mein aatma ko hi dekhne ka abhyaas karo। aatma hokar aatma se baat karo, aatma hokar suno। deh par drishti na jaae - yahi mukhya mehnat hai, isi mehnat mein vighna padte hain। jitna ho sake yeh abhyaas karo - ki “main aatma hoon, main aatma hoon।''

geet:- om namo shivaae…

om shanti। meethe bachchon ko baap ne smriti dilaai hai ki srishti ka chakra kaise phirta hai। abhi tum bachche jaante ho hamne baap se jo kuchh jaana hai, baap ne jo raasta bataaya hai, woh duniya mein koi nahin jaanta। aapehi poojya, aapehi pujaari ka arth bhi tumhein samjhaaya hai, jo poojya vishwa ke maalik bante hain, vahi phir pujaari bante hain। paramatma ke liye aise nahin kahenge। ab tumhein smriti mein aaya ki yeh to bilkul right baat hai। srishti ke aadi-madhya-ant ka samaachaar baap hi sunaate hain, aur kisko bhi gyaan ka saagar nahin kaha jaata hai। yeh mahima shreekrishna ki nahin hai। abhi tum samajhte ho, unki aatma abhi gyaan le rahi hai। yeh wonderful baat hai। baap bigar koi samjha na sake। aise to bahut saadhu-santa bhinna-bhinna prakaar ke hathayog aadi sikhlaate rehte hain। woh sab hai bhakti maarga। satayug mein tum koi ki bhi pooja nahin karte ho। vahaan tum pujaari nahin bante ho। unko kaha hi jaata hai - poojya devi-devta the, ab nahin hai। vahi poojya phir ab pujaari bane hain। baap kehte hain yeh bhi pooja karte the na। saari duniya is samay pujaari hai। nai duniya mein ek hi poojya devi-devta dharma rehta hai। bachchon ko smriti mein aaya barobar drama ke plan anusaar yeh bilkul right hai। geeta episode barobar hai। sirf geeta mein naam badal diya hai। jis samjhaane ke liye hi tum mehnat karte ho। 2500 varsha se geeta shreekrishna ki samajhte aaye hain। ab ek janma mein samajh jaaen ki geeta niraakaar bhagwan ne sunaai, ismen time to lagta hai na। bhakti ka bhi samjhaaya hai, jhaad kitna lamba-chauda hai। tum likh sakte ho baap hamko raajayog sikha rahe hain। jin bachchon ko nishchay ho jaata hai to ve nishchay se samjhaate bhi hain। nishchay nahin to khud bhi moonjhate rehte hain - kaise samjhaayen, koi hangaama to nahin hoga। nidar to abhi hue nahin hain na। nidar tab honge jab poore dehi-abhimaani ban jaaen, darna to bhakti maarga mein hota hai। tum sab ho mahaaveer। duniya mein to koi nahin jaante ki maaya par jeet kaise pahni jaati hai। tum bachchon ko ab smriti mein aaya hai। aage bhi baap ne kaha tha manamnaabhav। patit-paavan baap hi aakar yeh samjhaate hain, bhal geeta mein akshar hai parantu aise koi samjhaate nahin। baap kehte hain bachche dehi-abhimaani bhav। geeta mein akshar to hain na - aate mein namak misal। har ek baat ka baap nishchay bithaate hain। nishchaybuddhi vijayanti।

tum abhi baap se varsa le rahe ho। baap kehte hain grihastha vyavhaar mein bhi zaroor rehna hai। sabko yahaan aakar baithne ki darkaar nahin। service karni hai, centres kholne hain। tum ho salvation army। eeshvareey mission ho na। pahle shoodra maayaavi mission ke the, abhi tum ishvareey mission ke bane ho। tumhaara mahatva bahut hai। in lakshmi-naaraayan ki kya mahima hai। jaise raajaayen hote hain, vaise raajya karte hain। baaki inhon ko kahenge sarvagun sampanna, vishwa ka maalik kyonki us samay aur koi raajya nahin hota। abhi bachche samajh gaye hain - vishwa ke maalik kaise banen? abhi ham so devta bante hain to phir unhon ko maatha kaise jhuka sakenge। tum knowledgeful ban gaye ho, jinko knowledge nahin hai woh maatha tekte rehte hain। tum sabke occupation ko abhi jaan gaye ho। chitra wrong kaun se hain, right kaun se hain, woh bhi tum samjha sakte ho। raavan raajya ka bhi tum samjhaate ho। yeh raavan raajya hai, inko aag lag rahi hai। bhambhor ko aag lagni hai, bhambhor vishwa ko kaha jaata hai। akshar jo gaaye jaate hain un par samjhaaya jaata hai। bhakti maarga mein to anek chitra banaaye hain। vaastav mein asul hoti hai - shivbaaba ki pooja, phir brahma-vishnu-shankar ki। trimoorti jo banaate hain woh right hai। phir yeh lakshmi-naaraayan bas। trimoorti mein brahma-sarasvati bhi aa jaate hain। bhaktimaarga mein kitne chitra banaate hain। hanumaan ki bhi pooja karte hain। tum mahaaveer ban rahe ho na। mandir mein bhi koi ki haathi par savaari, koi ki ghode par savaari dikhaai hai। ab aisi savaari thode hi hai। baap kehte hain mahaarthi। mahaarthi maana haathi par savaar। to unhonne phir haathi ki savaari bana di hai। yeh bhi samjhaaya hai kaise gaj ko graah khaate hain। baap samjhaate hain jo mahaarthi hain, kabhi-kabhi unko bhi maaya graah hap kar leti hai। tumko abhi gyaan ki samajh aai hai। achhe-achhe mahaarthiyon ko maaya kha jaati hai। yeh hain gyaan ki baaten, inka varnan koi kar na sake। baap kehte hain nirvikaari banna hai, daiveegun dhaaran karne hain। kalpa-kalpa baap kehte hain - kaam mahaashatru hai। ismen hai mehnat। is par tum vijay paate ho। prajaapita ke bane to bhaai-behen ho gaye। vaastav mein asal tum ho aatmaayen। aatma, aatma se baat karti hai। aatma hi in kaanon se sunti hai, yeh yaad rakhna pade। ham aatma ko sunaate hain, deh ko nahin। asul mein ham aatmaayen bhaai-bhaai hain phir aapas mein bhaai-behen bhi hain। sunaana to bhaai ko hota hai। drishti aatma taraph jaani chaahiye। ham bhaai ko sunaate hain। bhaai sunte ho? haan main aatma sunta hoon। beekaaner mein ek bachcha hai jo sadaiv aatma-aatma kah likhta hai। meri aatma is shareer dvaara likh rahi hai। mujh aatma ka yeh vichaar hai। meri aatma yeh karti hai। to yeh aatma-abhimaani banna mehnat ki baat hai na। meri aatma namaste karti hai। jaise baba kehte hain - roohaani bachche। to bhrakuti taraph dekhna pade। aatma hi sunne vaali hai, aatma ko main sunaata hoon। tumhaari nazar aatma par padni chaahiye। aatma bhrakuti ke beech mein hai। shareer par nazar padne se vighna aate hain। aatma se baat karni hai। aatma ko hi dekhna hai। deh-abhimaan ko chhodo। aatma jaanti hai - baap bhi yahaan bhrakuti ke beech mein baitha hai। unko ham namaste karte hain। buddhi mein yeh gyaan hai ham aatma hain, aatma hi sunti hai। yeh gyaan aage nahin tha। yeh deh mili hai part bajaane ke liye isliye deh par hi naam rakha jaata hai। is samay tumko dehi-abhimaani ban vaapis jaana hai। yeh naam rakha hai part bajaane। naam bigar to kaarobaar chal na sake। vahaan bhi kaarobaar to chalegi na। parantu tum satopradhaan ban jaate ho isliye vahaan koi vikarma nahin banenge। aisa kaam hi tum nahin karenge jo vikarma bane। maaya ka raajya hi nahin। ab baap kehte hain - tum aatmaon ko vaapis jaana hai। yeh to puraane shareer hain phir jaayenge satayug-treta mein। vahaan gyaan ki darkaar hi nahin। yahaan tumko gyaan kyon dete hain? kyonki durgati ko paaye hue ho। karma to vahaan bhi karna hai parantu woh akarma ho jaata hai। ab baap kehte hain hath kaar de.. aatma yaad baap ko karti hai। satayug mein tum paavan ho to saari kaarobaar paavan hoti hai। tamopradhaan raavan raajya mein tumhaari kaarobaar khoti ho jaati hai, isliye manushya teertha yaatra aadi par jaate hain। satayug mein koi paap karte nahin jo teerthon aadi par jaana pade। vahaan tum jo bhi kaam karte ho woh satya hi karte ho। satya ka vardaan mil gaya hai। vikaar ki baat hi nahin। kaarobaar mein bhi jhooth ki darkaar nahin rehti। yahaan to lobh hone ke kaaran manushya chori thagi karte hain, vahaan yeh baaten hoti nahin। drama anusaar tum aise phool ban jaate ho। woh hai hi nirvikaari duniya, yeh hai vikaari duniya। saara khel buddhi mein hai। is samay hi pavitra banne ke liye mehnat karni pade। yogbal se tum vishwa ke maalik bante ho, yogbal hai mukhya। baap kehte hain bhakti maarga ke yagya tap aadi se koi bhi mere ko praapta nahin karte। sato-rajo-tamo mein jaana hi hai। gyaan bada sahaj aur ramneek hai, mehnat bhi hai। is yog ki hi mahima hai jisse tumko satopradhaan banna hai। tamopradhaan se satopradhaan banaane ka raasta baap hi batlaate hain। doosra koi yeh gyaan de na sake। bhal koi chandrama tak chale jaate hain, koi paani se chale jaate hain। parantu woh koi raajayog nahin hai। nar se naaraayan to nahin ban sakte। yahaan tum samajhte ho ham aadi sanaatan devi-devta dharma ke the jo phir ab ban rahe hain। smriti aai hai। baap ne kalpa pahle bhi yeh samjhaaya tha। baap kehte hain nishchaybuddhi vijayanti। nishchay nahin to woh sunne aayenge hi nahin। nishchaybuddhi se phir sanshaybuddhi bhi ban jaate hain। bahut achhe-achhe mahaarthi bhi sanshay mein aa jaate hain। maaya ka thoda toofaan aane se deh-abhimaan aa jaata hai।

yeh baapdaada donon hi combined hain na। shivbaaba gyaan dete hain phir chale jaate hain va kya hota hai, kaun bataaye। baba se poochhen kya aap sadaiv ho ya chale jaate ho? baap se to yeh nahin poochh sakte hain na। baap kehte hain main tumko raasta bataata hoon patit se paavan hone ka। aaoon, jaaoon, mujhe to bahut kaam karne padte hain। bachchon ke paas bhi jaata hoon, unse kaarya karaata hoon। ismen sanshay ki koi baat na laae। apna kaam hai - baap ko yaad karna। sanshay mein aane se gir padte hain। maaya thappad zor se maar deti hai। baap ne kaha hai bahut janmon ke ant ke bhi ant mein main inmen aata hoon। bachchon ko nishchay hai barobar baap hi humein yeh gyaan de rahe hain, aur koi de na sake। phir bhi is nishchay se kitne gir padte hain, yeh baap jaante hain। tumko paavan banna hai to baap kehte hain maamekam yaad karo, aur koi baaton mein nahin pado। tum yeh aisi baaten karte ho to samajh mein aata hai - pakka nishchay nahin hai। pahle ek baat ko samjho jisse tumhaare paap naash hote hain, baaki phaaltu baaten karne ki darkaar nahin। baap ki yaad se vikarma vinaash honge phir aur baaton mein kyon aate ho! dekho koi prashn-uttar mein moonjhata hai to use bolo ki tum in baaton ko chhod ek baap ki yaad mein rahne ka purushaartha karo। sanshay mein aaya to padhaai hi chhod denge phir kalyaan hi nahin hoga। nabja dekhkar samjhaana hai। sanshay mein hai to ek point par khada kar dena hai। bahut yukti se samjhaana padta hai। bachchon ko pahle yeh nishchay ho - baba aaya hua hai, hamko paavan bana rahe hain। yeh to khushi rehti hai। nahin padhenge to naapaas ho jaayenge, unko khushi bhi kyon aayegi। school mein padhaai to ek hi hoti hai। phir koi padhkar laakhon ki kamaai karte hain, koi 5-10 roopaya kamaate hain। tumhaari em object hi hai nar se naaraayan banna। raajaai sthaapan hoti hai। tum manushya se devta banenge। devtaaon ki to badi raajdhaani hai, usmein oonch pad paana woh phir padhaai aur activity par hai। tumhaari activity badi achhi honi chaahiye। baba apne liye bhi kehte hain - abhi karmaateet avastha nahin bani hai। hamko bhi sampoorn banna hai, abhi bane nahin hain। gyaan to bada sahaj hai। baap ko yaad karna bhi sahaj hai parantu jab karen na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi baat mein sanshay buddhi ban padhaai nahin chhodni hai। pahle to paavan banne ke liye ek baap ko yaad karna hai, doosri baaton mein nahin jaana hai।

2) shareer par nazar jaane se vighna aate hain, isliye bhrikuti mein dekhna hai। aatma samajh, aatma se baat karni hai। aatma-abhimaani banna hai। nidar bankar seva karni hai।

vardaan:- sada baap ke avinaashi aur nihsvaartha prem mein lavleen rahne vaale maayaaprooph bhav

jo bachche sada baap ke pyaar mein lavleen rehte hain unhein maaya aakarshit nahin kar sakti। jaise waterproof kapda hota hai to paani ki ek boond bhi nahin tikti। aise jo lagan mein lavleen rehte hain woh maayaaprooph ban jaate hain। maaya ka koi bhi vaar, vaar nahin kar sakta kyonki baap ka pyaar avinaashi aur nihsvaartha hai, iske jo anubhvi ban gaye woh alpakaal ke pyaar mein phans nahin sakte। ek baap doosra main, uske beech mein teesra koi aa hi nahin sakta।

slogan:- nyaare-pyaare hokar karma karne vaala hi second mein fullstop laga sakta hai।

avyakt ishaare - ab sampanna va karmaateet banne ki dhun lagaao

karmaateet arthaat karma ke vash hone vaala nahin lekin maalik ban, authority ban karmendriyon ke sambandh mein aaye, vinaashi kaamna se nyaara ho karmendriyon dvaara karma karaaye। aatma maalik ko karma apne adheen na kare lekin adhikaari ban karma karaata rahe। karaane vaala ban karma karaana - isko kahenge karma ke sambandh mein aana। karmaateet aatma sambandh mein aati hai, bandhan mein nahin।