Daily Murli for Friday 9 January 2026

09-01-2026 praatahmurli om shanti "baapdaada"' madhuban

“meethe bachche - great great grand father arthaat sarva dharma pitaaon ka bhi aadi pita hai prajaapita brahma, jiske occupation ko tum bachche hi jaante ho''

prashn:- karmon ko shreshtha banaane ki yukti kya hai?

uttar:- is janma ka koi bhi karma baap se chhipaao nahin, shreemat ke anusaar karma karo to har karma shreshtha hoga। saara madaar karmon ke oopar hai। agar koi paap karma karke chhipa lete to uska 100 guna danda padta, paap vriddhi ko paate rehte, baap se yog toot jaata। phir aise chhipaane vaalon ki satyaanaash ho jaati, isliye sachche baap ke saath sachche raho।

om shanti। meethe-meethe sikeeldhe bachche yeh to samajhte hain is puraani duniya mein ab thode din ke ham musaaphir hain। duniya ke manushya to samajhte hain 40 hazaar varsha yahaan aur rahne ka hai। tum bachchon ko to nishchay hai na। yeh baaten bhoolo nahin। yahaan baithe ho to tum bachchon ko andar mein bahut gadgad hona chaahiye। in aankhon se jo kuchh dekhte ho yeh to vinaash hone ka hai। aatma to avinaashi hai। yeh bhi buddhi mein hai ham aatma ne poore 84 janma liye hain, ab baap aaya hai le jaane ke liye। puraani duniya jab poori hoti hai tab baap aate hain nai duniya banaane। nai duniya se puraani, phir puraani duniya se nai duniya, is chakra ka tumhaari buddhi mein gyaan hai। anek baar hamne yeh chakra lagaaya hai। abhi yeh chakra poora hota hai। phir nai duniya mein ham thode se devtaayen hi rahenge। manushya nahin honge। abhi ham manushya se devta ban rahe hain। yeh to pakka nishchay hai na। baaki karmon par hi saara madaar hai। manushya ulta karma karte hain to woh andar khaata zaroor hai isliye baap poochhte hain is janma mein aise koi paap to nahin kiye hain? yeh hai hi chhi-chhi raavan raajya। yeh bhi tum samajhte ho। duniya nahin jaanti ki raavan kis cheez ka naam hai। baapooji kehte the raamraajya chaahiye parantu arth nahin samajhte the। ab behad ka baap samjhaate hain raamraajya kis prakaar ka hota hai। yeh to dhundhakaari duniya hai। abhi behad ka baap bachchon ko varsa de rahe hain। abhi tum bhakti nahin karte ho। abhi baap ka haath mila hai। baap ke sahaare bigar tum vishay vaitarni nadi mein gote khaate rehte the, aadhaakalpa hai hi bhakti। gyaan milne se tum nai duniya satayug mein chale jaate ho। abhi tum bachchon ko yeh nishchay hai - ham baba ko yaad karte-karte pavitra ban jaayenge, phir pavitra raajya mein aayenge। yeh gyaan bhi abhi purushottam sangamayug par tumko milta hai। yeh hai purushottam sangamayug। jabki tum chhi-chhi se gul-gul, kaanton se phool ban rahe ho। kaun banaate hain? baap। baap ko jaana hai। ham aatmaon ka woh behad ka baap hai। laukik baap ko behad ka baap nahin kahenge। paarlaukik baap aatmaon ke hisaab se sabka baap hai। phir brahma ka bhi occupation chaahiye na। tum bachche sabka occupation jaan chuke ho। vishnu ke bhi occupation ko jaante ho। kitna saja hua hai। svarga ka maalik hai na। yeh to sangam ka hi kahenge। mool vatan, sookshm vatan, sthoolavtan, woh bhi sangam mein aate hain na। baap samjhaate hain puraani duniya aur nai duniya ka yeh sangam hai। pukaarte bhi hain - he patit-paavan aao। paavan duniya hai nai duniya aur patit duniya hai puraani duniya। yeh bhi jaante ho behad ke baap ka bhi part hai। creator, director hai na। sab maante hain to zaroor unki koi to activity hogi na! unko aadmi nahin kaha jaata hai, unko to shareer nahin hai। baaki sabko ya to manushya ya devta kahenge। shivbaaba ko to na devta, na manushya kah sakte, kyonki unko shareer hi nahin hai। yeh to tempareri liya hai। khud kehte hain meethe-meethe bachchon ko main shareer bigar raajayog kaise sikhlaaoon! mujhe manushyon ne thikkar-bhittar mein kah diya hai, parantu abhi to tum bachche samajhte ho main kaise aata hoon! abhi tum raajayog seekh rahe ho। koi manushya to sikhla na sake। devtaaon ne satayugi raajaai kaise li? zaroor purushottam sangamayug par raajayog seekhe honge। to yeh simran kar abhi tum bachchon ko athaah khushi honi chaahiye। hamne ab 84 ka chakra poora kiya hai। baap kalpa-kalpa aate hain। baap khud kehte hain yeh bahut janmon ke ant ka janma hai। shreekrishna jo prince tha satayug ka, vahi phir 84 ka chakra lagaate hain। tum shiv ke to 84 janma bataayenge nahin। tumhaare mein bhi nambarvaar purushaartha anusaar jaante hain। maaya bahut kadi hai, kisko bhi chhodti nahin। yeh baap achhi reeti jaante hain। aise mat samjho baap koi antaryaami hai। nahin, sabki activity se jaante hain। samaachaar aate hain - maaya ekdam kachcha pet mein daal deti hai। aisi bahut baaten tum bachchon ko maaloom nahin padti, baap ko to sab maaloom padta hai। manushya phir samajhte hain baba antaryaami hai। baap kehte hain main antaryaami nahin hoon। harek ki chalan se sab maaloom padta hai। bahut chhi-chhi chalan chalte hain। baap bachchon ko khabardaar karte hain। maaya se sambhaalna hai। maaya aisi hai kisi na kisi roop mein ekdam hap kar leti hai। phir bhal baap samjhaate hain to bhi buddhi mein nahin baithta isliye bachchon ko bahut khabardaar rehna hai। kaam mahaashatru hai। maaloom bhi na pade ki ham vikaar mein gaye hain, aise bhi hota hai isliye baap kehte hain kuchh bhi bhool aadi hoti hai to saaph bataao, chhipaao mat। nahin to sau guna paap ho jaayega, jo andar mein khaata rahega। ekdam gir padenge। sachche baap ke saath bilkul sachcha hona chaahiye, nahin to bahut-bahut ghaata hai। maaya is samay to bahut kadi hai। yeh raavan ki duniya hai। ham is puraani duniya ko yaad hi kyon karen! ham to nai duniya ko yaad karen, jahaan ab ja rahe hain। baap naya makaan banaate hain to bachche samajhte hain na hamaare liye makaan ban raha hai। khushi rehti hai। yeh hai behad ki baat। hamaare liye nai duniya svarga ban rahi hai। svarga mein zaroor makaan bhi honge rahne liye। ab ham nai duniya mein jaane vaale hain। jitna baap ko yaad karenge utna gul-gul phool banenge। ham vikaaron ke vash kaante ban gaye the। baap jaante hain maaya aadha ko to ekdam kha jaati hai। tum bhi samajhte ho jo nahin aate hain woh to maaya ke vash ho gaye na! baap ke paas to aate nahin। aise maaya bahuton ko hap kar leti hai। bahut achhe-achhe kahkar jaate hain - ham aise karenge, yeh karenge, ham to yagya ke liye praan dene taiyaar hain। aaj woh hain nahin। tumhaari ladaai hai hi maaya ke saath। duniya mein yeh koi nahin jaante - maaya ke saath ladaai kaise hoti hai। abhi tum bachchon ko baap ne gyaan ka teesra netra diya hai, jisse tum andhiyaare se sojhre mein aa gaye ho। aatma ko hi yeh gyaan netra dete hain tab baap kehte hain apne ko tum aatma samjho। behad ke baap ko yaad karo। bhakti mein tum yaad karte the na। kehte bhi the aap aayenge to balihaar jaayenge। kaise balihaar jaayenge! yeh thode hi jaante the। abhi tum samajhte ho ham jaise aatma hain vaise baap bhi hai। baap ka hai alaukik janma। tum bachchon ko kaise achhi reeti padhaate hain! khud kehte ho yeh to vahi baap hai jo kalpa-kalpa hamaara baap bante hain। ham bhi baba-baba kehte hain, baap bhi bachche-bachche kehte hain। vahi teacher ke roop mein raajayog sikhlaate hain। aur to koi raajayog sikhla na sake। vishwa ka tumko maalik banaate hain to aise baap ka bankar phir usi teacher ki shiksha bhi leni chaahiye na। khushi mein gadgad hona chaahiye। agar chhi-chhi bana to phir woh khushi aayegi nahin। bhal kitna bhi maatha maare phir jaise woh hamaara jaati bhaai nahin। yahaan manushyon ke kitne surname hote hain। tumhaara surname dekho kitna bada hai! yeh hai bade te bada great-great grand father brahma। unko koi jaante hi nahin। shivbaaba ko to sarvavyaapi kah diya hai। brahma ka bhi kisko pata nahin padta। chitra bhi hain brahma-vishnu-shankar ke। brahma ko sookshm vatan mein le gaye hain। biography kuchh nahin jaante। sookshm vatan mein brahma ko dikhaate hain phir prajaapita brahma kahaan se aayega! vahaan bachche adopt karenge kya! kisko bhi pata nahin hai। prajaapita brahma kehte hain parantu biography nahin jaante। baba ne samjhaaya hai yeh hamaara rath hai। bahut janmon ke ant mein hamne yeh aadhaar liya hai। yeh purushottam sangamayug geeta ka episode hai। pavitrata bhi mukhya hai। patit se paavan banna kaise hai, yeh duniya mein kisko bhi pata nahin hai। saadhu-santa aadi kabhi aise nahin kahenge ki deh sahit sabko bhoolo। ek baap ko yaad karo to maaya ke paap karma sab bhasma ho jaayenge। koi guru aise kabhi nahin kahenge।

baap samjhaate hain - yeh brahma kaise banta hai? chhotepan mein gaanvade ka chhora tha। chauraasi janma liye hain, first se lekar last tak। to nai duniya so phir puraani ho jaati hai। abhi tum bachchon ki buddhi ka taala khula hai। tum samajh sakte ho, dhaarna kar sakte ho। abhi tum buddhimaan bane ho। aage buddhiheen the। yeh lakshmi-naaraayan buddhivaan hain aur yahaan buddhiheen hain। saamne dekho yeh paradise ke maalik hain na। shreekrishna svarga ka maalik tha phir gaanvade ka chhora bana hai। tum bachchon ko yeh dhaaran kar phir pavitra bhi zaroor banna hai। mukhya hai hi pavitrata ki baat। likhte bhi hain - baba, maaya ne hamko gira diya। aankhen criminal ban gai। baap kehte hain apne ko aatma samjho। bas ab to ghar jaana hai। baap ko yaad karna hai। thode time ke liye, shareer nirvaah ke liye karma kar phir ham chale jaate hain। is puraani duniya ke vinaash ke liye ladaai bhi lagti hai। yeh bhi tum dekhna - kaise lagti hai? buddhi se samajhte hain ham devta bante hain to hamko nai duniya bhi chaahiye isliye vinaash zaroor hoga। ham apni nai duniya sthaapan kar rahe hain shreemat par।

baap kehte hain - main tumhaari seva mein upasthit hota hoon। tumne dimaanda ki hai ki ham patiton ko aakar paavan banaao to tumhaare kahne se main aaya hoon, tumko raasta bataata hoon bahut sahaj। manamnaabhav। bhagvaanuvaach hai na sirf shreekrishna ka naam de diya hai। baap ke next hai shreekrishna। yeh paramdham ka maalik, woh vishwa ka maalik। sookshm vatan mein to kuchh hota hi nahin hai। sabhi se number one hai shreekrishna, jisko bahut pyaar karte hain। baaki to peechhe-peechhe aaye hain। svarga mein to sabhi ja na saken। to meethe-meethe bachchon ko haddi khushi rahni chaahiye। artificial khushi nahin chal sakti। baahar se kisma-kisma ke bachche baba ke paas aate the, kab pavitra nahin rehte। baba samjhaate the vikaar mein jaate ho to phir aate hi kyon ho, kehte the - kya karen, rah nahin sakte। roj aata hoon, na jaane kab koi aisa teer lag jaae। aap bigar sadgati kaun karenge। aakar baith jaate the। maaya badi prabal hai। nishchay bhi hota hai - baba hamko patit se paavan gul-gul banaate hain। parantu kya karen, phir bhi sach to bolta tha - ab zaroor woh sudhar gaya hoga। unko yeh nishchay tha - in dvaara hi ham sudhrenge।

is samay kitne actors hain। ek ke features na milen doosre se। phir kalpa baad us hi features se part repeat karenge। aatmaaen to sab fix hain na। sabhi actors bilkul accurate part bajaate rehte hain। kuchh bhi farka ho nahin sakta। sabhi aatmaayen avinaashi hain। unmein part bhi avinaashi noondha hua hai। kitni samjhaane ki baate hain। kitna samjhaate hain phir bhi bhool jaate hain। samjha nahin sakte hain। yeh bhi drama mein hona hai। har kalpa raajaai to sthaapan hoti hi hai। satayug mein aate hi thode hain - so bhi nambarvaar। yahaan bhi nambarvaar hain na। ek ka part ek hi jaane, doosra koi jaan nahin sakta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachche baap ke saath sada sachcha rehna hai। baap par poora-poora balihaar jaana hai।

2) gyaan ko dhaaran kar buddhivaan banna hai। andar se haddi (zigri) khushi mein rehna hai। koi bhi shreemat ke virooddha kaam karke khushi gum nahin karni hai।

vardaan:- drama ki point ke anubhav dvaara sada saaksheepan ki stage par rahne vaale achal adol bhav

drama ki point ke jo anubhvi hain ve sada saaksheepan ki stage par sthit rah ekras, achal-adol sthiti ka anubhav karte hain। drama ke point ki anubhvi aatma kabhi bhi bure mein buraai ko na dekh achchhaai hi dekhegi arthaat sva-kalyaan ka raasta dikhaai dega। akalyaan ka khaata khatma hua। kalyaankaari baap ke bachche hain, kalyaankaari yug hai - is knowledge aur anubhav ki authority se achal-adol bano।

slogan:- jo samay ko amoolya samajhkar saphal karte hain, woh samay par dhokha nahin khaate।

avyakt ishaare - is avyakti maas mein bandhanmukta rah jeevanmukta sthiti ka anubhav karo

gyaan-khajaane dvaara is samay hi mukti-jeevanmukti ka anubhav karna hai। jo bhi duhkh aur ashaanti ke kaaran hain, vikaar hain unse mukta hona hai। agar koi vikaar aate bhi hain to vijayi ban jaana hai, haar nahin khaani hai। anek vyartha sankalp aur vikalpa, vikarmon se mukta banna - yahi jeevanmukta avastha hai।