Daily Murli for Friday 23 January 2026

23-01-2026 praatahmurli om shanti "baapdaada"' madhuban

“meethe bachche - tumhaare mukh se sadaiv gyaan ratna nikalne chaahiye, tumhaara mukhda sadaiv harshit rehna chaahiye''

prashn:- jin bachchon ne brahman jeevan mein gyaan ki dhaarna ki hai unki nishaani kya hogi?

uttar:- 1- unki chalan devtaaon misal hogi, unmein daiveegunon ki dhaarna hogi। 2- unhein gyaan ka vichaar saagar manthan karne ka abhyaas hoga। ve kabhi aasuri baaton ka arthaat kichde ka manthan nahin karenge। 3- unke jeevan se gaali dena aur glaani karna banda ho jaata hai। 4- unka mukhda sada harshit rehta hai।

om shanti। baap baith samjhaate hain gyaan aur bhakti ke oopar। yeh to bachche samajh gaye hain bhakti se sadgati nahin hoti hai aur satayug mein bhakti hoti nahin। gyaan bhi satayug mein milta nahin। shreekrishna na bhakti karte hain, na gyaan ki murli bajaate hain। murli maana hi gyaan dena। gaayan bhi hai na murli mein jaadu। to zaroor koi jaadu hoga na! sirf murli bajaana, woh to common phakeer log bhi bajaate rehte hain। is murli mein gyaan ka jaadu hai। agyaan ko jaadu to nahin kahenge। murli ko jaadu kehte hain। manushya se devta bante hain gyaan se। jab satayug hai to is gyaan ka varsa hai। vahaan bhakti hoti nahin। bhakti hoti hai dvaapar se, jabki devta se manushya ban jaate hain। manushyon ko vikaari, devtaaon ko nirvikaari kaha jaata hai। devtaaon ki srishti ko pavitra duniya kaha jaata hai। abhi tum devta ban rahe ho। gyaan kisko kaha jaata hai? ek to svayan ki va baap ki pahchaan aur phir srishti ke aadi-madhya-ant ki knowledge ko gyaan kaha jaata hai। gyaan se hoti hai sadgati। phir bhakti shuru hoti hai to utarti kala kaha jaata hai kyonki bhakti ko raat, gyaan ko din kaha jaata hai। yeh to koi ki bhi buddhi mein baith sakta hai parantu daiveegun dhaaran nahin karte hain। daiveegun hon to samjha jaae gyaan ki dhaarna hai। gyaan ki dhaarna vaalon ki chalan devta misal hoti hai। kam dhaarna vaale ki chalan mix rehti hai। dhaarna nahin to goya woh bachche hi nahin। manushya baap ki kitni glaani karte hain। brahman kul mein aate hain to gaali dena, glaani karna banda ho jaata hai। tumko gyaan milta hai, us par apna vichaar saagar manthan karne se amrit milega। vichaar saagar manthan hi nahin karte to baaki kya manthan hoga? aasuri vichaar। unse kichda hi niklega। abhi tum eeshvareey student ho। jaante ho manushya se devta banne ki padhaai padh rahe hain। devtaaen yeh padhaai nahin padhaayenge। devtaaon ko kabhi gyaan ka saagar nahin kaha jaata hai। gyaan ka saagar to ek ko hi kaha jaata hai। daiveegun bhi gyaan se dhaaran hote hain। yeh gyaan jo tum bachchon ko abhi milta hai, yeh satayug mein nahin hota। in devtaaon mein daiveegun hain। tum mahima bhi karte ho sarvagun sampanna… to abhi tumko aisa banna hai। apne se poochhna chaahiye hamaare mein sab daiveegun hain ya koi aasuri avgun hain? agar aasuri avgun hain to unko nikaal dena chaahiye tab hi devta kahenge। nahin to kam darja pa lenge।

abhi tum bachche daiveegun dhaaran karte ho। bahut achhi-achhi baaten sunaate ho। inko hi kaha jaata hai purushottam sangamayug jabki tum purushottam ban rahe ho, to vaataavran bhi bahut achha hona chaahiye। mukh se koi bhi chhi-chhi baat na nikle, nahin to kaha jaayega yeh kam darje ka hai। bolchaal aur vaataavran se jhat pata pad jaata hai। tumhaara mukhda sadaiv harshit hona chaahiye। nahin to unmein gyaan nahin kaha jaayega। mukh se sadaiv ratna niklen। yeh lakshmi-naaraayan dekho kitne harshitmukh hain। inhon ki aatma ne gyaan ratna dhaaran kiye the। mukh se sadaiv gyaan ratna nikalte hain। ratna hi sunte-sunaate kitni khushi rehti hai। gyaan ratna jo abhi tum lete ho, phir ye sabhi heere-javaahraat ban jaate hain। 9 ratnon ki maala koi heeron-javaahraaton ki nahin hai। in gyaan ratnon ki maala hai। manushya log phir woh ratna samajh angoothiyaan aadi pahan lete hain। in gyaan ratnon ki maala purushottam sangamayug par padti hai। yeh ratna hi tumko bhavishya 21 janmon ke liye maalaamaal banaate hain। inko koi loot na sake। yahaan tum yeh heere javaahraat pahnon to jhat koi loot le jaae। to apne ko bahut-bahut samajhdaar banaana hai। aasuri avgunon ko nikaalna hai। aasuri avgunon se shakla hi aisi ho jaati hai। krodh mein laal-laal taambe jaisi shakla ho jaati hai। kaam vikaar vaale to kaale ban jaate hain। to bachchon ko har baat mein vichaar saagar manthan karna chaahiye। yeh padhaai hai hi bahut dhan paane ki। woh padhaai koi ratna thode hi hai। haan, knowledge padhkar bada position pa lete hain। to padhaai kaam aai, na ki paisa। padhaai hi dhan hai। woh hai had ka dhan, phir yeh hai behad ka dhan। hain donon padhaai। abhi tum samajhte ho baap hamko padhaakar vishwa ka maalik bana dete hain। woh alpakaal kshan bhangur ki padhaai hai ek janma ke liye। phir doosre janma mein naye sir padhna pade। vahaan dhan ke liye padhaai ki darkaar nahin। vahaan to abhi ke purushaartha se akeechaar (athaah) dhan mil jaata hai। dhan avinaashi ban jaata hai। devtaaon ke paas dhan bahut tha phir jab bhakti maarga arthaat raavanraajya mein aaye to kitna tha, kitne mandir banaaye hue hain। phir aakar musalmaanon aadi ne dhan loota। kitne dhanvaan the! aaj ki padhaai se itna dhanvaan koi ban nahin sakenge। tum abhi jaante ho ham itni oonchi padhaai padhte hain jisse yeh (devi-devta) bante hain। to padhaai se dekho manushya kya ban jaate hain! gareeb se saahookaar। abhi bhaarat bhi kitna gareeb hai। saahookaaron ko to phursat hi nahin hai। apna ahankaar rehta hai - main phalaana hoon। ismen ahankaar aadi mit jaana chaahiye। ham aatma hain, aatma ke paas to dhan-daulat, heere-javaahraat aadi kuchh bhi nahin hain। baap bhi kehte hain deh sahit sab sambandh chhodo। aatma shareer chhodti hai to saahookaari aadi sab khatma ho jaati hai। jab nayesir padhkar phir dhan kamaave ya to daan-punya achha kiya ho to saahookaar ke ghar janma lenge। kehte hain na past ke karmon ka phal hai। knowledge ka daan kiya hoga va college, dharmashaala aadi banaai hai to uska phal milta hai parantu alpakaal ke liye। yeh daan-punya bhi yahaan kiya jaata hai। satayug mein nahin kiya jaata hai। satayug mein achhe hi karma hote hain kyonki abhi ka varsa mila hua hai। vahaan koi ka bhi vikarma hota nahin kyonki raavan hi nahin hai। gareebon ka bhi vikarma nahin banega। yahaan to saahookaaron ke bhi vikarma bante hain tab to yeh beemaariyaan aadi duhkh hote hain। vahaan vikaar mein jaate hi nahin to vikarma kaise banenge? saara madaar hai karmon par। yeh maaya raavan ka raajya hai, jo manushya vikaari ban jaate hain। baap aakar padhaate hain nirvikaari banaane liye। baap nirvikaari banaate hain, maaya phir vikaari bana deti hai। raamvanshi aur raavanvanshi ki yuddha chalti hai। tum baap ke bachche ho, woh raavan ke bachche hain। kitne achhe-achhe bachche maaya se haar kha lete hain। maaya badi prabal hai। phir bhi ummeend rakhte hain। adham se adham (bilkul patit) ka bhi uddhaar karna hota hai na। baap ko to saare vishwa ka uddhaar karna hota hai। bahut girte hain। ekdam chat khaate mein adham se adham ban jaate hain। aise ka bhi baap uddhaar karte hain। adham to sab hain raavan raajya mein, parantu baap bachaate hain। phir bhi girte rehte hain, to bahut adham ban jaate hain। unka phir itna chadhna nahin hota hai। woh adhmapna andar khaata rehta hai। jaise tum kehte ho antakaal jo.. unki buddhi mein woh adhmapna hi aata rahega। to baap baith bachchon ko samjhaate hain, kalpa-kalpa tum hi devta bante ho। jaanvar banenge kya? manushya hi bante hain aur samajhte hain। in lakshmi-naaraayan ko bhi naak kaan aadi hain, manushya hain na! parantu daivi gunon vaale hain isliye inko devta kaha jaata hai। yeh aisa sundar devta kaise bante hain, phir kaise girte hain, is chakra ka tumko maaloom pad gaya hai। jo vichaar saagar manthan karte honge unko dhaarna bhi achhi hogi। vichaar saagar manthan hi nahin karte to buddhu ban padte, murli chalaane vaale ka vichaar saagar manthan chalta rahega। is topic par yeh-yeh samjhaana hai। automatically vichaar saagar manthan chalta hai। phalaane aane vaale hain unhon ko bhi hullaas se samjhaayenge। ho sakta hai kuchh samajh jaae। bhaagya par hai। koi jhat nishchay karenge, koi nahin karenge। ummeed rakhi jaati hai। abhi nahin to aage chalkar samjhenge zaroor। ummeed rakhni chaahiye na! ummeed rakhna maana service ka shauk hai। thakna nahin hai। bhal koi padhkar phir adham bana hai, aata hai to zaroor unko vijiting room mein bithaayenge। va kahenge chale jaao? zaroor poochhenge itne din kyon nahin aaye? kahenge maaya se haar kha li। aise dher aate hain। samajhte hain gyaan bahut achha tha parantu maaya ne hara diya। smriti to rehti hai na। bhakti mein to haarne aur jeetne ki baat hi nahin rehti। yeh knowledge dhaaran karne ki hai। abhi tum baap dvaara sachchi geeta sunte ho jisse devta ban jaate। bigar brahman bane devta ban nahin sakte। Christian, paarsi, musalmaanon mein brahman hote hi nahin। yeh sab baaten abhi tum samajhte ho।

tum jaante ho alpha ko yaad karna hai। alpha ko yaad karne se hi baadshaahi milti hai। jab bhi tumko koi mile bolo, alpha allaah ko yaad karo। alpha ko hi oonch kaha jaata hai। anguli se alpha ka ishaara karte hain na! alpha ko ek bhi kaha jaata hai। ek hi bhagwan hai। baaki to sab hain bachche। baap to sadaiv alpha hi rehte hain। baadshaahi karte nahin। gyaan bhi dete hain, apna bachcha bhi banaate hain to bachchon ko kitni khushi mein rehna chaahiye। baba hamaari kitni seva karte hain। hamko vishwa ka maalik banaate hain। phir khud us nai pavitra duniya mein aate hi nahin। paavan duniya mein unko koi bulaate hi nahin। patit hi bulaate hain। paavan duniya mein kya aakar karenge। unka naam hi hai patit-paavan, to puraani duniya ko naya banaane ki unki duty hai। baap ka naam hai shiv, aur saaligraam bachchon ko kaha jaata hai। unki pooja hoti hai। shivbaaba kah sab yaad karte hain। doosra brahma ko bhi baba kehte hain। prajaapita brahma kehte to bahut hain parantu unko yathaartha reeti jaante nahin hain। brahma kiska bachcha hai? tum kahenge parampita paramatma shiv ne unko adopt kiya hai। yeh to shareerdhaari hai na! eeshvar ki aulaad sab aatmaayen hain। sab aatmaon ko apna-apna shareer hai। apna-apna part mila hai, jo bajaana hi hai। yeh parampara se chala aata hai। anaadi arthaat unka aadi-madhya-ant nahin। manushya sunte hain, and hoti hai, to phir moonjhate hain ki phir banenge kaise? baap samjhaate hain yeh anaadi hai। kab bane hain, yeh poochhne ka nahin rehta। pralay hoti hi nahin। yeh bhi gapoda laga diya hai। thode manushya ho jaate hain isliye kaha jaata hai jaise pralay ho gai। baba mein jo gyaan hai woh abhi hi emerge hota hai। inke liye hi kehte hain - saara saagar syaahi (mas) banaao..... to bhi poora nahin hoga। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne harshitmukh mukhde se baap ka naam baala karna hai। gyaan ratna hi sunne aur sunaane hain। gale mein gyaan ratnon ki maala padi rahe। aasuri avgunon ko nikaal dena hai।

2) service mein kabhi thakna nahin hai। ummeed rakh shauk se service karni hai। vichaar saagar manthan kar ullaas mein rehna hai।

vardaan:- kanaphyooz hone ke bajaae loose connection ko theek karne vaale samasya mukta bhav

sabhi samasyaaon ka mool kaaran connection loose hona hai। sirf connection ko theek kar do to sarva shaktiyaan aapke aage ghoomengi। yadi connection jodne mein ek do minute lag bhi jaate hain to himmat haarkar confuse na ho jaao। nishchay ke foundation ko hilaao nahin। main baba ka, baba mera - is aadhaar se foundation ko pakka karo to samasya mukta ban jaayenge।

slogan:- beejroop avastha mein sthit rehna - yahi puraane sanskaaron ko parivartan karne ki vidhi hai।

avyakt ishaare - is avyakti maas mein bandhanmukta rah jeevanmukta sthiti ka anubhav karo

jab seva mein va apne puraane sanskaaron ko parivartan karne mein saphalta nahin milti hai to koi na koi vighna ke vash ho jaate ho। phir unse mukta hone ki ichchha rakhte ho, lekin bina shakti ke yeh ichchha poorn nahin ho sakti isliye anlakaari roop bano। shaktiroop dhaaran karo to bandhanmukta ban jaayenge।