Daily Murli for Tuesday 10 February 2026

10-02-2026 praatahmurli om shanti "baapdaada"' madhuban

“meethe bachche - khuda tumhaara dosta hai, raavan dushman hai, isliye tum khuda ko pyaar karte aur raavan ko jalaate ho''

prashn:- kin bachchon ko anekon ki aasheervaad svatah milti jaati hai?

uttar:- jo bachche yaad mein rah svayan bhi pavitra bante aur doosron ko bhi aap samaan banaate hain। unhein anekon ki aasheervaad mil jaati hai, ve bahut oonch pad paate hain। baap tum bachchon ko shreshtha banne ki ek hi shreemat dete hain - bachche kisi bhi dehdhaari ko yaad na kar mujhe yaad karo।

geet:- aakhir woh din aaya aaj…

om shanti। om shanti ka arth to roohaani baap ne roohaani bachchon ko samjhaaya hai। om maana main aatma hoon aur yeh mera shareer hai। aatma to dekhne mein nahin aati hai। aatma mein hi achhe va bure sanskaar rehte hain। aatma mein hi man-buddhi hai। shareer mein buddhi nahin hai। mukhya hai aatma। shareer to mera hai। aatma ko koi dekh nahin sakte। shareer ko aatma dekhti hai। aatma ko shareer nahin dekh sakta। aatma nikal jaati hai to shareer jad ban jaata hai। aatma dekhi nahin ja sakti। shareer dekha jaata hai। vaise hi aatma ka jo baap hai, jisko O god father kehte hain woh bhi dekhne mein nahin aate hain, unko samjha jaata hai, jaana jaata hai। ham aatmaayen sab brothers hain। shareer mein aate hain to kahenge yeh bhaai-bhaai hain, yeh behen-bhaai hain। aatmaayen to sab bhaai-bhaai hi hain। aatmaon ka baap hai - parampita paramatma। jismaani bhaai-behen ek-do ko dekh sakte hain। aatmaon ka baap ek hai, unko dekh nahin sakte। to ab baap aaye hain, puraani duniya ko naya banaane। nai duniya satayug thi। ab puraani duniya kaliyug hai, inko ab badalna hai। puraani duniya to khatma honi chaahiye na। puraana ghar khatma ho, naya ghar banta hai na, vaise yeh puraani duniya bhi khalaas honi hai। satayug ke baad phir treta, dvaapar, kaliyug phir satayug aana zaroor hai। world ki history-geography repeat honi hai। satayug mein hota hai devi-devtaaon ka raajya। soorya-vanshi aur chandravanshi, unko kaha jaata hai lakshmi-naaraayan ki dynasty, raam-seeta ki dynasty। yeh to sahaj hai na। phir dvaapar-kaliyug mein aur dharma aate hain। phir devtaayen jo pavitra the woh apvitra ban jaate, inko kaha jaata hai raavan raajya। raavan ko varsha-varsha jalaate aate hain parantu jalta hi nahin phir-phir jalaate rehte hain। yeh hai sabka bada dushman isliye unko jalaane ki rasam pad gai hai। bhaarat ka number one dushman kaun hai? aur phir number one dosta, sada sukh dene vaala hai khuda। khuda ko dosta kehte hain na। is par ek kahaani bhi hai। to khuda hai dosta, raavan hai dushman। khuda jo dosta hai, unko kabhi jalaayenge nahin। woh hai dushman isliye 10 sheesh vaala raavan banaae unko varsha-varsha jalaate hain। gaandhi ji bhi kehte the hamko raamraajya chaahiye। raamraajya mein sukh hai, raavanraajya mein duhkh hai। ab yeh kaun baith samjhaate hain? patit-paavan baap। shivbaaba, brahma hai daada। baba hamesha sahi bhi karte hain baapdaada। prajaapita brahma bhi to sabka ho gaya। jisko Adam bhi kaha jaata hai। unko great-great grand father kaha jaata hai। manushya srishti mein prajaapita hua। prajaapita brahma dvaara brahman rache jaate hain phir brahman so devta bante hain। devtaayen phir kshatriy, vaishya, shoodra ban jaate hain। inko kaha jaata hai prajaapita brahma, manushya srishti ka bada। prajaapita brahma ke kitne dher bachche hain। baba-baba kehte rehte hain। yeh hai saakaar baba। shivbaaba hai niraakaar baba। gaaya bhi jaata hai prajaapita brahma dvaara nai manushya srishti rachte hain। ab tumhaari yeh puraani khaal hai। yeh hai hi patit duniya, raavan raajya। ab raavan ki aasuri duniya khatma ho jaayegi। uske liye hi yeh maha-bhaarat ladaai hai। phir satayug mein is raavan dushman ko koi jalaayenge hi nahin। raavan hoga hi nahin। raavan ne hi duhkh ki duniya banaai hai। aise nahin jinke paas paise bahut hain, bade-bade mahal hain, woh svarga mein hain।

baap samjhaate hain, bhal kiske paas karod hain, parantu yeh to sab mitti mein mil jaane vaale hain। nai duniya mein phir nai khaaniyaan nikalti hain, jisse nai duniya ke mahal aadi saare banaaye jaate hain। yeh puraani duniya ab khatma honi hai। manushya bhakti karte hi hain sadgati ke liye, hamko paavan banaao, ham vicious ban gaye hain। vicious ko patit kaha jaata hai। satayug mein hai hi viceless, sampoorn nirvikaari hain। vahaan bachche yogbal se paida hote hain, vikaar vahaan hota hi nahin। na deh-abhimaan, na kaam, krodh...... 5 vikaar hote nahin isliye vahaan kabhi raavan ko jalaate hi nahin। yahaan to raavanraajya hai। ab baap kehte hain tum pavitra bano। yeh patit duniya khatma honi hai jo shreemat par pavitra rehte hain vahi baap ki mat par chal vishwa ki baadshaahi ka varsa paate hain। in lakshmi-naaraayan ka raajya tha na। abhi to raavan raajya hai jo khatma hona hai। satayugi raamraajya sthaapan hona hai। satayug mein bahut thode manushya rehte hain। capital dehli hi rehti hai। jahaan lakshmi-naaraayan ka raajya hota hai। dehli satayug mein paristaan thi। dehli hi gaddi thi। raavan raajya mein bhi dehli capital hai, raamraajya mein bhi dehli capital rehti hai। parantu raamraajya mein to heeron javaahraaton ke mahal the। athaah sukh tha। abhi baap kehte hain tumne vishwa ka raajya ganvaaya hai, main phir tumko deta hoon। tum meri mat par chalo। shreshtha banna hai to sirf mujhe yaad karo aur kisi dehdhaari ko yaad na karo। apne ko aatma samajh mujh baap ko yaad karo to tamopradhaan se satopradhaan ban jaayenge। tum mere paas chale aayenge। mere gale ki maala bankar phir vishnu ki maala ban jaayenge। maala mein oopar mein main hoon phir do hain brahma-sarasvati। vahi satayug ke mahaaraaja-mahaaraani bante hain। unhon ki phir saari maala hai jo nambarvaar gaddi par baithte hain। main is bhaarat ko in brahma sarasvati aur braahmanon dvaara svarga banaata hoon। jo mehnat karte hain unhon ke hi phir yaadgaar bante hain। woh hai roodra maala aur woh vishnu ki maala। roodra maala hai - aatmaon ki aur vishnu ki maala hai manushyon ki। aatmaon ke rahne ka sthaan woh niraakaari paramdham hai, jisko brahmaanda bhi kehte hain। aatma koi ande misal nahin hai, aatma to bindi misal hai। ham sab aatmaayen vahaan sweet hom mein rahne vaali hain। baap ke saath ham aatmaayen rehti hain। woh hai muktidhaam। manushya sab chaahte hain muktidhaam mein jaayen parantu vaapis koi ek bhi ja nahin sakte। sabko part mein aana hi hai, tab tak baap tumko taiyaar karaate rehte hain। tum taiyaar ho jaayenge to phir jo bhi aatmaayen hain, woh sab aa jaayengi। phir khalaas। tum jaakar nai duniya mein raajya karenge phir nambarvaar chakra chalega। geet mein suna na - aakhir woh din aaya aaj..... tum jaante ho jo bhaaratvaasi ab narkavaasi hain, woh phir svargavaasi banenge। baaki sab aatmaayen shantidham mein chali jaayengi। samjhaana bahut thoda hai। alpha baba, be baadshaahi। alpha ko baadshaahi mil jaati hai। abhi baap kehte hain - main vahi raajya phir se sthaapan karta hoon। tum 84 janma bhog ab patit ban gaye ho। patit banaaya hai raavan ne। phir paavan kaun banaate hain? bhagwan jisko patit-paavan kehte hain, tum kaise patit se paavan, paavan se patit bante ho, woh saari history geography repeat hogi। yeh vinaash hai hi iske liye। kehte hain brahma ki aayu shaastron mein 100 varsha hai। yeh jo brahma hai, jismen baap baith varsa dilaate hain, unka bhi shareer chhoot jaayega। aatmaon ko baith, aatmaon ka jo baap hai woh samjhaate hain। manushya, manushya ko paavan bana na saken। devtaayen kabhi vikaar se nahin paida hote hain। punarjanma to sab lete aate hain na। baap kitna achhi tarah se samjhaate hain ki kahaan takdeer jag jaae। baap aate hi hain manushya maatra ki takdeer jagaane। sab patit duhkhi hain na। traahi-traahi kar vinaash ho jaayenge isliye baap kehte hain traahi-traahi karne ke pahle mujh behad ke baap se varsa le lo। yeh jo kuchh duniya mein dekhte ho, yeh sab khatma ho jaana hai। fall oph bhaarat, rise oph bhaarat, iska hi khel hai। rise oph world। svarga mein kaun-kaun raajya karte hain, yeh baap hi baith samjhaate hain। rise oph bhaarat, devtaaon ka raajya, fall oph bhaarat raavan raajya। abhi nai duniya ban rahi hai। baap se padh rahe ho nai duniya ka varsa lene। kitna sahaj hai। yeh hai manushya se devta banne ki padhaai। yeh bhi achhi reeti samajhna hai। kaun-kaun se dharma kab aate hain, dvaapar ke baad hi aur-aur dharma aate hain। pahle sukh bhogte hain phir duhkh। yeh saara chakra buddhi mein bithaana hota hai। jisse tum chakravarti mahaaraaja-mahaaraani bante ho। sirf alpha aur be ko samajhna hai। ab vinaash to hona hi hai। hangaama itna ho jaayega jo vilaayat se phir aa bhi nahin sakenge isliye baap samjhaate hain - bhaarat bhoomi sabse uttam hai। jabardasta ladaai lagegi phir vahaan ke vahaan hi rah jaayenge। 50-60 laakh bhi denge to bhi mushkil aa sakenge। bhaarat bhoomi sabse uttam hai। jahaan baap aakar avtaar lete hain। shiv jayanti bhi yahaan manaai jaati hai। sirf shreekrishna ka naam daalne se saari mahima hi khatma ho gai hai। sarva manushya maatra ka liberator yahaan hi aakar avtaar lete hain। shiv jayanti bhi yahaan manaate hain। god father hi hain jo aakar liberate karte hain। to aise baap ko hi naman karna chaahiye, unki hi jayanti manaana chaahiye। woh baap yahaan bhaarat mein aakar sabko paavan banaate hain। to yeh sabse bada teertha thahra। sabko durgati se chhudaae sadgati dete hain, yeh drama bana hua hai। abhi tum aatmaayen jaanti ho, hamaara baba hamko is shareer dvaara yeh raaz samjha rahe hain, ham aatma is shareer dvaara sunti hain। aatma-abhimaani banna hai। apne ko aatma samajh baap ko yaad karo to kat nikalti jaayegi aur pure ban tum baap ke paas aa jaayenge। jitna yaad karenge utna pavitra banenge। auron ko bhi aapasmaan banaayenge to bahuton ki aasheervaad milegi। oonch pad pa lenge isliye gaaya jaata hai second mein jeevanmukti। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) shreemat par pavitra ban, har kadam baap ki mat par chal vishwa ki baadshaahi leni hai। baap ke samaan duhkh harta sukh karta banna hai।

2) manushya se devta banne ki yeh padhaai sada padhte rehna hai। sabko aap samaan banaane ki seva karke aasheervaad praapta karni hai।

vardaan:- kalyaan ki vritti aur shubhchintak bhaav dvaara vishwa kalyaan ke nimitta banne vaale teevra purushaarthi bhav

teevra purushaarthi woh hain jo sabhi ke prati kalyaan ki vritti aur shubhchintak bhaav rakhe। bhal koi baar-baar giraane ki koshish kare, man ko dagmag kare, vighna roop bane phir bhi aapka uske prati sada shubhchintak ka adol bhaav ho, baat ke kaaran bhaav na badle। har paristhiti mein vritti aur bhaav yathaartha ho to aapke oopar uska prabhaav nahin padega। phir koi bhi vyartha baaten dekhne mein hi nahin aayengi, time bach jaayega। yahi hai vishwa kalyaankaari stage।

slogan:- santushtata jeevan ka shrringaar hai isliye santushtamni ban santushta raho aur sarva ko santushta karo।

ye avyakt ishaare - ekta aur vishvaas ki visheshta dvaara saphalta sampanna bano

ekmat arthaat ekta ka vaataavran banaane ke liye samaane ki shakti dhaaran karo। bhinnata ko samaao। har ek ki visheshtaaon ko dekho, kamiyon ko to bilkul dekhna hi nahin hai। jaise chandrama athva soorya ko grahan lagta hai to kehte hain ki dekhna nahin chaahiye, nahin to grahchaari baith jaayegi। to kiski kami bhi grahan hai, use kabhi nahin dekho।