Daily Murli for Thursday 19 February 2026

19-02-2026 praatahmurli om shanti "baapdaada"' madhuban

“meethe bachche - abhi bhaarat khaas aur aam saari duniya par brahspati ki dasha baithni hai, baba tum bachchon dvaara bhaarat ko sukhdhaam bana rahe hain''

prashn:- 16 kala sampoorn banne ke liye tum bachche kaun sa purushaartha karte ho?

uttar:- yogbal jama karne ka। yogbal se tum 16 kala sampoorn ban rahe ho। iske liye baap kehte hain de daan to chhoote grahan। kaam vikaar jo giraane vaala hai iska daan do to tum 16 kala sampoorn ban jaayenge। 2- deh-abhimaan ko chhod dehi-abhimaani bano, shareer ka bhaan chhod do।

geet:- tum maat pita…

om shanti। meethe-meethe roohaani bachchon ne apne roohaani baap ki mahima suni। woh gaate rehte hain yahaan tum practical mein us baba ka varsa le rahe ho। tum jaante ho - baba hamaare dvaara hi bhaarat ko sukhdhaam bana rahe hain। jiske dvaara bana rahe hain zaroor vahi sukhdhaam ka maalik banenge। bachchon ko to bahut khushi rahni chaahiye। baba ki mahima aparmaapaar hai। unse ham varsa pa rahe hain। abhi tum bachchon par balki saari duniya par ab brahaspati ki avinaashi dasha hai। abhi tum brahman hi jaante ho bhaarat khaas aur duniya aam sab par ab brahaspati ki dasha baithni hai kyonki tum ab 16 kala sampoorn bante ho। is samay to koi kala nahin hai। bachchon ko bahut khushi rahni chaahiye। aise nahin yahaan khushi hai, baahar jaane se gum ho jaae। jiski mahima gaate hain woh ab tumhaare paas haazir hai। baap samjhaate hain - 5 hazaar varsha pahle bhi tumko raajaai dekar gaya tha। ab tum dekhenge - aahiste-aahiste sab pukaarte rahenge। tumhaare bhi slogan nikalte rahenge। jaise indira gaandhi kehti thi ki ek dharma, ek bhaasha, ek raajaai ho, usmein bhi aatma kehti hai na। aatma jaanti hai barobar bhaarat mein ek raajdhaani thi, jo abhi saamne khadi hai। samajhte hain kabhi bhi saara khaatma ho jaae, yeh koi nai baat nahin hai। bhaarat ko phir 16 kala sampoorn zaroor banna hai। tum jaante ho ham is yogbal se 16 kala sampoorn ban rahe hain। kehte hain na - de daan to chhoote grahan। baap bhi kehte hain vikaaron ka, avgunon ka daan do। yeh raavan raajya hai। baap aakar inse chhudaate hain। ismen bhi kaam vikaar bada bhaari avgun hai। tum deh-abhimaani ban pade ho। ab dehi-abhimaani banna pade। shareer ka bhaan bhi chhodna pade। in baaton ko tum bachche hi samajhte ho। duniya nahin jaanti। bhaarat jo 16 kala sampoorn tha, sampoorn devtaaon ka raajya tha, abhi grahan laga hua hai। in lakshmi-naaraayan ki raajdhaani thi na। bhaarat svarga tha। ab vikaaron ka grahan laga hua hai isliye baap kehte hain de daan to chhoote grahan। yeh kaam vikaar hi giraane vaala hai isliye baap kehte yeh daan do to tum 16 kala ban jaayenge। nahin denge to nahin banenge। aatmaon ko apna-apna part mila hua hai na। yeh bhi tumhaari buddhi mein hai। tumhaari aatma mein kitna part hai। tum vishwa ka raajya-bhaagya lete ho। yeh behad ka drama hai। athaah actors hain। ismen first class actors hain yeh lakshmi-naaraayan। inhon ka number one part hai। vishnu so brahma-sarasvati phir brahma-sarasvati so vishnu bante hain। yeh 84 janma kaise lete hain। saara chakra buddhi mein aa jaata hai। shaastra padhne se thode hi koi samajhte hain। woh to kalpa ki aayu hi laakhon varsha kah dete hain। phir to svaastika bhi ban na sake। vyaapaari log chaupda likhte hain to us par svaastika nikaalte hain। ganesh ki pooja karte hain। yeh hai behad ka chaupda। svaastika mein 4 bhaag hote hain। jaise jagannaathpuri mein chaaval ka handa rakhte hain, woh pak jaata hai to 4 bhaag ho jaate hain। vahaan chaaval ka hi bhog lagaate hain kyonki vahaan chaaval bahut khaate hain। shreenaath dvaare mein chaaval hote nahin। vahaan to sab sachche ghi ka pakka maal banta hai। jab bhojan banaate hain to bhi saphaai se munh band karke banaate hain। prasaad bahut ijjat se le jaate hain, bhog lagaakar phir woh sab pande logon ko milta hai। dukaan mein jaakar rakhte hain। vahaan bahut bheed rehti hai। baba ka dekha hua hai। ab tum bachchon ko kaun padha rahe hain? most beloved baap aakar tumhaara servant bana hai। tumhaari seva kar rahe hain, itna nasha chadhta hai? ham aatmaon ko baap padhaate hain। aatma hi sab kuchh karti hai na। manushya phir kah dete aatma nirlep hai। tum jaante ho aatma mein to 84 janmon ka avinaashi part bhara hua hai, unko phir nirlep kehna kitna raat-din ka farka ho jaata hai। yeh jab koi achhi reeti maas dedh baith samjhe tab yeh points buddhi mein baithen। din-pratidin points to bahut nikalti rehti hain। yeh hai jaise kastoori। bachchon ko jab poora nishchay baithta hai to phir samajhte hain barobar parampita paramatma hi aakar durgati se sadgati karte hain।

baap kehte hain tum par abhi brahaspati ki dasha hai। mainne tumko svarga ka maalik banaaya ab phir raavan ne raahu ki dasha bitha di hai। ab phir baap aaye hain svarga ka maalik banaane। to apne ko ghaata nahin lagaana chaahiye। vyaapaari log apna khaata hamesha theek rakhte hain। ghaata daalne vaale ko anaadi kaha jaata hai। ab yeh to sabse bada vyaapaar hai। koi birla vyaapaari yeh vyaapaar kare। yahi avinaashi vyaapaar hai aur sab vyaapaar to mitti mein mil jaane vaale hain। abhi tumhaara sachcha vyaapaar ho raha hai। baap hai gyaan ka saagar, saudaagar, ratnaagar। pradarshani mein dekho kitne aate hain। centre mein koi mushkil aayenge। bhaarat to bahut lamba-chauda hai na। sab jagah tumko jaana hai। paani ki ganga saare bhaarat mein hai na। yeh bhi tumko samjhaana pade। patit-paavan koi paani ki ganga nahin। tum gyaan gangaaon ko jaana padega। chaaron taraph mele pradarshani hote rahenge। din-pratidin chitra bante rahenge। aise shobhaavaan chitra hon jo dekhne se hi maza aa jaae। yeh to theek samjhaate hain, ab lakshmi-naaraayan ki raajdhaani sthaapan ho rahi hai। seedhi ka chitra bhi first class hai। abhi brahman dharma ki sthaapna ho rahi hai। yeh brahman hi phir devta bante hain। tum abhi purushaartha kar rahe ho to dil andar apne se poochhte raho hamaare mein koi chhota-mota kaanta to nahin hai? kaam ka kaanta to nahin hai? krodh ka chhota kaanta woh bhi bada kharaab hai। devtaayen krodhi nahin hote hain। dikhaate hain - shankar ki aankh khulne se vinaash ho jaata hai। yeh bhi ek kalank lagaaya hai। vinaash to hona hi hai। sookshm vatan mein shankar ko koi saanp aadi thode hi ho sakte। sookshm vatan aur mool vatan mein baag bageeche sarpa aadi kuchh bhi nahin hote। yeh sab yahaan hote hain। svarga bhi yahaan hota hai। is samay manushya kaanton misal hain, isliye inko kaanton ka jangal kaha jaata hai। satayug hai phoolon ka bageecha। tum dekhte ho baba kaisa bageecha banaate hain। most beautiful banaate hain। sabko haseen banaate hain। khud to ever haseen hai। sab sajniyon ko athva bachchon ko haseen banaate hain। raavan ne bilkul kaala bana diya hai। ab tum bachchon ko khushi honi chaahiye hamaare oopar brahaspati ki dasha baithi hai। aadha samay sukh, aadha samay duhkh ho to usse phaayda hi kya? nahin, 3/4 hissa sukh, 1/4 hissa duhkh hai। yeh drama bana hua hai। bahut log poochhte hain drama aisa kyon banaaya hai? are yeh to anaadi hai na। kyon bana, yeh prashn uth nahin sakta। yeh anaadi avinaashi drama bana hua hai। bani-banaai ban rahi hai। kisko bhi moksha nahin mil sakta। yeh to anaadi srishti chali aati hai, chalti hi rahegi। pralay hoti nahin।

baap nai duniya banaate hain parantu usmein gunjaais kitni hai। jab manushya patit duhkhi hote hain tab bulaate hain। baap aakar sabki kaaya kalpatru banaate jo aadhaakalpa tumhaari kabhi akaale mrityu nahin hogi। tum kaal par jeet paate ho। to bachchon ko bahut purushaartha karna chaahiye। jitna oonch pad paayen utna achha hai। purushaartha to har ek jaasti kamaai ke liye karta hi hai। lakdi vaale bhi kahenge ham jaasti kamaai karen। koi thagi se bhi kamaate hain। paise par hi aaphat hai। vahaan to tumhaare paise koi loot na sake। dekho duniya mein to kya-kya ho raha hai। vahaan aisi koi duhkh ki baat nahin hoti hai। ab tum baap se kitna varsa lete ho। apni jaanch karni chaahiye - ham svarga mein jaane laayak hain? (naarad ka misaal) manushya anek teertha aadi karte rehte hain, milta kuchh bhi nahin। geet bhi hai na - chaaron taraph lagaaye phere phir bhi hardam door rahe। ab baap tumko kitni achhi yaatra sikhlaate hain, ismen koi takleeph nahin। sirf baap kehte hain maamekam yaad karo to vikarma vinaash honge। bahut achhi yukti sunaata hoon। bachche sunte hain। yeh mera loan liya hua shareer hai। is baap ko kitni khushi hoti hai। hamne baba ko shareer loan par diya hai। baba hamko vishwa ka maalik banaate hain। naam bhi hai bhaageerath। abhi tum bachche raampuri mein chalne liye purushaartha kar rahe ho। to poora purushaartha mein lag jaana chaahiye। kaanta kyon banna chaahiye।

tum brahman-braahmaniyaan ho। sabka aadhaar murli par hai। murli tumko nahin milegi to tum shreemat kahaan se laayenge। aise nahin sirf ek braahmani ko hi murli sunaani hai। koi bhi murli padhkar suna sakte hain। bolna chaahiye - aaj tum sunaao। ab to pradarshani ke chitra bhi samjhaane ke liye achhe bane hain। yeh mukhya chitra to apni dukaan par rakho, bahuton ka kalyaan hoga। bolo, aao to ham tumko samjhaayen। yeh srishti ka chakra kaise phirta hai। kiska kalyaan karne mein thoda time gaya to harja thode hi hai। us saude ke saath yeh sauda kara sakte ho। yeh baba ka avinaashi gyaan ratnon ka dukaan hai। number one hai seedhi ka chitra aur geeta ke bhagwan shiv ka chitra। bhaarat mein shiv bhagwan aaya tha, jiski jayanti manaate hain। ab phir woh baap aaya hai। yagya bhi racha hua hai। tum bachchon ko raajayog ka gyaan suna rahe hain। baap hi aakar raajaaon ka raaja banaate hain। baap kehte hain main tumko sooryavanshi raaja-raani banaata hoon, jinhon ko phir vikaari raajaayen bhi naman karte hain। to svarga ka mahaaraaja-mahaaraani banne ka poora purushaartha karna chaahiye। baba koi makaan aadi banaane ki mana nahin karte hain। bhal banaao। paise bhi to mitti mein mil jaayenge, isse kyon na makaan banaae aaraam se raho। paise kaam mein lagaane chaahiye। makaan bhi banaao, khaane ke liye bhi rakho। daan-punya bhi karte hain। jaise kashmeer ka raaja apni property jo private thi, woh sab aarya samaajiyon ko daan mein diya। apne dharma, jaati ke liye karte hain na। yahaan to woh koi baat nahin। sab bachche hain। jaati aadi ki baat nahin। woh hai deh ki jaati aadi। main to tum aatmaon ko vishwa ki baadshaahi deta hoon, pavitra banaae। drama anusaar bhaaratvaasi hi raajya-bhaagya lenge। ab tum bachche jaante ho - hamaare oopar brahaspati ki dasha baithi hui hai। shreemat kehti hai maamekam yaad karo aur koi baat nahin। bhakti maarga mein vyaapaari log kuchh na kuchh dharmaau zaroor nikaalte hain। uska bhi doosre janma mein alpakaal ke liye milta hai। ab to main direct aaya hoon, to tum is kaarya mein lagaao। mujhe to kuchh nahin chaahiye। shivbaaba ko apne liye koi makaan aadi banaana hai kya। yeh sab tum braahmanon ka hai। gareeb saahookaar sab ikatthe rehte hain। koi-koi bigadte hain - bhagwan ke paas bhi sam drishti nahin hai। koi ko mahal mein, koi ko jhopdi mein rakhte hain। shivbaaba ko bhool jaate hain। shivbaaba ki yaad mein rahe to kabhi aisi baaten na karen। sabse poochhna to hota hai na। dekha jaata hai yeh ghar mein aisa aaraam se rehta hai to woh prabandha dena pade isliye kehte hain sabki khaatiri karo। koi bhi cheez na ho to mil sakti hai। baap ka to bachchon par lav rehta hai। itna lav aur koi ka rah na sake। bachchon ko kitna samjhaate hain purushaartha karo। auron ke liye bhi yukti racho। ismen chaahiye 3 pair prithvi ke, jismen bachchiyaan samjhaati rahen। koi bade aadmi ka hall ho, ham sirf chitra rakh dete hain। ek-do ghanta subah-shaam ko class kar chale jaayenge। kharcha sab hamaara, naam tumhaara hoga। bahut aakar kaudi se heere jaise banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jo bhi andar mein kaante hain unki jaanch kar nikaalna hai। raampuri mein chalne ka purushaartha karna hai।

2) avinaashi gyaan ratnon ka sauda kar kisi ka bhi kalyaan karne mein samay dena hai। haseen banna aur banaana hai।

vardaan:- tamoguni vaayumandal mein apni sthiti ekras, achal-adol rakhne vaale master sarvashaktimaan bhav

din-pratidin paristhitiyaan ati tamopradhaan banni hain, vaayumandal aur bhi bigadne vaala hai। aise vaayumandal mein kamal pushpa samaan nyaare rehna, apni sthiti satopradhaan banaana - iske liye itni himmat va shakti ki aavashyakta hai। jab yeh vardaan smriti mein rehta ki main master sarvashaktimaan hoon to chaahe prakriti dvaara, chaahe laukik sambandh dvaara, chaahe daivi parivaar dvaara koi bhi pareeksha aa jaae - usmein sada ekras, achal-adol rahenge।

slogan:- vardaata baap ko apna sachcha saathi bana lo to vardaanon se jholi bhari rahegi।

ye avyakt ishaare - ekta aur vishvaas ki visheshta dvaara saphalta sampanna bano

is parmaatma-gyaan se hi vishwa mein ek dharma, ek raajya, ek mat ki sthaapna hoti hai। aapke is brahman sangathan ke ekmat ki visheshta - devta roop mein practical chalti hai। yeh visheshta hi kamaal karegi, isse hi naam baala hoga, pratyakshata hogi। to is visheshta mein number one bano। iske liye jo apna mool sanskaar hai, usko mitaakar baapdaada ke sanskaaron ko copy kar samaan aur sampoorn bano tab har ek se baap dikhaai dega aur pratyakshata hogi।