Daily Murli for Wednesday 25 March 2026

25-03-2026 praatahmurli om shanti "baapdaada"' madhuban

“meethe bachche - tum mahaaveer ho, tumhein maaya ke toofaanon se darna nahin hai, ek baap ke sivaae aur koi bhi parvaah na kar pavitra zaroor banna hai,

prashn:- bachchon mein kaun si himmat bani rahe to bahut oonch pad pa sakte hain?

uttar:- shreemat par chalkar pavitra banne ki। bhal kitne bhi hangaamen ho, sitam sahan karne pade lekin baap ne jo pavitra banne ki shreshtha mat di hai us par nirantar chalte rahen to bahut oonch pad pa sakte hain। kisi bhi baat mein darna nahin hai, kuchh bhi hota hai - nothing new।

geet:- bholenaath se niraala…

om shanti। yeh hai bhaktimaarga vaalon ka geet। gyaan maarga mein geet aadi ki koi jaroorat nahin hai kyonki gaaya hua hai baap se humein behad ka varsa milna hai। jo bhakti maarga ki rasam-rivaaz hai, woh ismen nahin aa sakti। bachche kavita aadi banaate hain vo auron ko sunaane ke liye। uska bhi arth jab tak tum na samjhaao tab tak koi samajh na sake। ab tum bachchon ko baap mila hai to khushi ka paara chadhna chaahiye। baap ne 84 janmon ke chakra ka knowledge bhi sunaaya hai। khushi honi chaahiye - ham abhi svadarshan chakradhaari bane hain। baap se vishnupuri ka varsa le rahe hain। nishchaybuddhi hi vijayanti। jisko nishchay hota hai woh satayug mein to jaayenge hi। to bachchon ko sadaiv khushi rahni chaahiye - follow father। bachche jaante hain niraakaar shivbaaba ne jabse ismen pravesh kiya hai to bade hangaamen hue। pavitrata par bade jhagde chale। bachche bade hote, kahenge jaldi shaadi karo, shaadi bigar kaam kaise chalega। bhal manushya geeta padhte hain parantu usse samajhte kuchh nahin। sabse jaasti baba ko abhyaas tha। ek din bhi geeta padhna miss nahin karte the। jab maaloom pada geeta ka bhagwan shiv hai, nasha chadh gaya ham to vishwa ke maalik bante hain। yeh to shiv bhagvaanuvaach hai phir pavitrata ka bhi bada hangaama hua। ismen bahaaduri chaahiye na। tum ho hi mahaaveer-mahaaveerni। sivaae ek ke aur koi ki parvaah nahin। purush hai rachta, rachta khud paavan banta hai to rachna ko bhi paavan banaata hai। bas is baat par hi bahuton ka jhagda chala। bade-bade gharon se nikal aaye। koi ki parvaah nahin ki। jinki takdeer mein nahin hai to samjhen bhi kaise। pavitra rehna hai to raho, nahin to jaakar apna prabandha karo। itni himmat chaahiye na। baba ke saamne kitne hangaame hue। baba ko kabhi ranj hua dekha? America tak akhbaaron mein nikal gaya। nothing new। yeh to kalpa pahle muaaphik hota hai, ismen darne ki kya baat hai। hamko to apne baap se varsa lena hai। apni rachna ko bachaana hai। baap jaante hain saari creation is samay patit hai। mujhe hi sabko paavan banaana hai। baap ko hi sab kehte hain he patit-paavan, liberator aao, to unko hi taras padta hai। merciful hai na। to baap samjhaate hain - bachche, koi bhi baat mein daro mat। darne se itna oonch pad pa nahin sakenge। maataaon par hi atyaachaar hote hain। yeh bhi nishaani hai - dropdi ko nangan karte the। baap 21 janmon ke liye nangan hone se bachaate hain। duniya in baaton ko nahin jaanti। patit tamopradhaan puraani srishti bhi banni hi hai। har cheez nai se phir puraani zaroor honi hai। puraane ghar ko chhodna hi padta hai। nai duniya golden ej, puraani duniya iron ej...... sadaiv to rah na sake। tum bachche jaante ho - yeh srishti chakra hai। devi-devtaaon ke raajya ki phir se sthaapna ho rahi hai। baap bhi kehte hain phir se tumko geeta gyaan sunaata hoon। yahaan raavan raajya mein duhkh hai। raamraajya kisko kaha jaata hai, yeh bhi koi samajhte nahin। baap kehte hain main svarga athva raamraajya ki sthaapna karne aaya hoon। tum bachchon ne anek baar raajya liya aur phir ganvaaya hai। yeh sabki buddhi mein hai। 21 janma satayug mein ham rehte hain, usko kaha jaata hai 21 peedhi arthaat jab vriddha avastha hoti hai tab shareer chhodte hain। akaale mrityu kabhi hoti nahin। ab tum jaise trikaaldarshi ban gaye ho। tum jaante ho - shivbaaba kaun hai? shiv ke mandir bhi dher banaaye hain। moorti to ghar mein bhi rakh sakte ho na। parantu bhakti maarga ki bhi drama mein noondh hai। buddhi se kaam liya jaae। shreekrishna ki athva shiv ki moorti ghar mein bhi rakh sakte hain। cheez to ek hi hai। phir itna door-door kyon jaate hain? kya unke paas jaane se shreekrishnapuri ka varsa milega। abhi tum jaante ho janma-janmaantar ham bhakti karte aaye hain। raavan raajya ka bhi bhabhka dekho kitna hai। yeh hai pichhaadi ka bhabhka। raamraajya to satayug mein tha। vahaan yeh vimaan aadi sab the phir yeh sab gum ho gaye। phir is samay yeh sab nikle hain। abhi yeh sab seekh rahe hain, jo seekhne vaale hain woh sanskaar le jaayenge। vahaan aakar phir vimaan banaayenge। yeh bhavishya mein tumko sukh dene vaali cheejen hain। yeh science phir tumko kaam aayegi। abhi yeh science duhkh ke liye hai phir vahaan sukh ke liye hogi। abhi sthaapna ho rahi hai। baap nai duniya ke liye raajdhaani sthaapan karte hain to tum bachchon ko mahaaveer banna hai। duniya mein yeh thode hi koi jaante ki bhagwan aaya hua hai।

baap kehte hain grihastha vyavhaar mein rehte kamal phool samaan pavitra raho, ismen darne ki baat nahin। karke gaali denge। gaali to inko bhi bahut mili hai। shreekrishna ne gaali khaai - aisa dikhaate hain। ab shreekrishna to gaali kha na sake। gaali to kaliyug mein khaate hain। tumhaara roop jo abhi hai phir kalpa ke baad is samay hoga। beech mein kabhi ho na sake। janma by janma features badalte jaate hain, yeh drama bana hua hai। 84 janmon mein jo features vaale janma liye hain vahi lenge। ab tum jaante ho yahi features badal doosre janma mein yeh lakshmi-naaraayan ke features ho jaayenge। tumhaari buddhi ka ab taala khula hua hai। yeh hai nai baat। baba bhi naya, baaten bhi nai। yeh baaten kiski samajh mein jaldi nahin aati। jab takdeer mein ho tab kuchh samjhen। baaki mahaaveer unko kaha jaata hai jo kitne bhi toofaan aayen, hile nahin। ab woh avastha ho na sake। honi hai zaroor। mahaaveer koi toofaan se darenge nahin। woh avastha pichhaadi mein honi hai isliye gaaya hua hai ateendriy sukh gop-gopiyon se poochho। baap aaye hain tum bachchon ko svarga ka laayak banaane। kalpa pahle misal narka ka vinaash to hona hi hai। satayug mein to ek hi dharma hoga। chaahte bhi hain oneness, ek dharma hona chaahiye। yeh bhi kisko pata nahin hai ki raam raajya, raavan raajya alag-alag hai। ab baap mein poora nishchay hai to shreemat par chalna pade। har ek ki nabja dekhi jaati hai। us anusaar phir raay bhi di jaati hai। baba ne bhi bachche ko kaha - agar shaadi karni ho to jaakar karo। bahut mitra-sambandhi aadi baithe hain, unko shaadi kara denge। phir koi na koi nikal pada। to har ek ki nabja dekhi jaati hai। poochhte hain baba yeh haalat hai, ham pavitra rehna chaahte hain, hamaare sambandhi hamko ghar se nikaalte hain, ab kya karna hai? are yeh bhi poochhte ho, pavitra rehna hai, agar nahin rah sakte ho to jaakar shaadi karo। achha samjho kiski sagaai hui hai, raaji karna hai, harja nahin। hathiyaala jab baandhate hain to us samay kehte hain yeh pati tumhaara guru hai। achha tum unse likhva lo। tum maanti ho main tumhaara guru eeshvar hoon, likho। achha ab main hukm deta hoon pavitra rehna hai। himmat chaahiye na। manzil bahut bhaari hai। praapti bahut jabardasta hai। kaam ki aag tab lagti hai jab praapti ka pata nahin hai। baap kehte hain itni badi praapti hoti hai to agar ek janma pavitra rahe to kya badi baat hai। ham tumhaare pati eeshvar hain। hamaari aagya par pavitra rehna padega। baba yuktiyaan bata dete hain। bhaarat mein yeh kaayda hai - stri ko kehte hain tumhaara pati eeshvar hai। unki aagya mein rehna hai। pati ka paanv dabaana hai kyonki samajhte hain na, lakshmi ne bhi naaraayan ke paanv dabaaye the। yeh aadat kahaan se nikli? bhakti maarga ke chitron se। satayug mein to aisi baat hoti nahin। naaraayan kabhi koi thakta hai kya jo lakshmi paanv dabaayegi। thakaavat ki baat ho na sake। yeh to duhkh ki baat ho jaati hai। vahaan duhkh-darda kahaan se aaya। tab baba ne photo se lakshmi ka chitra hi uda diya। nasha to chadhta hai na। chhotepan se hi vairaagya rehta tha isliye bhakti bahut karte the। to baba yukti bahut bataate hain। tum jaante ho ham ek baap ke bachche hain to aapas mein bhaai-behen ho gaye। daade se varsa lete hain। baap ko bulaate hi hain patit duniya mein। he patit-paavan sabhi seetaaon ke raam। baap ko kaha jaata hai truth, sachkhanda sthaapan karne vaala। vahi saari srishti ke aadi-madhya-ant ka satya gyaan tumko dete hain। tumhaari aatma abhi gyaan saagar ban rahi hai।

meethe bachchon ko himmat rakhni chaahiye, hamko baba ki shreemat par chalna hai। behad ka baap behad ki rachna ko svarga ka maalik banaate hain। to purushaartha kar poora varsa lena hai। vaari jaana hai। tum unko apna vaaris banaayenge to vo tumko 21 janmon ke liye varsa denge। baap bachche ke oopar vaari jaate hain। bachche kehte hain baba yeh tan-man-dhan sab aapka hai। aap baap bhi ho to bachcha bhi ho। gaate bhi hain tvamev maataashcha pita tvamev........ ek ki mahima kitni badi hai। unko kaha hi jaata hai sarva ka duhkh harta, sukh karta। satayug mein 5 tatva bhi sukh dene vaale hote hain। kaliyug mein 5 tatva bhi tamopradhaan hone ke kaaran duhkh dete hain। vahaan to hai hi sukh। yeh drama bana hua hai। tum jaante ho yeh vahi 5 hazaar varsha pahle vaali ladaai hai। abhi svarga ki sthaapna ho rahi hai। to bachchon ko sadaiv khushi mein rehna chaahiye। bhagwan ne tumko adopt kiya hai phir tum bachchon ko baap shrringaarte bhi hain, padhaate bhi hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada baap samaan banne ki himmat rakhni hai। baap par poora vaari jaana hai।

2) kisi bhi baat mein darna nahin hai। pavitra zaroor banna hai।

vardaan:- samasyaaon ko chadhti kala ka saadhan anubhav kar sada santushta rahne vaale shaktishaali bhav

jo shaktishaali aatmaayen hain woh samasyaaon ko aise paar kar leti hain jaise koi seedha raasta sahaj hi paar kar lete hain। samasyaayen unke liye chadhti kala ka saadhan ban jaati hain। har samasya jaani pahchaani anubhav hoti hai। ve kabhi bhi aashcharyavat nahin hote balki sada santushta rehte hain। mukh se kabhi kaaran shabd nahin nikalta lekin usi samay kaaran ko nivaaran mein badal dete hain।

slogan:- sva-sthiti mein sthit rahkar sarva paristhitiyon ko paar karna hi shreshthata hai।

maateshvari ji ke anmol mahaavaakya

'parmaartha se vyavhaar svatah siddha hota hai"

bhagvaanuvaach hai ki tum mere dvaara param arth ko jaanne se mere param pad ko praapta karenge arthaat parmaartha ko jaanne se vyavhaar siddha ho jaata hai। dekho, devtaaon ke aage prakriti to charnon ki daasi hokar rehti hai, yeh paanch tatva sukh-swaroop ban manaichchhit seva karte hain। is samay dekho man ichchhit sukh na milne ke kaaran manushya ko duhkh, ashaanti praapta hoti rehti hai। satayug mein to yeh prakriti ba adab rehti hai। dekho, devtaaon ke jad chitron par bhi itne heere-javaahraat lagaate hain, to jab chaitanya mein pratyaksha honge to us samay kitne vaibhav honge? is samay manushya bhookh marte hain aur jad chitron par karodon roopaye kharcha kar rahe hain। to yeh kya pharka hai! zaroor unhonne aise shreshtha karma kiye hain tabhi to unhon ke yaadgaar bane hue hain। unka poojan bhi kitna hota hai। woh nirvikaari pravritti mein rehte bhi kamal phool samaan avastha mein the, parantu ab vo nirvikaari pravritti ke badle vikaari pravatti mein chale gaye hain, jis kaaran sabhi parmaartha ko bhool vyavhaar ke taraph lag gaye hain, isliye result ulti ja rahi hai। ab apne ko svayan paramatma aae vikaari pravritti se nikaal nirvikaari pravritti sikhaate hain, jisse apni jeevan sadaakaal ke liye sukhi banti hai isliye pahle chaahiye parmaartha baad mein vyavhaar। parmaartha mein rahne se vyavhaar automatically siddha ho jaata hai। om shanti।

ye avyakt ishaare-'“nishchay ke foundation ko majboot kar sada nirbhay aur nishchint raho“

jaise doctor patient ko pahle faith mein laate hain, unhein vishvaas ho jaata hai ki yeh doctor bada achha hai, yahaan se shapha mil jaayegi। vaise doctor kitni bhi badhiya davaai de lekin agar faith nahin hai to us davaai ka asar nahin hota। aise roohaani daaktari mein bhi aisi shaktishaali stage ho jo sabka faith ho jaae ki yahaan pahunche hain to avashya koi na koi praapti hogi hi।