Daily Murli for Sunday 29 March 2026

29-03-26 praatahmurli om shanti ''avyakt-baapdaada'' revise 25-10-09 madhuban

sarva khajaanon se sampanna apne chehre va chalan se alaukikta ka saakshaatkaar karaao

aaj sarva khajaanon ke daata apne khajaanon ke maalik bachchon ko dekh rahe hain। har ek bachcha sarva khajaanon se sampanna hai kyonki baap ne sarva bachchon ko ek jaise ek hi samay mein sarva khajaane diye hain। to baapdaada apne baalak so maalik bachchon se milne aaye hain। bachchon ne bulaaya to baap bachchon ke sneh mein pahunch gaye hain। khajaane to bahut hain, sabse pahla khajaana hai gyaan dhan, jis gyaan dhan se maalaamaal ho gaye, mahaadaani ban auron ko bhi baantate rehte ho। jis gyaan ke khajaane se bhinna-bhinna bandhanon mein phansi hui aatma, un sab bandhanon se mukta ho gai। bandhanayukta se bandhanmukta ho gaye। saath mein yog arthaat yaad ka khajaana, jisse anek shaktiyaan praapta ki hain। aise hi dhaarna dvaara sarva gunon ki anubhooti arthaat khajaana mila hai। saath mein dhaarna ki shakti se sarva ke sneh ki shakti, sarva ke pyaare aur nyaarepan ki shakti ka khajaana praapta kiya, sarva ke sneh ka khajaana anubhav kiya। saath mein sarva brahman sambandh se apaar khushi ka khajaana anubhav kiya। lekin sarva khajaanon ke saath jo vishesh khajaana hai woh hai sangam ke samay ka khajaana। jis aatma ko samay ke khajaane ka mahatva hai woh sada anek praaptiyon ke maalik ban jaate hain kyonki sangamayug ka samay bahut chhota hai lekin samay se praaptiyaan jyaada hain। sabse jyaada sangamayug ki shreshtha se shreshtha praapti hai svayan bhagwan baap roop mein, shikshak roop mein, satguru ke roop mein praapta hota hai। sangamayug mein chhote se janma mein 21 janma ki praapti, jismen tan, man, dhan, jan sarva praapti hain aur guarantee hai 21 janma full, aadha nahin, pauna nahin lekin full 21 janma ki guarantee hai। to sabse jyaada jo mahatva hai woh hai sangamayug ka ek-ek second anek varshon ke samaan hai। to bolo, sarva khajaanon se sampanna to hain? sampanna hai na? isliye baapdaada sada samay ki smriti dila rahe hain। kai bachche samajhte hain ki ek do minute agar aur kuchh soch liya, to 2 minute hi to hain। lekin jitna samay ka mahatva hai us anusaar to 2 minute nahin, 2 maas bhi nahin, do varsha ke samaan hain। itna mahatva hai sangam ke samay ka। sarva shaktiyon ki, sarva gunon ki, parmaatma pyaar ki, brahman parivaar ke pyaar ki aur kalpa pahle vaale eeshvareey hak ki, yeh sarva praaptiyaan is chhote se yug mein hain aur koi bhi yug mein yeh sarva praapti nahin। raajya bhaagya hoga, aap sabka raajya hoga, sukh shanti sab hoga lekin parmaatma milan ka, ateendriy sukh ka, sarva brahman parivaar ke pyaar ka, aadi madhya ant ki knowledge ka bhaagya ab sangam par hi mila hai, har kalpa milta rahega।

baapdaada har bachche ke chehre se dekhte hain ki khajaane jama kitne hain? khajaane to mile lekin har ek ne kitna jama ka khaata badhaaya hai, woh har ek ke chehre se, chalan se dikhaai deta hai aur aap sab bhi apne aapko jaante ho ki mainne kitna jama kiya hai! abhi baapdaada ke dil ki yahi aash hai ki khajaane mile to hain lekin ab samay sirf varnan karne ka nahin hai lekin aapka chehra aur chalan pratyaksha anubhav karaaye ki yeh aatmaayen koi vishesh hain, nyaare hain aur parmaatma pyaare hain kyonki aage chalkar samay parivartan hone se aapki seva sirf varnan karne se nahin, samay naajuk hone se itna samay koi nikaal nahin sakega lekin aapke khajaane sampanna chehre se, chalan se aapki alaukikta ka door se hi saakshaatkaar hoga। to aisa purushaartha abhi apna pratyaksha karo। jaise brahma baap ko dekha, chaahe sangathan ke beech mein bhi raha to bhi door se woh personality, chamak anubhav hui। aise abhi double videshi vishesh double purushaartha karo। baapdaada double purushaarthi kehte hain to baapdaada nimitta aaj double videshi bachchon ko dekh khush hai। vriddhi ka purushaartha achha kar rahe hain, nimitta bani hui aatmaon se paalna bhi sabhi ko bahut achhi mil rahi hai aur baapdaada ko ek baat sabhi ki bahut achhi lagti hai ki sarva aatmaayen har varsha apna sangathan ka milan madhuban mein vishesh karte hain kyonki madhuban ka vaayumandal refreshment mein bahut sahayog deta hai aur ek hi jimmevaari hai - sva-parivartan, mansa seva, ek do ke anubhvon ka bhi achha chance milta hai। to baapdaada is baat par mubaarak dete hain।

abhi kuchh kamaal apne-apne sthaan par jaakar karna, kuchh nyaaraapan jo baap ko pyaara hai woh practical mein anubhav karaana jisse madhuban ki refreshment ka sahayog vahaan bhi anubhav karte rahenge। to aaj vishesh double purushaarthi group ka milan hai aur dekho aap sabhi se India vaale bachchon ka itna pyaar hai jo pahla chance aapko hi dete hain। to pahle chance ki result pahla number lena hai। achha lagta hai, baapdaada ne pahle bhi sunaaya hai ki double videshi ya double purushaarthi bachchon ne baap ka ek vishesh title pratyaksha kiya hai। jo videsh mein majority taraph ke baap ke bachchon ko nikaal unki bhi takdeer ki tasveer bana di hai, iseelie lagan se jo chaaron or mehnat kar rahe hain, usse baap ka vishwa kalyaankaari kartavya prasiddha kiya hai iseelie baapdaada har bachche ko vaah! bachcha vaah! ki mubaarak dete hain। abhi bhi jaise bhaarat mein kone-kone mein sandesh dene ki seva chalti rehti hai aise vahaan bhi umang-utsaah hai ki rahe hue desh mein sandesh de den kyonki samay par koi bharosa nahin। baapdaada ne pahle se hi kaha hai ki achaanak kya bhi ho sakta hai isliye sandesh dene ka va apne progress ka abhi-abhi, kabhi-kabhi nahin, baapdaada ne kaha hi hai ki vaastav mein braahmanon ki dictionary mein kabhi-kabhi shabd shobhta nahin hai, abhi-abhi, sankalp kiya karna hi hai। dekhenge, karenge, yeh ge-ge ka shabd hi nahin hai isliye aapki mama ne bhi yahi lakshya rakha aur sabko yaad dilaaya ki “ab nahin to kab nahin''।

to double purushaarthi bachche abhi-abhi karne vaale hain ya kabhi-kabhi? jo samajhte hain ki abhi-abhi karke dikhaane vaale hain, woh haath uthaao। karna hi hai। karna hi hai। karenge nahin, karna hi hai। yaad rakhna, apne aaphi apna chart rakhna aur baap-daada ne pahle hi sunaaya hai ki har raatri ko baapdaada ko apne saare din ka chart sunaane ke baad apna dimaag khaali karke sone se aapko neend bhi achhi aayegi aur saath mein roz ka haalchaal dene se doosre din yaad rehta hai ki baba ko hamne apna kaha hai, to woh smriti sahayog deti hai। phir dharmaraajpuri mein jaana nahin padega। de diya na aur parivartan kar liya to dharmaraajpuri se bach jaayenge। abhi doosre varsha, dekha to kisne nahin hai lekin abhi lakshya rakho, varsha ko chhodo, kam se kam jitne thode samay mein baap ki jo aash hai ki chehra dikhaai de, chalan dikhaai de, woh jaldi se jaldi practical mein karke dikhaao। himmat hai, to haath uthaao। himmat hai? himmat hai? achha mubaarak ho। baapdaada to har bachche mein nishchay aur himmat ka umang-utsaah abhi-abhi dekh raha hai। lekin jaate-jaate plen mein thoda kam nahin karna। badhaate rehna। baapdaada ne jo dridh sankalp ki chaabi di hai usko sada hi kaayam rakhna। karna hi hai, abhi-abhi, ge ge nahin। woh samay abhi gaya। ho jaayega nahin, hona hi hai। baapdaada ne double purushaarthi ka title jo diya hai, usko sada yaad rakhna।

baaki baapdaada ne result suni, baapdaada ne jo seva ka plan diya, usmein bhaarat ne bhi kam nahin kiya aur videsh ne bhi kam nahin kiya। is vardaan ko majority sthaanon mein umang-utsaah se kiya hai aur result bhi alag-alag sthaan ki aa rahi hai। to baapdaada chaahe bhaarat ke bachchon ko, chaahe videsh ke bachchon ko padam-padam guna practical laane ki mubaarak de rahe hain।

abhi is varsha mein vishesh kaun si baat practical mein karni hai, woh suna diya ki abhi aapko jo bhi dekhe usko aapke chehre mein chamak dikhaai de। pratyakshata ke nimitta banna hai, baap ko pratyaksha karna hai to kya karna hai? sada muskaraata hua chehra, koi chintan mein, koi uljhan mein nahin। baapdaada ne sunaaya tha ki abhi do shabd yaad karo - maaya ko ishaara karo get out aur apne ko guest house mein anubhav karo। yeh duniya aapki nahin hai, guest house hai, ab to ghar jaana hi hai। ghar ke nazaare man mein buddhi mein dikhaai den। to automatically ghar aaya ki aaya। aapka ek geet hai - ab ghar chalna hai। to yeh lahar har sthaan par ho, chaahe bhaarat, chaahe videsh, ab yeh anubhav pratyaksha karke dikhaao। behad ka vairaagya, guest house mein dil nahin lagti, jaana hai, jaana hai, yaad rehta hai। to yeh behad ka vairaagya koi bhi prakaar ke man ke sankalpon ko, aapas mein sangathan ke maaya ke vighnon ko ekdam samaapta kar dega। yeh maaya ke toofaan aapke liye tohpha ban jaayenge। yeh jo chhote-mote paper aate hain yeh paper nahin lagenge lekin ek anubhav badhaane ki lift lagenge। gift aur lift। samjha। abhi lakshya rakho behad ke vairaagi aur himmat umang-utsaah ke pankhon se udte raho aur udaate raho। abhi udne ka samay hai। apne pankh sada check karo kamjor to nahin ho rahe hain!

baapdaada double videshiyon ka vistaar dekh khush hai, abhi kya dekhne chaahte hain? har bachcha baap samaan sampanna aur sampoorn, sarva khajaanon se sampanna aur har shreemat jo milti rahi hai usmein sampoorn। pasanda hai? pasanda hai to taali bajaao। achha। yeh taali har din yaad karna, apne aap hi man mein bajaana, baahar se nahin man mein bajaana। yeh homework hai। achha।

90 deshon se 2300 bhaai bahinen aaye hue hain:- (paanchon khandon ke bhaai bahinon ko alag-alag group mein khada kiya)

1- America, Canada aur caribbean ke bhaai bahinen, 2- Australia, eshiya, nyoojeelainda, Fiji, 3- Europe, yu.ke., middle east 4- aphreeka, south aphreeka, Mauritius, 5- Russia, si.aai.S., Baltic kantreez

sabhi ne aage badhne ka sankalp bhi kiya hai aur aapas mein roohrihaan bhi ki hai। baapdaada ke paas samaachaar aata rehta hai। abhi ever ready group banaao। jo desh jitne bhi aaye hain, un deshon mein baapdaada prize denge, kya prize denge woh to dekhenge us samay। lekin baapdaada double purushaarthi bachchon ke har area ke group ko yahi kehte hain ki koi bhi group jo number one jaayega usko prize denge। ek desh ke ek-ek shahar mein jitne bhi centre hain, maano America hai, America ke connection mein jo bhi desh hain, woh sabhi desh aapas mein raay kar programme banaayen ki yahaan sabhi nirvighna rahenge, ever ready rahenge, maayaajeet rahenge, snehi aur seva mein sahayogi rahenge। jo number one hoga usko baapdaada prize dega। chalo, ek nahin to teen ko denge। ek do teen। teen number। vaise to ek ko diya jaata hai lekin double purushaarthi hain na to teen ko chance denge। pasanda hai? haan haath hilaao। pasanda hai? kitna time chaahiye? yeh teacher sunaaven, kitna time chaahiye prize lene mein? bataao। (sabhi ne kaha February tak) sabhi deshon ki teachers haath uthaao। theek hai? taiyaar honge na! phir baapdaada prize denge। bahut achha। iski taali to bajaao। achha। bhaarat ka bhi tarna aayega। abhi to aap logon ka tarna hai। baapdaada bhi khush hote hain vaah teevra purushaarthi bachche vaah! achha।

chaaron or ke teevra purushaarthi himmat aur umang-utsaah se udne vaale, chalne vaale nahin, udne vaale, chaaron or ke baap samaan sampanna aur sampoorn banne vaale baapdaada ke diltakhtansheen, sada baap ke combined roop ka anubhav aur sahayog lene vaale har ek baap ke sikeeldhe, snehi bachchon ko baapdaada ka yaadapyaar aur namaste।

daadiyon se:- baap ke saath aap sabka bhi sahayog raha hai na। bachche aur baap donon ke sahayog se yagya chala hai, chalta rahega। nimitta to aap bhi ho na। saakaar mein ek ne kaha doosre ne kiya। ek do ke sahayogi ban ud rahe ho। baba udte hue dekh khush hote hain। (daadi jaanki ne kaha kamaal hai, guljaar daadi ki) woh to saath mein hai hi। baapdaada ki yahi shubh ichchha hai ki aap sabhi jo nimitta hain woh sada ek dikhaai paden। bhinna-bhinna nahin, ek dikhaai den। ek ne kaha doosre ne raay di aur ek ho gaye। tabhi to yagya chal raha hai। aap sabki ekta se hi chal raha hai, chaahe baahar se dikhaai nahin de lekin sankalp mein, vichaaron mein ek rah karke aur aage badhaana hai kyonki abhi aap sabke oopar nazar hai। achha।

vardaan:- apni shreshtha vritti dvaara shuddh vaayumandal banaane vaale sada shaktishaali aatma bhav

jo sada apni shreshtha vritti mein sthit rehte hain ve kisi bhi vaayumandal, vibration mein dagmag nahin ho sakte। vritti se hi vaayumandal banta hai, yadi aapki vritti shreshtha hai to vaayumandal shuddh ban jaayega। kai varnan karte hain ki kya karen vaayumandal hi aisa hai, vaayumandal ke kaaran meri vritti chanchal hui - to us samay shaktishaali aatma ke bajaae kamjor aatma ban jaate hain, lekin vrat (pratigya) ki smriti se vritti ko shreshtha bana do to shaktishaali ban jaayenge।

slogan:- gunmoorta bankar sarva ko gunmoorta banaana hi mahaadaani banna hai।

ye avyakt ishaare- “nishchay ke foundation ko majboot kar sada nirbhay aur nishchint raho"

aapas mein ek do ke prati sachcha sneh ho, to snehi aatma ke prati kabhi anumaan paida nahin hoga। unke sneh ke bol, saadhaaran hote bhi feel nahin hoge। unka halka bol bhi aise lagega ki isne avashya koi matlab se kaha hoga। bematlab, vyartha nahin lagega। jahaan sneh hota hai, vahaan faith zaroor hota hai। to brahman parivaar mein ek do ke prati sneh va faith rakh, sampoorn nishchaybuddhi bano tab brahma baap ki aashaaon ko poora kar sakenge।