Daily Murli for Tuesday 31 March 2026

31-03-2026 praatahmurli om shanti "baapdaada"' madhuban

“meethe bachche - oonch pad paana hai to sachche baap ke saath sada sachche raho, koi bhi bhool ho to baap se kshama le lo, apni mat par nahin chalo''

prashn:- kaun se laal kabhi chhip nahin sakte hain?

uttar:- jinka eeshvareey parivaar se pyaar hai, jinhen raat-din service ka hi ona rehta hai, aise serviceable jo pharmaan-bardaar aur vaphaadaar hain, kabhi bhi manmat par nahin chalte hain, baap se sachche aur saaph dil hain woh kabhi bhi chhip nahin sakte hain।

geet:- tumheen ho maata pita…

om shanti। geet mein guarantee kiski thi? maat-pita ke saath bachchon ki guarantee hai ki baba hamaare to ek aap ho doosra na koi। kitni oonch manzil hai। aise shreshtha baap ki shreemat par koi chale to guarantee hai, varsa zaroor oonch paayenge। parantu buddhi kehti hai badi oonchi manzil dekhne mein aati hai। jo koton mein koi, koi mein koi sirf maala ke daane bante hain। kehte bhi hain tum maat-pita parantu maaya itni dustar hai, jo koi mushkil hi guarantee par chal sake। har ek apne se poochh sakte hain ki sach-sach main maat-pita ka bana hoon? baap kehte hain nahin। bahut thode hain tab to dekho maala kitnon ki banti hai? kitne koton mein sirf 8 ki vaijayanti maala banti hai, kai kehte ek hain, karte doosra hain isliye baap bhi kehte hain - dekho kaisa wonder hai। baba kitna prem se samjhaate hain parantu sapoot bachche bahut thode nikalte hain, (maala ke daane)। bachchon mein itni taakat nahin hai jo shreemat par chal saken, to zaroor raavan mat par hain isliye itna pad nahin pa sakte hain। koi birle hi maala ka daana bante hain, woh bhi laal chhipe nahin rehte। woh dil par chadhe rehte hain। raat din service ka hi ona rehta hai। eeshvareey sambandh se lav rehta hai। baahar mein unki buddhi kahaan nahin jaati। aisa lav daivi parivaar se rakhna hai। agyaan kaal mein bhi bachchon ka baap se, behen-bhaaiyon ka aapas mein bahut hi lav rehta hai। yahaan to koi-koi ka rinchak maatra bhi baap se yog nahin hai। guarantee to bahut karte hain। bhakti maarga mein gaate hain, abhi to bachche sammukh hain। vichaar kiya jaata hai bhakti maarga mein jo gaate rehte hain, kitna lav se yaad karte hain। yahaan to yaad hi nahin karte। baba ka banne se maaya dushman ban padti hai। buddhi baahar chali jaati hai to maaya achha hi gira deti hai। woh khud nahin samajhte ki ham jo kuchh karte hain woh girne ke liye hi karte hain। apni mat par girte rehte hain। unko pata hi nahin padta ki ham kya kar rahe hain। kuchh to khaamiyaan bachchon mein hain na। kehte ek hain karte doosra hain। nahin to baap se varsa kitna oonch milta hai। sachchaai se kitna baap ki service mein lag jaana chaahiye। parantu maaya kitni dustar hai। koton mein koi baap ko poora pahchaante hain। baap kehte hain, kalpa-kalpa aise hi hota hai। poora vaphaadaar, pharmaanbardaar na hone ke kaaran un bichaaron ka pad aisa ho padta hai। kehte bhi hain baba ham raajayog seekh nar se naaraayan, naari se lakshmi banenge। raam seeta nahin banenge। haath bhi uthaate hain parantu chalan bhi to aisi chaahiye na। behad ka baap varsa dene ke liye aaye hain, unki shreemat par kitna chalna chaahiye। bahut hain jinhonne kasam khaaya hua hai ham shreemat par nahin chalenge। woh chhipe nahin rehte। koi ki takdeer mein nahin hai to deh-abhimaan pahle thappad lagaata hai phir hai kaam। kaam nahin to krodh, lobh hai। hain to sabhi dushman। moh bhi aisi cheez hai jo bilkul hi satyaanaash kar deta hai। lobh bhi kam nahin hai। bade kade dushman hain। paai paise ki cheez chori kar lenge। yeh bhi lobh hai na। chori ki bahut gandi aadat hai। andar mein dil khaana chaahiye ki ham paap karte rehte hain to kya pad paayenge। shivbaaba ke yagya mein aakar baba ke paas ham aise kaam kaise kar sakte hain। maaya bahut ulte kaam karaati hai। kitna bhi samjhaao phir bhi aadat mitti nahin hai। koi naam roop mein phans padte hain। deh-abhimaan ke kaaran naam roop mein bhi aa jaate hain। har ek centre ka baba ko saara maaloom rehta hai na। baba bhi kya kare, samjhaana to pade। kitne centres hain। kitne baba ke paas samaachaar aate hain। phikraat to rehti hai na। phir samjhaana padta hai, maaya kam nahin hai। bahut tang karti hai। achhe-achhe bachchon ko kaha jaata hai bada kahaavna bada duhkh paana। yahaan to duhkh ki koi baat nahin hai। jaante hain kalpa pahle bhi aise hua tha। eeshvar ka bankar phir bhi maaya ke vash ho jaate hain। koi na koi vikarma kar lete hain, tab baap kehte hain pratigya to bahut bachche karte hain ki baba ham aapki shreemat par zaroor chalenge, parantu chalte nahin hain isliye maala dekho kitni chhoti banti hai, baaki to hai praja। kitni badi manzil hai, ismen dil ki badi saphaai chaahiye। kahaavat bhi hai - sach to bitho nach। agar baap ke saath sachcha chalta rahe to satayug mein shreekrishna ke saath jaakar dance karenge। satayug mein shreekrishna ka dance hi mashhoor hai। raas leela, raadhe-krishna ki hi dikhaate hain। peechhe raamleela dikhaate hain। parantu number one mein raadhe-krishna ki raas leela hai kyonki is samay woh baap se bahut hi sachche bante hain to kitna oonch pad paate hain। haath to bahut uthaate hain, parantu maaya kaisi hai। pratigya karte hain to us par chalna pade na। maaya ke bhooton ko bhagaana hai। deh-abhimaan ke peechhe sab bhoot chatak jaate hain। baba kehte hain dehi-abhimaani ban baap ko yaad karo। usmein bhi savere-savere baith baaten karo। baba ki mahima karo। bhaktimaarga mein bhal yaad karte hain parantu mahima to koi ki hai nahin। shreekrishna ko yaad karenge। mahima karenge - maakhan churaaya, unko bhagaaya। akaasur, bakaasur ko maara, yeh kiya। bas aur kya kahenge। yeh hai sab jhooth। sach ki ratti nahin। phir raasta kya bataayenge! mukti ko hi nahin jaante। is samay saare vishwa par raavan ka raajya hai। sab is samay patit hain। manushya bhrashtaachaari ka arth bhi nahin samajhte hain। yeh bhi nahin jaante ki satayug mein nirvikaari devtaayen the। gaate bhi hain sarvagun sampanna, 16 kala sampoorn। parantu phir kah dete - vahaan bhi raavan, kans, jaraasandhi aadi the। kaha jaata hai pavitra bano, to kehte hain devtaaon ko bhi to bachche aadi the na। are, tum gaate ho sarvagun sampanna..sampoorn nirvikaari phir vikaar ki baat kaise ho sakti। tum bhi nirvikaari bano to kehte hain srishti kaise badhegi। bachche kaise paida honge। mandiron mein jaakar mahima gaate hain। ghar mein aane se woh mahima bhi bhool jaate hain। bhal tum jaanch karke dekho। ghar mein jaakar samjhaao to maanenge nahin। vahaan ki baat vahaan hi rahi। pavitra banne ke liye kaho to kahenge vaah! iske bigar duniya kaise chalegi। unko pata hi nahin ki viceless duniya kaise chalti hai।

bachchon ne geet bhi suna। pratigya karte hain - tumhaari mat par chalenge kyonki shreemat par chalne mein kalyaan hai। baap to kehte rehte hain shreemat par chalo, nahin to aakhir maut aa jaayega। phir tribunal mein sab bataana padega। tumne hi yeh paap kiye hain। apni mat par chalkar phir kalpa-kalpa ka daag lag jaayega। aise nahin ki ek baar fail hua to doosre teesre varsha mein padhega। nahin। abhi naapaas hua to kalpa-kalpa hota rahega, isliye purushaartha bahut karna hai। kadam-kadam shreemat par chalo। andar kuchh bhi ganda na rahe। hriday ko shuddh banaana hai। naarad ko bhi kaha na - apni shakla aaine mein dekho। to dekha main to bandar misal hoon। yeh ek drishtaanta hai। apne se poochhna hai ki ham kahaan tak shreemat par chal rahe hain। buddhiyog kahaan baahar to nahin bhatakta hai? deh-abhimaan mein to nahin hoon? dehi-abhimaani to service mein laga rahega। saara madaar yog par hai। bhaarat ka yog mashhoor hai। woh to niraakaar baap hi niraakaar bachchon ko samjhaate hain। isko kaha jaata hai sahaj raajayog। likha hua bhi hai niraakaar baap ne sahaj raajayog sikhaaya। sirf shreekrishna ka naam daal diya hai। tum jaante ho hamko aisa lakshmi-naaraayan banna hai। punya aatma banna hai। paap ki koi baat nahin। baap ki yaad mein hi rahkar unki service mein rehna hai। itna oonch pad paana hai to kuchh to mehnat karenge na। sannyaasi aadi to kah dete grihastha vyavhaar mein rah kamal phool samaan rahen, yeh ho nahin sakta। sampoorn banne mein bahut fail ho jaate hain kyonki yaad nahin kar sakte hain। abhi praacheen yog baap sikhla rahe hain। baap kehte hain yog to main svayan hi aakar sikhlaata hoon, ab mujhe yaad karo। tumko mere paas aana hai। yeh hai yaad ki yaatra। tumhaara sweet silence hom woh hai। yeh bhi jaante hain ki ham hi baap se poora varsa paayenge। to baap baar-baar samjhaate hain, pratigya par poore raho। bhool ho jaati hai to baap se kshama leni chaahiye।

dekho, yeh bachcha kshama lene liye khaas baba ke paas ek din ke liye aaya hai। thodi bhool hui hai to bhaaga hai kyonki dil ko khaata hai to samjha sammukh jaakar baba ko sunaayen। kitna baap ke prati regard hai। bahut bachche hain jo isse bhi jaasti vikarma karte rehte hain, pata bhi nahin padta। ham to kehte hain vaah bachcha, bada achha hai। thodi si bhool ki kshama lene aaya hai। baba ka hamesha kehna hai ki bhool bataakar kshama le lo। nahin to woh paap vriddhi ko paate rahenge। phir gir padenge। mukhya yog se hi bach sakenge। jis yog ki bahut kami hai। gyaan to bahut sahaj hai। yeh to jaise ek kahaani hai ki aaj se 5 hajaar varsha pahle kiska raajya tha, kaise raajya kiya, kitna samay kiya, phir raajya karte-karte kaise vikaaron mein phanse। koi ne chadhaai nahin ki। chadhaai to baad mein jab vaishya banen tab hui hai। unhon se to raavan ne raajya chheena। tum phir raavan par jeet paakar raajya lete ho, yeh bhi kiski buddhi mein mushkil baithta hai। tumhein baap se poora vaphaadaar, pharmaanbardaar hokar rehna hain। agyaankaal mein bhi koi vaphaadaar, pharmaanbardaar hote hain। koi naukar bhi bade imaandaar hote hain। laakhon roopaye pade rahen, kabhi ek bhi uthaayenge nahin। kehte hain - seth ji aap chaabiyaan chhod gaye the, ham sambhaal kar liye baithe hain। aise bhi hote hain। baap to bahut achhi reeti samjhaate rehte hain। vivek kehta hai ki is kaaran se maala ka daana nahin bante hain। phir vahaan jaakar daas daasinyaan banenge। nahin padhne se zaroor yeh haal hota hoga। shreemat par nahin chalte hain। baap samjhaate hain tumhaari manzil saari hai yog ki। maaya ekdam naak se pakad yog lagaane nahin deti। yog ho to service bahut achhi karen। paapon ka dar rahe। jaise yeh bachcha to bahut achha hai। sachchaai ho to aisi। achhe-achhe bachchon se inka pad achha hai। aur jo service karte rehte hain, woh kahaan na kahaan phanse rehte hain। kuchh bhi bataate nahin hain। kahne se chhodte bhi nahin hain। geet mein to dekho, pratigya karte hain ki kuchh bhi ho jaae, kabhi aisi bhool nahin karenge। mool baat hai deh-abhimaan ki।। deh-abhimaan se hi bhoolen hoti hain। bahut bhoolen karte hain isliye saavdhaani di jaati hai। baap ka kaam hai samjhaana। na samjhaaye to kahenge hamko koi ne samjhaaya thode hi। is par ek kahaani bhi hai। baap bhi kehte hain bachche khabardaar raho। nahin to bahut saja khaani padegi। phir aise nahin kehna ki hamko samjhaaya kyon nahin। baap saaph samjhaate hain thoda bhi paap karne se bahut vriddhi ho jaati hai। phir baap ke aage sir bhi nahin utha sakenge। jhooth bolne se to tobaan-tobaan karni chaahiye। aise nahin samjho ki shivbaaba hamko dekhte thode hi hain। are agyaan kaal mein bhi woh sab jaante hain tab to paap aur punya ka evja dete hain। saaph kehte hain ki tum paap karenge to tumhaare liye bahut badi kadi saja hai। baap se varsa lene aaye ho, to uske badle donon kaan to nahin kataana chaahiye na। kehte ek hain aur yaad karte hain doosron ko। baap ko yaad nahin karte to bataao unki gati kya hogi? sach khaana, sach bolna, sach pahanna..... yeh bhi abhi ki baat hai। jabki baap aakar sikhaate hain to unse har baat mein sachcha rehna chaahiye। achha!

aise sachche vaphaadaar, pharmaanbardaar bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachchaai se baap ki service mein lag jaana hai। poora vaphaadaar, pharmaanbardaar banna hai। eeshvareey parivaar se sachcha lav rakhna hai।

2) shreemat mein manmat va raavan ki mat mix nahin karni hai। ek baap doosra na koi is guarantee mein pakka rehna hai। hriday ko shuddh pavitra banaana hai।

vardaan:- roohaaniyat ki khushbu ke aadhaar par sarva ko parmaatma sandesh dene vaale vishwa kalyaankaari bhav

roohaaniyat ki sarvashaktiyaan svayan mein dhaaran kar lo to roohaaniyat ki khushbu sahaj hi anek aatmaon ko apne taraph aakarshit karegi। jaise mansa shakti se prakriti ko tamopradhaan se satopradhaan banaate ho vaise anya vishwa ki aatmaayen jo aap logon ke aage nahin aa sakengi unko door rehte hue bhi aap roohaaniyat ki shakti se baap ka parichay va mukhya sandesh de sakenge। yeh sookshm machinery jab tej karo tab anek tadaphti hui aatmaon ko anchali milegi aur aap vishwa kalyaankaari kahlaayenge।

slogan:- apne paas shuddh va shreshtha sankalp emerge rakho to vyartha svatah merge ho jaayenge।

ye avyakt ishaare - “nishchay ke foundation ko majboot kar sada nirbhay aur nishchint raho"

jis samay koi bhi paristhiti aaye to baap ko saathi bana lo to anubhav karenge ki main akela nahin hoon, mere saath vishesh shakti hai। jahaan baap hai vahaan chaahe kitne bhi toofaan hon, woh topha ban jaayenge। nishchay buddhi vijayanti - is title ki smriti se vijayi bano aur vijayi varsha manaao।