Daily Murli for Tuesday 7 April 2026

07-04-2026 praatahmurli om shanti "baapdaada"' madhuban

“meethe bachche - jab bhi samay mile to ekaanta mein baith sachche maashook ko yaad karo kyonki yaad se hi svarga ki baadshaahi milegi''

prashn:- baap mila hai to kaun sa albelaapan samaapta ho jaana chaahiye?

uttar:- kai bachche albele ho kehte hain ham to baba ke hain hi। yaad ki mehnat nahin karte। ghadi-ghadi yaad bhool jaati hai। yahi hai albelaapan। baba kehte bachche, agar yaad mein raho to andar sthaai khushi rahegi। kisi bhi prakaar ka ghutka nahin aayega। jaise baandheliyaan yaad mein tadaphti hain, din-raat yaad karti hain, aise tumhein bhi nirantar yaad rahni chaahiye।

geet:- takdeer jagaakar aai hoon…

om shanti। baap ne bachchon ko samjhaaya hai - tum bhi kehte ho om shanti। baap bhi kehte hain om shanti arthaat tum aatmaayen shant swaroop ho। baap bhi shant swaroop hai, aatma ka svadharma shant hai। paramatma ka bhi svadharma shant hai। tum bhi shantidham mein rahne vaale ho। baap bhi kehte hain - main bhi vahaan ka rahne vaala hoon। tum bachche punarjanma mein aate ho, main nahin aata। main is rath mein pravesh karta hoon। yeh mera rath hai। shankar se agar poochhenge, poochh to nahin sakte parantu samjho sookshm vatan mein jaakar koi poochhe to kahenge yeh sookshm shareer hamaara hai। shivbaaba kehte hain yeh hamaara shareer nahin hai। yeh hamne udhaar liya hai kyonki mujhe bhi karmendriyon ka aadhaar chaahiye। pahli-pahli mukhya baat samjhaani hai ki patit-paavan, gyaan ka saagar shreekrishna nahin hai। shreekrishna sarva aatmaon ko patit se paavan nahin banaate hain, vo to aakar paavan duniya mein raajya karte hain। pahle prince bante hain phir mahaaraaja bante hain। unmein bhi yeh gyaan nahin hai। rachna ka gyaan to rachta mein hi hoga na। shreekrishna ko rachna kaha jaata hai। rachta baap hi aakar gyaan dete hain। abhi baap rach rahe hain, kehte hain tum hamaare bachche ho। tum bhi kehte ho baba ham aapke hain। kaha bhi jaata hai brahma dvaara braahmanon ki sthaapna। nahin to brahman kahaan se aaye। sookshm vatan vaala brahma koi doosra nahin hai। oopar vaala so neeche vaala so oopar vaala। ek hi hai। achha vishnu aur lakshmi-naaraayan bhi ek hi baat hai। woh kahaan ke hain? brahma so vishnu bante hain। brahma-sarasvati hi so lakshmi-naaraayan phir vahi saara kalpa 84 janmon ke baad aakar sangam par brahma-sarasvati bante hain। lakshmi-naaraayan bhi manushya hain, unka devi devta dharma hai। vishnu ko bhi 4 bhujaayen di hain। yeh pravritti maarga dikhaaya hai। bhaarat mein shuru se hi pravritti maarga chala aata hai isliye vishnu ko 4 bhujaayen di hain। yahaan hai brahma-sarasvati, woh sarasvati adopted bachchi hai। inka asul naam lakheeraaj tha, phir inka naam rakha brahma। shivbaaba ne ismen pravesh kiya aur raadhe ko apna banaaya, naam rakha sarasvati। sarasvati ka brahma koi laukik baap nahin thahra। in donon ke laukik baap apne-apne the। abhi woh nahin hain। yeh shivbaaba ne brahma dvaara adopt kiya hai। tum ho adopted children। brahma bhi shivbaaba ka bachcha hai। brahma ke mukh kamal se rachte hain isliye brahma ko bhi maata kaha jaata hai। tum maat pita ham baalak tere, tumhari kripa se sukh ghanere.. gaate hain na। tum brahman aakar baalak bane ho। ismen samajhne ki buddhi badi achhi chaahiye। tum bachche shivbaaba se varsa lete ho। brahma koi svarga ka rachayita va gyaan saagar nahin hai। gyaan ka saagar ek hi baap hai। aatma ka baap hi gyaan ka saagar hai। aatma bhi gyaan saagar banti hai parantu inko gyaan saagar nahin kahenge kyonki saagar ek hi hai। tum sab nadiyaan ho। saagar ko apna shareer nahin hai। nadiyon ko hai। tum ho gyaan nadiyaan। kalkatta mein brahmaputra nadi bahut badi hai kyonki unka saagar se connection hai। unka mela bahut bada lagta hai। yahaan bhi mela lagta hai। saagar aur brahmaputra donon combined hain। yeh hai chaitanya, woh hai jad। yeh baaten baap samjhaate hain। shaastron mein nahin hain। shaastra hain bhakti maarga ki department। yeh hai gyaan maarga, woh hai bhakti maarga। aadhaakalpa bhakti maarga ki department chali hai। usmein gyaan saagar hai nahin। parampita paramatma, gyaan ka saagar baap sangam par aakar gyaan snaan se sabki sadgati karte hain।

tum jaante ho ki ham behad ke baap se svarga ke sukhon ki takdeer bana rahe hain। barobar ham satayug, treta mein poojya devi devta the। abhi ham pujaari manushya hain। phir manushya se tum devta bante ho। brahman so devta dharma mein aaye phir kshatriy, vaishya, shoodra banen। 84 janma lete-lete neeche utarna pada hai। yeh bhi tumko baap ne bataaya hai। tum apne janmon ko nahin jaante the। 84 janma bhi tum hi lete ho। jo pahle-pahle aate hain, vahi poore 84 janma lete hain। yog se hi khaad nikalti hai, yog mein hi mehnat hai। bhal kai bachche gyaan mein teekhe hain parantu yog mein kachche hain। baandheliyaan yog mein chhuteliyon se bhi achhi hain। woh to shivbaaba se milne ke liye raat-din tadaphti hain। tum mile ho। tumko kaha jaata hai yaad karo to tum ghadi-ghadi bhool jaate ho। tumko toofaan bahut aate hain। woh yaad mein tadaphti hain। tum tadaphte nahin ho। unhon ka ghar baithe bhi oonch pad ho jaata hai। tum bachche jaante ho - baba ki yaad mein rahne se hamko svarga ki baadshaahi milegi। jaise bachcha garbha se nikalne ke liye tadaphta hai। vaise baandheliyaan tadapte-tadapte pukaarti hain, shivbaaba is bandhan se nikaalo। din-raat yaad karti hain। tumko baap mila hai to tum albele ban pade ho। ham baba ke bachche hain। ham yeh shareer chhod jaae prince banenge, yeh andar sthaai khushi rahni chaahiye। parantu maaya yaad rakhne nahin deti। yaad se khushi mein bahut rahenge। yaad nahin karenge to ghutka khaate rahenge। aadhaakalpa tumne raavan raajya mein duhkh dekha hai। akaale mrityu hota aaya hai। duhkh to hai hi hai। bhal kitna bhi saahookaar ho, duhkh to hota hai। akaale mrityu ho jaati hai। satayug mein aise akaale nahin marte, kabhi beemaar nahin honge। samay par baithe-baithe aapehi ek shareer chhod doosra le lete hain। uska naam hi hai-sukhdhaam। manushya to svarga ki baaton ko kalpana samajhte hain। kahenge, svarga kahaan se aaya। tum jaante ho ham to svarga mein rahne vaale hain phir 84 janma lete hain। yeh saara khel bhaarat par hi bana hua hai। tum jaante ho ham 21 janma paavan devta the phir ham kshatriy, vaishya, shoodra bane। ab phir brahman bane hain। yeh svadarshan chakra bahut sahaj hai। yeh shivbaaba baith samjhaate hain।

tum jaante ho shivbaaba brahma ke rath mein aaya hai, jo brahma hai vahi satayug aadi mein shreekrishna tha। 84 janma le patit bane hain phir inmen baap ne pravesh kar adopt kiya hai। khud kehte hain mainne is tan ka aadhaar le tumko apna banaaya hai। phir tumko svarga ki raajdhaani ka laayak banaata hoon, jo laayak banenge vahi raajaai mein aayenge। ismen manners achhe chaahiye। mukhya hai hi pavitrata। is par ablaaon par atyaachaar hote hain। kahaan-kahaan purushon par bhi atyaachaar hote hain। vikaar ke liye ek do ko tang karte hain। yahaan maataayen bahut hone ke kaaran shakti sena naam gaaya hua hai, vande maatram। abhi tum gyaan-chita par baithe ho kaam-chita se utar gore banne ke liye। dvaapar se lekar kaam-chita par baithe ho। ek do ko vikaar dene ka hathiyaala vikaari brahman baandhate hain। tum ho nirvikaari brahman। tum woh cancel karaae gyaan-chita par bithaate ho। kaam-chita se kaale bane hain, gyaan-chita se gore ban jaayenge। baap kehte hain bhal ikatthe raho parantu pratigya karni hai ham vikaar mein nahin jaayenge, isliye baba angoothi bhi pahnaate hain। shivbaaba, baba bhi hai, saajan bhi hai। sabhi seetaaon ka raam hai। vahi patit-paavan hai। baaki raghupti raaghav raajaaraam ki baat nahin hai। usne sangam par hi yeh praalabdha paai thi। unko hinsak baan dikhaana wrong hai। chitra mein bhi nahin dena chaahiye। sirf likhna hai chandravanshi। bachchon ko samjhaana chaahiye shivbaaba is dvaara hamko yeh chakra ka raaz samjha rahe hain। satya-naaraayan ki katha hoti hai na। woh hai manushyon ki banaai hui katha। nar se naaraayan to koi bante nahin। satya naaraayan ki katha ka arth hi hai nar se naaraayan banna। amraktha bhi sunaate hain parantu amarpuri mein to koi jaate nahin। mrityulok 2500 varsha chalta hai। teejri ki katha maataayen sunti hain। vaastav mein yeh hai teesra gyaan ka netra dene ki katha। abhi gyaan ka teesra netra aatma ko mila hai to aatma-abhimaani banna hai। main is shareer dvaara ab devta banti hoon। mere mein hi sanskaar hain। manushya sab deh-abhimaani hain। baap aakar dehi-abhimaani banaate hain। log phir kah dete hain aatma paramatma ek hai। paramatma ne yeh sab roop dhaaran kiye hain। baap kehte hain yeh sab wrong hai, isko mithya abhimaan, mithya gyaan kaha jaata hai। baap batlaate hain main bindi misal hoon। tum bhi nahin jaante the, yeh bhi nahin jaante the। abhi baap samjhaate hain - ismen sanshay nahin aana chaahiye। nishchay hona chaahiye। baba zaroor satya hi bolte hain, sanshaybuddhi vinashyanti। woh poora varsa nahin paayenge। aatma-abhimaani banne mein hi mehnat hai। khaana pakaate buddhi baap ki taraph lagi rahe। har baat mein yeh practice karni chaahiye। roti belte, apne maashook ko yaad karte rehna - yeh abhyaas har baat mein chaahiye। jitna samay phursat mile yaad karna hai। yaad se hi tum satopradhaan banenge। 8 ghanta karma ke liye chhutti hai। beech mein bhi ekaanta mein jaakar baithna chaahiye, tumhein sabko baap ka parichay bhi sunaana hai। aaj nahin sunenge to kal sunenge। baap svarga sthaapan karte hain, ham svarga mein the abhi phir narkavaasi hue hain। ab phir baap se varsa milna chaahiye। bhaaratvaasiyon ko hi samjhaate hain। baap aate bhi bhaarat mein hi hain। dekho, tumhaare paas musalmaan log bhi aate hain, vo bhi centre sambhaalte hain। kehte hain shivbaaba ko yaad karo। sikkha bhi aate hain, Christian bhi aate hain, aage chalkar bahut aayenge। yeh gyaan sabke liye hai kyonki yeh hai hi sahaj yaad aur sahaj varsa baap ka। parantu pavitra to zaroor banna padega। de daan to chhoote grahan। abhi bhaarat par raahu ka grahan hai phir brahaspati ki dasha shuru hogi 21 janmon ke liye। pahle hoti hai brahaspati ki dasha। phir chakra ki dasha। sooryavanshiyon par brahaspati ki dasha, chandravanshiyon par chakra ki dasha kahenge। phir dasha kamti hoti jaati hai। sabse kharaab hai raahu ki dasha। brahaspati koi guru nahin hota hai। yeh dasha hai vrikshapti ki। vrikshapti baap aate hain to brahaspati aur chakra ki dasha hoti hai। raavan aate hain to raahu ki dasha ho jaati hai। tum bachchon par abhi brahaspati ki dasha baithti hai। sirf vrikshapti ko yaad karo, pavitra bano, bas। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har kaarya karte hue aatma-abhimaani banne ki practice karni hai। deh ka ahankaar samaapta ho jaae, iske liye hi mehnat karni hai।

2) satayugi raajaai ke laayak banne ke liye apne manners royal banaane hain। pavitrata hi sabse oonchi chalan hai। pavitra banne se hi pavitra duniya ke maalik banenge।

vardaan:- karan-karaavanhaar ki smriti dvaara sahjayog ka anubhav karne vaale saphaltaamoorta bhav

koi bhi kaarya karte yahi smriti rahe ki is kaarya ke nimitta banaane vaala backbone kaun hai। bina backbone ke koi bhi karma mein saphalta nahin mil sakti, isliye koi bhi kaarya karte sirf yeh socho main nimitta hoon, karaane vaala svayan sarva samartha baap hai। yeh smriti mein rakh karma karo to sahaj yog ki anubhooti hoti rahegi। phir yeh sahjayog vahaan sahaj raajya karaayega। yahaan ke sanskaar vahaan le jaayenge।

slogan:- ichchhaayen parchhaai ke samaan hain aap peeth kar do to peechhe-peechhe aayengi।

ye avyakt ishaare - mahaan banne ke liye madhurta aur namrata ka gun dhaaran karo

madhurta aisi vishesh dhaarna hai jo kadvi dharni ko bhi madhur bana deti hai। aap sabhi ko badalne ka aadhaar baap ke do madhur bol hain। meethe bachche tum meethi shuddh aatma ho। in do madhur bol ne hi badal diya। meethi drishti ne badal diya। aise hi madhurta dvaara auron ko bhi mudhar banaao। yeh mukh meetha karo। sada is madhurta ki saugaat ko saath rakho। isi se sada meetha rahenge aur meetha banaayenge।