Daily Murli for Monday 18 May 2026

18-05-2026 praatahmurli om shanti "baapdaada"' madhuban

“meethe bachche - isi roohaani nashe mein raho ki ham eeshvareey family ke hain, ham apni gupta daivi raajdhaani sthaapan kar rahe hain''

prashn:- bachchon mein kaun si aadat pakki ho to saara din khushi bani rahe?

uttar:- agar savere-savere uthkar vichaar saagar manthan karne ki aadat ho to saara din apaar khushi rahe। baap ki shreemat hai bachche, amritvele uthkar apne baap se meethi-meethi baaten karo। vichaar karo - ham abhi kis family ke hain। hamaara kartavya kya hai, agar buddhi mein rahe ki hamaari yeh eeshvareey family hai, ham apni nai raajdhaani sthaapan kar rahe hain to saara din khushi bani rahe।

om shanti। bachche jaante hain ki yeh roohaani parivaar hai, woh sab hai jismaani parivaar। yeh hai roohaani parivaar। roohaani baap ka yeh parivaar, jaise laukik ghar mein maa-baap, bachche hote hain, woh hua had ka parivaar। tum abhi behad ki family thahre। bachche gaate bhi hain tum maat-pita… to jaise family ho gaye। creator ki creation thahre। yoon to bachche unki creation hain, parantu jaante nahin hain। tum bachche abhi jaante ho, barobar behad baap ki yeh family hai। eeshvareey vishwa vidyaalay। inke liye gaaya hai vinaash kaale preet buddhi vijayanti। aisi family kabhi geeta mein nahin gaai hui hai। tum eeshvareey family; gupta daivi raajdhaani sthaapan kar rahe ho। kisko bhi pata nahin padta। tumko nasha hai, jo-jo baap ko yaad karenge, unko nasha rahega। deh-abhimaan mein aane se woh nasha utar jaayega। yeh eeshvareey family hai। hamko ghar jaana hai phir daivi raajdhaani mein aayenge। vahaan hai daivi family। woh aasuri family, yeh hai tumhaari eeshvareey family। roohaani baapdaada ke bachche behen-bhaai hain। bas yeh hai roohaani pravritti maarga। satayug mein eeshvareey family nahin kahenge। vahaan daivi family ho jaati hai। yeh eeshvareey family badi jabardasta hai। tum jaante ho abhi ham eeshvareey family, daivi raajya sthaapan kar rahe hain। aise-aise apne saath baaten karte, vichaar saagar manthan karna chaahiye। savere uthkar yaad mein baitho to vichaar saagar manthan karne ki aadat pad jaayegi। umang mein aate jaayenge। jab aur sab manushya neend mein soye rehte hain, tum us samay jaagte ho। tumhein savere-savere uthkar aise-aise khyaal karne chaahiye phir dekho tumko kitni khushi rehti hai। jo bhi shreemat milti hai us par chalna hai phir tumko khushi bahut hogi, eeshvareey family ki yaad aayegi। aasuri family se dil hat jaayegi। naya makaan jab bilkul taiyaar ho jaata hai to phir puraane se aasakti nikal jaati hai। jab tak naya nahin bana hai tab tak kuchh na kuchh marammat aadi karte rehte hain। phir dil hat jaati hai। yeh puraani duniya bhi aisi hai।

ab tum jaante ho yeh puraana ghar hai, ham naye ghar mein jaayenge। phir naya chola pahnenge। yeh deh bhi puraani hai। ab tum bhavishya 21 janmon ke liye raajya bhaagya le rahe ho। yahaan raajya nahin karna hai। yahaan hoti hai sthaapna। yeh baaten sirf tum hi jaante ho। hai bhi yeh geeta, raajayog hai na। ise kaha jaata hai sahaj raajayog। anek baar tum is raajayog abhyaas dvaara daivi raajya sthaapan karte ho। vahaan yeh baaten yaad nahin rahengi। agar vahaan yeh baaten yaad rahen to phir sukh hi na bhaase। chinta lag jaaye। is samay tumko gupta nasha hai। oonch te oonch baba ki yeh family hai। isko kaha jaata hai eeshvareey gupta family type। eeshvareey vishwa vidyaalay, eeshvareey yagya bhi kehte hain। family hai, hamko bahut lovely banna hai। bhavishya mein tum bahut lovely bante ho। tum ho roop-basanta। aatma roop bhi hai, basanta bhi hai। itni chhoti si aatma avinaashi part bajaati hai। is samay tum roop-basanta bane ho। baap gyaan ka saagar hai। gyaan zaroor denge tab jab is shareer mein aayenge। tum jaante ho - gyaan ki varsha barsaate hain। ek-ek ratna laakhon roopayon ka hai। ab tum aatmaon ko baap ka parichay mila hai। baap ne smriti dilaai hai। tumhaari buddhi mein hai - yeh 84 ka chakra kaise phirta hai isliye tumhaara naam hi hai - svadarshan chakradhaari। vishnu va lakshmi-naaraayan svadarshan chakradhaari nahin the, unmein yeh gyaan nahin hota। abhi aatma ko yeh gyaan milta hai। srishti ka chakra kaise phirta hai। bhal trimoorti kehte to bhi shiv nahin dikhaate। trimoorti ke chitra bahut dekhe honge। saakaar mein prajaapita brahma to yahaan hai na। yeh ho gaya bahut puraana, great-great grand father। to yeh hua praja-pita brahma ka sizra। baap srishti rachte hain, brahma dvaara। to brahma bada hua na। dikhaate bhi boodha hain। yeh 84 janmon ka chakra lagaaya hua hai। abhi tum in baaton ko samajh gaye ho। yeh bhi jaante ho ki baap ke to sab bachche hain। aatmaon ko baap ka parichay dena hai। abhi bhaarat ka bahut bada kalyaan ho raha hai। sab aatmaayen pavitra ho muktidhaam mein chali jaayengi। tum ho hi bhaarat ki seva par। bhaarat khaas duniya aam। tum abhi thode ho, jo in baaton ko samajhte ho phir nutshell mein samjhaaya jaata hai, bachche manamnaabhav। alag mein bhi samjhaaya jaata hai, jo kuchh hai daivi raajdhaani sthaapan karne mein lagaao। baapu gaandhi kya karte the! woh bhi raamraajya chaahte the। kaisa wonderful khel hai na! abhi tum saakshi ho khel dekhte ho। tumko hansi aati hai। kahaan ki baaten kahaan le jaate hain।

baap kehte hain - drama anusaar duniya ki gati buri ho gai hai phir baap aakar sadgati karte hain। tum bachchon ko nasha chadha hai। yeh hai saare world ke niraakaar baapu ji। yeh brahma bhi kiska bachcha hai? shivbaaba ka। woh kiska bachcha? yeh maataayen kehti hain - shivbaaba hamaara bachcha। yeh hai shivbaaba ka khelpaal। baaki dhyaan-deedaar mein to maaya ki bahut praveshta hoti hai। yeh jo kehte hain - hamaare mein shivbaaba aate hain। shivbaaba yeh bolte hain। yeh sab bhoot ki praveshta hai। tum bachchon ko khabardaar rehna hai। yeh bhoot ki beemaari aisi hai jo donon jahaan se uda deti hai। yeh kabhi bhi khyaal nahin aana chaahiye ki ham saakshaatkaar karen। yeh sab bhakti ke khyaalaat hain। gyaan maarga ko achhi reeti samajhna hai। maaya anek prakaar se dhokha deti hai। saakshaatkaar aadi se koi faayda nahin। baap kehte hain in dvaara sagaai karaate hain। baap ka pharmaan hai - tumko koi bhi dehdhaari ko yaad nahin karna hai। tum apne ko aatma samajh baap ko yaad karo। apne kalyaan ke liye baap ko yaad karna hai। yeh to bahut samajh ki baat hai। baba ko koi bhi samaachaar likh sakte hain। kai bachchon ko to itna bhi akla nahin ki behad ke baap ko chitthi mein apna khush-khairaaphat ka samaachaar likhen। laukik baap ko chitthi na likhen to aaraam hi fit jaata। yeh bhi behad ka baap hai। dekhte hain maas dedh chitthi nahin aati hai to samajhte hain, inko shaayad maaya kha gai, jo aise paarlaukik baap ko chitthi nahin likhte hain। itna to likhna chaahiye - baba, ham naaraayni nashe mein sadaiv rehte hain। aapki di hui yukti mein hi ham tatpar hain। to baba samjhenge khush-raazi hain। chitthi nahin likhenge to samjhenge beemaar hain। yaad mein hi nahin rehte hain। nahin to baba ko samaachaar dena hai, baba hamne yeh service ki hai, inko samjhaaya, inki buddhi mein poora nahin baitha। to phir yeh bhi samjhaayenge ki is reeti samjhaao।

bhakti maarga mein jo kuchh kehte hain, samajhte kuchh bhi nahin। mukhya baat - baap ko hi nahin jaante। baap ko jaanne se bhaarat sadgati ko paata hai। baap ko na jaanne kaaran bhaarat bilkul durgati ko pa leta hai। ab baap tum bachchon ko samjhaate hain - ham tumko sadgati mein le jaaoonga, baaki sabko mukti mein le jaaoonga। bhaarat jeevan mukti mein hai to baaki sab mukti mein hain। yeh change sivaae baap ke aur koi nahin kar sakta hai। sarva ka sadgati daata ek hi baap hai। sarva ki sadgati zaroor kalpa-kalpa sangam par hi hogi।

tum jaante ho ham aatmaon ka roohaani baap ek hai। unko aatma hi yaad karti hai। tumko bhakti maarga mein do baap hain। satayug mein hai ek baap। sangam par hain 3 baap। prajaapita brahma bhi to baap thahra na। shiv bhi baba hai। woh hai sarva aatmaon ka baap, unse hi varsa lena hai। unko yaad karne se hi vikarma vinaash honge। brahma ko yaad karne se vikarma vinaash nahin honge, isliye shivbaaba ko hi yaad karna hai। ham unke bane hain, yeh hai sachcha-sachcha real gyaan, roohaani baap ka roohaani bachchon prati। baaki sab hain deh-abhimaani। deh-abhimaani patit manushya jo kartavya karte hain woh patit hi karte hain। daan punya aadi jo bhi karte hain, woh sab patit hi banaate hain। raavan raajya mein yeh hota hi hai। ab baap aakar ordinance nikaalte hain। kehte hain - bachche khabardaar, vikaar mein nahin jaana, kaam par vijay paani hai। toofaan aadi to bahut aayenge। ismen phaan nahin hona chaahiye। maaya ke itne vikalpa aayenge jo agyaan kaal mein bhi nahin aaye honge, aise bhi vikalpa aate hain। kehte hain - bhakti maarga mein to badi khushi rehti hai। abhi aapko yaad karne chaahte hain to kar nahin sakte। bindi yaad nahin padti hai। badi cheez ho to yaad karen।

baba kehte hain ki tum shivbaaba kahkar yaad karo, is puraani duniya ko bhool jaao। tum shantidham mein yaad karo। sirf shantidham ko yaad nahin karna hai, baap ki yaad se hi vikarma vinaash honge। aatma ka sweet baap se lav chaahiye। aadhaakalpa ka lover hai। aatma kehti hai - ham aadhaakalpa aapko bhool gaye hain। yahaan braahmaniyaan jinko le aati hain, bahut khabardaari se nishchaybuddhi vaale ko hi aana hai। agar yahaan aakar phir jaae koi patit bana to danda braahmani par aa jaayega isliye braahmani par bahut responsibility hai। baba ne yeh rath liya hai। sab baaton ka anubhvi hai। yahaan to ganda ki baat nahin। aapas mein hansana, khelna, baatcheet karna iski koi mana nahin hai। baaki thoda bhi koi aatma se pyaar rakhenge to phir jaasti badhta jaayega। uski yaad aati rahegi isliye isse bhi paar jaana hai।

ab tum ghar mein baithe ho va satayug mein baithe ho? (ghar mein) baap bachchon ko ghar mein padhaate hain। tum sabka yeh ghar hai। jab baahar jaate ho to aise nahin kahenge। yahaan bahut achha nasha rahega। deh ka abhimaan chhodna hai। dehi-abhimaani bano to jaat-paat ka bhed sab nikal jaayega। puraani duniya tamopradhaan hai, unmein bhedbhaav aur hi badhta jaata hai। aage British government ke samay bhaashaaon ki khitpit nahin thi, ab din-pratidin phoot badhti jaati hai। phir satayug mein ek hi bhaasha hogi। koi bhedbhaav nahin hoga। achha।

meethe-meethe sikeeldhe bachchon prati-maata pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi dehdhaari ki yaad na aaye, iske liye kisi se bhi pyaar nahin karna hai। isse bhi paar jaana hai। bahut khabardaari rakhni hai। maaya ke vikalpon se ghabraana nahin hai, vijayi banna hai।

2) dhyaan deedaar mein maaya ki bahut praveshta hoti hai is bhoot praveshta se apne ko bachaana hai। baap ko apna sachcha-sachcha samaachaar dena hai।

vardaan:- har baat mein saar ko grahan kar all-round banne vaale saral purushaarthi bhav

jo bhi baat dekhte ho, sunte ho - uske saar ko samajh lo aur jo bol bolo, jo karma karo usmein saar bhara hua ho to purushaartha saral ho jaayega। aisa saral purushaarthi sab baaton mein all-round hota hai। usmein koi bhi kami dikhaai nahin deti। koi bhi baat mein himmat kam nahin hoti, mukh se aise bol nahin nikalte ki ham yeh nahin kar sakte। aise saral purushaarthi svayan bhi saralchit rehte hain aur doosron ko saralchit bana dete hain।

slogan:- saadhan use karte unke prabhaav se nyaare aur baap ke pyaare bano।

ye avyakt ishaare - sada achal, adol, ekras sthiti ka anubhav karo

ekras sthiti banaane ke liye sivaae ek ke aur kuchh bhi dekhte hue na dekho। yeh jo kuchh dekhte ho yeh koi bhi vastu rahne vaali nahin hai। to ekras, stheriyam tab rah sakenge jab koi bhi drishya dekhte kyon, kya ki utpati na ho, yahi vyartha sankalpon ki halchal ka kaaran hai। is queue ki samaapti ke baad hi sampoornata aayegi।