Daily Murli for Tuesday 26 May 2026

26-05-2026 praatahmurli om shanti "baapdaada"' madhuban

“meethe bachche - sada isi khushi mein raho ki svayan bhagwan humein teacher bankar padhaate hain, ham unse raajayog seekh rahe hain, praja yog nahin''

prashn:- is padhaai ki khoobi kaun si hai? tumhein kab tak purushaartha karna hai?

uttar:- yeh padhaai jo bahut samay se karte aa rahe hain, unse naye bachche teekhe chale jaate hain। yeh bhi khoobi hai jo 3 maas ke teekhi buddhi vaale (teevra purushaarthi) naye bachche puraanon se bhi aage ja sakte hain। tumhein purushaartha tab tak karna hai jab tak poore paas na ho, karmaateet avastha na ho, sab hisaab-kitaab chhoot na jaayen।

om shanti। bachche kahaan baithe hain? behad ke baap ke school mein। bahut hi ooncha nasha hona chaahiye bachchon ko। kiske bachchon ko? behad ke baap ke bachchon ko athva roohaani bachchon ko। baap roohon ko hi padhaate hain। gujraati va maraathi ko nahin padhaate hain। woh to naam-roop ho gaya। baap padhaate hi hain roohon ko। tum bachche bhi samajhte ho hamaara behad ka baap vahi hai, jisko bhagwan kehte hain। bhagvaanuvaach bhi hai zaroor parantu bhagwan kisko kaha jaata hai - yeh samajhte nahin hain। kehte bhi hain shiv paramatma namah। paramatma to ek hi hai। woh hai oonch te oonch niraakaar। tumko shreekrishna bhagwan nahin padhaate। na padhaaya tha। tum jaante ho ham aatmaon ka baba hamko padha rahe hain। bhagwan to niraakaar hi thahra। shiv ke mandir me jaate hain, unki pooja bhi karte hain to zaroor koi cheez hai। naam-roop se nyaari koi cheez thode hi hoti hai। yeh bhi tum ab samajhte ho। saari duniya mein koi bhi nahin jaante hain। tum bhi abhi jaanne lag pade ho। bahut samay se jaante aaye ho। aise bhi nahin bahut samay se aane vaalon se naye teekhe nahin ja sakte hain। yeh bhi khoobi hai। 3 maas ke naye bachche bhi bahut teekhe ho sakte hain। kehte hain, baba is aatma ki buddhi bahut teekhi hai। naye jab sunte hain to bade gad-gad hote hain। hain to sab godly student। niraakaar baap gyaan ka saagar padha rahe hain। bhagvaanuvaach bhi gaaya hua hai। parantu kab? woh bhool gaye hain।

abhi tum bachche jaante ho - aise bhi koi hote hain, jinka baap teacher hota hai। parantu woh sirf ek hi subject padhaayenge, doosri subject liye doosra teacher padhaayenge। yahaan to baap sab bachchon ka teacher hai। yeh wonderful baat hai। dher bachche hain, jinko nishchay hai shivbaaba hamko padhaate hain। shreekrishna ko baba kah nahin sakte। shreekrishna ko aise teacher, guru bhi nahin samajhte। yeh to practical padha rahe hain। tum bhinna-bhinna prakaar ke students baithe ho। baba teacher padhaate hain, jab tak tum paas ho jaao। karmaateet avastha ko pa lo tab tak purushaartha karna hai। karmon ke hisaab-kitaab se chhootna hai। tumhein andar mein badi khushi honi chaahiye - baba hamko aisi duniya mein le jaate hain aur koi aise school hote nahin jo bachche baithe hon aur samjhen paramdham nivaasi baba aakar humein padhaayenge। abhi tum yahaan baithte ho to samajhte ho hamaara behad ka baba hamko padhaane ke liye aate hain। to andar mein badi khushi honi chaahiye। baba hamko raajayog sikha rahe hain। yeh praja yog nahin, yeh hai raajayog। is yaad se hi bachchon ko khushi ka paara chadhna chaahiye। kitna bada imtahaan hai aur tum baithe kitne saadhaaran ho। jaise musalmaan log bachchon ko dari par baith padhaate hain। tum is nishchay se yahaan aate ho। ab baap ke sammukh baithe ho। baba bhi kehte hain main gyaan ka saagar hoon। main kalpa-kalpa aakar raajayog sikhaata hoon। shreekrishna ke 84 janma kaho va brahma ke 84 janma kaho, baat ek hi hai। brahma so shreekrishna hai। yeh buddhi mein achhi reeti dhaaran karna hai। baap ke saath bada lav rehna chaahiye। ham aatmaayen us baap ke bachche hain, parampita paramatma aakar hamko padhaate hain। shreekrishna to ho na sake। aise thode hi shreekrishna ne padhaaya hoga। taaj aadi utaar kar aaya hoga! ab padhaane vaala to bujurga chaahiye। baap kehte hain mainne bujurga tan liya hai, yeh fix hai। shivbaaba brahma dvaara hi padhaate hain। kehte bhi hain barobar parampita paramatma brahma dvaara sthaapna karte hain। ab brahma kahaan se aaya, yeh samajhte nahin hain। baap baith ghadi-ghadi bachchon ko sujaag karte hain। maaya phir sula deti hai। ab tum sammukh baithe ho, samajhte ho ki main tumhaara roohaani baap hoon। mujhe jaante ho na। gaate bhi hain parampita paramatma gyaan ke saagar hain, patit-paavan, duhkh harta, sukh karta hain। shreekrishna ke liye yeh kabhi nahin kahenge। sabko ikattha to padha nahin sakte। madhuban mein murli chalti hai, woh phir sab centres par jaati hai। tum abhi sammukh ho। jaante ho kalpa pahle bhi baba ne aise padhaaya tha। yahi samay tha jo past ho gaya। woh phir abhi present hona hai। bhaktimaarga ki baaten to ab chhod deni hain। abhi tumhaari gyaan se preet, padhaane vaale se preet hai। koi-koi jab teacher se padhte hain to unko saugaat dete hain। yeh baba to khud hi saugaat dete hain। yahaan aakar saakaar mein bachchon ko dekhte hain, yeh hamaare bachche hain। yeh bhi bachchon ko gyaan hai - sab 84 janma nahin lete hain। koi ka ek janma to bhi usmein sukh-duhkh paas karenge। abhi tum in sab baaton ko samajh gaye ho। yeh manushya srishti ka sijra hai। pahle number mein hain brahma-sarasvati, aadi dev, aadi devi। peechhe phir anek dharma hote jaate hain। woh hai sarva aatmaon ka beej। baaki sab hain patte। prajaapita brahma sabka baap hai। is samay prajaapita haazir hai। yeh baith shoodra se convert kar brahman banaate hain। aise koi kar na sake। baap hi tumko shoodra se brahman banaae phir devta banaane liye padha rahe hain। yeh hai hi sahaj raajayog ki padhaai। raaja janak ne bhi second mein jeevanmukti ko paaya arthaat svargavaasi ban gaya। manushya gaate to rehte hain parantu phir bhi samjha nahin sakte। ab baap kehte hain bachche dehi-abhimaani bano। tum ashareeri aaye the, phir shareer lekar part bajaaya। barobar 84 janma liye hain। baap jo truth hai, woh satya hi bataayenge। raajdhaani hui na। raajayog ek thode hi seekhenge। tum sab abhi kaanton se phool ban rahe ho। kaanta aur phool kisko kehte hain - yeh bhi ab tum samajh rahe ho। yeh hai hi chhi-chhi kaanton ki duniya। ham 84 janmon ka chakra lagaae narkavaasi hue hain। phir se world ki history-geography repeat karenge। ham phir se zaroor svargavaasi banenge। kalpa-kalpa ham bante hain। ghadi-ghadi yeh yaad karna hai aur knowledge samjhaani hai। yeh lakshmi-naaraayan sooryavanshi the। Christ aaya unke pahle bahut thode the, raajdhaani nahin thi। ab baap aakar satayugi raajdhaani sthaapan karte hain। sthaapna hoti hi hai sangam par। abhi tumhaari buddhi mein hai ki yeh hai - sachcha-sachcha kumbha ka mela। aatmaayen anek hain, paramatma ek hai। paramatma baap bachchon ke paas aate hain paavan banaane। isko hi sangamayug ka, kumbha ka mela kaha jaata hai। abhi tumko gyaan ka teesra netra mila hai। baap aakar svargavaasi banaate hain phir narka puraani duniya ka vinaash zaroor hona chaahiye। kalpa-kalpa vinaash hota hi hai। nai so puraani, puraani so nai hoti hai। yeh to zaroor hoga। nai ko svarga, puraani ko narka kaha jaata hai। abhi to kitni manushyon ki vriddhi hoti jaati hai। anaaj nahin milta hai to samajhte hain ham bahut anaaj paida karenge, parantu bachche kitne paida hote rehte hain। anaaj kahaan se laayenge।

abhi tum bachchon ko yeh khaatiri hai ki ye saari puraani duniya khatma honi hai। manushyon ko yeh gyaan achha bhi lagta hai parantu buddhi mein kuchh bhi baithta nahin hai। tumhaari buddhi mein hai narka ke baad svarga aayega। satayug ke devi-devta hokar gaye hain। yeh lakshmi-naaraayan bhaarat ke maalik the, chitra hain। satayug mein hai aadi sanaatan devi-devta dharma। abhi apne ko devta dharma ke kahlaate nahin hain, uske badle hindu kah dete hain। bachche achhi tarah jaante hain ki ham yeh (devi-devta) ban rahe hain। baba hamko padha rahe hain, in organs dvaara। baba kehte hain - nahin to main tumko padhaaoon kaise। aatmaon ko hi padhaate hain kyonki aatma mein hi khaad padti hai। abhi tumko sachcha sona banna hai, golden ez se silver ej mein aaye arthaat chaandi ki khaad padne se tum chandravanshi ban jaate ho। satayug mein golden ej mein the, vahi phir neeche utarte hain phir vriddhi bhi ho jaati hai। abhi tumhaari buddhi mein hai - ham golden, silver, copper, iron mein 84 ka chakra lagaakar aaye hain। anek baar yeh part bajaaya hai, is part se koi bhi chhoot nahin sakta hai। vo kehte hain, hamko moksha chaahiye lekin vaastav mein tang to tumko hona chaahiye। 84 ka chakra to tumne lagaaya hai। manushya to samajhte hain aana aur jaana hota hi rehta hai, inse kyon na ham chhooten। parantu yeh to ho na sake। guru log bhi kah dete hain - tum moksha ko paayenge। brahm ko yaad karo to brahm mein leen ho jaayenge। anek mat-mataantar bhaarat mein hi hain aur koi khanda mein itne nahin hain। dher ki dher mat hain, ek na mile doosre se। riddhi-siddhi bhi bahut seekhte hain। koi kesar nikaalte, koi kya… ismen manushya bahut khush hote hain। yeh to hai spiritual knowledge। tum jaante ho - spiritual father hai, ham aatmaon ka baap। roohaani baba roohon se baat karte hain। satya naaraayan ki katha aakar sunaate hain va amraktha sunaate hain, jisse amarlok ka maalik banaate hain, nar se naaraayan banaate hain। phir kaudi misal ban padte hain। abhi tumko heere jaisa anmol janma mila hai phir kaudiyon pichhaadi kyon ganvaate ho। yeh duniya hi baaki kitne varsha hogi! kitne ladaai-jhagde hote rehte hain, sab khatma ho jaayenge। maut saamne khada hai phir itne laakh, karod kaun baith khaayenge। kyon nahin inko saphal karna chaahiye! yeh roohaani college kholne se manushya ever healthy, wealthy, happy ban jaate hain। so bhi yeh combined hai - hospital aur university। health, wealth, happiness to hai hi। barobar yog se aayu bhi badi milti hai। kitne tum healthy bante ho, phir kaaroon ka khajaana bhi milta hai। allaah avaldeen ka naatak dikhaate hain na। tum jaante ho allaah jo aadi sanaatan devi-devta dharma sthaapan karte hain, usmein bahut sukh hai। naam hi hai svarga। tum shantidham ke rahvaasi the phir tum pahle-pahle sukhdhaam mein aaye phir 84 janma lete neeche girte aaye ho। kalpa-kalpa ham tum bachchon ko aise baith samjhaate hain। tum apne janmon ko nahin jaante ho, main tumko bataata hoon। tumne 84 janma liye hain, yeh chola patit hai। aatma bhi tamopradhaan ho gai hai। baba right kehte hain। baba kabhi wrong kahenge nahin। woh hai hi truth। satayug hai hi viceless world, righteous duniya। phir raavan unrighteous banaate hain। yeh hai hi jhooth khanda। gaate bhi hain jhoothi maaya, jhoothi kaaya... kaun sa sansaar? yeh saara puraana sansaar jhootha hai। satayug mein sachcha sansaar tha। duniya ek hi hai, do duniya nahin hain। nai duniya se phir puraani hoti hai। naye makaan, puraane makaan mein farka to hota hai। naya bankar taiyaar hota hai to samajhte hain naye mein baithenge। yahaan bhi bachchon ke liye naya makaan banaate hain, bahut bachche hote jaayenge। tum bachchon ko to bahut khushi honi chaahiye। baap kehte hain mujh gyaan saagar ke bachche sab kaam chita par baith bichaare ekdam jal gaye hain। ab phir unko gyaan chita par bithaate hain। gyaan chita par bithaae svarga ka maalik banaate hain। kaam chita par baithne se bilkul hi kaale ban gaye hain। shreekrishna ko shyaam-sundar naam diya hai। parantu arth koi samajh nahin sakte। ab tum kya se kya bante ho! baap kaudi se heere misal banaate hain to phir itna attention dena chaahiye। baap ko yaad karna chaahiye। yaad se hi tum svarga ke maalik banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is heere tulya anmol jeevan ko kaudiyon ke peechhe nahin ganvaana hai। maut saamne khada hai isliye apna sab kuchh roohaani seva mein saphal karna hai।

2) padhaai aur padhaane vaale se sachchi preet rakhni hai। bhagwan hamko padhaane aate hain, is khushi mein rehna hai।

vardaan:- catching power dvaara apne asli sanskaaron ko catch kar unka svarup banne vaale shaktishaali bhav

purushaartha ka mukhya aadhaar catching power hai। jaise saainsadaan bahut pahle ke sound ko catch karte hain aise aap silence ki shakti se apne aadi daivi sanskaar catch karo, iske liye sadaiv yahi smriti rahe ki main yahi tha aur phir ban raha hoon। jitna un sanskaaron ko catch karenge utna uska swaroop banenge। 5 hajaar varsha ki baat itni spashta anubhav mein aaye jaise kal ki baat hai। apni smriti ko itna shreshtha aur spashta banaao tab shaktishaali banenge।

slogan:- brahman jeevan ka shvaas khushi hai, shareer bhal chala jaae lekin khushi na jaae।

ye avyakt ishaare - sada achal, adol, ekras sthiti ka anubhav karo

ek dhak se sauda karne vaale ek ke hone kaaran sada ekras rehte hain। baaki jo thoda-thoda karke sauda karte hain - ek ke bajaae do naav mein paanv rakhne vaale hain, woh sada koi na koi uljhan ki halchal mein, ekras nahin bante hain, isliye sauda karna hai to second mein karo। dil ke tukde-tukde nahin karo।