Daily Murli for Friday 19 June 2026

19-06-2026 praatahmurli om shanti "baapdaada"' madhuban

“meethe bachche - shivbaaba tumhaare phool aadi sveekaar nahin kar sakte kyonki woh poojya va pujaari nahin bante, tumhein bhi sangam par phool haar nahin pahanne hain''

prashn:- bhavishya raajya takhta ke adhikaari kaun bante hain?

uttar:- jo abhi maat-pita ke diltakhta ko jeetne vaale hain, vahi bhavishya takhtansheen bante hain। wonder hai bachche maat-pita par bhi vijay praapta karte hain। mehnat kar maat-pita se bhi aage jaate hain।

geet:- chhod bhi de aakaash sinhaasan…

om shanti। meethe-meethe sikeeldhe bachchon ne geet suna। is geet se sarvavyaapi ka gyaan to ud jaata hai। yaad karte hain, ab bhaarat bahut duhkhi hai। drama anusaar yeh sab geet bane hain। duniya vaale nahin jaante। baap aate hain patiton ko paavan karne va duhkhiyon ko duhkh se liberate kar sukh dene liye। bachche jaan gaye hain - vahi baap aaya hua hai। bachchon ko pahchaan mil gai hai। svayan baith batlaate hain - main saadhaaran tan mein pravesh kar saari srishti ke aadi-madhya-ant ka raaz sunaata hoon। srishti ek hi hai, sirf nai aur puraani hoti hai। jaise shareer bachpan mein naya hota hai phir puraana hota hai। naya shareer, puraana shareer do shareer to nahin kahenge। hai ek hi sirf naye se puraana banta hai। vaise duniya ek hi hai। naye se ab puraani hoti hai। nai kab thi? yeh phir koi bata na sake। baap aakar samjhaate hain, bachche jab nai duniya thi to bhaarat naya tha। satayug kaha jaata tha। vahi bhaarat phir puraana bana hai। isko puraani, old world kaha jaata hai। new world se phir old bani hai phir unko naya zaroor banna hai। nai duniya ka bachchon ne saakshaatkaar kiya hai। achha us nai duniya ke maalik kaun the? barobar yeh lakshmi-naaraayan the। aadi sanaatan devi-devta us duniya ke maalik the। yeh baap bachchon ko samjha rahe hain। baap kehte hain - ab nirantar yahi yaad karo। baap paramdham se hamko padhaane, raajayog sikhaane aaye hue hain। mahima saari us ek ki hai, inki mahima kuchh nahin hai। is samay sab tuchchha buddhi hain, kuchh nahin samajhte isliye main aata hoon tab to geet bhi banaaya hua hai। sarvavyaapi ka gyaan to ud jaata hai। har ek ka part apna-apna hai।

baap baar-baar kehte hain - deh-abhimaan chhod tum aatma-abhimaani bano aur organs dvaara shiksha dhaaran karo। bhal is baba ko chalte-phirte dekhte ho parantu yaad shivbaaba ko karo। aise hi samjho shivbaaba hi sab kuchh karte hain। brahma hai nahin। bhal inka roop in aankhon se dikhaai padta hai। tumhaari buddhi shivbaaba ki taraph jaani chaahiye। shivbaaba na ho to inki aatma, inka shareer koi kaam ka nahin। hamesha samjho ismen shivbaaba hai। woh in dvaara padhaate hain। tumhaara yeh teacher nahin hai। supreme teacher woh hai। yaad unko karna hai। kabhi bhi jisma ko yaad nahin karna hai। buddhiyog baap ke saath lagaana hai। bachche yaad karte hain phir se aakar gyaan-yog sikhaao, parampita paramatma ke sivaae koi raajayog sikha na sake। bachchon ki buddhi mein hai vahi baith geeta ka gyaan sunaate hain phir yeh knowledge praayahlop ho jaata hai। vahaan darkaar hi nahin। raajdhaani sthaapan ho gai। sadgati ho jaati hai। gyaan diya jaata hai durgati se sadgati hone ke liye। baaki woh to sab hain bhakti maarga ki baaten। manushya jap-tap, daan-punya aadi jo kuchh karte hain, sab bhakti maarga ki baaten hain, isse mujhe koi mil nahin sakta। aatma ke pankh toot gaye hain। pattharbuddhi ban gai hai। patthar se phir paaras banaane mujhe aana pade। baap kehte hain - ab kitne manushya hain। sarson misal sansaar bhara hua hai। ab sab khatma ho jaane hain। satayug mein to itne manushya hote nahin। nai duniya mein vaibhav bahut aur manushya thode honge। yahaan to itne manushya hain jo khaane ke liye bhi nahin milta hai। puraani reteeli jameen hai phir nai ho jaayegi। vahaan hai hi everything new। naam hi kitna meetha hai - heaven, bahishta, devtaaon ki nai duniya। puraani ko tod nai mein baithne ki dil hoti hai na। ab hai nai duniya, svarga mein jaane ki baat। ismen puraane shareer ki koi value nahin hai। shivbaaba ko to koi shareer hai nahin।

bachche kehte hain - baba ko haar pahnaayen। parantu inko haar pahnaayenge to tumhaara buddhiyog ismen chala jaayega। shivbaaba kehte hain haar ki darkaar nahin hai। tum hi poojya bante ho। pujaari bhi tum bante ho। aapehi poojya aapehi pujaari। to apne hi chitra ki pooja karne lagte hain। baba kehte hain main na poojya banta hoon, na phool aadi ki darkaar hai। main kyon yeh pahnoon isliye kabhi phool maala aadi lete nahin hain। tum poojya bante ho phir jitna chaahiye utna phool pahanna। main to tum bachchon ka most beloved obedient father bhi hoon, teacher bhi hoon, servant bhi hoon। bade-bade royal aadmi jab neeche sahi daalte hain to likhte hain Minto, Curzon aadi... apne ko lord kabhi nahin likhenge। yahaan to shri lakshmi-naaraayan, shri phalaana। ekdam shri akshar daal dete hain। to baap baith samjhaate hain ab is shareer ko yaad nahin karo। apne ko aatma nishchay karo aur baap ko yaad karo। is puraani duniya mein aatma aur shareer donon hi patit hain। sona 9 carat hoga to jevar bhi 9 carat। sone mein hi khaad padti hai। aatma ko kabhi nirlep nahin samajhna chaahiye। yeh gyaan tumko abhi hai। tum aadhaakalpa 21 janma liye praalabdha paate ho to kitna purushaartha karna chaahiye! parantu bachche ghadi-ghadi bhool jaate hain। shivbaaba, brahma dvaara hamko shiksha de rahe hain। brahma ki aatma bhi unko yaad karti hai। brahma, vishnu, shankar hain sookshmavtanvaasi। baap pahle sookshm srishti rachte hain, nirvaandhaam oonch te oonch dhaam hai। aatmaon ka nirvaandhaam sabse oonch hai। ek bhagwan ko sab bhakta yaad karte hain। parantu tamopradhaan ban gaye hain to baap ko bhool, thikkar-bhittar sabki pooja karte rehte hain। ham jaante hain jo kuchh chalta hai drama shoot hota jaata hai। drama mein ek baar jo shooting hoti hai। samjho beech mein koi panchhi aadi udta hai to vahi ghadi-ghadi repeat hota rahega। patang udta hua shoot ho gaya to phir-phir repeat hota rahega। yeh bhi drama ka second-second repeat hota jaata hai। shoot hota rehta hai। yeh bana banaaya drama hai। tum actors ho saare drama ko saakshi ho dekhte ho। ek-ek second drama anusaar paas hota hai। patta hila, drama paas hua। aise nahin patta-patta bhagwan ke hukm se chalta hai। nahin, yeh sab drama mein noondh hai। inko achhi reeti samajhna padta hai। baap hi aakar raajayog sikhlaate hain aur drama ki knowledge dete hain। chitra bhi kitne achhe bane hue hain। sangamayug par ghadi ka kaanta bhi laga hua hai। kaliyug ant satayug aadi ka sangam hai। abhi puraani duniya mein anek dharma hain। nai duniya mein phir yeh nahin honge। tum bachche hamesha aise samjho - hamko baap padhaate hain, ham godly student hain। bhagvaanuvaach - main tumko raajaaon ka raaja banaata hoon। raaje log bhi lakshmi-naaraayan ko poojte hain। to unhon ko poojya banaane vaala main hoon। jo poojya the woh ab pujaari ho gaye hain। tum bachche samajh gaye ho ham so poojya the phir ham so pujaari bane। baba to nahin bante hain। baba kehte hain, na main pujaari hoon, na poojya banta hoon isliye main na haar pahanta hoon, na pahnaane padte hain। phir ham kyon phoolon ko sveekaar karen। tum bhi sveekaar nahin kar sakte ho। kaayde anusaar un devtaaon ka hak hai, unki aatma aur shareer pavitra hai। vahi hakdaar hain phoolon ke। vahaan svarga mein to hain hi khushboodaar phool। phool hote hi hain khushbu ke liye। pahanne ke liye bhi hote hain। baap kehte hain - abhi tum bachche vishnu ke gale ka haar bante ho। nambarvaar tumko takhta par baithna hai। jinhonne jitna kalpa pahle purushaartha kiya hai, ab karte hain aur karne lag padenge। nambarvaar to hain। buddhi kehti hai phalaana bachcha bahut serviceable hai। jaise dukaan mein hota hai, seth bante hain, bhaageedaar bante hain, manager bante hain। neeche vaalon ko bhi lift milti hai। yeh bhi aise hai। tum bachchon ko bhi maat-pita par jeet paani hai। tum wonder khaate ho - maat-pita se aage kaise ja sakte hain। baap to bachchon ko mehnat kar laayak banaate hain, takhtansheen banaane liye isliye kehte hain, ab hamaare dil roopi takhta par jeet pahanne se bhavishya ke takhtansheen banenge। purushaartha itna karo, jo nar se naaraayan bano। em object mukhya hai hi ek, phir kingdom sthaapan ho rahi hai to usmein variety pad hai।

tumhein maaya ko jeetne ka poora-poora purushaartha karna hai। bachchon aadi ko bhi bhal pyaar se chalaao parantu trustee hokar raho। bhakti maarga mein kehte the na - prabhu yeh sab aapka diya hua hai। aapki amaanat aapne le li। achha phir rone ki baat hi nahin parantu yeh to hai hi rone ki duniya। manushya kathaayen bahut sunaate hain। mohjeet raaja ki katha bhi sunaate hain। phir koi duhkh feel nahin hota hai। ek shareer chhod jaae doosra liya। vahaan kabhi koi beemaari aadi hoti nahin। ever healthy, nirogi kaaya rehti hai, 21 janma ke liye। bachchon ko sab saakshaatkaar hota hai। vahaan ki rasamrivaaj kaise chalti hai, kya dress pahante hain। svayanvar aadi kaise hote hain - sab bachchon ne saakshaatkaar kiya hai। woh part sab beet gaya। us samay itna gyaan nahin tha। ab din-pratidin tum bachchon mein taakat bahut aati jaati hai। yeh bhi sab drama mein noondha hua hai। wonder hai na। parampita paramatma ka bhi kitna bhaari part hai। khud baith samjhaate hain bhakti maarga mein bhi oopar baith main kitna kaam karta hoon। neeche to kalpa mein ek hi baar aata hoon। bahut, niraakaar ke pujaari bhi hote hain parantu niraakaar paramatma kaise aakar padhaate hain, yeh baat gum kar di hai। geeta mein bhi shreekrishna ka naam daal diya hai to niraakaar se preet hi toot gai hai। yeh to paramatma ne hi aakarke sahaj yog sikhlaaya aur duniya ko badlaaya, duniya badalti rehti hai। yug phirte rehte hain। is drama ke chakra ko abhi tum samajh gaye ho। manushya kuchh nahin jaante। satayug ke devi-devtaaon ko bhi nahin jaante। sirf devtaaon ki nishaaniyaan rah gai hain, to baap samjhaate hain, hamesha aise samjho ham shivbaaba ke hain। shivbaaba hamko padhaate hain। shivbaaba, is brahma dvaara hamesha shiksha dete hain। shivbaaba ki yaad mein phir bahut maza aata rahega। aisa god father kaun? woh father bhi hai, teacher bhi hai, satguru bhi hai। kai baap bachchon ko padhaate bhi hain to woh zaroor kahenge hamaara yeh father, teacher hai parantu woh father guru bhi ho, aise nahin hote hain। haan teacher ho sakta hai। father ko guru kabhi nahin kahenge। inka (baba ka) father teacher bhi tha, padhaate the। woh hai had ka father teacher। yeh hai behad ka father teacher। tum apne ko godly student samjho to bhi aho saubhaagya। god father padhaate hain, kitna clear hai। to kitna meetha baba hai। meethi cheez ko yaad kiya jaata hai। jaise aashik-maashook ka pyaar hota hai। unka vikaar ke liye pyaar nahin hota hai। bas ek do ko dekhte rehte hain। tumhaara phir hai aatmaon ka paramatma baap ke saath yog। aatma kehti hai baba kitna gyaan ka saagar, prem ka saagar hai। is patit duniya, patit shareer mein aakar hamko kitna oonch banaate hain। gaayan bhi hain - manushya se devta kiye karat na laagi vaar। second mein vaikuntha mein jaate hain। second mein manushya se devta ban padte hain। yeh hai em object। uske liye padhaai karni chaahiye। guru naanak ne bhi kaha hai na moot paleeti kapad dhoe... lakshya soap hai na। baba kehte hain main kitna achha dhobi hoon। tumhaare vastra, tumhaari aatma aur shareer kitna shuddh banaata hoon। to inko (daada ko) kabhi yaad nahin karna hai। yeh saara kaarya shivbaaba ka hai, unko hi yaad karo। inse meetha woh hai। aatma ko kehte hain tumko in aankhon se yeh brahma ka rath dekhne mein aata hai parantu tum yaad shivbaaba ko karo। shivbaaba inke dvaara tumko kaudi se heere jaisa bana rahe hain । achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke dil roopi takhta par jeet paane ka purushaartha karna hai। parivaar mein trustee rahkar pyaar se sabko chalaana hai। mohjeet banna hai।

2) yogbal se aatma ko svachchha banaana hai। in aankhon se sab kuchh dekhte hue yaad ek baap ko karna hai। yahaan phool haar sveekaar na kar khushboodaar phool banna hai

vardaan:- praalabdha ki ichchha ko tyaag achha purushaartha karne vaale shreshtha purushaarthi bhav

shreshtha purushaarthi unhein kaha jaata hai jo purushaartha ki praalabdha ko bhogne ki ichchha nahin rakhte। jahaan ichchha hai vahaan svachchhata khatma ho jaati hai aur sochta (sochne vaale) ban jaate hain। jo yahaan hi praalabdha bhogne ki ichchha rakhte hain woh apni bhavishya kamaai jama hone mein kami kar dete hain isliye ichchha ke bajaae achha shabd yaad rakho। shreshtha purushaarthi sada flawless banne ka purushaartha karte hain, kisi bhi baat mein fail nahin hote।

slogan:- saadhan kamal pushpa bankar use karo kyonki ye aapke karmayog ka phal hain।

ye avyakt ishaare - sada harshit rahne ke liye apni nature ko saral banaao, sahansheel bano।

sarvasva tyaagi bachchon mein mukhya saralta aur sahansheelta ka gun avashya hoga। aise bachche svayan harshit rehte aur sarva ko aakarshit karte hain। ve ek do ke snehi ban jaate hain। agar saralta nahin to sneh bhi nahin ho sakta। jaise saakaar roop mein dekha jitna hi knowledgeful utna hi saral svabhaav। bujurga ka bujurga, bachpan ka bachpan।