Daily Murli for Monday 13 July 2026

13-07-2026 praatahmurli om shanti "baapdaada"' madhuban

“meethe bachche - tum baap ke paas aaye ho apni jeevan heere samaan banaane, baap ki yaad se hi aisi jeevan banegi''

prashn:- nai duniya mein oonch pad ke liye kaun sa ek mukhya purushaartha karna hai?

uttar:- baba kehte - meethe bachche, jin puraane sambandhiyon ne itna duhkhi kiya, ab unke mohjaal se buddhi ko nikaal ek mujhe yaad karo। unke saath rehte bhi man ko mere mein lagaao। manamnaabhav ka mantra sada yaad rakho to tum nai duniya mein oonch pad paayenge।

geet:- toone raat ganvaai…

om shanti। jaise bachchon ko sabhi shaastron ka saar samjhaate hain, vaise in geeton ka bhi saar tumko samjhaate hain। vahi sabka roohaani baap, roohaani bachchon ko brahma tan se baith samjha rahe hain। baap samjhaate hain he bachchon - tum jaante ho hamaara heere jaisa janma ban raha hai। baap ke paas aate hi ho heere jaisa janma banaane। heere jaisa janma kaha jaata hai svargavaasiyon ka। kaudi jaisa janma hai narkavaasiyon ka। tum sangamayug ko bhi jaan chuke ho। ham abhi sangamayugvaasi hain। yeh sangamayug sabke liye kalyaankaari hai। is sangamayug mein hi sarva ki gati sadgati hoti hai। kaun karte hain? paramdham se aane vaala musaaphir। woh musaaphir hai na। tum musaaphir nahin ho, tum aakar jaate nahin ho। baap kehte hain - main puraani duniya mein aakar phir laut jaata hoon। bachche jaante hain yeh seva karne vaala sirf ek musaaphir hai, jo aakar ham bachchon ki badi seva karte hain। aisi seva aur koi kar na sake। seva ke liye hi pukaarte hain ki aakar ham patiton ki seva karo। baap bhi kehte hain ham bachchon ki seva mein aaye hain kyonki bachche bahut duhkhi hain। pukaarte bhi hain hamaare duhkh haro aur shanti do। do cheez hamesha yaad rehti hai - sukh aur shanti। yahaan duhkh aur ashaanti hai, tab pukaarte hain। baap hi aakar saara raaz srishti chakra ka bachchon ko samjhaate hain। bachche samajhte hain - ab bhakti maarga khatma hota hai। kaliyug ka ant maana bhakti neeche utarti aati hai। gyaan se tumhaari chadhti kala ho jaati hai। tum oonch te oonch pad pa lete ho phir woh praalabdha ka sukh kam hota jaata hai। bhakti to bhaarat mein jitni hoti hai utni aur kahaan nahin। aadhaakalpa bhakti chalti hai। jab se dvaapar shuru hota hai aur doosre dharma sthaapan hona shuru hote hain tab se bhakti shuru hoti hai। bhakti bhi pahle bahut achhi hoti hai। jaise svarga pahle bahut achha hota hai phir aahiste-aahiste kala kam hoti jaati hai। bhakti shuru hoti hai to pahle-pahle shiv ke pujaari bante hain। aadhaakalpa koi pooja hoti nahin hai। phir bhaktimaarga shuru hota hai aur doosre dharma bhi shuru hote hain। itni bhakti aur koi kar nahin sakte, poora aadha-kalpa bhakti chalti hai। yeh bhi tum bachche jaante ho ki baap, jo sabko, khaas bhaarat ko sadgati dete hain, svarga ka maalik banaate hain vahi doordesh ka musaaphir aaya hua hai - ham bachchon ko phir se svarga ki baadshaahi dene। varsa bhi kitna jabardasta hai। parantu ek bhi baat kiski buddhi mein nahin baithti। bhaarat mein bhakti kitni karte hain। kitne mandir hain। bhaarat khanda mein to dher mandir hain। abhi tum jaante ho yeh kiske mandir hain। pahle-pahle to shivbaaba ka mandir banta hai, phir bante hain devtaaon ke। woh mandir bhi tumhaare saamne khade hain। ek taraph shivbaaba ki pooja karte rehte hain, doosre taraph shivbaaba tumko poojya bana rahe hain। tum yahaan aaye ho poojya devta banne। jo bhi devtaaon ke pujaari hain - vaastav mein woh bhi aakar yahaan brahman banenge। dheere-dheere vriddhi hoti jaayegi। sabhi ikatthe to padh na saken। samay lagta hai। kalpa pahle bhi jinhonne padha hoga vahi phir padhenge। ek do ko padhaate rehna hai। sabko baap aur srishti ke aadi-madhya-ant ka knowledge sunaate hain, jisse manushya svarga ka maalik ban sakte hain। so aakar samjho। tum bachchon ki buddhi mein hai ki yeh naatak kaise chakra lagaata hai। kahaani koi laakhon varsha ki to nahin suna sakte। tum jaante ho 5 hajaar varsha pahle kya tha, kiska raajya tha! bhaarat mein ham poojya devi-devtaaon ka raajya tha। yaad aaya na - ham poojya the, phir pujaari banen। aage yeh pata nahin tha - ham so poojya devta the, phir hamne 84 janma liye। 84 janmon ki kahaani lakshmi-naaraayan ki hai। tum apne 84 janmon ki kahaani sunaate ho। unko to apni kahaani baith likhne mein bahut samay lagta hai। tum ek minute mein 84 janmon ki kahaani bata sakte ho। woh to ek janma ki kahaani likhte hain। chhote pan mein kya-kya kiya। yeh bhi apni kahaani bataate hain। ham 84 ka chakra kaise lagaate hain। ek ki to baat nahin, bahut brahman hain। tum hi is chakra ko jaante ho। is chakra ko jaanne se tum raaja raani bante ho aur phir auron ko banaate bhi ho। bhakti bhi bhaaratvaasiyon jaisi koi nahin karte hain। aur jo bhi math panth dharma aadi hain, woh hamaare bhakti ke samay sthaapan hote hain। pahle-pahle hamaara kitna chhota phoolon ka jhaad tha, roohaani garden tha। tum chaitanya phool the। inko kaha jaata hai phoolon ka bageecha। phir vahi kaanton ka bageecha hota jaata hai। is samay sab kaante ban gaye hain। phir kaanton se phool kaise banna hai, so baap baith samjhaate hain। ek do ko duhkh dena kaanta lagaana hai। student life is di best kaha jaata hai। woh bahut achhi hoti hai। bachche bachchiyaan badi khushi mein padhte rehte hain। shaadi ki aur ek do ko kaanta lagaana shuru kiya। satayug mein koi kaanta nahin lagaate। abhi tum phir phool bante ho। tum jaante ho bhaarat svarga tha to kitne apaar sukh the। sone ki khaaniyaan thi। abhi woh khaali ho gai hai। phir tumko sona bharpoor milega। bhaarat mein hi sone, heere, javaahraat ki khaaniyaan thi। us samay America aadi kuchh bhi nahin hota। baambe bhi nahin hoti। wonder hai na। kaliyug ke ant mein kuchh bhi sona dekhne mein nahin aata phir satayug aadi mein itni sone ki khaaniyaan bhartu ho jaati hain। sone ke mahal ban jaate hain। wonder hai na। vahaan khaaniyon se kitna dher sona nikaalte hain। jaise yahaan mitti ki eeten banti hain, vaise vahaan sone ki eeten banti hain। maaya machchhandar ka khel dikhaate hain na। dhyaan mein dekha yahaan to sona hi sona hai। barobar satayug mein sona hoga। yahaan to dekho mitti ki eeten bhi nahin milti hain। jitni yahaan eeten paise se milti hain, utni vahaan sone ki eeten muphta milti hain। raat-din ka pharka hai। to kyon nahin purushaartha karna chaahiye - nai duniya mein oonch pad paane ka! yahaan mohjaal mein kyon phasen!

baap kehte hain puraane sambandhon mein tum kitna duhkh uthaate ho! baba aise nahin kehte ki inko chhod do। sirf buddhiyog ek baap se lagaao to tum vishwa ke maalik ban jaayenge। manamnaabhav ka arth hi hai - mujhe yaad karo aur vishnu chaturbhuj ko arthaat vishnupuri ko yaad karo। mool hai hi ek akshar। bhakti maarga mein to dher panchaayat hai। abhi tum sab aatmaayen aashik ho ek maashook parampita paramatma ke। woh tumko sukhdhaam ka maalik banaate hain। sab aatmaayen unko yaad karte hain। tum roohaani aashik, roohaani maashook ke ek hi baar bante ho। baaki to sab manushya hain jismaani aashik maashook। abhi behad ke aashikon ko behad ka maashook aakar mila hai। unko kehte bhi hain - aao aakar hamko patit se paavan banaao। ek ko hi pukaarte hain। tum jaante ho hamaari aatma patit bani hai isliye pukaarte hain patit-paavan aao। kumbha ka mela lagta hai, kitne jaakar ganga snaan karte hain। phaayda kuchh bhi nahin। paavan koi bhi banta nahin। abhi baap aakar gyaan varsha karte hain। tumhaare oopar gyaan ki varsha ho rahi hai, jisse phir kaanton ka jangal phoolon ka bageecha ban jaayega।

tum jaante ho - hamaara jab raajya hoga to vahaan koi patit hoga hi nahin। saare vishwa par gyaan varsha ho jaati hai। sab kuchh hara bhara ho jaata hai। khaaniyaan bhi heere javaahron ki nai ban jaati hain। ab tum bachchon ko kitna khushi mein rehna chaahiye। sammukh dekhte ho, behad ka baap baith samjhaate hain ki tum mujhe yaad karo to tumhaare vikarma vinaash honge। bhal tum kahaan bhi baitho - snaan karo, buddhi mein baap ki yaad rahe। vahaan to yaad karne ki phursat hai। baap ko jitna yaad karenge utni kamaai hai। yaad se hi kamaai hai। aisa kabhi suna ki yaad se kamaai hoti hai! kitni badi kamaai hai, tum vishnupuri ke maalik ban jaayenge। tum jaante ho ham aatmaon ka baap niraakaar hai। usne is shareer ka aadhaar liya hai। bhaageerath ka bhi varnan hai na। bhaagyashaali rath, jis rath par parampita ki param aatma savaar hoti hai। aatma ka rath jab taiyaar hota hai to jhat aatma aakar pravesh karti hai। baap ko to is rath mein aakar sirf knowledge deni hai। inke bhi bahut janmon ke ant ke janma mein jab vaanaprastha avastha hoti hai tab baap kehte hain - main aakar inmen pravesh karta hoon athva is rath mein viraajmaan hota hoon। baaki koi ghode gaadi ke rath ki baat nahin hai। abhi tumko yeh gyaan mila hai। baap baith sammukh tum bachchon ko samjhaate hain। tumko to bahut khushi honi chaahiye। aai.si.S. ka imtahaan padhte hain to bada nasha rehta hai। woh hota hai sabse oonch imtahaan। tumhaari bhi yeh padhaai hai। yeh bhagwan ki paathshaala hai। ab prashn uthta hai bhagwan kaun? kya shreekrishna ya shivbaaba? sabka bhagwan kaun hai? sivaae ek niraakaar ke sab to shreekrishna ko maanenge nahin। sabhi aatmaon ka baap woh niraakaar parampita paramatma hai। woh sadaiv paramdham mein rehte hain। ek hi baar aate hain - bachchon ko svarga ka maalik banaane। tum jaante ho vahi baba kalpa-kalpa aakar hamko rank se raav banaate hain। bhaarat ab rank hai na। phir doosre janma mein kya banna hai, tumko sab saakshaatkaar hue hain। vinaash ka bhi saakshaatkaar kiya hai। sthaapna ka bhi kiya hai। bhagvaanuvaach main tumko raajaaon ka raaja banaata hoon। bahut daan-punya karne se koi ko alpakaal ka sukh milta hai। raajaaon ke paas janma le phir phat se mar jaate hain। koi garbha mein bhi mar jaate hain। koi loole langade, kaane ban jaate hain। jaise karma karte hain vaisa pad paate hain। ab tumko to raajaaon ka raaja banaate hain। tum kehte ho - baba ham balihaar jaayenge। to zaroor raajaai bhi tum paayenge। bhaarat ko mahaadaani khanda kaha jaata hai। yahaan daan-punya bahut karte hain। woh phir shuru hota bhakti maarga mein। ab baap tumko 21 janmon ke liye daan dete hain। ab tum baba par balihaar jaate ho। tan-man-dhan sab kuchh de diya। ab baap kehte hain trustee hokar raho। apna gharbaar sambhaalo। sab shivbaaba ka hai। main aapka hoon, aapko hi yaad karta hoon। dil se surrender karte hain। baap kehte hain bhal mahal mein raho, ghoomo phiro mauj manaao, sirf mujhe yaad karo to tum bahut khushi mein rahenge। tum vishwa ke maalik the। ab phir tum purushaartha kar woh bante ho। baap samjhaate hain - meethe-meethe bachchon is yogbal se hi tum vikarmaajeet banenge। baap ki yaad se tum vishwa ke maalik bante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) raajaai pad paane ke liye baap par poora-poora balihaar jaana hai। tan-man-dhan sab samarpan kar trustee hokar rehna hai। vikarmaajeet banne ka purushaartha karna hai।

2) yaad mein hi kamaai hai, isliye nirantar yaad mein rahne ka purushaartha karna hai। aisa roohaani phool banna hai jo phoolon ki duniya ka adhikaari ban jaayen। andar mein koi bhi kaanta na rahe।

vardaan:- ek baap mein saare sansaar ka anubhav karne vaale behad ke vairaagi bhav

behad ke vairaagi vahi ban sakte jo baap ko hi apna sansaar samajhte hain। jinka baap hi sansaar hai woh apne sansaar mein hi rahenge, doosre mein jaayenge hi nahin to kinaara svatah ho jaayega। sansaar mein vyakti aur vaibhav sab aa jaata hai। baap ki sampatti so apni sampatti - isi smriti mein rahne se behad ke vairaagi ho jaayenge। koi ko dekhte hue bhi nahin dekhenge। dikhaai hi nahin denge।

slogan:- powerful sthiti ka anubhav karne ke liye ekaanta aur ramneekta ka balance rakho।

ye avyakt ishaare - jvaalaasvaroop sthiti mein rah shaktishaali yaad ka anubhav karo

jaise kila baandha jaata hai, jisse praja kile ke andar safe rahe। ek raaja ke liye kothri nahin banaate, kila banaate hain। aap sabhi bhi svayan ke liye, saathiyon ke liye, anya aatmaon ke liye jvaala roop yaad ka kila baandho। yaad ke shakti ki jvaala ho to har aatma safety ka anubhav karegi।