Daily Murli for Monday 20 July 2026

20-07-2026 praatahmurli om shanti "baapdaada"' madhuban

“meethe bachche - beggar se prince banne ka aadhaar pavitrata hai, pavitra banne se hi pavitra duniya ki raajaai milti hai''

prashn:- is paathshaala ka kaun sa paath tumhein manushya se devta bana deta hai?

uttar:- tum is paathshaala mein roz yahi paath padhte ho ki ham shareer nahin aatma hain। aatma-abhimaani banne se hi tum manushya se devta, nar se naaraayan ban jaate ho। is samay sab manushya maatra pujaari arthaat patit deh-abhimaani hain isliye patit-paavan baap ko pukaarte rehte hain।

geet:- chhod bhi de aakaash sinhaasan…

om shanti। bachche jaante hain ki yeh om shanti kisne kaha? kaun se bachche? aatmaayen jaanti hain ki om shanti kiski aatma ne kaha? parampita paramatma ne kaha। bachche jaante hain manushya ki aatma ne nahin kaha, yeh parampita paramatma shiv ne kaha। woh sabhi ka baap oonche te ooncha hai। ab geet mein suna bhaarat par bahut maaya ka parchhaaya pada hua hai। bahut patit ban gaye hain isliye pukaarte hain ki he patit-paavan phir se aao, paavan banaane। aatma hi bulaati hai apne baap ko, jisko bhagwan kehte hain। kehte hain vahi patit-paavan hai। ek ki hi mahima hoti hai। woh hai sabhi aatmaon ka behad ka baap। yahaan sab patit ban gaye hain tab pukaarte hain - he parampita paramatma। vahi gyaan ka saagar bhi hai, patit-paavan bhi hai। woh pita bhi hai to shikshak bhi hai kyonki gyaan saagar bhi hai, world authority bhi hai। sabhi vedon, shaastron, granthon ko jaanne vaala bhi hai। unko kehte hi hain knowledgeful। to is samay sab paarlaukik baap ko pukaarte hain kyonki sabhi duhkhi hain। kehte hain - god father। unka naam bhi chaahiye na। unka naam gaaya hua hai shivbaaba। vahi oonch te oonch gyaan ka saagar, sukh ka saagar, shanti ka saagar hai। yeh manushya ki aatma apne baap ki mahima karti hai। oonch te oonch aatma kiski hai? parampita paramatma ki। woh hai param, patit manushya unko yaad karte hain। satayug mein jab paavan bhaarat tha, devi-devtaaon ka raajya tha to koi patit nahin tha। yeh hai tamopradhaan duniya arthaat duniya mein jo manushya rehte hain sab paap aatmaayen hain। yahi bhaarat paavan tha, yahi bhaarat patit ho gaya hai। yahaan kaliyug mein sab patit hain। tum jaante ho gyaan ka saagar, patit-paavan parampita paramatma paramdham se aakar hamko brahma dvaara padhaate hain। zaroor unko shareer to chaahiye na। yeh baaten koi shaastron mein nahin hain। gyaan ka saagar jo authority hai vahi sab kuchh jaante hain। bhaarat mein chitra bhi dikhaate hain vishnu ki naabhi se brahma nikla, unko haath mein shaastra dete hain। abhi vishnu koi sab shaastron ka saar nahin sunaate hain। parampita paramatma gyaan ka saagar brahma dvaara sab shaastron ka saar samjhaate hain। brahma, vishnu, shankar ka bhi woh rachayita hai। brahma ko va vishnu ko gyaan ka saagar nahin kahenge। shankar ki to baat hi chhod do। abhi gyaan ka saagar kaun? niraakaar oonch te oonch paramatma hi patit-paavan hai। yeh mahima hai us parampita paramatma ki। yahaan bhi aatma ki hi mahima hoti hai। aatma hi shareer dvaara kehti hai - main president hoon, main barrister hoon, main phalaana minister hoon। aatma hi martaba leti hai। shareer dvaara aatma kehti hai main ek shareer chhod doosra leta hoon। is samay jab baap aate hain, kehte hain bachche aatma-abhimaani bano। main tumhaara baap aaya hua hoon - tumko yahi paath padhaane। yeh paathshaala hai - manushya se devta, nar se naaraayan, naari se lakshmi banne ki। baap ko sabhi aatmaayen bulaati hain ki he parampita paramatma... ab niraakaari duniya se saakaari duniya mein aao। roop badlo। tum niraakaari aatmaayen to jab shareer mein aati ho to garbha mein aati ho, punarjanma leti ho। baap samjhaate hain - tumne 84 janma garbha se liye hain। ek shareer chhod phir garbha mein jaate ho, aise 84 janma lete ho। main to garbha mein nahin aata hoon। bhaaratvaasi asul mein devi-devta dharma ke the। phir seedhi neeche utarte aaye, kshatriy varna mein phir vaishya, shoodra varna mein kalaayen kam hoti jaati hain। bhaarat 16 kala sampoorn tha phir 14 kala bana। bhaaratvaasi apne janmon ko nahin jaante। 84 janma bhaaratvaasi hi lete hain। aur koi dharma vaale 84 janma nahin lete। tum svadarshan chakradhaari bane ho, yeh gyaan ki baat hai। svadarshan chakradhaari banne se tum chakravarti mahaaraaja bante ho svarga ka। tum achhi reeti jaante ho ham yahaan aaye hain patit se paavan banne। yeh hai hi patit duniya। patit-paavan, sarva ka sadgati daata to ek hi baap hai। sab unko hi pukaarte hain। baap ko yaad karte hain, shreekrishna ko nahin। shreekrishna ne geeta nahin sunaai। geeta hai sarva shaastramai shiromni। bhaarat ki geeta kis dharma ka shaastra hai? aadi sanaatan devi-devta dharma ka। kisne geeta gaai? raajayog kisne sikhaaya? parampita paramatma patit-paavan baap ne। to tumhaari aatma jo niraakaar thi, usne abhi yeh saakaar shareer dhaaran kiya hai। saakaar manushya ko kabhi bhagwan nahin kahenge। bhal satayug mein lakshmi-naaraayan hain to bhi bhagwan nahin kahenge। yeh to karke upaadhi (title) di jaati hai। kaayde anusaar bhagwan ek hai। creator is one। baaki woh hain devtaayen। 5 hajaar varsha ki baat hai। in lakshmi-naaraayan ka raajya tha, inko mahaaraaja mahaaraani kaha jaata tha। bhagwan mahaaraaja nahin bante hain। woh to baap hi hai jo aakar bhaaratvaasiyon ko aisa devi-devta banaate hain। abhi to devi-devta dharma ka koi hai nahin। inko kaha jaata hai raavan sampradaay kyonki raavan raajya hai। raavan ko varsha-varsha jalaate rehte hain kyonki yeh puraana dushman hai parantu inko bhaaratvaasi jaante nahin। shaastron mein bhi varnan nahin hai ki raavan kaun hai। raavan ko 10 sheesh kyon dikhaaye hain। in baaton ko achhi reeti samajhna hai। manushya to bilkul pattharbuddhi hain। paarasbuddhi in lakshmi-naaraayan aadi ko kahenge। paarasnaath, paaras-naathini ka raajya tha। yatha raaja-raani tatha praja। bhaarat jaisa sukhdhaam aur koi khanda hota nahin। jab bhaarat mein svarga tha to koi beemaari, duhkh rog nahin tha। sampoorn sukh tha। gaaya jaata hai - eeshvar ki mahima aparmaapaar hai। vaise bhaarat ki bhi mahima aparmaapaar hai। saara madaar pavitrata par hai। pukaarte bhi aise hain, sab patit hain। pees nahin hai, prosperity bhi nahin hai। abhi tumne samjha hai - ham bhaaratvaasi sooryavanshi devi-devta the phir dheere-dheere patit bane hain। inko kaha jaata hai mrityulok। isko aag lagni hai। yeh hai shiv gyaan yagya, roodra gyaan yagya bhi kehte hain। manushya naam to bahut rakh dete hain। jahaan bhi shiv ki moorti dekhte hain, to anek bhinna-bhinna naam rakh dete hain। ek ke hi anek naam se mandir banaate hain। to baap baith samjhaate hain - gyaan, bhakti, vairaagya। abhi bhakti poori hoti hai, tumko bhakti se vairaagya aata hai arthaat is puraani duniya se vairaagya hai। yeh puraani duniya vinaash honi hai।

bachche poochhte hain baba ham patit se paavan kaise banen। kai naye aate hain to allow nahin kiya jaata hai। jaise college mein koi naya jaakar baithe to kuchh bhi samajh na sake aur kisko pata hi nahin hai, manushya se devta kaise ban rahe hain। manushya jo patit hain vahi paavan bante hain। is samay bhaarat bhi beggar hai। satayug mein bhaarat prince tha। shreekrishna satayug ka pahla number prince tha। usmein sab gun hain। raajya lakshmi-naaraayan ka kahenge। shreekrishna to prince tha, raadhe princess thi। shreekrishna prince ki hi mahima gaai jaati hai - sarvagun sampanna, 16 kala sampoorn.....। usne koi geeta nahin sunaai। woh to satayug ka prince tha। woh patit manushyon ko paavan banaane ke liye geeta paath sunaaye - yeh ho nahin sakta। yeh sab shaastra hain bhakti maarga ke। kitni shaastron ki mahima hai। satayug mein koi shaastra, chitra aadi bhakti maarga ke hote hi nahin। vahaan to gyaan ki praalabdha hoti hai - 21 janmon ke liye। phir se satayug ka raajyabhaagya le rahe hain। bhaaratvaasi satayug mein 5 hajaar varsha pahle vishwa ke maalik the aur koi bhi partition aadi nahin tha। 5 hajaar varsha ki baat hai। abhi kaliyug ka ant hai na। vinaash saamne khada hai। bhagwan ne yeh gyaan yagya racha hai। patit kaliyug ko paavan satayug banaane, to zaroor patit duniya ka vinaash hoga। gaaya bhi hua hai brahma dvaara aadi sanaatan devi-devta dharma ki sthaapna, so ab shivbaaba brahma dvaara kara rahe hain। tum abhi manushya se devta ban rahe ho। gaate bhi hain parampita paramatma brahma dvaara sthaapna karaate hain। woh to hua prajaapita, unki sab aulaad hain। barobar brahma dvaara hi svarga ki sthaapna hui thi। aaj se 5 hajaar varsha pahle bhi main sangam par aaya tha - tumko yeh raajayog sikhaane। shreekrishna nahin, main aaya tha। shreekrishna patit duniya mein aa nahin sakta। baap hi aate hain। vahi sarva ka sadgati daata hai। manushya, manushya ko sadgati de nahin sakte। yaad bhi sabhi ek ko hi karte hain। parampita paramatma kahaan rehte hain? tum bachche jaante ho paramdham mein rehte hain। woh hai brahm mahtatva। vahaan aatmaayen pavitra, jaise mahaatmaayen hain। yahaan bhi mahaan aatma, patit aatma kehte hain na। vaastav mein yahaan mahaan aatma ek bhi nahin hai। aatma ko hi paavan satopradhaan banna hai, gyaan aur yog se na ki paani se। aatma hi patit bani hai। aatma mein hi khaad padti hai। aatma hi golden, silver, copper, iron banti hai। abhi aatmaayen jo patit hain unko paavan kaun banaaye! sivaae parampita paramatma ke aur koi bana na sake। baap hi baith samjhaate hain - maamekam yaad karo to tumhaare paap bhasma ho jaayenge। jitna yaad karenge utna patit se paavan banenge। mehnat ismen hai। gyaan to saara buddhi mein hai। yeh chakra kaise phirta hai, ham 84 janma kaise lete hain। satayug mein kitna samay raajya chalta hai, phir raavan kaise aata hai! raavan hai kaun! yeh bhi kisko pata nahin hai। kab se raavan ko jalaate aate hain। yeh bhi kisko pata nahin। har varsha jalaate hain। satayug mein to nahin jalaayenge। abhi hai hi raavan raajya। raamraajya to koi sthaapan kar nahin sakta। yeh to baap ka hi kaam hai। patit manushya to kar nahin sakte। woh to sab vinaash ho jaayenge। patit duniya hi vinaash honi hai। satayug mein ek bhi aise nahin kahenge ki he patit-paavan aao। woh to paavan duniya hai na। tum abhi jaante ho ki in lakshmi-naaraayan ko aisa svarga ka maalik kisne banaaya। phir inhonne 84 janma kaise liye। aadi sanaatan devi-devta dharma vaalon ne hi 84 janma liye hain। vahi is samay shoodra vanshi bane hain। ab phir brahman vanshi bante ho। abhi tum ho brahman choti। yeh hai oonch te oonch choti। brahma mukh vanshaavli brahman kul bhooshan। abhi tum shivbaaba ke bachche bhi ho। potre potriyaan bhi ho। shiv vanshi phir brahmaakumaar-kumaariyaan ho। varsa milta hai daade se। baap kehte hain - mujhe nirantar yaad karo। paavan bano to tum mere paas muktidhaam mein aa jaayenge। in baaton ko samjhenge vahi jinhonne kalpa pahle samjha hai। woh to hajaaron hain। koi poochhte hain, kitne bi.ke. hain? bolo, hajaaron ki andaaj mein hain। is daivi jhaad ki vriddhi hoti jaati hai। ab phir se sapling lag raha hai - aadi sanaatan devi-devta dharma ka kyonki devta dharma hai nahin। sab apne ko hindu kahlaate rehte hain। aur dharmon mein convert ho gaye hain। phir sab nikal aayenge, aakar baap se varsa lenge। tum aaye ho behad ke baap se behad ke sukh ka varsa paane arthaat manushya se devta banne। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) patit se paavan banne ke liye gyaan aur yog mein majboot hona hai। aatma mein jo khaad padi hai use yaad ki mehnat se nikaalna hai।

2) ham brahma mukh vanshaavli brahman choti hain is nashe mein rehna hai। brahman hi varse ke adhikaari hain kyonki shivbaaba ke potre hain।

vardaan:- apni powerful vritti dvaara patit vaayumandal ko parivartan karne vaale master patit-paavni bhav

kaisa bhi vaayumandal ho lekin svayan ki shaktishaali vritti vaayumandal ko badal sakti hai। vaayumandal vikaari ho lekin svayan ki vritti nirvikaari ho। jo patiton ko paavan banaane vaale hain vo patit vaayumandal ke vasheebhoot nahin ho sakte। master patit-paavni ban svayan ki powerful vritti se apvitra va kamjori ka vaayumandal mitaao, uska varnan kar vaayumandal nahin banaao। kamjor va patit vaayumandal ka varnan karna bhi paap hai।

slogan:- ab dharni mein parmaatma pahchaan ka beej daalo to pratyakshata hogi।

ye avyakt ishaare - jvaalaasvaroop sthiti mein rah shaktishaali yaad ka anubhav karo

yog maana shanti ki shakti। yeh shanti ki shakti bahut sahaj sva ko aur doosron ko parivartan karti hai, isse vyakti bhi badal jaayenge to prakriti bhi badal jaayegi। vyaktiyon ko to mukh ka course kara lete ho lekin prakriti ko badalne ke liye shanti ki shakti arthaat yogbal hi chaahiye। yog mein jab aur sab sankalp shant ho jaate hain, ek hi sankalp rehta “baap aur main'' isi ko hi powerful yog kehte hain। baap ke milan ki anubhooti ke sivaae aur sab sankalp sama jaayen tab kahenge jvaala roop ki yaad, jisse parivartan hota hai।