Daily Murli for Friday 7 August 2026

07-08-2026 praatahmurli om shanti "baapdaada"' madhuban

“meethe bachche - ab tak jo kuchh padha hai, use bhool ek baap ko yaad karo''

prashn:- bhaarat par satayugi svaraajya sthaapan karne ke liye kaunsa bal chaahiye?

uttar:- pavitrata ka bal। tum sarvashaktivaan baap se yog lagaakar pavitra bante ho। yeh pavitrata ka hi bal hai jisse satayugi svaraajya ki sthaapna hoti hai, ismen ladaai aadi ki koi baat nahin। gyaan aur yogbal hi paavan duniya ka maalik bana deta hai। isi bal se ek mat ki sthaapna ho jaati hai।

geet:- aakhir woh din aaya aaj…

om shanti। bachchon ne geet suna। yeh geet koi apna banaaya hua nahin hai। jaise aur vedon shaastron ka saar samjhaaya ja raha hai। vaise yeh bhi jo geet banaaye hain, unka bhi saar samjhaate hain। bachche jaante hain ki khivaiya va baagvaan va sadgati daata ek hi baap hai। bhakti karte hain jeevanmukti ke liye। parantu jeevanmukti va sadgati daata ek bhagwan hai। uska arth bachche hi samajh sakte hain, manushya nahin samajhte hain। sadgati arthaat duhkh se chhudaakar shanti ki praapti karaate hain। bhaaratvaasi bachche jaante hain ki yahaan pavitrata sukh shanti thi, jabki in lakshmi-naaraayan ka raajya tha। raadhe-krishna ka raajya nahin kah sakte। vaastav mein maataaon ki hamjinsa raadhe hai। unko jaasti pyaar karna chaahiye phir bhi shreekrishna ko bahut pyaar karte hain। jhoole mein jhulaate hain। shreekrishna ki janmaashtami bhi manaate hain। raadhe ki jayanti nahin manaate hain। vaastav mein manaana chaahiye donon ka। samajh to kuchh hai nahin। unhon ki jeevan kahaani ko to koi jaante nahin। baap aakar apni aur sabki jeevan kahaani sunaate hain। manushya kehte bhi hain shiv paramatma namah parantu unki jeevan kahaani ko nahin jaante। manushya ki jeevan kahaani ko history-geography kaha jaata hai, duniya ki history-geography to gaai jaati hai na - kitne ilaake par raajya karte the, kitni jameen par raajya karte the। kaise raajya kiya phir woh kahaan gaye..... yeh baaten koi nahin jaante। tum bachchon ko achhi reeti samjhaaya jaata hai। rachayita aur rachna ki knowledge bachchon ko samjhaate hain। tum bachchon ko maaloom pad gaya hai ki barobar ab kaliyug ka ant hai aur satayug ka aadi hai। sangam par hi parampita paramatma aakar manushya ko patit se paavan devta banaate hain। uttam purush athva purushottam banaate hain kyonki is samay ke manushya uttam nahin hain, kanishta hain। uttam, madhyam, kanishta, sato rajo tamo hote hain। jo achhi tarah gyaan sunenge unko satoguni kahenge, jo thoda sunenge unko rajoguni kahenge, jo sunte hi nahin unko tamo-guni kahenge। padhaai mein bhi aise hota hai। tum bachchon ko satopradhaan padhaai chaahiye isliye satopradhaan lakshmi-naaraayan banne ka tumko gyaan diya jaata hai। nar se naaraayan, naari se lakshmi banna hai। geeta ke liye bhi tum kehte ho ki yeh hai sachchi geeta। tum likh bhi sakte ho - yeh hai sachchi geeta paathshaala arthaat satya naaraayan banne ki katha athva sachchi amraktha, sachchi teejri ki katha। chitra to sab tumhaare paas hain, inmen saara gyaan hai। tum bachche ab pratigya karte ho ki ham prajaapita brahmaakumaar kumaariyaan bhaarat ko satopradhaan svarga banaakar chhodenge। tumko itla (khabar) karni hai। gaandhi ji bhi paavan raajya chaahte the to zaroor ab patit raajya hai। yeh koi samajh nahin sakte ki ham khud patit hain। raavan hai 5 vikaar। kehte hain raam-raajya chaahiye to zaroor aasuri sampradaay thahre na, parantu yeh kiski buddhi mein nahin aata hai। kitne bade-bade guru log bhi itna nahin samajhte hain। tum bachche itla karte ho ki ham shreemat par brahma dvaara 5 hajaar varsha pahle muaaphik daivi raajya sthaapan karenge। yeh hai purushottam sangamayug jabki kanishta purush se satopradhaan purushottam bante ho। maryaada purushottam aadi sanaatan devi-devta dharma hi hai। ab ek hi devi-devta dharma ki sthaapna hoti hai phir doosre dharma honge hi nahin। tum bachche siddha kar samjhaate ho ki satayug mein ek dharma, ek hi raajya tha। bhal treta mein sooryavanshi se badal chandravanshi mein jaate hain parantu hogi ek hi bhaasha। ab to bhaarat mein anek bhaashaayen hain। bachche jaante hain ki hamaare raajya mein ek hi bhaasha thi। aajkal to bahut kuchh dekhte rahenge। jaise musaaphiri se najdeek aate jaate hain apne desh taraph to khush hote hain ki ab apne ghar aa gaye। bas ab jaakar milenge। tumko bhi apni raajdhaani ka saakshaatkaar hota rahega। apne purushaartha ka bhi saakshaatkaar hoga। dekhenge ki baba hamko kitna kehte hain ki purushaartha karo। nahin to haay-haay karenge aur pad bhi kam ho jaayega। yog ki yaatra sabko bataate raho। samjhaana to bahut sahaj hai। seedhi kitni sahaj hai। jo deri se aate hain unko din-pratidin sahaj gyaan milta hai। ek haphta samajhne se hi sahaj samajh jaayenge। chitra aise bane hue hain, jinmen accurate samjhaani hai। 84 janmon ka chakra bilkul theek hai। yeh bhaaratvaasiyon ke liye hai। tum bachchon ki buddhi mein saara gyaan hai। tum jaante ho ki patit-paavan, sadgati daata shiv-baba ki mat par ham phir se sahaj raajayog bal se, apne tan-man-dhan se bhaarat ko svarga banaate hain। doosre koi ka ham nahin lagaate hain। apne hi tan-man-dhan se seva karte hain। jitna jo karenge woh apne bhavishya ke liye banaate hain। tum hi ghar ke bhaati ho। tumhaare se hi baba satayugi svaraajya sthaapan kara rahe hain। kharcha bhi tum hi karenge। tumhaara koi jaasti kharcha nahin hai। tumko sirf shivbaaba ko yaad karna hai, kanyaaon ko kya kharcha karna hai। unke paas kuchh hai kya? baba bachchon se kya fee lenge। kuchh bhi nahin। school mein to pahle fees ki baat karte hain। vahaan kitna padhaai mein kharcha hota hai। yahaan to shivbaaba bachchon se kaise paisa lenge। shivbaaba ko apna ghar thode hi banaana hai, jo paisa lenge। tum bachchon ko bhavishya svarga mein jaakar heere javaahron ke mahal banaane hain isliye tum yahaan jo karte ho uska return bhavishya mein tumko mahal mil jaata hai। yeh badi samajhne ki baaten hain। jitna jo tan-man-dhan se seva karenge, woh aisa vahaan paayenge। college va hospital banaate hain। 10 laakh, 20 laakh lagaane padte hain। yahaan to itna kharcha nahin lagta। chhote se makaan mein roohaani college kam hospital banaate hain। paandavon ka aadi pati kaun tha? unhonne to shreekrishna ka naam likh diya hai। vaastav mein hai niraakaar bhagwan। tumko shreemat dene vaala bhagwan hai। baaki to sab hain raavan ki mat par, raavan raajya mein। raavan ki mat par kitne dirty ban pade hain। ab yahi srishti puraani, vahi nai banti hai। srishti mein bhaarat hi tha। bhaarat naya, bhaarat puraana kahenge। naya bhaarat to svarga tha। phir bhaarat puraana hai to narka hai। inko kaha jaata hai raurav narka। manushya ki hi baat hai। yahaan sukh ka naam nishaan nahin hai। yeh koi sukh thode hi hai। sannyaasi bhi kehte hain, is samay ka sukh kaag vishta samaan hai, isliye woh grihastha vyavhaar ko chhod dete hain। woh svarga va satayug ki sthaapna kar na saken। shreekrishnapuri to paramatma hi sthaapan karte hain। shreekrishna ki aatma aur shareer donon satopradhaan the isliye shreekrishna ko bahut pyaar karte hain kyonki pavitra hai na। gaaya bhi jaata hai chhota bachcha brahm gyaani samaan hai। chhote bachchon ko vikaaron ka pata nahin rehta। sannyaasiyon ko phir bhi pata hai। bachcha to janma se hi mahaatma hai। bachchon ko to pavitra phool kaha jaata hai। number one phool hai shreekrishna। svarga nai duniya ka pahla prince। janma liya to kahenge first prince। shreekrishna ko to sab yaad karte hain ki shreekrishna jaisa bachcha mile। ab baap kehte hain ki jo banna hai so bano। sirf ek shreekrishna thode hi banta hai। prince oph Wales kitne bante hain? second third hote hain na। to yahaan bhi dynasty hai। baap ke pichhaadi phir doosre gaddi par baithenge। jaise gharaane hote hain vaise yeh gharaana hai। tumhaara connection hi Christian se hai। shreekrishna aur Christian donon ki ek hi raashi hai। len-den bhi aapas mein bahut chalti hai। bhaarat se woh kitna dhan le gaye hain। ab phir de rahe hain। return service kar rahe hain। yeh yooropvaasi aapas mein ladkar khatma ho jaayenge। is par kahaani bhi hai - do bille lade, beech mein maakhan bandar kha gaya। yeh baat abhi ki hai। woh aapas mein ladenge aur raajya bhaagya tumko milna hai। ab tum bachchon ko athaah gyaan hai। tum bachchon ki buddhi mein hai ki ham sab brahmaakumaar-kumaariyaan hain। aise nahin ki ham gujraati hain, ham bangaali hain। yeh hai nahin। yeh matbhed bhi nikal jaana chaahiye। ham ek baap ki santaan hain। brahma dvaara shivbaaba ki shreemat par phir se ham apna svaraajya sthaapan kar rahe hain - gyaan aur yogbal se। yog bal se hi ham paavan bante hain। baap hai sarvashaktimaan, unse bal milta hai। tum vishwa ki baadshaahi lete ho। ladaai aadi ismen kuchh nahin karte ho। saara pavitrata ka bal hai। kehte bhi hain ki aakar patit se paavan banaao, to yaad ka hi bal hai। aise nahin ki vahaan ulte dhandhe mein jaakar sab bhool jaaye। yahaan sammukh to gyaan saagar ki lahren dekhte rehte hain। nadiyon mein to woh lahren nahin hoti hain। saagar ki ek lahar kitna nuksaan kar deti hai। jab arth quake hogi to saagar bhi uthal khaayenge। saagar ko sukhaakar jameen li hai, woh jameen phir kitne daam mein bechte hain। tum jaante ho yeh baambe hi nahin rahegi। aage yeh baambe thode hi thi, chhota ek gaanvada tha। yeh maataayen to bholi hain। yeh itna likhi-padhi nahin hain। yahaan to padha hua sab bhoolna hai। tum kuchh nahin padhe ho to achha hai। padhe hue manushya samajhne samay kitne prashn karte hain। yahaan to sirf baap ko yaad karna hai। kisi dehdhaari manushya ko yaad karne ki baat nahin hai। mahima hai hi ek behad ke baap ki। tum jaante ho ki oonche te ooncha hai ek bhagwan phir second number mein brahma। unse ooncha koi hota nahin। isse badi aasaami koi nahin, parantu chalte dekho kitna saadhaaran hain। kaise saadhaaran reeti bachchon se baithte hain। train mein jaate hain, koi kya jaane ki yeh kaun hain! bhagwan aakar gyaan dete hain, zaroor pravesh kar gyaan denge na। agar shreekrishna hota to bheed mach jaati phir to padha bhi na sake, sirf darshan karte rahen। yahaan to baap gupta saadhaaran vesh mein baith bachchon ko padhaate hain।

tum ho incognito sena। tum jaante ho ki ham aatmaayen yogbal se phir se apna raajya sthaapan kar rahe hain। yeh puraana shareer chhod jaae naya gora shareer dhaaran karenge। ab hai aasuri sampradaay phir banenge daivi sampradaay। aatma kehti hai ki ham nai duniya mein daivi shareer dhaaran kar jaae raajya karoonga। aatma mel hai, shareer prakriti hai। aatma sadaiv mel hai। baaki shareer hisaab-kitaab se mel-female ka milta hai। lekin main hoon avinaashi aatma। yeh chakra phirta rehta hai। kaliyug ka vinaash bhi zaroor hoga। vinaash ke aasaar bhi saamne dekhte ho। vahi mahaabhaarat ladaai hai to zaroor bhagwan bhi hoga। kis roop mein, kis tan mein hai woh tum bachchon ke alaava kisko pata nahin। kehte bhi hain - main bilkul saadhaaran tan mein aata hoon। main shreekrishna ke tan mein nahin aata hoon। yahi poore 84 janma lete hain। main inke bahut janmon ke ant ke bhi ant mein aata hoon। 84 janma sooryavanshi gharaane vaale hi lete hain। vahi pahle number mein aayenge। saakaari jhaad aur niraakaari jhaad donon ka tumko saara gyaan hai। mool vatan se nambarvaar aatmaayen aati hain। pahle-pahle devi-devta dharma ki aatmaayen aati hain phir nambarvaar aur dharma vaale aate hain। chitron mein samjhaani to badi oonchi hai। bachchon ko samjhaana hai, kumaariyon ko khada hona chaahiye। koi bachchiyaan aisi-aisi baaten samjhaayen to kamaal hai na। kitna naam nikaalengi। laukik alaukik donon naam baala karengi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sangamayug par shreshtha karma karke purushottam banna hai। koi bhi aisa karma nahin karna hai jo kanishta ban jaaye।

2) gupta roop mein baap ka madadgaar ban bhaarat ko svarga banaane ki seva karni hai। apne hi tan-man-dhan se bhaarat ko svarga banaana hai। yaad aur pavitrata ka bal jama karna hai।

vardaan:- apni sampoorn stage dvaara sarva prakaar ki adheenta samaapta karne vaale prakriti jeet bhav

jab aap apni sampoorn stage par sthit honge to prakriti par bhi vijay arthaat adhikaar ka anubhav hoga। sampoorn stage mein kisi bhi prakaar ki adheenta nahin rehti hai। lekin aisi sampoorn stage banaane ke liye teen baaten saath-saath chaahiye:- 1-roohaaniyat, 2-roohaab aur 3-merciful ka gun। jab yeh teenon baaten pratyaksha roop mein, sthiti mein, chehre va karma mein dikhaai den tab kahenge adhikaari va prakriti jeet aatma।

slogan:- shreemat ki lagaam majboot hai to man roopi ghoda bhaag nahin sakta।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

agar koi bhi apvitrata vritti, smriti va sankalp mein hai to brahman-pan ki sthiti mein sthit nahin ho sakte isliye kadam-kadam par saavdhaan raho। visheshtaaon ke saath agar koi ek bhi kamjori hai to ek kamjori anek visheshtaaon ko samaapta kar deti hai।