Daily Murli for Tuesday 8 September 2026

08-09-2026 praatahmurli om shanti "baapdaada"' madhuban

“meethe bachche - tumhaara abhi eeshvareey new blood hai, tumhein badi masti mein bhaashan karna chaahiye, nasha rahe shivbaaba humein padha rahe hain''

prashn:- tumhein apni em object ka nasha sthaai bana rahe, uske liye kaun si yukti apnaao?

uttar:- apna raajaai passport nikaal kar rakho। neeche saadhaaran chitra, oopar raajaai poshaak se saja sajaaya aur uske oopar shivbaaba, to em object ki smriti sahaj rahegi। pocket mein yeh passport pada rahe। jab kabhi maaya ke toofaan aayenge to khyaal chalega ki ab hamaara yeh passport to cancel ho jaayega। ham svarga mein ja nahin sakenge।

geet:- raat ke raahi thak mat jaana…

om shanti। bachchon ne to is geet ka arth samjha। ab bhakti maarga ke ghor andhiyaare ki raat poori hui। bachche jaante hain ab hamaare paas kaal nahin aa sakta। yahaan baithe hain, hamaari em object hai manushya se devta banne ki। jaise sannyaasi log kehte hain tum apne ko bhains samjho to woh roop ho jaayenge। woh hai bhakti maarga ke drishtaanta। jaise yeh bhi ek drishtaanta hai na ki raam ne bandaron ki sena li aur raavan par jeet praapta ki। tum yahaan baithe ho jaante ho ham so devi-devta double sirtaaj banenge। jaise school mein padhte hain to kahenge main yeh padhkar doctor banoonga, engineer banoonga। tum jaante ho ham is padhaai se so devi-devta ban rahe hain। yeh shareer chhodenge aur hamaare sir par taaj hoga। yeh to bahut gandi chhi-chhi duniya hai। nai duniya hai first-class duniya। puraani duniya hai bilkul third class। yeh duniya to khalaas hone ki hai। hamko vishwa ka maalik banaane vaala zaroor vishwa ka rachayita hi hoga, doosra koi padha na sake। shivbaaba hi hamko padha-kar raajayog sikhlaate hain। baap ne samjhaaya hai ki aatma-abhimaani bano। aatma-abhimaani banne mein hi mehnat hai। poora aatma-abhimaani ban jaaen to baaki kya chaahiye। tum brahman to ho hi, jaante ho ham devta ban rahe hain। nasha rehta hai - main yeh ban raha hoon। pahle ham kaliyug narka mein patit the। asur aur devta mein kitna farka hai। devtaayen kitne pavitra hain। yahaan kitne patit manushya hain। shakla bhal manushya ki hai, parantu seerat dekho kaisi hai। jo devtaaon ke pujaari hain woh khud bhi unhon ke aage mahima gaate hain। aap sarvagun sampanna... hamaare mein koi gun naahi। ab tum change hokar devta banenge। shreekrishna ki pooja karte hi isliye hain ki ham krishnapuri mein jaayen। parantu yeh pata nahin ki kab jaayenge। bhakti karte rehte hain ki bhagwan aakar phal denge। bhakti ka phal hai sadgati। to yeh hai padhaai। pahle to yeh nishchay chaahiye ki hamko padhaate kaun hain। yeh hai shri shri.... tum bachche jaante ho baap humein shreemat de rahe hain। jinko yeh pata nahin, woh shreshtha kaise ban sakte hain। aajkal to ek do ko bhrashta banaane ki mat dete hain। bhrashta mat hai aasuri mat। itne sab brahman shri shri shivbaaba ki mat par chal rahe hain। paramatma ki mat se hi shreshtha bante hain। jinki takdeer mein hoga unki hi buddhi mein baithega। nahin to kuchh bhi nahin samjhenge। jab samjhenge tab khud hi madad karne lag padenge। kai to jaante hi nahin ki yeh kaun hain, isliye baba koi se milte bhi nahin hain। woh to aur hi apni aasuri mat nikaalenge। abhi sab maanav mat par hi chal rahe hain। shreemat ko na jaanne kaaran brahma baap ko bhi apni mat dene lag padte hain। ab baap aaye hi hain tum bachchon ko shreshtha banaane।

ab bachche kehte hain baba 5 hajaar varsha pahle muaaphik ham aapse mile hain। jinko pata hi nahin, woh aise response de na saken। bachchon ko padhaai ka bahut nasha rehna chaahiye। yeh badi oonch padhaai hai। parantu maaya bhi badi against hai। tum jaante ho ham woh padhaai padhte hain, jisse hamaare sir par double taaj hona hai। bhavishya janma-janmaantar double taajdhaari banenge। to uske liye phir aisa purushaartha karna chaahiye। inko kaha jaata hai raajayog। kitna wonder hai। baba hamesha samjhaate hain, lakshmi-naaraayan ke mandir mein jaao। pujaari ko bhi tum samjha sakte ho। unse poochho ki lakshmi-naaraayan ko yeh pad kaise mila? yeh vishwa ke maalik kaise banen? aise-aise baith kisko sunaao to pujaari ka bhi kalyaan ho jaae। tum kah sakte ho ki ham aapko samjhaate hain। in lakshmi-naaraayan ko raajya kaise mila। geeta mein bhi bhagvaanuvaach hai na ki main tumko raajayog sikhlaakar raajaaon ka raaja banaata hoon। to bachchon ko kitna nasha rehna chaahiye। ham yeh bante hain। bhal apna chitra aur raajaai ka chitra bhi saath mein nikaalo। neeche tumhaara chitra oopar raajaai ka chitra ho, ismen kharcha to hai nahin। raajaai poshaak to jhat ban sakti hai। woh apne paas rakh do to ghadi-ghadi yaad aata rahega। ham so devta ban rahe hain। oopar mein bhal shivbaaba ho। yeh sab chitra nikaalne honge। ham manushya se devta bante hain। yeh shareer chhod ham jaakar devta banenge kyonki abhi yeh raajayog seekh rahe hain। to yeh photo madad karenge। oopar mein shiv phir raajaai chitra, neeche tumhaara saadhaaran chitra। shivbaaba se ham raajayog seekhkar double sirtaajdhaari devta ban rahe hain। chitra rakha hoga, koi bhi poochhenge to tum bata sakenge। hamko sikhaane vaala yeh shivbaaba hai। chitra dekh bachchon ko nasha chadhega। bhal dukaan mein bhi yeh chitra rakh do। bhakti maarga mein baba naaraayan ka chitra rakhta tha। pocket mein bhi rehta tha। tum bhi apna photo rakh do to yaad rahega ki ham so devi-devta ban rahe hain। baap ko yaad karne ka upaay dhoondhana chaahiye। baap ki yaad bhool jaane se hi girte hain। vikaar mein girenge to phir sharma aayegi ki ab to ham yeh devta ban nahin sakte। heartfail ho jaayegi ki ham ab devta kaise banenge। baba kehte hain - vikaar mein girne vaale ka photo nikaal do। bolo, tum svarga mein chalne laayak nahin ho। tumhaara passport khalaas। khud bhi feel karenge - ham to gir gaye! ab svarga mein kaise jaayenge। jaise baba naarad ka misaal dete hain, unko kaha ki apni shakla to dekho lakshmi ko varne laayak ho? to shakla bandar ki dikhaai padi to manushyon ko bhi sharma aayega - hamaare mein to yeh vikaar hain phir shri lakshmi-naaraayan ko kaise var sakte hain। baba to yuktiyaan bahut bataate hain। parantu koi vishvaas bhi rakhe na। vikaar ka nasha aata hai to samajhte hain is hisaab se ham raajaaon ka raaja double taajdhaari kaise banenge। purushaartha to karna chaahiye na। baba samjhaate hain ki aisi-aisi sundar yuktiyaan racho aur sabko samjhaate raho। yeh raajayog se sthaapna ho rahi hai। ab vinaash saamne khada hai। din-pratidin toofaanon ka jor hota jaayega। bombs aadi bhi taiyaar ho rahe hain।

tum bachche yeh padhaai padhte hi ho oonch pad paane ke liye। tum ek hi baar patit se paavan bante ho। manushya samajhte thode hi hain ki ham narkavaasi hain kyonki pattharbuddhi hain। abhi tum pattharbuddhi se paarasbuddhi ban rahe ho। takdeer mein hoga to jhat samjhega। nahin to kitna bhi maatha maaro, buddhi mein baithega nahin। baap ko hi nahin jaante to naastik hain arthaat nidhanke hain। dhani ka banna chaahiye jabki shivbaaba ke bachche hain। yahaan jinko gyaan hai woh apne bachchon ko vikaar se bachaate rahenge। agyaani log to apne muaaphik bachchon ko vikaar mein phansaate rahenge। tum jaante ho yahaan vikaaron se bachaaya jaata hai। kanyaaon ko to pahle bachaana chaahiye। maa-baap to jaise vikaar mein dhakka dete hain। tum jaante ho ki yeh bhrashtaachaari duniya hai। shreshthaachaari duniya to sab chaahte hain parantu woh kaun banaayega? bhagvaanuvaach - main in saadhuon, santon ka bhi uddhaar karta hoon। geeta mein bhi likha hua hai ki bhagwan ko hi sabka uddhaar karna hai। ek hi bhagwan baap aakar sabka uddhaar karte hain। is samay agar maaloom ho jaae ki barobar geeta ka bhagwan shiv hai to pata nahin kya ho jaae! parantu abhi thodi deri hai। nahin to sabke adde ekdam hilne lag paden। takhta hilte hain na। ladaai jab lagti hai to pata padta hai ki inka takhta hilne laga hai, ab gir padega। abhi yeh hile to halchal mach jaaye। aage chal hone ka hai। to bhaashan mein bhi tum samjha sakte ho। sanskrit jo achhi reeti jaante hain woh shlok suna sakte hain। patit-paavan, sarva ka sadgati daata khud kehte hain, barobar brahma tan se sthaapna kar rahe hain। sarva ki sadgati arthaat uddhaar kar rahe hain। bhaashan karne mein badi masti chaahiye। kanyaaon ka new blood hai। gyaan ka patthar maar sakti hain। student ka new blood hota hai na, to khoob hangaama machaate hain। patthar maarte hain। ismen woh teekhe hote hain। ab yeh bhi tumhaara new blood hai। tum jaante ho woh kitna nuksaan kar rahe hain। tumhaara yeh eeshvareey new blood hai। tum puraane se naye ban rahe ho। tumhaari aatma jo puraani iron aged ban gai hai, woh ab nai golden aged ban rahi hai। to bachchon ko bada shauk hona chaahiye। nasha kaayam rakhna chaahiye। apni hamjinsa ko uthaana chaahiye। gaaya bhi jaata hai guru maata। maata guru kab hoti hai so tum jaante ho। guru ka silsila abhi chalta hai। maataaon par baap aakar gyaan amrit ka kalash rakhte hain। shuru bhi aise hota hai। centres ke liye bhi kehte hain braahmani chaahiye। baba to kehte hain aapehi chalaao। himmat nahin hai, nahin baba maata chaahiye। yeh bhi theek hai, maan dete hain। aajkal duniya mein ek-do ko langada maan dete hain। sthaai kisko milta nahin hai। is samay tum bachchon ko sthaai raajya-bhaagya mil raha hai। tumko baap kitne prakaar se samjhaate hain। apne ko sadaiv harshit mukh rahne ke liye bahut achhi-achhi yuktiyaan baap bataate hain। shubh bhaavna rakhni chaahiye। oho! ham yeh lakshmi-naaraayan bante hain। agar kiski takdeer mein nahin hai to tadbeer kya kare। baba to tadbeer bataate hain, tadbeer kabhi vyartha nahin jaati। yeh to sada saphal hoti hai। raajdhaani sthaapan ho jaayegi। vinaash bhi mahaabhaari mahaabhaarat ladaai dvaara hona hai। aage chal tum bhi jor bharenge to yeh sab aayenge। abhi nahin samjhenge, nahin to unki raajaai ud jaaye। tumhaare paas chitra bahut achhe hain। yeh hai sadgati arthaat sukhdhaam। yeh hai muktidhaam। buddhi bhi kehti hai ham sab aatmaayen nirvaandhaam mein rehti hain। jahaan se phir talkie dhaam mein aate hain। ham aatmaayen vahaan ki rahne vaali hain। yeh khel hi bhaarat par bana hua hai। shiv jayanti bhi yahaan manaate hain। baap kehte hain - main aaya hoon, kalpa baad phir aaoonga। bhaarat hi paradise hai। kehte bhi hain Christ ke itne varsha pahle paradise tha। ab nahin hai, phir hona hai। to zaroor narkavaasiyon ka vinaash, svargavaasiyon ki sthaapna chaahiye। so to tum svargavaasi ban rahe ho, narka ka vinaash ho jaayega। yeh bhi samajh chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har ek ke prati shubh bhaavna rakhni hai। sabko sachcha maan dena hai। satayugi raajdhaani mein oonch pad paane ke liye tadbeer karni hai।

2) aatma-abhimaani banne ki mehnat karni hai। maanav mat chhod ek ki shreemat par chalna hai। padhaai ke nashe mein rehna hai।

vardaan:- sarva aatmaon ke patit sankalp va vrittiyon ko bhasma karne vaale master gyaan soorya bhav

jaise soorya apni kirnon se kichda, gandagi ke keetaanu bhasma kar deta hai। aise jab aap master gyaan soorya bankar koi bhi patit aatma ko dekhenge to unka patit sankalp, patit vritti va drishti bhasma ho jaayegi। patit-paavni aatma par patit sankalp vaar nahin kar sakta। patit aatmaayen patit-paavniyon par balihaar jaayengi। iske liye might house arthaat master gyaan soorya sthiti mein sada sthit raho।

slogan:- apne dhaarna swaroop se yogi jeevan ka prabhaav daalna - yeh bahut badi seva hai।

avyakt ishaare - ab apne daata swaroop ko pratyaksha karo

jaise gaayan hai ki bhaagya-vidhaata baap ne bahma dvaara bhaagya baanta, to jo brahma ka kaam, woh braahmanon ka kaam। duniya vaale kapda baantenge, anaaj baatenge, paani baatenge lekin shreshtha bhaagya to aap bhaagya vidhaata ke bachche hi baant sakte ho। jise bhaagya praapta ho jaae use sab kuchh praapta ho jaata hai isliye bhaagya baantane mein phraakhdil bano।