Daily Murli for Tuesday 22 September 2026

22-09-2026 praatahmurli om shanti "baapdaada"' madhuban

“meethe bachche - tum sensible bane ho to kamaai ka bahut-bahut shauk rehna chaahiye। dhandhe aadi se bhi samay nikaal baap ko yaad karo to kamaai hoti rahegi''

prashn:- tum bachchon ko abhi kaun si aisi shreemat milti hai, jo kabhi nahin mili?

uttar:- 1- tumhein is samay baap shreemat dete hain - meethe bachche, savere-savere uthkar baap ki yaad mein baitho to poora varsa milega। 2- grihastha vyavhaar mein rehte kamal phool samaan raho, aisi shreemat doosre satsangon mein kabhi mil nahin sakti। un satsangon mein baap aur varse ki baat nahin।

geet:- tumheen ho maata pita…

om shanti। is bhaarat mein khaas aur saari duniya mein aam anek prakaar ke satsang hote hain। aise koi bhi satsang ya church ya mandir nahin honge jahaan manushyon ki buddhi mein ho ki ham yeh varsa pa rahe hain। yahaan tum bachche baithe ho, sabhi centres mein apne behad baap ki yaad mein baithe hain - is vichaar se ki ham apne baap se sukhdhaam ka varsa pa rahe hain। aise aur koi satsang va church aadi mein nahin samjhenge। tum bachchon ki buddhi mein hi hai। tum bachche jaante ho ki ham behad ke baap ki yaad mein baithe hain। nai duniya svarga ka varsa le rahe hain। sab bachche ek baap se varsa le rahe hain। itne dher bachche vriddhi ko paate rehte hain। sabko shreemat milti hai, savere uthkar baap ko yaad karo। ham baba se yeh varsa lene vaale hain। ham us baap ke bane hain। aatma ko ab pahchaan mili hai baap se। baap direction dete hain mujhe yaad karo aur grihastha vyavhaar mein rehte hue kamal phool samaan pavitra raho। sabko yahaan aakar baithna to nahin hai। school mein padhkar phir apne-apne ghar chale jaate hain। har ek bachchi-bachcha apne teacher se varsa pa sakta hai। yeh bhi aise hi hai। roz padhkar phir ghar mein jaakar bhal dhandha aadi karo। tum grihastha vyavhaar mein bhi ho aur phir student bhi ho। grihastha vyavhaar mein rehte kamal phool samaan rehna hai। aise koi sannyaasi aadi nahin kehte। yahaan tum practical mein baithe ho। grihastha vyavhaar mein rehte pavitra bante ho। pavitra bankar parampita paramatma ko doosre koi yaad nahin karte hain। bhal geeta sunte hain, padhte hain parantu yaad to nahin karte hain na। kathni aur karni mein farka hai। tum jaante ho hamaara baap knowledgeful hai, usmein saare drama chakra ki knowledge hai। abhi hamko bhi knowledge mil rahi hai। yeh chakra bada achha hai। yeh purushottam yug hone ke kaaran tumhaara yeh janma bhi purushottam hai। extra maas hota hai na।

tum bachche jaante ho ki ham barobar baap se purushottam ban rahe hain। maryaada purushottam, ham phir se ban rahe hain। phir 84 ka chakra khaaya, yeh buddhi mein gyaan hai। aur koi satsang mein yeh nahin samjhaate hain। tum samajhte ho hamko yeh banna hai। banaane vaala ek hi baap hai। in lakshmi-naaraayan ke chitra par tum achhi reeti samjha sakte ho। barobar brahma dvaara yogbal se inhonne yeh pad paaya hai। aise buddhi mein emerge karna chaahiye। brahma-sarasvati, lakshmi-naaraayan ke do roop bhi dikhaaye hain। brahma-sarasvati phir praja bhi dikhaani pade। har ek baat par achhi reeti vichaar karna chaahiye। baap kehte hain - mujhe yaad karo। brahma ko bhi kehte hain mujhe yaad karo to yeh banenge। goya brahma mukh vanshaavli sabko kaha mujhe yaad karo। kaise yaad karna hai, yeh bhi buddhi mein hai। chitra bhi saamne rakhe hain। in par samjhaana bada sahaj hai। baap ka parichay dena hai। pradarshani mein bhi is par samjhaao। yeh nishchay baithta hai ki barobar yeh sabka behad ka baap hai। is hisaab se humein behad ka varsa milna chaahiye। ham niraakaari aatmaayen to bhaai-bhaai hain। jab saakaar mein aayen to bhaai behen banen, tab padh saken। bhaai-behen banenge hi brahma ke bachche। varsa baap se milta hai। yeh buddhi mein bithaana hai। koi ko bhi samjhaao। pahle baap ka parichay do। ham brotherhood hain, sarvavyaapi kahne se fatherhood ho jaata hai। fatherhood ko varsa kahaan se milega। father-father kehte girte aaye hain। varsa kuchh bhi nahin। abhi brother-hood samajhne se hi varsa milega। to us par achhi reeti samjhaane se buddhi mein jo ashta devtaayen aadi baithe hue hain, woh sab nikal jaayenge। bolo do baap hain। roohaani baap jisse sarva ki sadgati honi hai, vahi sukh-shanti ka varsa dete hain। sab sukhi ho jaate hain। unko kaha jaata hai heavenly god father, svarga rachne vaala। pahle baap ka prabhaav buddhi mein bithaana chaahiye। yeh hai aatmaon ka behad ka baap। unko hi patit-paavan kehte hain। tum aatma parampita paramatma ke bachche ho। yeh nishchay pakka karo। mool baat pahle yeh buddhi mein bithaani hai। yeh samjhen tab khushi ka paara chadhe aur kahen ki ham baap ko yaad zaroor karenge। hamko nishchay hota hai, ham baap ko yaad kar vishwa ka maalik banenge। yeh khushi bahut rahegi। samajhdaar hoga aur buddhi mein poora nishchay hoga to kahega aisa behad ka baap jo daada mein aata hai, pahle to unse milen। shivbaaba brahma dvaara hi hamse baat kar sakenge। tum aatma to unse mili nahin ho to yaad kaise karenge। bachche adopt hon to yaad pade। adopt hi nahin honge to yaad kaise padega। pahle unke bano। aise baap ke saath to jhat milna chaahiye। baap bhi yahi poochhenge tum apne ko aatma samajhte ho? main tum aatmaon ka baap hoon। shiv-baba tumse baat kar rahe hain। meri aatma ka baap so tumhaara bhi baap hai। woh poochhte hain tumko nishchay hai ki sab aatmaon ka baap barobar ek hi hai। vahi varsa denge। pavitra bhi banna hai। sivaae unke aur sab bhool jaana hai।

tum aatma ghar se nangi (ashareeri) aai thi na। koi bhi deh, sambandh nahin tha। aatma jab shareer mein pravesh kare, badi ho tab unko samjhaaya jaata hai ki yeh tumhaara baba hai, yeh phalaana hai। aatma to sab sambandhon se nyaari hai। aatma chali jaati hai to kaha jaata hai - aap muye mar gai duniya। bandhan rahit ho jaati hai। jab tak doosra shareer mile। maata ke garbha mein jaakar baahar nikle, samajhdaar ho phir hai sambandh ki baat। to yahaan bhi tum bachchon ko samjhaana hai। jeete ji sab kuchh bhool jaana hai। ek baap ko yaad karna - yeh hai avyabhichaari yaad। isko hi yog kaha jaata hai। yahaan to manushyon ko anekon ki yaad rehti hai। tumhaari hai avyabhichaari yaad। aatma jaanti hai ki yeh sab shareer ke sambandh khatma ho jaane hain। hamaara sambandh ek baap ke saath hai, baap ko jitna yaad karenge, vikarma vinaash honge। aise bhi nahin ki mitra-sambandhiyon ko yaad karne se koi vikarma banenge। nahin, vikarma tab banenge jab aisa koi wrong karma karenge। baaki aur koi ko yaad karne se vikarma nahin banenge, haan, time vesta zaroor hoga। ek baap ko yaad karne se vikarma vinaash hote hain। yeh yukti hai paap katne ki। baaki sambandh aadi to yaad rehte hain। shareer nirvaah arth dhandha aadi sab karo parantu jitna time mile baap ko yaad karte raho, to khaad nikal jaae। mool baat hai yeh। andar mein hi vichaar karo ki patit se paavan kaise banen। baap ko yaad karna pade। grihastha vyavhaar mein rehna hai। sannyaasi log bhi shareer chhod phir grihasthiyon ke paas jaakar janma lete hain। aise to nahin janma-janmaantar ke liye paavan ban jaate hain। viceless world to abhi koi hai nahin। yeh hai vicious world। inse koi nikal nahin sakte। vicious world mein rahne ke kaaran kuchh na kuchh khaami zaroor hai। baaki duniya to hain hi do। vicious world aur viceless world, paavan duniya mein devtaayen rehte the to samjhaane mein bahut sahaj hoga। is patit duniya ka abhi vinaash hona hai। vinaash hone ke pahle behad baap se varsa lena hai। baba kehte hain - deh ke sambandh chhod apne ko aatma nishchay karo aur baap ko yaad karo to tum paavan ban jaayenge। baap kehte hain - tum mujhe patit-paavan kehte ho na। ganga mein dubki lagaane vaale to bahut hain। aise thode hi ki paavan ban jaayenge। pradarshani mein samjhaana bahut achhi tarah padta hai। prajaapita to yahaan hi chaahiye। neeche yeh brahma aur brahmaakumaar-kumaariyaan tapasya kar rahe hain। to yeh baat achhi reeti samjhaani chaahiye। kisko bhi haddi (jigri) samjhaana hai। bit-bit karne se badnaam kar denge। agar dekho ham kahaan moonjhate hain to kaho achha thoda thahro ham doosri behen ko bhejte hain। ek-do se teekhe hote hain na। pradarshani mele mein jaanch karni chaahiye ki theek samjhaate hain। koi debate to nahin karte hain। get par bhi pahchaan vaala chaahiye। anek prakaar ke aate hain na। bade aadmi ko zaroor regard denge। farka to zaroor rahega। ismen yeh nahin aana chaahiye ki in par pyaar hai, in par nahin hai। dvait drishti hai, nahin। inko dvait nahin kaha jaata hai। samajhte hain yahaan bade aadmi ki khaatiri ki jaati hai। serviceable ki khaatiri karenge na। koi ne makaan banvaakar diya hai to unki khaatiri to zaroor karenge na। tumhaare liye hi to makaan bane hain na। jo mehnat kar raaja bante hain to praja automatically khaatiri karegi na। kam darje vaale se, oonch darje vaale ki khaatiri to hogi na। behad ke baap ki saari duniya ki aatmaayen bachche hain। parantu janma liya hai bhaarat mein। bhaaratvaasi jo pahle oonch the, ab neech ban gaye। to baap kehte hain main aaya hoon padhaane। main bhaarat mein aata hoon to sabka kalyaan ho jaata hai। in particular, in general to hota hai na। abhi bhaarat hi narka hai phir svarga banna hai। to bhaarat mein hi to jaayenge na aur jagah jaakar kya karenge। bhaarat mein hi bhakti maarga mein pahle-pahle somnaath ka bada aaleeshaan mandir banaaya tha। jaise church bade te badi vilaayat mein banaayenge kyonki pope ki li hui raajaai hai। sab church ek jaisi nahin hoti hain। nambarvaar to hogi na। somnaath ka mandir kitna heere-javaahron se bharpoor tha, musalmaan aadi lootkar le gaye। bahut dhanvaan the। church se kya loot sakenge। manushya dhan ke pichhaadi padte hain na। muhammad gajanvi kitna le gaya। phir angrej aaye, woh bhi yahaan se dhan bhejte gaye। bahut dhan le gaye। ab woh tumko vaapis mil raha hai, karodon rupaya dete hain। yeh sab aaivel (samay aane par) mil raha hai। hisaab na mile to aaivel kaise chale।

baap samjhaate hain yeh drama kaise bana hua hai। yeh len-den ka hisaab kaisa hai। phir bhi tum bachchon ko ab svarga ka maalik banna hai। yeh world ki history-geography kaise chakra lagaati hai, woh bhi bachchon ko samjhaaya hai। phir bhi kehte hain bachche manamnaabhav। yeh sab phir repeat hoga। har cheez sato se tamopradhaan ban jaayegi। din mein dhandha-dhori aadi karte ho, woh time chhodo। baaki jitna time mile mujhe yaad karo। dhandhe aadi mein bhi kabhi-kabhi time milta hai। kaiyon ki aisi service rehti hai, sirf sahi ki, khalaas। aise bhi bahut free rehte hain। phir bhi raat to apni hai। din mein shareer nirvaah ke liye kamaai karte ho, raat ko phir yeh kamaai karo। yeh hai bhavishya 21 janmon ke liye। kaha jaata hai ek ghadi, aadhi ghadi - jitna ho sake baap ki yaad mein raho to tumhaari bahut kamaai hogi। sensible jo hoga woh samjhega ki barobar bahut kamaai kar sakte hain। koi-koi chart bhi likhte hain - hamne itna samay yaad kiya। agyaan kaal mein koi apni dincharya likhte hain। tum bhi chart likhenge to attention rahega। koi time vesta to nahin hota hai! koi vikarma to nahin kiya! achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi dehdhaareen ko yaad kar apna time vesta nahin karna hai। aisa koi wrong karma na ho jo vikarma ban jaae।

2) jeete ji sab kuchh bhool ek baap ko yaad karna hai। shareer nirvaah arth karma bhi karna hai। saath-saath sensible ban raat mein bhi jaagkar yeh avinaashi kamaai karni hai। yaad ka chart rakhna hai।

vardaan:- sampoorn stage aur status ki smriti se sada oonch kartavya karne vaale baap samaan bhav

sadaiv yeh smriti mein rahe ki main har samay, har second, har karma karte hue stage par hoon to har karma par attention rahne se sampoorn stage ke najdeek aa jaayenge। saath-saath vartamaan aur bhavishya status ki smriti rahne se har karma shreshtha hoga। yahi do smritiyaan baap samaan bana dengi। samaanta mein aane se ek do ke man ke sankalpon ko sahaj hi catch kar lenge। iske liye sirf sankalpon par controlling power chaahiye। apne sankalpon ki mixturity na ho।

slogan:- eershya aur apraapti ka kaaran ichchhaayen hain, jahaan sarva praaptiyaan hain vahaan prasannata hai।

ye avyakt ishaare - ab apne daata swaroop ko pratyaksha karo

har second, har sankalp check karo kuchh diya? liya to nahin? dete jaao। lena hai baap se, woh to le hi liya, ab dena hai। jitna-jitna dene mein busy honge to koi bhi baaten cross karna mushkil nahin lagega। sab baaten bahut sahaj ho jaayengi kyonki mahaadaani banne se mahaan shakti ki praapti svatah hoti hai।