Daily Murli for Thursday 5 November 2026

05-11-2026 praatahmurli om shanti "baapdaada"' madhuban

meethe bachche - tumhein silence mein rahkar ek baap ko yaad karna hai, ismen ghante aadi bajaane ki darkaar nahin hain“

prashn:- kis baat mein baap samaan bano to sab kaam siddha ho jaayenge?

uttar:- jaise baap pyaar ka saagar hai vaise bahut-bahut pyaare bano। krodh se kaam bigadta hai, banta nahin isliye aankh dikhaana, jor se bolna, garam hona, iski darkaar nahin hai। shant rehna bahut-bahut achha hai। pyaar se bahut kaam siddha ho sakte hain।

geet:- tumheen ho maata pita…

om shanti। yeh mahima hai ek ki। parantu bhaktimaarga mein sirf ek ki mahima gaane se bhakti ka show nahin hota isliye bhakti mein bahuton ki mahima gaate hain। vahaan aavaaj bhi bahut hota hai। ghanta-ghadiyaal, geet-bhajan, rona-peetna kitna bhakti maarga mein chalta hai। kisam-kisam ke aavaaj mantra-jantra, stuti aadi hoti hai aur gyaan maarga mein hai silence। sirf ishaara diya jaata hai, aavaaj kuchh nahin। bhakti mein kitni dhoomdhaam hai। sabse jaasti ghante bajte hain shiv ke mandir mein, jahaan tahaan dekho ghante hi ghante hain। kisko neend se jagaane ke liye koi ghante nahin bajaaye jaate hain। shivbaaba ne aakar manushyon ko kumbhakran ki agyaan neend se jagaaya hai, parantu ghante nahin bajaate। bilkul shanti se do aksharon mein hi samjhaate hain। buddhivaan jo hote hain woh do akshar mein hi samajh jaate hain। baap kehte hain bachche - mujhe yaad karo। tumne hi mujhe bulaaya hai he patit-paavan aao। ab main aaya hoon tumko raah bataata hoon। kya ab tak tumko patit bankar is duniya mein hi rehna hai! tum to paavan duniya mein rahne chaahte ho na। paavan duniya svarga ko kaha jaata hai। kehte hi hain patit-paavan, to samajhna chaahiye ki patit-paavan kya aakar karega? zaroor narka se svarga mein le jaayega। bina samjhe aise hi bulaate rehte hain, taaliyaan bajaate rehte hain। parantu yeh nahin jaante ki baap aayega to kya aakar karega? vaastav mein yeh university bhi hai manushya se devta banne ki। tab gaate hain manushya ko devta kiye..... ismen shaastra aadi kuchh bhi padhna nahin hai। bhakti maarga mein bahut shaastra aadi padhte hain, dher lecture aadi hote hain। maas-maas mandap banaakar baith aavaaz karte hain। yahaan kitna shanti mein baap baith samjhaate hain। dekho, tumko baba aakar paavan banaae, paavan duniya ka maalik banaate hain। padhaai bhi kitni sahaj hai। tum pahle-pahle paavan the, golden ej mein the। phir 84 janma lete-lete iron ej mein tamopradhaan ban gaye ho। ab tumko satopradhaan banna hai isliye mujhe yaad karo। so bhi ajpa। jaise kanya ki jab shaadi hoti hai to kya jaap karti hai? yaad mein rehti hai। tum bhi sab patniyaan ho, yeh shivbaaba patiyon ka pati hai। tumhaari sagaai hui hai paramatma ke saath। sagaai jab ho gai to bas yaad buddhi mein baith gai। khaatiri ho gai ki hamne sagaai kar li। phir ek do ko yaad karte rehte hain। tumko bhi baap kehte hain nishchay buddhi ho gaye ki ham ek baap ke bachche aapas mein bhaai-bhaai hain। bhaaiyon ko varsa milta hai - ek baap se, isliye baap ko pukaarte hain। bhal manushya tan mein aakar bhaai-behen ban jaate hain। parantu pukaarti aatma hai na। bhaai-bhaai pukaarte hain he patit-paavan baba aao। baba kehte hain - mujhe yaad karo to tamopradhaan se satopradhaan ban jaayenge। paavan ko satopradhaan, patit ko tamopradhaan kaha jaata hai। yeh baaten baba sangam par hi samjhaate hain। yeh hai geeta paathshaala। is paathshaala mein baap aakar raajayog sikhlaate hain, nar se naaraayan banaate hain। vahaan teacher to saamne baith padhaate hain, dikhaai padta hai। yeh hai gupta। to is teacher ko bhi buddhiyog se samajhna padta hai। woh niraakaar patit-paavan baap hai। vahi smriti dilaate hain ki kalpa pahle bhi mainne tumko raajayog sikhaaya tha। tab kaha jaata hai manamnaabhav, pavitra bano to yeh lakshmi-naaraayan ban jaayenge। ismen ghanta-ghadiyaal aadi bajaane ki darkaar hi nahin। baap khud aakar jagaate hain। manamnaabhav ka arth hai silence। apne ko aatma nishchay karo। bas! ab hamko apne ghar jaana hai। baap ko hi sab kehte hain ki hamko duhkh se chhudaae mukta karo। sannyaasi log sirf brahm ko yaad karte hain। ab brahm tatva to hai ghar। woh ghar ko yaad karenge, yahaan baap ko yaad karna hai। sirf ghar ko yaad karenge to jaise sannyaasi ho jaayenge। brahm to bhagwan hai nahin।

baap baith samjhaate hain - mujhe yaad karo to tum nirvaandhaam mein chale jaayenge। phir vahaan se aayenge svarga mein। yahaan se main tum bachchon ko saath le jaaoonga। tumko maaloom hai tiddiyon ka jhunda kitna bada hota hai। sabki unity hoti hai। pahle aage vaala baitha to sab baith jaayenge। madhumakkhiyaan bhi aisi hoti hain। raani ne ghar chhoda to sab bhaagengi unke pichhaadi। woh jaise unhon ka saazan hua। unmein phir sajni hi raajya karti hai hamjinsa par। shaastron mein bhi hai aatmaayen sab machchharon sadrishya bhaagti hain। anginat aatmaayen hain। woh makkhiyaan har season mein apni raani ke peechhe bhaagti hain। tumko to ek baar bhaagna hai। ab sab aatmaon ko jaana hai mool vatan। tumhaara aavaaz kuchh bhi nahin isliye baba misaal dete hain। sarson ke daane misal peeste hain। baba bhi bindi, sarson ke daane misal hai। khas-khas ka daana bhi chhota hota hai। paramatma bhi bindi hai। unko dekha bhi nahin jaata - divya drishti bina। bilkul chhota star misal hai। geeta mein dikhaaya hai akhanda jyoti ka saakshaatkaar hua, to yahaan bhi jab akhanda jyoti ka saakshaatkaar ho tab samjhenge saakshaatkaar hua। agar bindi ka hua to samjhenge yeh paramatma thode hi hai। geeta mein to likha hua hai - arjun ko bahut tejomay saakshaatkaar hua। bhakti ki baaten buddhi mein baithi hui hain। bhakti maarga aur gyaan maarga mein raat din ka pharka hai। tum jaante ho ham 63 janma shareer dvaara kitna daans karte hain। 63 janma kitna bhakti maarga ka hangaama dekhte hain। usmein bhi pahle jab satopradhaan bhakti thi to ek shivbaaba ki bhakti karte the। phir yeh ganga snaan aadi baad mein shuru hote hain। pahle avyabhichaari bhakti hoti hai phir vriddhi ko paate hain। yahaan to ekdam silence lagi padi hai। bagair kaudi tum vishwa ke maalik bante ho। mama bina kaudi aai aur vishwa mahaaraani ban gai। yeh saadhaaran tha। ekdam gareeb ghar ke bina kaudi kharcha dekho kya bante hain। mama phir service bahut karti thi। jaakar auron ko samjhaati thi ki baba kehte hain mujhe yaad karo to tumhaare vikarma vinaash honge aur tum satopradhaan ban jaayenge। ismen kharche ki to koi baat hi nahin। agar koi thoda kharcha bhi karte hain to apne liye। jaise kheti mein do mutthi anna ki daalne se kitna dher anna nikalta hai। kheti badi ho jaati hai। yeh bhi 21 janmon ke liye tumhaari kitni aamadni hoti hai। manushya se devta banna kitna sahaj hai। ek second ki baat hai। baithe bhi kaise saadhaaran hain। agar koi baith nahin sakta hai to baba kehte hain so karke bhi (let karke) murli suno। yeh hai dhaarna ki baat। andar mein baba aur chakra ko yaad karte raho। yaad karte-karte hi shareer chhodna hai। baaki mukh mein ganga jal daalne ki koi baat nahin hai। guru gosaai to bahut dara dete hain ki tum yeh niyam todenge, bhakti nahin karenge to yeh hoga। samjho koi ki taang toot padti hai va nuksaan hua to kahenge tumne bhakti chhodi hai tab yeh nateeja nikla, to dar jaate hain। yahaan to kuchh bhi karna nahin hai। baba ki yaad dilaani hai, chakra ka raaz samjhaana hai। abhi kaliyug ke baad satayug aana hai, vinaash hona hai zaroor, isliye yeh mahaabhaari ladaai khadi hai। bhagwan aakar raajayog sikhaae nar se naaraayan banaate hain। yeh raajayog hai, praja yog nahin। shubh bolna chaahiye। bachchon ko bahut meetha banna hai। baba meetha hai na। krodh aadi sab daan mein le lete hain। baap kehte hain - main pyaar ka saagar hoon, tum bhi bano। bada pyaar se samjhaate hain। nahin to bachche bahut hangaama karte hain kyonki maaya maatha kharaab kar deti hai, isliye khyaal aata hai kabhi bhi kisko kuchh kahen nahin। pyaar se samjhaayen। aankh dikhaana, garam hona, jor se bolna, iski darkaar nahin hai, isse kaam bigadta hai। shant rehna achha hai। vikaaron ka daan dekar phir lete hain to apna pad ganvaate hain। baba ka bane goya 5 vikaaron ka daan de diya। kehte hain de daan to chhoote grahan। phir bhi baap panda hai na, pande brahman hote hain। shivbaaba bhi roohaani panda hai। tum bhi pande ho। baba brahma ke tan mein aate hain to yeh bhi brahman thahra। baba ismen baitha hai, unki mahima gaate hain tum maat-pita..... aur kiski yeh mahima nahin। unka kartavya bhi aisa hai। yeh paathshaala hai, baap padhaate hain। yeh bachchon ko yaad rehna chaahiye। em object hai hi vishwa ki baadshaahi paana। to aise padhaane vaale ko poori tarah yaad karna chaahiye। school se student achha paas hote hain to saal-saal teacher ko saugaat bhejte rehte hain। yeh tyohaar aadi sab is samay ke hain, parantu inke mahatva ko koi jaanta nahin।

baba hai knowledgeful। woh aate hi hain rachna ke aadi-madhya aur ant ki knowledge dene। thikkar-bhittar mein kaise aayenge? ek doctor ne siddha kiya tha ki har cheez mein aatma hai। paramatma nahin kaha। phir yeh kah dete hain - sarvavyaapi। unhonne kaha sabmen aatma, to sannyaasiyon ne kaha sabmen paramatma। kitna raat-din ka farka hai। woh to behad ka baap hai। sabse buddhiyog tudaae apne saath judaate hain। woh kehte aatma budbuda saagar se nikla hai, saagar mein leen ho jaayega। brahm gyaani samajhte hain - chhoti jyoti badi jyoti mein leen ho jaayegi, phir nai utpatti hoti hai। baba samjhaate hain yeh bhakti ki bhi drama mein noondh hai। main bhi drama ki noondh anusaar tum bachchon ko aakar samjhaata hoon। 84 janmon ka jo chakra lagaate hain, yeh bhi drama mein noondh hai। jo kuchh hota hai sab noondh hai। koi gaayan bhi karte hain, koi vighna bhi daalte hain।

tum bachchon ko shivbaaba se varsa lena hai। woh aate hi hain sab aatmaon ko le jaane ke liye। shareer ka naam bhi nahin lete। shareer sahit thode hi kisko bhagaane aaya hoon। mujhe to kehte hain he liberator aao। hamko duhkh se liberate kar aur jagah le chalo। jahaan chain, sukh-shanti paayen। to sabka shareer yahaan hi chhudaae aatmaon ko le jaaoonga। to kaalon ka kaal hua na। main sabko ikattha le jaaoonga। kitni wonderful baaten baap baith samjhaate hain। kahaan koi baat samajh mein nahin aati hai to bolo yeh baat baba ne ajun samjhaai nahin hai। jab samjhaayenge tab aapko sunaayenge। aise apne ko chhuda dena chaahiye। bachche samajhte hain baba gyaan ka saagar hai। nai-nai baaten sunaate rehte hain। world ki history-geography sunaane vaala rachayita baap hai, jo aadi-madhya-ant ka gyaan sunaate hain। tum light house bhi ho to svadarshan chakradhaari bhi ho। parantu maaya bhula deti hai। ghutka khaate hain। kuchh na kuchh lais aa jaati hai। karmon ka hisaab-kitaab hai na। jab tak karmaateet avastha nahin bani hai to kuchh na kuchh hota rehta hai। hisaab-kitaab chuktu hua aur shareer chhod denge, ladaai shuru ho jaayegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vikaaron ka daan dekar vaapis nahin lena hai। mukh se shubh bolna hai, bahut meetha banna hai। baap ke samaan pyaar ka saagar bankar rehna hai।

2) silence mein rah bina kaudi kharcha vishwa ki baadshaahi leni hai। baap ki yaad mein rah thoda bahut kharcha kar 21 janmon ki aamadni karni hai।

vardaan:- trikaaldarshi sthiti dvaara maaya ke vaar se safe rahne vaale ateendriy sukh ke adhikaari bhav

sangamayug ka vishesh vardaan va brahman jeevan ki visheshta hai - ateendriy sukh। yeh anubhav aur kisi bhi yug mein nahin hota। lekin is sukh ki anubhooti ke liye trikaaldarshi sthiti dvaara maaya ke vaar se safe raho। agar baar-baar maaya ka vaar hota rahega to chaahte hue bhi ateendriy sukh ka anubhav kar nahin paayenge। jo ateendriy sukh ka anubhav kar lete hain unhein indriyon ka sukh aakarshit kar nahin sakta, knowledgeful hone ke kaaran unke saamne woh tuchchha dikhaai dega।

slogan:- karma aur mansa donon seva ka balance ho to shaktishaali vaayumandal bana sakenge।

ye avyakt ishaare - brahma baap samaan sampanna aur sampoorn sthiti ka anubhav karo

jaise hain, jo bhi paristhitiyaan saamne hain, unheen haalton mein rehte is hi shareer mein hamko sampoorn banna hai, yeh lakshya rakho। aapka sangamayugi sampoorn roop shaktiyon aur paandavon ke roop mein gaaya hua hai। jab is swaroop mein sthit honge tab maaloom padega ki hamaare bhakta kaun se hain aur praja kaunsi hai। jo praja hogi woh nazdeek aayenge aur jo bhakta honge woh pichhaadi mein charnon par jhukenge।