Mamma's Murli - gyan-sitar-08

२३.१२.५८

sanskaaron ke aadhaar par shareer ki banaavat

om shanti । paramatma dvaara ham manushya aatmaon ko aur paramatma ko jaan chuke hain। paramatma ka parichay maana rachta ko jaanna aur manushya ka parichay maana rachna ko jaanna। manushya hi mukhya hain। saari creation manushya ke pichhaadi aa jaati hai। ab ham jaante hain ki manushya hi aasuri aur daivi svabhaav vaala banta hai। devtaaen bhi manushya hain, asur bhi manushya hain। aise nahin ki asur koi bhayaanak shakla vaale hote hain। athva devtaaon ko teen netra dikhaate hain। aise koi manushya ko jyaada ang nahin hote hain। saari svabhaav ki baat hai। devtaaon ke aur asuron ke sanskaar alag-alag hain। asur kaha jaata hai ५ bhooton ko। yeh ५ bhoot manushyon mein hain to manushya ko asur kaha jaata hai। isse hi manushya duhkhi hote hain। abhi in sanskaaron ko badalna hai jo poorn gyaan se hi badlenge। in ५ bhooton se chhootne ki shapha dene vaala ek hi samartha paramatma hai। paramatma hi manushya se devta banaate hain।

ab ham aasuri svabhaav ko palat daivi svabhaav ki dhaarna kar rahe hain। pahle to aasuri svabhaav ke karmabandhan se poora chhootna hai arthaat sanskaar badalne hain। devtaaon ko sarvagun sampanna kaha jaata hai। unhon ke shareer bhi sundar hain kyonki shareer ki banaavat bhi sanskaar ke aadhaar par hoti hai। koi andha-loola hota hai to kehte hain karmon ka hisaab hai। to sanskaaron ka aadhaar raha na। ab paramatma aatmaon ko pavitra banaate hain, to shareer bhi sundar milte hain। ab aatmaaen impure hain to shareer bhi impure hain। ab ham daivi svabhaav dhaaran kar devta bante hain।

yeh hai sangam । devtaaen aur asur ab hain। asuron ke jamaane mein devtaaon ki baat hi nahin hai, devtaaon ke zamaane mein asuron ki baat nahin rehti hai। yeh hai sangam, jahaan ham ek taraf aasuri svabhaav ko chhod doosre taraf shuddh sanskaar dhaaran karne ke prayatna mein hain। sanskaar badlaana to ek paramatma samartha ka hi kaam hai। sanskaar bhi bahut janmon ke kade hain। bahut janmon ke sanskaar jo force se chalte aa rahe hain, ab us force ko mitaana paramatma ka hi kaam hai। bahut kehte hain ki purushaartha bhi karte hain parantu sanskaar aise kade hain jo mitte nahin hain। yeh saara sanskaaron ke oopar anek janmon ka bojh hai, unko ab mitaana hai। jitna ham baba ko yaad karenge utna vikarmo ka bojh kam hoga। ab hi sarvagun sampanna, १६ kala sampanna banna hai। kai poochhte hain - १६ kala kaunsi hain ? iska matlab hai poorn kalaayen। manushya ke liye aur jyaada stage hi nahin hai। jaise kaha jaata hai १००% । yahi sampoornata hai। unke oopar koi kalaaen nahin hain। baaki koi १६ gun aadi nahin hain। sab kalaaon se sampanna rehte hain। ratna jadit taaj aur light ka taaj - donon rehte hain। inke oopar koi taakat nahin rehti hai। jismaani aur ruhaani- donon taakat rehti hain। to hamaara purushaartha yeh hai। sab powers paramatma dvaara apne haath mein lete hain।

abhi ham १६ kala sampanna, sampoorn nirvikaari ban rahe hain। sanyaasiyon ko sampoorn nirvikaari nahin kahenge kyonki janma phir bhi vikaariyon se lete hain। to sampoorn nirvikaari nahin thahre। devtaaen janmate bhi nirvikaar se, rehte bhi nirvikaari aur shareer bhi karmabandhan-vash nahin chhodte । yeh stage paramatma dvaara milti hai। vahaan duhkh ka naam-nishaan nahin rehta hai। manushya samajhte hain - devtaaen bhi ladte the । parantu ham jaante hain ki devtaaon mein ladne ka svabhaav hi nahin hai। unhon ko sarvagun sampanna kaha jaata hai। us samay ka itna prabhaav hai। ab phir chakra ko phirna hai। sab kalaaon mein manushya sampoorn ab ho sakta hai। paramatma is samay aakar sampoorn aananda, sampoorn sukh dete hain, tab hi sukhdaata, aananda-daata kaha jaata hai। satayug mein jab १६ kala sampoorn hain to us samay mahima gaane ki bhi baat nahin rehti hai। jab woh neeche aate hain tab mahima gaai jaati hai ki aise १६ kala sampoorn bhi hokar gaye hain। us samay gaaye kaun ? duniya hi us avastha mein hai।