Avyakt murli du jeudi 18 septembre 1969

>

18-09-69om shanti avyakt baapdaada madhuban

“trinetri,trikaaldarshi aur trilokeenaath banne ki yuktiyaan”

kisko dekhte ho? aakaar ko dekhte va avyakt ko dekhte ho? agar apni va auron ki aakriti ko na dekh avyakt ko dekhenge to aakarshan moorta banenge। agar aakriti ko dekhte to aakarshan moorta nahin bante ho। aakarshan moorta banna hai to aakriti ko mat dekho। aakriti ke andar jo aakarshan roop hai usko dekhne se hi apne se aur auron se aakarshan hoga। to ab ke samay yahi avyakt service rahi hui hai। vyakta mein kyon aa jaate ho? iska kaaran kya hai?avyakt banna achha bhi lagta phir bhi vyakta mein kyon aate ho?vyakta mein aane se hi vyartha sankalp aate hain aur vyartha karma hote hain to vyakta se avyakt banne mein mushkil kyon lagti hai?vyakta mein jaldi aa jaate hain avyakt mein mushkil se tikte hain। iska kaaran kya hai? bhool jaate hain। bhoolte bhi kyon hai? deh abhimaan kyon aa jaata hai? maaloom bhi hai, jaante bhi ho, anubhav bhi kiya hai,ki vyakta mein aur avyakt mein antar kya hai?nuksaan aur phaayda kya hai?yeh bhi sab maaloom hai। jab tum yaad mein baithte ho to deh-abhimaan se dehi-abhimaani mein kaise sthit hote ho?kya kehte ho? baat to badi sahaj hai। jo aap sabne bataaya vo bhi purushaartha ka hi hai। lekin jaante aur maante hue bhi deh abhimaan mein aane ka kaaran yahi hai jo deh ka aakarshan rehta hai। is aakarshan se door hatne ke liye koshish karni hai। jaise koi kheenchane vaali cheej hoti hai to us khinchaav se door rakhne ke liye kya kiya jaata hai?chumbak hota hai to na chaahte hue bhi us taraph khinch aate hain। agar aapko us aakarshan se kisi ko door karna hai to kya karenge? koi cheej na chaahte hue bhi usko khaichti hai aur aapko us cheej se door use karna hai to kya karenge?ya to unko door le jaayenge ya to beech mein aisi cheej rakhenge jo vo aakarshan na kar sake। yeh do tarah se hota hai ya to door kar dena hai ya donon ke beech mein aisi cheej daal denge to vo door ho jaate isi prakaar yeh deh abhimaan ya yeh vyakta bhaav jo hai yeh bhi chumbak ke maaphik na chaahte hue bhi phir usmein aa jaate hai। beech mein kya rakhenge?svayan ko jaanne ke liye kya aavashyakta hai jisse svayan ko aur sarvashaktimaan baap ko poorn reeti jaan sakte ho? ek hi shabd hai। svayan ko aur sarvashaktimaan baap ko poorn reeti jaanne ke liye sanyam chaahiye। jab sanyam ko bhoolte ho to svayan ko bhi bhoolte aur sarvashaktimaan ko bhi bhoolte hain। albelepan ka sanskaar bhi kyon aata hai?koi na koi sanyam ko bhoolte ho। to sanyam jo hai vo svayan ko aur sarvashaktimaan baap ko sameep laata hai। agar sanyam mein kami hai to svayan aur sarvashaktimaan se milan mein kami hai। to beech ki jo baat hai woh sanyam hai। koi na koi sanyam jab chhodte ho to yeh yaad bhi chhootti hai। agar sanyam theek hai to svayan ki sthiti theek hai aur svayan ki sthiti theek hai to sab baaten theek hai। to yeh deh ki jo aakarshan hai vo baar-baar apni taraph aakarshit karti hai। agar beech mein yeh sanyam (niyam) rakh do to yeh deh ki aakarshan aakarshit nahin karegi। iske liye teen baaten dhyaan mein rakho। ek svayan ki yaad। ek sanyam aur samay। yeh teen baaten yaad rakhenge to kya ban jaayenge? trinetri trikaaldarshi-trilokeenaath। sangamayug ka jo aap sabka title hai vo sab praapta ho jaavega। svayan ko jaanne se sarvashaktimaan beech mein aa hi jaata hai। to in teenon baaton taraph dhyaan do। koi bhi chitra ko dekhte ho (chitra arthaat shareer) to chitra ko nahin dekho। lekin chitra ke andar jo chetan hai usko dekho। aur us chitra ke jo charitra hain un charitron ko dekho। chetan aur charitra ko dekhenge to charitra taraph dhyaan jaane se to chitra arthaat deh ke bhaan se door ho jaayenge। ekaek mein koi na koi charitra zaroor hai। kyonki brahman kul bhooshan hi charitravaan hai। sirf ek baap ka hi charitra nahin hai। lekin baap ke saath jo bhi madadgaar hai unki bhi har ek chalan charitra hai। to charitra ko dekho aur chetan va vichitra ko। to yeh kahen vichitra aur charitra। agar yeh do baaten dekho to deh ki aakarshan jo na chaahte huye bhi kheench leti hai vo door ho jaayegi। vartamaan samay yahi mukhya purushaartha hona chaahiye। jabki aap log kehte hi ho ki ham badal chuke hain। to phir yeh sab baaten hi badal jaani chaahiye phir puraane sanskaar aur yeh puraani baaten kyon? apne ko badalne liye pahle yeh jo bhaav hai, us bhaav ko badalne se sab baaten badal jaayegi।

aasakti mein aa jaate hain na। to aasakti ke bajaay agar apne ko shakti samjho to aasakti samaapta ho jaayegi। shakti na samajhne se anek prakaar ki aasaktiyaan aati hain।

koi bhi aasakti chaahe deh ki, chaahe to deh ke padaarthon ki koi bhi aasakti utpanna ho to us samay yahi yaad rakho ki main shakti hoon। shakti mein phir aasakti kahaan?aasakti ke kaaran us sthiti mein aa nahin sakte hain। to aasakti ko khatma kar do। iske liye yahi socho ki main shakti hoon maataaon ko vishesh kaunsa vighna aata hai? (moh) moh kis kaaran aata hai?moh mera se hota hai। lekin aap sabka vaayda kya hai? shuru-shuru mein aap sab-jab aaye to aapka vaayda kya tha?main teri to sab kuchh tera। pahla vaayda hi yeh hai। main bhi teri aur mera sab kuchh bhi tera। so phir bhi mera kahaan se aaya?tere ko mere se mila dete ho। isse kya siddha hua ki pahla vaayda hi bhool jaate ho। pahla-pahla vaayda hi sab yeh kehte hain:- jo kahoge,vo karenge,jo khilaayenge,jahaan bithaayenge। yeh jo vaayda hai,woh vaayda yaad hai? to baap tumko avyakt vatan mein bithaate hain। to aap phir vyakta vatan mein kyon aa jaate ho? vaayda to theek nahin nibhaaya। vaayda hai jahaan bithaayenge vahaan baithenge। baap ne to kaha nahin hai ki vyakta vatan mein baitho। vyakta mein hote avyakt mein raho। pahla-pahla paath hi bhool jaayenge to phir training kya karenge। training mein pahla paath to pakka karvaao। yeh yaad rakho ki jo vaayda kiya hai usko nibhaakar dikhaayenge। jo maataayen training mein aai hui hain,aap sab surrender ho? jab surrender ho chuke ho to phir moh kahaan se aaya। jab koi jalkar khatma ho jaata hai to phir usmein kuchh rehta hai? kuchh bhi nahin। agar kuchh hai to iska matlab ki teer laga hai lekin poore jale nahin hai। mare hain, jale nahin hain। raavan ko bhi pahle maarte hain phir jalaate hain। to marjeeva bane ho parantu jalkar ekdam khaak ban jaae,vo nahin bane hain। surrender ka arth to bada hai। mera kuchh raha hi nahin। surrender hua to tan-man-dhan sab kuchh arpan। jab man arpan kar diya to us man mein apne anusaar sankalp utha hi kaise sakte hain? tan se vikarma kar hi kaise sakte hain? aur dhan ko bhi vikalpa athva vyartha kaaryon mein laga hi kaise sakte ho? isse siddha hai ki dekar phir vaapis le lete hain। jabki tan,man, dhan de diya hai to man mein kya chalaana hai vo bhi shreemat milti hai, tan se kya karna hai, vo bhi mat milti hai,dhan se kya karna hai so bhi maaloom hai। jinko diya unki mat par hi to chalna hoga। jisne man de diya uski avastha kya hogi?manamnaabhav। uska man vahaan hi laga rahega। is mantra ko kabhi bhoolenge nahin। jo manamnaabhav hoga usmein moh ho sakta hai?to mohjeet banne ke liye apne vaayde yaad karo। yahaan training se jab niklenge to aap kaun sa thappa lagva kar niklenge? (mohjeet ka)agar mohjeet ka thappa lag jaayega to seedhi post thikaane par pahunchegi। aur seedha thappa nahin hoga to post thikaane par nahin pahunchegi। isliye hi thappa zaroor lagaana hai। in maataaon ka hi phir samarpit samaaroh karenge। usmein bulaayenge bhi unko jinhonne thappa lagaaya hoga। mohjeet vaalon ka hi sammelan karenge। isliye jaldi-jaldi taiyaar ho jaao।