Avyakt murli du samedi 24 janvier 1970

> 24-01-70om shanti […/…/…/jpg/Ray2.jpg]avyakt baapdaada madhuban

braahmanon ka mukhya dhandha – samarpan karna aur karaana – २४-०१-१९७०

apne jeevan ki naiyya kiske havaale ki hai ? (shivbaaba ke) shreemat par poorn reeti se chal rahe ho ? shreemat par chalna arthaat har karma mein alaukikta laana | shivbaaba ke varse ka poora adhikaari apne ko samajhte ho ? jo varse ke adhikaari bante hain, unhon ka sarva ke oopar adhikaar hota hai, woh koi bhi baat ke adheen nahin hote | agar adheen hote hain deh ke, deh ke sambandhiyon va deh ke koi bhi vastuon se to aise adheen honevaale adhikaari nahin ho sakte | adhikaari adheen nahin hote hain | sadaiv apne ko adhikaari samajhne se koi bhi maaya ke roop ke adheen banne se baakh jaayenge | hamesha yeh check karna ki alaukik karma kitne kiye hain aur laukik karma kitne kiye hain ? alaukik karma auron ko alaukik banaane ki prerna denge | sabhi ne yeh lakshya rakha hai ki ham sabhi oonche te oonche baap ke bachche oonche te ooncha raajya pad praapta karenge va jo milega vaahi theek hai ? jab oonche se oonche baap ke bachche hain to lakshya bhi ooncha rakhna hai | jab avinaashi aatmik sthiti mein rahenge tab hi avinaashi sukh ki praapti hogi | aatma avinaashi hai na |

madhuban mein aakar madhuban ke vardaan ko praapta kiya ? vardaan, vibar mhanat ke sahaj hi milta hai | avyakti sthiti mein avyakti aanand, avyakti sneh, avyakti shakti in sabhi ki praapti sahaj reeti hoti hai | to aisa vardaan sadaiv kaayam rahe, iski koshish ki jaati hai | sadaiv vardaanon ki yaad mein rahne se yeh vardaan avinaashi rahega | agar vardaata ko bhoole to vardaan bhi khatma | isliye vardaata ko kabhi alag nahin karna | vardaata saath hai to vardaan bhi saath hai | saari srishti mein sabhi se priy vaastu (shivbaaba) vaahi hai to unki yaad bhi svatah hi rahni chaahiye | jabki hai hi priy mein priy ek to phir unki yaad bhoolte kyon ? zaroor aur kuchh yaad aata hoga | koi bhi baat bina kaaran ke nahin hoti | vismriti ka bhi kaaran hai | vismriti ke kaaran priy vaastu door ho jaati hai | vismriti ka kaaran hai apni kamzori | jo shreemat milti hai un par poori reeti se na chalne kaaran kamzori aati hai | aur kamzori ke kaaran vismriti hoti hai | vismriti mein priy vaastu bhool jaati hai | isliye sadaiv karma karne ke pahle shreemat ki smriti rakh phir har karma karo | to phir woh karma shreshtha hoga | shreshtha karma se shreshtha jeevan svatah hi banti hai | isliye har kaarya ke pahle apni checking karni hai | karma karne ke baad checking karne se jo ulta karma ho gaya uska to vikarma ban gaya | isliye pahle checking karo phir karma karo |

eeshvareey padhaai bahut sahaj aur saral reeti kisko dene ka tareeka aata hai ? ek sekand mein kisko baap ka parichay de sakte ho ? jitna auron ko pparichay denge utna hi apna bhavishya praalabdha banaayenge | yahaan dena aur vahaan lena | to goya lena hi hai | jitna dete raho utna samjho ham lete hain | is gyaan ka bhi pratyaksha phal aur bhavishya ke praalabdha praapti ka anubhav karna hai | vartamaan ke praapti ke aadhaar par hi bhavishya ko samajh sakte ho | vartamaan anubhav bhavishya ko spashta karta hai | apne ko kis roop mein samajhkar chalte ho ? main shakti hoon, jagat ki maata hoon – yeh bhaavna rehti hai ? jo jagat maata ka roop hai usme jagat ke kalyaan ka rehta hai | shivshakti ruppa mein koi bhi kamzori nahin rahegi | to main jagatmaata hoon aur shivshakti hoon, yeh donon roop smriti mein rakhna tab maayaajeet banenge | aur vishwa ke kalyaan ki bhaavna se kai aatmaon ke kalyaan ke nimitta banenge | nashtomoha sambandh se va apne shareer se bane ho ? nashtomoha ki last stage kahaan tak hai ? jitna nashtomoha banenge utna smriti roop banenge | to smriti ko sada kaayam rakhne ke liye saadhan hai nashtomoha banna | nashtomoha banna sahaj hai va mushkil hai ? jab apne aap ko samarpan kar denge to phir sabhi sahaj hoga | agar samarpan na kar ke apne oopar rakhte ho to mushkil bhaasta hai | sahaj banaane ka mukhya saadhan hai – samarpan karna | baap ko jo chaahiye vo karaave | jaise masheen hoti hain, un dvaara saara kaarkhaana chalta hai | masheen ka kaam hai kaarkhaane ko chalaana | vaise ham nimitta hain | chalaane vaala jaise chalaaven | hamko chalna hai | aisa samajhne se mushkilaat feel nahin hogi | ya sthiti din prati din paripakva karni hai | is mukhya baat par attention rakhna hai | jitna svayan ko samarpan karte hain baap ke aage, utna hi baap bhi un bachchon ke aage samarpan hote hain | arthaat jo baap ka khazaana hai woh svatah hi unka ban jaata hai | jo gun apne mein hota hai woh kisko dena mushkil kyon ? samarpan karna aur karaana – yahi braahmanon ka dhandha hai | jo hai hi braahmanon ka dhandha to braahmanon ke sivaae aur kaun jaanenge | jaise baap thode mein raazi nahin hota bachchon ko bhi thode mein raazi nahin hona hai |

nishchay ki nishaani kya hai ? vijay | jitna nishchaybuddhi honge utna hi sabhi baitan mein vijayi honge | nishchaybuddhi ki kabhi haar nahin hoti | haar hoti hai to samajhna chaahiye ki nishchay ki kami hai | nishchaybuddhi vijayi ratnon mein se ham ek ratna hain aise apne ko samajhna hai | vighna to aaenge, unhon ko khatma karne ki yukti hai – sadaiv samjho ki yeh paper hai | apni sthiti ki parakh yeh paper karaata hai | koi bhi vighna aaye to unko paper samajh paas karna hai | baat ko nahin dekhna hai lekin paper samajhna hai | paper mein bhi bhinna-bhinna question hote hain – kabhi mansa ka, kabhi lok-laaj ka, kabhi deshvaasiyon ka question aaega | parantu ismen ghabraana nahin hai | gahraai mein jaana hai | vaataavran aisa banaana chaahiye jo na chaahte bhi koi kheench aaye | jitna khud avyakt vaayumandal banaane mein busy rahenge | utna svatah sabhi hota rahega | jaise raste jaate koi khushbu bhi na chaahte hue khichengi |

jo lakshya rakha jaata hai usko poorn karne ke liye aise lakshan bhi apne mein bharne hain | dheele koshish vaale kahaan tak pahunchenge ? koshish shabd hi kehte rahenge to koshish mein hi rah jaayenge | em to rakhna hai ki karna hi hai | koshish akshar kehna kamjori hai | kamjori ko mitaane ke liye koshish shabd ko mitaana hai | nishchay se vijay ho jaati hai | sanshay laane se shakti kam ho jaati hai | nishchaybuddhi banenge to sabhi ka sahayog bhi milega | koi bhi kaarya karna hota hai to sadaiv yahi socha jaata hai ki mere bina koi kar nahin sakta tab hi safalta hoti hai | aaj se koshish akshar khatma karo | main shivshakti hoon | shivshakti sabhi kaarya kar sakti hai | shaktiyon ki sher par savaari dikhaate hain | kis bhi prakaar maaya sher roop mein aaye darna nahin hai | shivshakti kabhi haar nahin kha sakti | abhi samay hi kahaan hai | samay ke pahle apne ko badalne se ek ka laakh guna milega badalna hi hai, to aise badalna chaahiye | yaad aata hai ki agle kalpa bhi vaarsa liya tha | apne ko puraana samajhne se woh kalpa pahle ki smriti aane se purushaartha sahaj ho jaata hai | kyonki nishchay rehta hai kalpa pahle bhi mainne liya tha | ab bhi lekar chhodenge | kalpa pahle ki smriti shakti dilaanevaali hoti hai | apne ko nae samjhenge to kamjori ke sankalp aayenge | pa sakenge va nahin | lekin main hoon hi kalpa pahle vaala is smriti se shakti aaegi | sadaiv apne ko himmatvaan banaana chaahiye | himmat haarna nahin chaahiye | himmat se madad bhi milegi | ham sarvashaktivaan baap ke bachche hain, baap ko yaad kiya, yahi himmat hai | baap ko yaad karna sahaj hai va mushkil ? sahaj karne mein sahaj ho jaata hai | yeh to mera karttavya hi hai | farz hai | kya karoon yeh sankalp aane se mushkil ho jaata hai | kabhi bhi apne andar kamzor sankalp ko nahin rahne dena | agar man mein kamzor sankalp utpanna bhi ho jaayen to unko vahaan hi khatma kar shakti shaali banaana hai | ab tak bhi agar koshish karte rahenge to avyakt kashish ka anubhav kab karenge ? jab tak koshish hai tab tak avyakti kashish apne mein nahin aa sakti hai | yeh bhaasha hi kamjori ki hai | sarvashaktivaan baap ke bachche yeh nahin kah sakte | unke sankalp, vaani sabhi nishchay ke honge | aisi sthiti banaani hai | sadaiv check karo ki sankalp roopi phaaundeshan mazboot hai | teevra purushaarthi ki chalan mein yeh visheshta hogi jo unke sankalp, vaani, karma teenon hi ek samaan honge | sankalp unch hon aur karma kamzor hon to unko teevra purushaarthi nahin kahenge | teenon ki samaanta chaahiye | sadaiv yeh samajhna chaahiye | jo ki maaya kabhi-kabhi apna roop dikhaati hai yeh sadaiv ke liye vidaai lene aati hai | vidaai ke badle nimantran de dete ho | sadaiv shivbaaba ke saath hoon, unse alag honge hi nahin to phir koi kya karenge | koi busy rehta hai to phir teesra disturb nahin karta hai | samajhte hain tang karne vaala koi nahin aaye | to ek board laga dete hain | aap bhi aisa board lagaao | to maaya laut jaaegi | aane ka sthaan hi nahin milega | kursi khaali hoti hai to koi baith jaata hai |

maataaon ke liye to bahut sahaj hai sirf baap ko yaad karna, bas | baap ko yaad karne se gyaan aape hi emerge ho jaata hai | baap ko jo yaad karta hai unko har kaarya mein madad baap ki mil jaati hai | yaad ki itni shakti hai jo anubhav yahaan paate ho woh vahaan bhi smriti mein rakhenge to avinaashi ban jaayenge | buddhi mein baar-baar yahi smriti rakho ham paramdham nivaasi hain | karttavya arth yahaan aaye hain | phir vaapas jaana hai | jitna buddhi ko in baaton mein busy rakhenge to phir bhatkenge nahin | gyaan bhi kisko yukti se sunna hai | seedha gyaan sunaane se ghabra jaayenge | pahle to eeshvareey sneh mein kheenchana hai | shareerdhaari ko chaahiye dhan, baap ko chaahiye man | to man ko jaha lagaana hai vahaan ho laga rahe aur kahaan prayog na ho | yogayukta avyakt sthiti mein rah do bol bolna bhi bhaashan karna hi hai | ek ghante ke bhaashan ka saar do shabd mein suna sakte ho |

din pratidin kadam aage samajhte ho ? aise bhi nahin sochna ki abhi samay pada hai, purushaartha kar lenge | lekin samay ke pahle samaapti karke aur is sthiti ka anubha praapta karna hai | agar samay aane par is sthiti ka anubhav karenge to samay ke saath sthiti bhi badal jaaegi | samay samaapta to phir avyakt sthiti ka anubhav bhi samaapta ho, doosra part aa jaayega | isliye pahle se hi avyakt sthiti ka anubhav karna hai | kumaaryaan daudne mein tez hoti hain | to is eeshvareey daud mein bhi tez jaana hai | first aane vaale hi first ke najdeek aayenge | jaise saakaar first gaya na | lakshya to ooncha rakhna hai | lakshya sampoor hai to purushaartha bhi sampoorn karna hai, tab hi sampoorn pad mil sakta | sampoorn purushaartha arthaat sabhi baaton mein apne ko sampanna banaana | badi baat to hai nahin | jaanne ke baad yaad karna mushkil hota hai kya ? jaanne ko hi knowledge kaha jaata hai | agar knowledge, light aur mighta nahin hai to woh knowledge hi kis kaam ki, unko jaanna nahin kaha jaayega | yahin jaanna aur karna ek hai | auron mein jaanne aur karne mein pharka hota hai | knowledge woh cheez hai jo woh roop bana deti hai | eeshvareey knowledge kya roop banaaegi ? eeshvareey sthiti | to eeshvareey knowledge lenevaale eeshvareey roop mein kyon nahin aaenge | theory aur cheez hai | jaanna arthaat buddhi mein dhaarna karna aur cheez hai | dhaarna se karma automatically ho jaata hai | dhaarna ka arth hi hai us baat ko buddhi mein samaana | jab buddhi mein samaan jaate hain to phir buddhi ke direction anusaar karmendriyaan bhi woh karti hain | knowledgeful baap ke ham bachche hain aur eeshvareey knowledge ki light mighta hamaare saath hai | aise samajh kar chalna hai | nolejak sirf sunna nahin lekin samaana hai | bhojan khaana aur cheez hai hazam karna aur cheez hai | khaane se shakti nahin aaegi | hazam karne se shakti kahaan se aa jaati hai, khaae hue bhojan ko hazam karne se hi shakti roop banta hai | shaktivaan baap ke bachche aur kuchh kar na saken, yeh ho sakta hai ? nahin to baap ke naam ko bhi sharmaate hain | sadaiv yahi em rakhni chaahiye ham aisa karma karen jo misaal ban dikhaaen | intazaar mein nahin rehna hai lekin example banna hai | baap example bana na |

apne ghar mein aaye ho yeh samajhte ho ? jab koi bhatka hua apne ghar pahunch jaata hai to jaise vishraam mil jaata hai | to yahaan vishraam ki bhaasna aati hai | sthaan milne se vishraam ki sthiti ho jaati hai | sadaiv vishraam sthiti mein samjho | bhaal kaarya arth jaao to bhi yeh sthiti ka anubhav saath le jaana | isko saath rakhenge to phir kitna bhi kaarya karte hue sthiti vishraam ki rahegi | vishraam avastha mein shanti sukh ka anubhav hota hai | apne mein jab shakti aa jaati hai to phir vaataavran ka bhi asar apne par nahin hota, lekin hamaara asar vaataavran par rahe | sarvashaktivaan vaataavran hai ya baap ? jabki sarvashaktivaan baap ke bachche ho to phir vaataavran aap se shaktishaali kyon ? apni shakti bhoolne se hi vaataavran ka asar hota hai | jaise doctor koi bhi beemaari vaale peshent ke aage jaayega to bhi unko asar nahin hoga | vaise hi apni smriti rakhkar service karni hai | yeh apne mein shakti rakho ki humein vaataavran ko banaana hai na ki vaataavran hamko banaave | yugal hote hue bhi akeli aatma ki smriti mein rehte ho ? aatma akeli hai na | agar aatma ko sambandh mein aana bhi hai to kiske ? sarva sambandh kisse hain ? ek se | to ek se do bhi banna hai baap aur bachche | teesra koi sambandh nahin | sarva sambandh ko ek se jodna hai | ek se doosra shivbaaba | is sthiti ko hi unch sthiti kaha jaata hai | teesri koi bhi cheez dekhte hue dekhne mein na aaye | agar dekhna hai to bhi ek ko, bolna bhi unse | aisi sthiti rahne se hi maaya jeet banenge | jo maaya jeet bante hain woh jagatjeet ban jaate hain | yeh shuddh sneh saare kalpa mein ek hi baar milta hai | aise sneh ko ham paate hain yeh sadaiv yaad rakhna hai | jo koi ko praapta nahin ho sakta woh humein praapta hua hai | isi nashe aur nishchay mein rehna hai | dilli mein naam baala hona, bhaarat mein naam baala hona hai |

itni zimmevaari dilli vaalon ko uthaani hai | samay kam hai service bahut hai | isi raftaar se jab service karenge tab hi sabhi ko sandesh pahunchega | koi ko dhanvaan banaane ke liye mauka dena bhi mahaadaan hai, mahaadaan ka phal bhi itna milta hai | baap ko sadaiv saath rakhenge to maaya dekhegi iske saath sarvashaktivaan baap hai to woh door se hi bhaag jaaegi | akela dekhti hai tab himmat rakhti hai | shikaar karne jab jaate hain to koi bhi jaanvar vaar na karen iske liye aa jalaate hain | vaise hi yaad ki agni jali hui hogi to maaya aa nahin sakegi | yeh lagan ki agni bujhni nahin chaahiye | saath rakhne se shakti aape hi aa jaaegi | phir vijay hi vijay hai |

baapdaada ko buzurga maataaen sabse pyaari lagti hain | kyonki bahut dukhon se thaki hui hain | to thake hue bachchon par baap ka sneh rehta hai | itna sneh bachchon ko bhi rakhna hai | ghar baithe bhi yaad ki yaatra mein paas ho gae to bhi aage badh sakte ho | jitna yaad ki yaatra mein saphal honge to man ki bhaavnaaen bhi shuddh ho jaayengi | sabhi service mein sahayogi ho rehte ho ? jitna dushron ko sandesh dete hain utna apne ko bhi sampoornata ka sandesh milta hai | kyonki doosron ko samjhaane se apne ko sampoorn banaane ka na chaahte hue bhi dhyaan jaata hain | yeh service karna bhi apne ko sampoorn banaane ka meetha bandhan hai | is bandhan mein jitna apne ko baandh lenge utna hi sarva sambandhon se mukta hote jaayenge | sarva bandhanon se mukta hone ka saadhan kya hua ? ek bandhan mein apne ko baandhana | yeh meetha bandhan bhi ab ka hi hai | phir kabhi nahin hota | sabhi is eeshvareey bandhan mein bandhi hui aatmaaen hain | shreshtha karma karne se hi shreshtha pad mil sakta hai aur shreshthaachaari bhi ban jaate hain | ek hi shreshtha karma se varmaan bhi ban jaata hai aur bhavishya bhi banta | jisse donon hi shreshtha ban jaayen woh karma karna chaahiye | ahamdaabaad ko sabhi se jyaada service karni hai kyonki ahamdaabaad sabhi centres ka beej roop hai | beej mein jyaada shakti hoti hai | khoob lalkaar karo | jo gahri neend mein soye hue bhi jaag uthen | kumaariyaan to bahut kamaal kar sakti hain | ek kumaari mein jitni shakti hai to itni service mein saphalta dikhaani chaahiye | kumaariyaan purushaartha mein, service mein, sabhi se tez ja sakti hain | shaktiyaan service mein aage hain va paandav ? apna yaadgaar hai – ham kalpa pahle vaale paandav hain | kitne baar paandav bane ho jo anginat baar hoti hai woh pakki yaad rehti hai na | yeh smriti rahegi to phir kabhi bhi vismriti nahin hogi | kalpa pahle bhi ham hi the ab bhi ham hi hain yeh nasha aur nishchay rakhna hai | ham hi haqdaar hain, kiske ? unch te unch baap ke | yeh yaad rahne se phir sadaiv ekras avastha rahegi | ek ki yaad mein rahne se hi ekras avastha hogi |

avyakt mein service kaise hoti hai ? yeh anubhav hota jaata hai ? avyakt mein service ka saath kaise sadaiv rehta hai | yeh bhi anubhav hota hai ? jo vaayda kiya hai ki snehi aatmaon ke har sekand saath hi hai | aise sadaiv saath ka anubhav hota hai ? sirf roop badla hai lekin karttavya vaahi chal raha hai | jo bhi snehi bachche hain unhon ke oopar chhatra roop mein jazar aata hai | chhatrachhaaya ke niche sabhi kaarya chal raha hai | aisi bhaasna aati hai | vyakta se avyakt, avyakt se vyakta mein aana yeh seedhi utarna aur chadhna jaise aadat pad gayi hai | abhi-abhi vahaan, abhi abhi yahaan | jiski aisi sthiti ho jaati hai, abhyaas ho jaata hai usko yeh vyakta desh bhi jaise avyakt bhaasta hai | smriti aur drishti badal jaati hai | sabhi ever ready bankar bathe hue ho ? koi bhi deh ke hisaab kitaab se bhi halka | vatan mein shuru-shuru mein pakshiyon ka khel dikhlaate the, pakshiyon ko udaate the | vaise yeh aatma bhi pakshi hai jab chaahe tab ud sakti hai | woh tab ho sakta hai jab abhyaas ho | jab khud udta pakshi banen tab auron ko bhi ek sekand mein uda sakte hain | abhi to samay lagta hai | aproksha reeti se vatan ka anubhav bataaya | aproksha roop se kitna samay vatan mein saath rehte ho ? jaise is vakta jiske saath sneh hota hai, woh kahaan videsh mein bhi hai to unka man jyaada us taraf rehta hai | jis desh mein woh hota hai us desh ka vaasi apne ko samajhte hain | vaise hi tumko ab sookshmavtanvaasi banna hai | sookshm vatan ko sthoolavtan mein emerge karte ho va khud ko sookshm vatan mein saath samajhte ho ? kya anubhav hai ? sookshmavtanvaasi baap ko yahaan emerge karte ho va apne ko bhi sookshmavtanvaasi banaakar saath rehte ho ? baapdaada to yahi samajhte hain ki sthool vatan mein rehte bhi sookshmavtanvaasi ban jaate, yahaan jo bhi bulaate ho yeh bhi sookshm vatan ke vaataavran mein hi sookshm se service le sakte ho | avyakt sthiti mein sthit hokar madad le sakte ho | vyakta roop mein avyakt madad mil sakti hai | abhi jyaada samay apne ko farishte hi samjho | pharisthon ki duniya mein rahne se bahut hi halkaapan anubhav hoga jaise ki sookshm vatan ko hi sthoolavtan mein basa diya hai | sthool aur sookshm mein antar nahin rahega | tab sampoorn sthiti mein bhi antar nahin rahega | yeh vyakta desh jaise avyakt desh ban jaayega | sampoornata ke sameep aa jaayenge | jaise baapdaada vyakta mein aate bhi hain to bhi avyakt roop ke avyakt desh ke avyakti pravaah mein rehte hain | vaahi bachchon ko anubhav karaane liye aate hain | aise aap sabheen bhi apne avyakt sthiti ka anubhav auron ko karaao | jab avyakt sthiti ki stage sampoorn hogi tab hi apne raajya mein saath chalna hoga | ek aankh mein avyakt sampoorn sthiti doosri aankh mein raajya pad | aise hi spashta dekhne mein aaenge jaise saakaar roop mein dikhaai padta hai | bachpan roop bhi aur sampoorn roop bhi | bas yeh bankar phir yeh banenge | yeh smriti rehti hai | bhavishya ki ruprekha bhi jaise sampoorn dekhne mein aati hai | jitna-jitna farishte life ke nazdeek honge utna-utna raajpad ko bhi saamne dekhenge | donon hi saamne | aajkal kai aise hote hain jinko apne pasta ki poori smriti rehti hai | to yeh bhavishya bhi aise hi smriti mein rahe yeh banna hai | woh bhavish ke sanskaar emerge hote rahenge | merge nahin | emerge honge | achha-