Avyakt murli du jeudi 30 juillet 1970

Brahma KumarisBrahma Kumaris> 30-07-70om shanti avyakt baapdaada madhuban

“mahaarthi arthaat mahaanta”

aaj paandav sena ki bhatthi ka samaapti samaaroh hai ya aaj shuruaat karte ho? (sameepta aarambha hui hai) vishesh kaun si improvement ki hai aur uske liye kya vishesh sankalp kiya hai? parivartan shuru hua hai ki hoga? sankalp roop mein liya hai va sanskaar bhar liya hai (harek ne apna-apna sunaaya) yeh hai paandav sena ki bhatthi ka paper । is ek prashn se poora paper ho gaya । vartamaan samay sankalp aur karma saath-saath hona hi aavashyak hai । abhi-abhi sankalp kiya abhi-abhi karma mein laaya । sankalp aur karma mein mahaan antar nahin hona chaahiye । mahaarthiyon ka arth hi hai mahaanta । to mahaanta sirf sankalp mein nahin sarva mein mahaanta । yeh hai mahaarthiyon ki nishaani । sankalp ko practical mein laane ke liye soch karne mein samay nahin lagta kyonki mahaarthiyon ke sankalp bhi aise hote hain jo sankalp practical mein sambhav ho sakte hain । yeh karen na karen, kaise karen kya hoga yeh sochne ki unko aavashyakta nahin hai । sankalp hi aise utpanna honge jo sankalp utha aur siddha hua । isse apni stage ki parakh kar sakte ho । final stage hai hi yog ki siddhi praapta karna । karma ki siddhi praapta karna । iske liye kaun si mukhya power dhaaran karna hai, jo yeh siddha ho jaaen । sankalp, vaani, karma sabhi siddha ho jaaen, iske liye kaun si power chaahiye? sabhi jo shaktiyaan sunaai theen woh to chaahiye hi lekin unmein bhi pahle controlling power vishesh chaahiye । agar controlling power nahin to vyartha mix hone ke kaaran siddhi praapta nahin hoti । agar yathaartha utpatti ho sankalpon ki va yathaartha vaani nikle, yathaartha karma ho to ho nahin sakta ki siddha na ho । lekin vyartha mix hone kaaran siddhi praapta nahin hoti । yathaartha ki siddhi hoti hai । vyartha ki nahin hoti hai । vyartha ko kantrol kiya jaata hai, uske liye controlling power zaroor chaahiye, kisi prakaar ki kamzori ka kaaran controlling power ki kami hai । kamzori kyon hoti hai? apne sanskaaron ko mita nahin sakte । samajhte hue bhi yeh sankalp yathaartha hai va vyartha hai, samajhte hue bhi controlling power nahin hai । jab kantrol karen tab uske badle mein aur sanskaar apne mein jama kar sakenge । controlling power ki kami hone ke kaaran apne ko hi kantrol nahin kar paate hain । apni rachna ka rachayita banna aata hai? kaun si rachna rachni hai? woh yathaartha rachna rachne mein kami hai । aisi rachna rach lete hain jo svayan hi apni rachna se pareshaan ho jaate hain । ab paandav sena ko practical kya saboot dena hai? jo kamzori ke bol, kamzori ke karma karte ho unki samaapti ka samaapti samaaroh karna hai । bhatthi ke samaapti ka samaaroh nahin । kamzori ki samaapti aur har sankalp aisa powerful utpanna ho jo ek-ek sankalp kamaal kar dikhaanevaala ho । to kamzori ki jagah kamaal ko bharna hoga । kamzori shabd hi ab shobhta nahin । vishwa ka aadhaar aap aatmaon ke oopar hai । to jo vishwa ke aadhaarmoorta aur uddhaarmoorta hain aisi moortiyon ke mukh se kamzori ke shabd shobhte nahin hain । ab to harek ki moorti mein sabhi ko kya saakshaatkaar hoga? baapdaada ka । aisi alaukik jhalak sabhi ki moorta mein dikhaai deni hai jo koi bhi us jhalak ko dekhkar fida ho jaae । sabhi ko fida kar sakenge । koi ko muktidhaam, koi ko jeevanmuktidhaam । koi bhi aisa na rahe jo aap logon se apna yatha part haq na le le । sabhi aatmaon ko aap logon dvaara apna-apna yatha part tatha baap ka varsa zaroor lena hai ।aapki moorta mein aisi jhalak honi hai ki jo koi bhi apna varsa lene se vanchit nahin rahenge । aise apne ko daata ke bachche daata samajhna hai । dene vaalon mein phalak aur jhalak rehti hai । abhi woh merge hai । un sanskaaron ko ab emerge karo । kis baat mein busy hain jo woh jhalak ab tak emerge nahin hoti hai? kamjoriyon ko mitaane mein busy hain । chuktu to karna hi padega । lekin ek hota hai jaldi mukta karna । vahi hisaab koi 5 minute mein koi aadha ghanta bhi lagaate hain । koi to saara din sochte bhi hisaab nahin nikaal sakte । yeh sabhi vishesh aatmaayen hain to har sankalp har karma vishesh hona chaahiye । jisse har aatma ko prerna mile – aage badhne ki । kyonki aap sabhi aadhaarmoorta ho । agar aadhaar hi aisa hoga to doosre kya karenge? vishesh aatmaon ko vishesh dhyaan dena hi hai । ab beeti ko sankalp mein bhi emerge nahin karna hai । agar bhool se puraane sanskaaron ki vish emerge ho bhi jaae to usko aisa samjho ki yeh bahut pichhle janma ke sanskaar hain । ab ke nahin । puraani beeti hui baaton ko baar-baar koi varnan kare to isko kaha jaata hai vyartha । is paandav sena ko pahle apne parivaar ke beech ek udhaaran bankar dikhaana hai । jaise saakaar roop mein udaahran bane na । aise follow faadar । isliye aaj ka din kahenge puraane sanskaar aur sankalp ke samaapti samaaroh ka divas । samjha ।

is group ka naam kya hua? jab naam diya jaata hai to kis aadhaar par diya jaata hai? aaj kaun sa din hai? brihaspativaar । brihaspati ki dasha arthaat saphalta । to yeh group hai sarva ke sahayogi, saphaltaamoorta sangathan । kabhi bhi kisi bhi prakaar ka kisko sahayog chaahiye to daata ke bachche sadaiv dene vaale hote hain । unka haath kabhi dene se rukta nahin hai । sarva ke sahayogi tab banenge jab sarva ke snehi banenge । snehi nahin to sarva ke sahayogi bhi nahin ban sakte । isliye is group ko mansa, vaacha, karmana aur sambandh mein bhi sahayogi banna hai aur saphaltaamoorta banna hai । isliye kaha ki sarva sahayogi, saphaltaamoorta sangathan । samjha ।

sarva ka sahayogi banne ke liye apne aap ko mitaana bhi padta hai । is kaarya se hatenge nahin । to apne ko mitaana arthaat apne puraane sanskaaron ko mitaana । puraane sanskaar hi sarva ke sahayogi banne mein vighna daalte hain । to apne puraane sanskaaron ko mitaana hai । doosre ka sanskaar mitaane ke liye nahin kar rahe hain । apne sanskaar mitaayenge to doosre aapko svayan hi follow karenge । ek ham doosra baap । teesra dekhte hue bhi na dekho । teesri baaten dekhne mein aayengi bhi lekin dekhte hue bhi na dekho, apne ko aur baap ko dekho । slogan yahi yaad rakhna – “ mitaayenge lekin sarva ke sahayogi banenge ।” aapka yaadgaar chitra jo kalpa pahle vaala hai woh yaad hai? govardhan parvat ka yaadgaar roop kya banaate hain? kab dekha hai? aajkal ke bhaktimaarga ke govardhan parvat ki pooja jab karte hain to kya banaate hain? (gobar ka banaate hain …) pahaad ko oongali dena arthaat puraane sanskaaron ko mitaane mein oongali dena । pahle yeh pahaad uthaana ha । tab yeh kaliyugi duniya badal phir nahin duniya banegi । koi bhi slogan smriti mein rakho । yeh bhi achha hai । lekin slogan ka svarup banna hi hai । yeh to ek saadhan hai lekin saadhan se svarup banna achha hai । maala ke manke kaun si visheshta se bante hain? mankon ki visheshta yahi hai jo ekmat hokar ek hi dhaage mein piroye jaate hain । ek ki hi lagan ekras sthiti aur ekmat to sab ek hi ek । ek jaise manke hain to ek dhaage mein piroye jaate hain na । yo ek hi mat par chalne vaale aur aapas mein bhi ekmat ho । sankalp bhi ek se । do mat hoti hain to woh doosri arthaat 16000 ki maala ke daane ban jaate hain । ek mat ke liye aisa vaataavran banaana hai । vaataavran tab banega jab samaane ki shakti hogi । maano koi baat mein bhinnata ho jaati hai kyonki yatha-yogya yatha shakti to hai na । to us bhinnata ko samaao । samaane ki shakti chaahiye । to aisi aapas mein ekta se hi sameep aayenge । sarva ke aage drishtaanta roop ban jaayenge । sabmen apni-apni visheshta hoti hai । koi bhi ho uski visheshtaaon ko dekho vishesh aatma ban jaayenge । kami ko to bilkul dekhna hi nahin hai । jaise chandrama athva soorya ko grahan lagta hai na ki nahin dekhna chaahiye । nahin to grahchaari baith jaaegi । to kiski bhi kami grahan hai । bhool se bhi koi ne dekh liya to samjho grahchaari baith jaaegi । to sachcha sona banna hai । zara bhi khaad hogi to vahi dekhne mein aaegi । visheshtaaon ko daba degi । apne ko aisa change karo jo doosron par prabhaav pade । dhak se change karna hai । ekdam nyaare bano to auron ka lagaav bhi khud hi tootta jaayega ।

achha !!!