Avyakt murli du mercredi 9 décembre 1970

>

09-12-70om shanti avyakt baapdaada madhuban

“purushaartha ka mukhya aadhaar catching power”

aaj harek ki do baaten dekh rahe hain ki harek kitna knowledgeful aur kitna powerful bane hain। usmein bhi mukhya catching power harek ki kitni powerful hain – yeh dekh rahe hain। purushaartha ka mukhya aadhaar catching power par hai। jaise aajkal science vaale aavaaz ko catch karne ka prayatna karte hain। lekin silence ki shakti se aap log kya catch karte ho? jaise woh bahut pahle ke sound ko catch karte hain,vaise aap kya catch karte ho?apne 5000 varsha pahle ke daivi sanskaar catch kar sakte ho?catching power itni aai hai। woh to doosron ki sound ko catch kar sakte hain। aap apne asli sanskaaron ko sirf catch nahin karte,lekin apna practical svarup banaate ho। sadaiv yeh smriti mein rakho ki main yahi tha aur phir ban raha hoon। jitna-jitna un sanskaaron ko catch kar sakenge utna svarup ban sakenge। apni smriti ko powerful banaao arthaat shreshta aur spashta banaao। jaise apne vartamaan svarup ka, vartamaan sanskaaron ka spashta anubhav hota hai aise apne aadi svaroopon aur sanskaaron ka bhi itna hi spashta anubhav ho। samjha। itni catching power chaahiye। jaise vartamaan samay mein apni chalan va kartavya spashta aur sahaj smriti mein rehti hai। aise hi apni asli chalan sahaj aur spashta smriti mein rahe। sadaiv yahi dridh sankalp rahe ki yeh main hi to tha। 5000 varsha ki baat itni spashta anubhav mein aaye jaise kal ki baat। isko kehte hain catching power। apni smriti ko itna shreshtha aur spashta banaakar jaana। bhatthi mein aaye ho na। sadaiv apna aadi svarup aur aadi sanskaar saamne dikhaai de। apni smriti ko powerful banaane se vritti aur drishti svatah hi powerful ban jaayengi। phir yeh kumaar group kya ban jaayenge?anukumaar arthaat anokhe। harek ke do naynon se do svarup ka saakshaatkaar hoga। kaun-se do svarup? sunaaya tha ki niraakaari aur divyagundhaari। farishta roop aur daivi roop। harek aise anubhav karenge va harek se aisa anubhav hoga jaise ki chalta phirta light house aur might house ho। aise apne svarup ka saakshaatkaar hota hai? jab5000 varsha ko catch sakte ho, anubhav kar sakte ho to is antim svarup ka anubhav nahin hota hai? abhi jo kuchh kami rah gayi hai woh bharkar aise anubhvi moorta bankar jaayenge। to dekhna kabhi kuchh kami na rah jaaye। bhatthi se aisa parivartan kar ke jaana, jaise kabhi-kabhi satayugi aatmaayen jab pravesh hoti hain to unhon ko is purushaarthi jeevan ka bilkul hi knowledge nahin hota। aise aap logon ko kamjoriyon aur kamiyon ki knowledge hi merge jaae। iske liye vishesh is group ko do baaten yaad rakhni hai। do baaten do shabdon mein hi hain। ek guest house, doosra get out arthaat baahar nikaalna hai aur aage ke liye andar aane nahin dena hai। doosra is puraani duniya ko sadaiv guest house samjho। phir kabhi kamzori va kami ka anubhav nahin karenge। sahaj purushaartha hai na। is group ko kamaal kar dikhaani hai isliye sadaiv lakshya rakhna hai ki ab phir 21janma ke liye rest karna hai। lekin abhi ek second mein bhi mansa,vaacha, karmana service se rest nahin। tab hi best banenge। samjha। kyonki yeh hai hard worker group। hard worker group mein rest nahin। kabhi rest nahin karta aur vesta nahin karta। isliye hard worker group va roohaani sevaadhaari sangathan ko seva ke sivaae aur kuchh soojhe hi nahin। yeh hai naam ka kaam। yeh bhi yaad rakhna– seva prati svayan ko hi offer karna hai tab baapdaada se aaphreen milegi। hard worker va roohaani sevaadhaari group ko sadaiv yeh slogan yaad rakhna hai। samaana aur saamna karna hamaara nishaana hai। yeh hai is group ka slogan। saamna maaya se karna hai na ki daivi parivaar se। samaana kya hai? apne puraane sanskaaron ko samaana hai। knowledgeful ke saath-saath powerful bhi banna hai tab hi serviceable banenge। achha tilak samaaroh dekh raajtilak samaaroh yaad aata hai?abhi yeh tilak sampoorn sthiti mein rahne ke liye hai। phir milega raajtilak। yeh tilak hai pratigya aur pratyakshata ka tilak। itni power hai? roohaani sevaadhaari group ke liye yeh khaas shiksha de rahe hain। apne ko jitna adhikaari samajhte ho utna hi satkaari bano। pahle satkaar dena phir adhikaar lena। satkaar aur adhikaar donon saath-saath ho। agar satkaar ko chhod sirf adhikaar lenge to kya ho jaayenga?jo kuchh kiya woh bekaar ho jaayega। isliye donon baaton ko saath-saath rakhna hai।

achha !!!