Avyakt murli du mercredi 25 août 1971

>

25-08-71 om shanti avyakt baapdaada madhuban

mukhya 7 kamjoriyaan aur unko mitaane ke liye 7 din ka course

ek second mein vaani se pare sthiti mein sthit ho sakte ho? jaise aur karmendriyon ko jab chaaho jaise chaaho vaise hila sakte ho, aise hi buddhi ki lagan ko jahaan chaaho, jab chaaho vaise aur vahaan sthit kar sakte ho? aise powerful bane ho? yeh vidhi vriddhi ko paati ja rahi hai? agar vidhi yathaartha hai to vidhi se siddhi arthaat saphalta aur shreshthata avashya hi din- prati-din vriddhi ko paate hue anubhav karenge। is parinaam se apne purooshaartha ki yathaartha sthiti ko parakh sakte ho। yeh siddhi vidhi ko parakhne ki mukhya nishaani hai। koi bhi baat ko parakhne ke liye nishaaniyaan hoti hain। to is nishaani se apne sampoorn buddhi ki nishaani ko parakh sakte ho? aajkal jo purooshaartha purooshaarthiyon ka chal raha hai, usmein mukhya kamjoriyaan kaunsi dikhaai deti hain? (1) ek to smriti mein samarthi nahin rahi hai। (2) drishti mein divyata va alaukikta yatha shakti nambarvaar aai hui hai। (3) vritti mein will power na hone ka kaaran vritti ekras na ho, chanchal hoti hai। (4) niraakaari avastha ka attention kam hone ke kaaran mukhya vikaar deh-abhimaan, kaam aur krodh - in teenon ka vaar samay prati samay hota rehta hai। (5) sangathan mein rehte va samparka mein aate vaayumandal, vibration apna impression daalta hai। (6) avyakt pharishtepan ki sthiti kam hone kaaran achhi va buri baaton ki feeling aane se fail ho jaate hain। (7) apni yaad ki yaatra se santushta kam। yeh hai purooshaarthiyon ke purooshaartha ki nambarvaar result।

ab in saat baaton ko mitaane ke liye phir se 7 din ka course karaana pade। in saaton baaton ko saamne rakh saat din ka course jo auron ko karaate ho woh apne aap ko revise karaana। jaise murliyon ko revise kar rahe ho, to revise karne se naveenta aur shakti badhne ka anubhav karte ho aise ab ekaanta mein baith amritvele, jo saat baaten sunaainr, un par ek ek baat ka nivaaran har din ke paath mein kaise samaaya hua hai, woh manan karke makkhan arthaat saar nikaalna aur aapas mein len-den karna। course to kiya hai lekin jaise jigyaasuon ko course karaane ke baad har paath ki yukti bataate ho va attention dilaate ho, vaise aap har ek regular godly student ab phir se ek saptaah ek paath ko practice aur practical mein laao। jaise saaptaahik paath karte hain na। aap log bhi service mein ‘pavitrata saptaah’ va ‘shanti saptaah’ ka programme rakhte ho na। vaise hi apni progress ke liye har paath ka saaptaahik paath practical aur practice mein laao। to revise hone se kya hoga? saphalta sameep, sahaj aur spashta dikhaai degi। to shreshtha to ban hi jaayenge। apne aap ko har sankalp va karma mein mahaan banaane ke liye sabhi se sahaj yukti ki teen baaten sunaao। man, vachan, karma mein mahaanta ke liye hi poochh rahe hain।

mahaan banne ke liye ek to apne ko puraani duniya mein mehmaan samjho। doosri baat - jo bhi sankalp va karma karte ho, to mahaan antar ko buddhi mein rakh sankalp aur karma karo। teesri baat ki baap ke va apne daivi parivaar ki har aatma ke gun aur shreshtha karttavya ki mahima karte raho। 1. mehmaan, 2. mahaan antar aur 3. mahima। yeh teen baaten chalti rahen to jo 7 kamiyaan hain woh samaapta ho jaaen। mehmaan na samajhne ke kaaran koi bhi roop va rangat mein attraction aur attention jaata hai। mahaan antar ko saamne rakhne se kabhi bhi deh-ahankaar va krodh ka ansh va vansh nahin rah sakta। teesri baat - baap ki va har aatma ke gunon ki mahima va karttavya ki mahima karte rahne se kisi dvaara kisi baat ki feeling nahin aa sakti। aur sadaiv gunon aur karttavyon ki mahima karne se yaad ki yaatra, asantushtata bhi nirantar va sahaj yaad mein parivartan ho jaayegi। in teenon shabdon ko sada smriti mein rakho to samartheevaan ho jaayenge। drishti, vritti, vaayumandal sabhi parivartan ho jaayenge।

dvaapar se lekar aaj tak apni aur apne daivi parivaar ki aatmaon ki mahima karte aaye ho, keertan karte aaye ho। ab phir chaitanya parichit hui aatmaon ke avgunon ko va kamiyon ko kyon dekhte ho va buddhi mein dhaaran kyon karte ho? abhi bhi saare vishwa se chuni hui shreshtha aatmaon ke gun-gaan karo। buddhi dvaara grahan karo aur mukh dvaara ek-do ke gungaan karo। phir drishti va vritti chanchal hogi? kiski bhi kami ki feeling hogi? abhi anubhav kiya hai ki koi bhi mandir ki moorti kitni bhi atraiktiv va sundar saji hui ho, to kabhi bhi drishti unki sundarta va sajaavat ke taraph sankalp maatra bhi chanchal nahin hoti hai। aur vahaan hi agar koi cinema va koi aisi kitaabon mein se koi attraction va sajaavat dekhte hain va koi board bhi dekhte hain to vritti aur drishti chanchal ho jaati hai, kyon? attraction to moortiyon mein bhi hai। sajaavat, features aur natures ki beauty moortiyon mein bhi hai, phir bhi vritti aur drishti chanchal kyon nahin hoti? donon hi chitra saamne rakho va ek hi kamre mein rakho to ek second mein us taraph jaane se vritti chanchal hoti hai aur us taraph jaane se vritti pavitra ban jaati hai। yeh pavitrata aur apvitrata ka kaaran kya hota hai? smriti। smriti hai ki yeh devi hai; to yeh smriti drishti aur vritti ko pavitra banaati hai। aur smriti hai ki yeh female hai; to woh smriti vritti aur drishti apvitrata ki taraph khainchati hai। vahaan roop ko dekhenge aur vahaan roohaaniyat ko dekhenge। aisa past ka anubhav to hoga na। vartamaan bhi percentage mein hai। lekin isko mitaane ke liye kabhi bhi kahaan bhi dekhte ho, kisse bhi bolte ho to smriti mein kya rakho? aatma samajhna, woh to hui first stage। lekin karma mein aate, samparka mein aate, sambandh mein aate yahi smriti rakho ki yeh sabhi jad chitron ki chaitanya devi va devtaaon ke roop hain। to devi ka roop smriti mein aane se jaise jad chitron mein kabhi sankalp maatra bhi apvitrata va deh ka attraction nahin hota hai, aise hi chaitanya roop mein bhi yeh smriti rakhne se sankalp mein bhi yeh complain nahin rahegi aur complete ho jaayenge। samjha? yeh hain vartamaan purooshaarthiyon ki complain ke oopar complete banne ki yuktiyaan।

achha bhattheevaale apni unnati kar rahe hain। speed bhi teevra hai? aise nahin ki samaapti ke baad neeche utarte speed kam ho jaaye। aisa hi purooshaartha kar rahe ho na। achha।